الأربعاء، 28 مارس 2007

زغزغة عالماشي 2

حبايبي الحلوين السلام عليكم و رحمة الله و بركاته و تحياتي من ماناساس البلد أنا استجابة لعمتنا المعلمة الكبيرة ايموس و لطلب الصديقة العزيزة رافينديل انا حتفضل عليكم بشوية زغزغة على الماشي لحد ما ربنا يفرجها قريب أوي ببوست جديد أول حاجة حابب أشكر الجميع على تعليقاتهم الجميلة وبجد بجد بجد والله أثرت فيا جدا سواء الأسلوب عجبهم و لا لأ بس أنا كنت مستني ياسمين و تعليقها على البوست ده و اهو تعليقها جيه اهو الحمدلله و كمان انا كنت مستني افكر في البوست الجديد و قولت في سري أشغلكم شوية في البوست ده بالتصويت ونتيجته تاني حاجة لو حد يعرف حاجة عن برايد يبقى يقولي :) أما بقا حوار التصويت: 26 انسان ظريف و لطيف و خفيف و جميل (هذه الالفاظ كلها تشمل البنات برضو يعني حاجة كده جينيرال عشان المعلمين ميزعلوش) راحو مصوتين عندي و تقريبا لموهم في البوكس لان مازادوش عن 26 من يومين الحلوين دولا منهم مفيش ولا واحد خالص بيقول ان الفرق المناسب بين الراجل و زوجته يكون اكبر من 5 سنين أسف والله يابابا كان من نفسنا نخدم بس الظاهر ان محدش عاجبه راي الكبار اليومين دولا كله متمرد يابا دي عالم انا عارفها اسألني أنا بس ولا يهمك انا وراك وراك يا أبي :) دي فعلا حاجة تلفت النظر أما بقا الخمسة اللي بحييهم والله و بحبهم أوي في الله (بحب الجميع برضو بس دولا أكتر P:) اللي قالو تكون العروسة قده أو أكبر مفيش مشكلة - الناس دي بتفهم صح وتعتقد ان السن مش حيفرق معاهم خالص يعني اصغر منها أو قدها مش حتفرق معاها في حاجة لان طالما في حب و اقتناع يبقى خلاص الناس بقا اللي بتمثل التريند الجديد أو الاتجاه الجديد للحاجة الساقعة - ساقعة مين؟ انت مين يا ساقع؟ الناس الحلوة دي بتاعت اليومين دولا الشباب الويريش دولا يبقو 15 واحد بتوع المرة اللي فاتت تقريبا ومعاهم سوسة و لا حاجة بيقولو ان الفرق لازم يكون من 3 الى 5 سنين - الناس دي بتفهم بس محبكاها شوية و كده وبتعقد الأمور و هما احد اسباب العنوسة هه بس ومحدش يقاطعني و الي مش عاجبه كلامي يقولي طز في وشك وانا مش حزعل بالعكس حقوله الله يسامحك :) الفرق ده مناسب شوية بس فيه عيب خطير لو انا 24 مش حابقى مستريح أوي مع بنت 21 او 19 لازم تكون قريبة مني شوية اكتر عشان يكون في تفاهم بيننا يعني انا مش عايز اخد بنت اربيها من تاني يعني من 1 الى 3 سنين احسن و انا برضه بقول مش عيب ان يكونو قد بعض أو بينهم فرق لحد 3 سنين فوق أو تحت يعني بلاس أور مايناس - مين بلاص ده؟ عيب يا واد اختشي - حاضر يا حمو المهم انا رأيي مع ال 6 الجمال الحلوين اللي مسكو العصاية من النص و قالو الفرق يكون من 1-3 سنين ومفيش مانع عندي في نفس الوقت من ان تكون البنت اكبر او قد الولد لأن العبرة بالشخصية و الدين و الحب :) واللي حيقولي حبك برص و بتاع حقوله روح حديقة الحيوانات و حب زي مانت عايز لكن أنا لن أتنازل عن حقي في قول رأيي بمنتهى الحرية في مدونتي و على المتضرر ضرب دماغه في الحيط وفي مصر الحائط أتخن من هنا من ماناساس طيب و اللي حيهاجمنا بأن البنت تكون قده أو أكبر منه حقوله و ماله؟ الرسول قدوة (عليه الصلاة و السلام - صلو عليه يا بخلاء) و الناس الظريفة بتاعت الرسول غير (عليه الصلاة و السلام) وظروفه غير و دي خصائص بس ليه لا انا شايف لا وألف لا لو لم يكن هو قدوتنا فمن؟ وبعدين الرسول عليه الصلاة و السلام تزوجها قبل الدعوة و البعثة يعني قبل أن يكون نبيا و لم يعارض أحد في مجتمعه العربي القبلي المتعصب هذه الزيجة و لم يلمه أحد وأقتبس هنا كلمات تقول: "وإذا كان تزوج بعد ذلك من السيدة خديجة وهى أكبر منه سنا بخمس عشرة سنة.. وظل مكتفيا بها زوجة وحيدة حتى بعد أن تجاوزت الستين.. " وبعدين لو بيحبها حقيقي و بينهم تفاهم حيعمل زي الرسول صلى الله عليه و سلم و حيفضل متمسك بيها لأخر لحظة - وماعتقدشي الشباب الكاوركية بتوع اليومين دولا وانا اولهم الكاوركي الكبير حعرف اتجوز تاني أساس على مراتي هاهاها يعني دي حاجة المفروض انها تشجع اكتر وبنقول تاني عشان العالم الفهيمة ان مش ده الاساس لكن مش عيب و لا حرام لو حصل الجواز ده وبالعكس لو بيحبو بعض يبقى فل الفل وتمام و نشجعهم ان شاء الله أنا عارف انه تقريبا الموضوع ده شبه مكرر و اتخانقنا فيه في الزغزوغة اللي فاتت و التعليقات عليها بس أنا كنت حابب أعلق شوية شماعات على التصويت و نتيجته صحيح أنا عايز أقولكم حاجة اللي مش عاجبه الزغزوغة دي يبقى ينفض ليها و لنفسه و للمدونة و يسمعنا حسه في التصويت الجديد و يخلع بدري بدري و يسيبني أركز في البوست الجاية أما بقا اللي حيشرفني بتعليق أو اتنين أو يتحفني على رأي واحد صاحبي بتعليق أو اتنين ;) فأنا جاهز تماما للرد عليه و تهنئته على الخطوة الموفقة :) وكمان قولولي رأيكم في الأغنية الجديدة بمناسبة التصويتات و سمعنا صوتك تصبحو على خير من ماناساس البلد :) فضفضة: ناس ليها في الصويت و ناس م الخنقة مبحوحة ناس بتكتب م الخنقة و ناس كتاباتها ملووحة ناس في السيما بتحب و ناس بتتفرج على بوحة ناس بتحب نفسيها و ناس م الحب مدبوحة

