الجمعة، 30 مارس 2007

حكاية حب - 1 من 2

السلام عليكم و رحمة الله ازيكم يا جماعة الخير النهاردة الجمعة و كل عام و انتم بخير ماهو عيد بقا خلينا نفرح شوية - الجمعة يوم حلو أوي صحيح هو في ماناساس الشغل هنا الجمعة يوم شغل عادي و بيعتبروه اخر الاسبوع و بيسكرو فيه و العياذ بالله اخر الليل لكن برضو هو يوم جميل و في نظري اجمل ايام الاسبوع و مش مهم حثالة الناس بيعملو فيه ايه لان برضو احسن الناس بيعملو فيه ايه و ايه واييييييييييييييييييييييييييييييييييه - انت مين يا؟ وفي الاخر اليوم يوم على الجميع هو هو الجمعة في كل انحاء العالم بس مين يفهم و يقدر طيب أنا حتكلم عن ايه في البوست ده؟ انا ححكي حكاية واحد صاحبي بأسلوبي أنا - واحت تاني غير حماتة حبيبي بسم الله نبدأ --------- تحبو الاول عربي شبه فصيح و لا عامي؟ خلينا في العامي احسن المرة دي :) --------- جرس المنبه فضل يرن و يرن ويرن - مالك يا عم ايه الازعاج ده؟ المهم قام طفاه و كمل نوووووم شوية و بيرن تاني - الله بقا - دانت مسقتصدني؟ ايه الحكاية؟ دانا جايبك مخصوص من النوع اللي بيرن مرة واحدة بس و مش بيرن تاني لما بنطفيه زي المنبهات الغلسة - اوووبببباااا اتاريه قام طفاه في الحلم و كمل نومه - في الحلم برضو يبقى لسه بيرن من ساعتها؟ يالهوييييي قوم بينا نشوف الساعة كام؟ اخص الساعة طلعت 9 و نص صباحا طيب هي المحاضرة من كام؟ اخص تاني النهاردة السبت ايه الرعب اللي انا فيه ده خليني يا عم انام شوية النهاردة اجازة وراح متكلفت في الغطا أو جزيرة القطن على رأي صديقتنا العزيزة و خلع في النوم شوية و اخ ياني النوم طار الله ينتقم منك يا منبه الندامة يعني جاي تصحيني يوم السبت الله يحرقك المهم قام راح عامله كوباية نستافيه (عشان مايطالبوش بنسبة من الاعلانات) و قعد يتفرج من الشباك على التلج و هو بينزل - عظيمة والله اجهزة التكييف المركزي دي بتخلي الجو حلو طول اليوم شتا أو صيف - طبعا الناس بردانة معانا دلوقتي من سيرة التلج بس أطمنكم هنا في زيوريخ - سويسرا - الجو كله لطيف و تلج حلو كده تحت الصفر طول الشتا عادي يعني - وأراهن برضو ان عند حبيبي جروم في ماناساس البلد الجو برضو طول الشتا حلو و متلج عالطول كده - يا ساتر يا رب معرفوش يا جماعة انا ماليش دعوة المهم قعد يسرح في التفكير ماهي مصر كان مالها يعني؟ وكان ايه اللي جابرنا على كده؟ لا برضو الماجستير مهم و زيوريخ مدينة جميلة و سويسراالدراسة فيها رخيصة و حلوة و مفيش بهدلة أمريكا و جروم المسكين - يا عم سيبني في حالي و ركز في قصتك المهم يعني مصر برضو حلوة - هانت اهي كلها كام شهر و انزل - صحيح انا مكملتش سنة لسه بس برضو تستاهل ننزلها بسرعة على الاقل مش عايز استنى سنة كاملة زي جروم عشان انزل - والله لو ما سيبتني في حالي لألبك على دماغك - خلاص خلاص متزوقش طيب صحيح يا ترى هي عاملة ايه دلوقتي؟ (أكيد مش مصر يعني) أي أي ليه السيرة دي بس ماكنا حلوين و طيبين و زي الفل لا بس فعلا أنا حاسس اني مشتاق ليها - اه لو اسمع صوتها دلوقتي و لا اكلمها - من كام يوم حلمت بيها و كنت حموت والله - وحشتني فعلا يعني لا مليش حق والله يعني - ماهي الغلطة غلطتي من البداية وقعد يا عيني الولد يسرح و يسرح و يسرح (أحمد و منى عشان الأنونيموسيتي) السلام عليكم و رحمة الله - ازيك يا منى؟ عاملة ايه؟ جايبالنا ايه جديد النهاردة؟ كان بيقولها و قلبه عمال يتنفض جوا سدره و يتشال و يتحط و يتجاب يمين و شمال و فوق و تحت و في كل الزوايا بس ما شاء الله عليه حافظ على رباطة الجأش (يعني ايه جأش؟) وصدره المتماسك اللي لا طالع و لا نازل و لا حاجة خالص ثابت في مكانه تمام و هو بيقول الكلام راحت هي لفت راسها وبصاله؟ وقالتله اه؟ احمد؟ وعليكم السلام و الرحمة - ازيك عامل ايه؟ انا كويسة الحمدلله - يعني النهاردة مفيش جديد أوي - حنشوف حنعمل ايه في اجتماعات الجمعية الخيرية و خلاص - النهاردة مفيش شغل كتير - وراحت مبتسمة ابستامة القمر و الشمس و كل النجوم و الكواكب - ده تعبيري أنا - ولفت وشها الناحية التانية كملت اللي بتعمله أبقى كداب بجد لو قلت اني فهمت حاجة من اللي قالته - أنا مكنتش مركز في كلامها خالص - أنا ركزت في حاجة تانية - ركزت في جمالها - أنا مش بصبص لا سمح الله و الله أنا كنت ببص في الأرض طول الوقت أنا متربي برضو يعني حتى أسألو جروووم ولا اطلع برا انت مش وش نعمة - مش قولتلك متجيبشي سيرتي تاني - طيب خلاص خلاص انا اسف ابوس ايدك كمل الحكاية طيب خلاص عفوت عنك بس من غير بوس و قرف حكمل يا سيدي المهم يا اخواني انا فعلا كنت سرحان في جمالها - مش جمال الشكل مع انها في نظر ناس كتير جميلة شوية بس عادي يعني زي كل البنات :) -لكن لا أنا بتكلم عن جمال الروح - روحها كان فيها حاجة لله في لله - أنا مش عارف ياض يا احمد انت بتعمل في نفسك كده ليه سبحان الله كلها على بعضها عادية بس لما تتكلم معاها و تشوف روحها و هي بتعامل الناس و بتتكلم معاهم و كده يبني ايه العظمة دي - سبحان الخلاق - لسه في ناس في الدنيا بالروح دي و الجمال ده؟ لا والله لن ممكن أبدا - لا ممكن بدل مالبك - خلاص ممكن يا سيدي و تاج راسي صحيح ماهي قدامي أهي يعني أنا مش عارف ليه والله بقيت أستنظر اجتماعات الجمعية دي كل سبت كده - أكيد عشان أملا قلبي من فيض روحها - شوفتو الحتة الجامدة دي - فعلا لازم بنت زي دي من النوع اللي روحها الجميلة دي بتبهت عليك و بتنسى الصدأ اللي كان اعتلى روحك من زمان - انت حتة صنفرة لقلبي يا جميلتي - معلش أصل الواد بشمهندس مالها الصنفرة يا جروم؟ ياض اسكت أنا اشتريت شبشب جديد خد بالك حشبشبلك بيه - طيب طيب متزوقش المهم قولت في عقل بالي والله يا أحمد مانت مفوت الدرة المكنونة دي - بجد دي لقطة انت عايز ايه تاني؟ يعني جمال و الحمدلله منه كتير - روووح آآآآآآآآاه من الرووووووح - طيب تعليم؟ اه ممتازة و زي الفل - طيب مستوى اجتماعي (أصل أهلي إنفين أوي أوي أوي) وماله برضو صحيح هي مش شكلها غنية أوي بس وماله يبقى احسن واحسن فرصتي تبقى كويسة و أنا كده ملو هدومي :) يبقى على بركة الله - طيب بسرعة كده؟ أه خير البر عاجله يبقى أكلم البنت و نشوف منى ممكن أقولك حاجة - اه بسرعة يا أحمد عشان أنا مستعجلة عايزة ألحق أروح وانت عارف انا ساكنة في العاشر من رمضان و المواصلات و الطريق بقا (اه العاشر دي تمام أوي) لو جبت أهلي و جينا البيت زرناكم و اتقدمتلك - توافقي؟ البنت العكروتة على رأي برايد كانت متوقعة حاجة زي كده - يا حلاوة الميزان يا رشيدي يا ولاد - دي طلعت هي كمان قلبها فيه بتاع من نفس البتاع اللي في قلبي - يا حلاوة النخيل كمان (يللا بقا ماهو موسم الحلاوة - اللي اداك يدينا يا سيدي)