هناك 15 تعليقًا:

أميرة البلطجية يقول...

اهلا يا عريس
انا شايفة ان فرق السن مش مشكلة هو اد ايه ولا مشكلة من الاكبر..المهم الاتنين يكونوا داخلين دماغ بعض
تحياتي

يعقــــوب .... يقول...

يا باشا فرق السن ده مسأله نسبية...يعني أنا مثلا لما جيت اتجوز كان عندي بتاع 25 سنه أكيد فرق السن كان مهم بالنسبالي انه يكون عى الأقل 5 سنين أصل لو كان اكتر كان هيكون صعب طبعا..و في ناس الفي التلاتينات أو اواخر العسرينان ممكن يكون فرق السن بالنسبلهم عادي انه يكون اكتر من 5 6 7 ,,يعني بتفرق حسب سن كل واحد في فترة جوازه

Shower-Mirror يقول...

انا بس جاى اسلم عليك ... احنا اتكلمنا فى الموضوع ده كتير قبل كده .

وحشتنى يا مضروب

:)

shermen يقول...

حلوة جدا الاغنية دي يا جروم بجد انا أصلا بحب أسمع علي الحجار
اما موضوع فرق السن ده احنا قتلنا الموضوع ده بقى فكر ف الجديد
---------------
صحيح ليا طلب صغنن أد كدهوه
ممكن تغير اللينك بتاع مش عاوزه اتجوز ده اللي كاتبه عندك لإسم حارة العوانس بليززز
عشان خاطري

Noony يقول...