وابتسامة خجولة و كلها كواكب على رأي حبيبي جرووووم (حفوتله المرة دي بس عشان الموقف العاتفي)

ممممم أيوة يا أحمد حوافق - سلااااااااااااااااااااااااااااااااام :)) وجريت ركبت ال سي تي ايه (بتفكرني بال CIA اللي هي Cairo International Airport) هاها حتة على الماشي وهو واقف مكانه نص ساعة زي العبيط - أنا مقولتش عبيط أنا قولت زي العبيط يعني ايه؟ - نعم ؟ مش فاهم؟ فضلت أقول لنفسي كده و أنا مش واخد بالي انها وافقت لسه - بيني و بينكم أنا متوقعتش ويوميها روحت البيت و نمت في غرفتي سعيد جدا جدا لدرجة ان بابا بيقولي يبني ايه كل السعادة دي - أصلي يا بابا اليوم سعيد أيوة يبني سعيد ليه؟ اه يا بابا سعيد اه

أيوة يعني ليه؟ آه يا بابا سعيد آه

الواد اتجنن يا خواتي - اه يا عمو اتجنن اتجنن آه هاهاههاا أسيبكم لحد هنا و نكمل المرة الجاية تحياتي من ماناساس البلد فضفضة: ناس صاحية يوم الجمعة و ناس يوم الخميس نيمانة ناس بتلعب كورة بعد الفجر و ناس في بيوتها كسلانة ناس ليها في النشاط وناس ف العسل غرقانــة

هناك 16 تعليقًا:

Rivendell** يقول...

اولا الطقطوقة بتاعت المرة دي عجبتني موووووووت


اما بالنسبة لأحمد - عشان التموين يعني - فوالله صعب عليا وهو واقف النص ساعة مش مصدق


يا عسللللل


خلتني ضحكت وانا مش على بالي ضحك خالص


لأ جامدة


بس بلاش موضوع الشبشبة دا

Noony يقول...

أنا مكنتش عارفة أقرأ من كتر الضحك...بجد أسلوبك تحفة
وكنت تسيب أحمد يبوح بمكنونه شوية لازم يعني تقف فوق راسه وتقوله شبشب وكلام؟...سيب الرجل يحكي...قال يعني هو اللي كان بيحكي
:)

ياللا يرجع بسرعة البنت موافقة اهي....ربنا يتمم لهم على خير..وعقبال الراوي :) :)

مستنييين الباقي...أساليب الإثارة التشويق بتاعتك

سلامات

The Groom يقول...


رافينديل بما ان الطقطوقة دي عجبتك فهي هدية ليكي :)

معلشي ميصعبش عليكي كتير هو بخير و كويس دلوقتي الحمدلله

نعمل ايه الشباشب احيانا مهمة عشان الحماسة و كده و عشان ناس تتعلم الادب


شكرا على زيارتك العزيزة

------

هاهاها الله يحظك يا نوني شكرا على الكومينت

نعمل ايه كان لازم نعلمه الادب عشان بيجيب سيرتي

انا قولتله برضو يرجع و بسرعة اوي حيرجع

حالا يا سيدتي انا جاي في السكة اهو

شكرا ليكي

تحياتي من ماناساس البلد

يعقــــوب .... يقول...

أحسن حاجة الواحد يقرا البوستات بتاعتك قبل النوم عشان تزيل الاكتئاب و تخفف الضغط

غير معرف يقول...

اسلوووووووووووووبك جامممددددد مووووووووووت.....
انا عمال اضحك......:):):):):):)

رنا يباركلو يا رب و ادعيلنا لما نبقى في نفس الموقف البنت ترد نفس الرد ده و النبي وحياة ولادك...:):):)

Anima يقول...

أسلوبك إن دل على شيء فإنه يدل علو أنك مصاب بانفصام الشخصية، إبقى مر عندي العيادة

يابني إحنا كمان عندنا نهاية الأسبوع بتكون السبت و الأحد عطلة يعني

أما صاحبك الله يوفقه، و يتجوزه يارببببببببببب

shermen يقول...

إمممممممممممم ايه الحلاوة دي
يا حلاوة الرشيدي الميزان
بس عشان خاطري بلاش النهايات التعيسة خليها فرايحي عارف هتصدم أوي لو كانوا سابوا بعض
معلش أصلي بتأثر بالأفلام العربي بسرعة بجد بحبها موت بس مش بحب نهايتها يا لبطل يموت يا البطلة تموت يا يفترقوا حاجه قرف بعيد عنك
ياريت تجوزهم ف النهاية
هبقى فرحانه جدا
وهزغر.....لولولولولو لي كمان
أبسط يا عم
معئني مش بعرف
أزغرد
بس هحاول
سلام

emos يقول...

الجملتيين اللى فى الاخر دول اللى لونهم اخضر بيقولولى اتخانقى يا ايموس
انت بتعلقنا يابنى؟
متكمل يا بابا
كمل يا ضنايا
و اية الفوت اللى انت عاملة دة يترض علية ازاى يعنى بيبقى على حسب حجات كتير اوى
مش هصوت بس
نرفزتونىىىىىىىىىىىىىىى
نصيحة لأحمد
متعرفش جروم تانى

ياسمين يقول...
أزال المؤلف هذا التعليق.
ياسمين يقول...

انا جيت امسى واقول كل سنة وانت طيب

تخاريف يقول...

يابنى كنت سيب الواد يتكلم براحته..لازم يعنى تخنق عليه..:D
لا بس عايزين نعرف حصل ايه بعد كده...

Esmeralda يقول...

سا الخير يا ريس
كل سنه و انت طيب , ها عندوكو حلاوة فى مانساس و لا لأ ؟؟

البوست لذيذ اوى و عجبنى

يلا يا سيدى انجز بالباقى و يا ريت على مرة و احده و لا ناوى تعمل فيها اسامه انور عكاشة ؟؟؟

يلا طابت ليلتك

The Groom يقول...


أي خدمة يا يعقوب باشا

تسلم يا مان و كل سنة و انت طيب
-----

ارتعاشة

امين يا رب - تسلم و كل سنة و انت طيب

يا رب ياخويا يا رب
-----

هاهاهاهاها عليكي يا أنيما انت بتربي زبون؟ انا يبنتي جاهز انا عندي كل الامراض النفسية الحمدلله يعني زبون تمام

اه انتم كمان عطلة نهاية الاسبوع عندكم امريكاني؟ اومال ايه بقا مش امريكاني؟

امين يارب
كل سنة و انت طيبة
------

والله زمان يا شريمين انت فين من زمان

والله النهاية انت وحظك بقا حنتابع سوا
;)

بتعرفي تزغرطي؟ ممكن تيجي هنا تعملي دهب في الافراح لو بتعرفي بجد

تسلمي و كل سنة و انت طيبة

------

هاهاها انت مالك روحك في أنفك يا ايموس

ليه بس

اه بعلقكم وماله؟ - الفوت ده عشان تقولي رايك في المهر عموما بس

احمد بيفكر جديا يقاطعني هاهاها

كل سنة و انت طيبة
------

ياسمييييييييييييين

أنت مسحتي كومينتك ليه بس

على فكرة تعليقك وهمي جدا و عجبني كمان و عمري عمري مازعل من تعليقاتك مهما كان يا ياسمين و الله ازعل منك لو قلتي كده تاني

ربنا يحفظك يا رب خدي بالك من نفسك و كل سنة و انت طيبة

------

دكتورة تخاريف

خطوة عزيزة

اكيد انا جاي في البوست اهو

كل سنة و انت طيبة
------

ايمان ازميرالدا

سالخير يا سيدتي

اه عندنا حلاوة في المحلات العربي

شكرا على الاطراء على البوست

ان شاء الله هي مرة واحدة بس انا مليش نفس متخافيش

طابت ليلتك انت كمان و كل سنة و انت طيبة

تحياتي لكم جميعا من ماناساس البلد

سلام عليكم

طهقان يقول...

ممكن اسألك سؤال

انت عايز تتجوز ليه...

يابني خد بنصيحتي

بلاش تهور

غير معرف يقول...

هههههههه مسخرة والله

كل سنه وانت طيب

Shower-Mirror يقول...

حبيب قلبى ....


انا تقريبا اول مره اقرا قصه بالاسلوب ده ... الحوار بينك و بين صاحب القصه جامد موت ... و القصه نفسها حلوه و شدتنى ... شدتنى من دراعى حتى شوف :) :)

براوه عليك يا واد و الله انا مستمتع ....


اخلص بقى و قول النهايه انا مراتى و الولاد قربوا ييجوا من مصر مش هابقى فاضيلكوا .........