أنا مش هتكلم في فرق السن...أنا عايزة أقولك إني أمتنع عن التصويت الحالي..عشان دة تصويت مش موضوعي بالمرة..أنت بتتكلم من وجهة نظر العرسان مش العروسة..دة أولاً...أما ثانياً...من وجهة نظر العروسة، فالكلام دة بين الأهالي والكبار بينهم وبين بعض...يعني محدش ينفع يتكلم عن الموضوع دة غير الرجال فقط لا غير
ثالثاً دة موضوع نسبي
رابعاً اللي هو أولاً تاني...أنا أمتنع عن التصويت بشدة وضراوة

وأبقوا تعالوا زورونا
أند دونت بي ليت
:)

صوت فيروز يقول...

دستور يا سيدنا سلامات يااللي هنا
احب اقولك اسلوبك لذيذ و شكرا ليك انك عبرتني و زرت المدونه المتواضعه جدا بتاعتي
و بالنسبه للفرق ده شئ نسبي جدا و ماحدش يحط ليه قوانين و يعمل نفسه ناصح و فلحوس , لان الارتباط ده ليه حكمة غريبه لحد دلوقتي مش قادره افهمها بس بجد الموضوع ده بيبقي في ايد القدر بشكل كبير
اما بالنسبه ليك انت عندي تعليق صغير عليك
انت ليه ضايع منك حاجه كده
كل ما اروح مدونه و القيك هناك
بحس انك بتضحك بس عنيك مش فرحانه
ايه اللي ضايع اوي كده منك و بتدور عليه
يمكن احساسي غلط ههههههه و يمكن انا اللي عندي حاجه ضايعه مني و بعمل نوع من انواع الاسقاط
و اخيرا و ليس اخرا اللهم صلي علي محمد و اعف بنات و شباب المسلمين قولوا امين

غير معرف يقول...

ايوه يا ريس انا معاك....قدّه..اصغر سنه لا تلاته...قدّه ديه ممكن تكون اكر شر ولا اتنين مهو مش هيلقي واحده مولوده على السرير اللي جنبيه....في نفس اليوم...
اهني و ربنا يحنن قلوب ابهتنا علينا :'(

Rivendell** يقول...

شكرا شكرا على الاستجابة السريعة يا جرووم

وبالنسبة للاغنية فهي اغنية جامدة جدا وموجعة جدا جدا جدا

بالنسبة لموضوع فرق السن فانا شايفة ان مافيش حاجةاسمها "انسب سن ايه" لأن في اختلاف بين كل بني آدم والتاني والفروق الفردية دي هي اللي بتحدد
في بنت عندها 19 سنة ودماغها كبيرة وتوزن بلد وفي بنت عندها 25 سنة ولسه عايزة تقرض مع العيال في الشارع
الفيصل في دا كله الارتياح بين الاتنين واذا كان في كليك حصل بينهم واللا لأ
وطبعا هي حرية شخصية في الآخر وكل واحد بيحب ينام على الجنب اللي يريحه
واللا ايه

باركلي لاني طلعت الرخصة وعاملة فرح على البلوج عندي

The Groom يقول...


أهلا أهلا بالأمراء و الأميرات

ازيك يا ملكة؟ و لا انت أميرة عالطول؟

شكرا على رأيي اللي أنت قولتيه :)

صح لسانك
-------

يعوقب باشا

اه انت شكلك مش فاكر بالظبط كان عندك كام سنة؟ ليه هو انت قديم أوي كده؟ :)

صح أن أكتر من 5 سنين كتير بس في الاخر يا مان كل واحد بينام على الجنب اللي بيريحه صح؟

شكرا على زيارتك و تعليقك الوهمي ده

-----

الحاج شاور أهلا أهلا أهلا

يا مرحبا ماناساس البلد كلها نورت

شكرا لزيارتك العزيزة و تسلم يا مان

وانت كمان وحشتني والله

-----

شيرمين ..... ميغسي

صحيح الموضوع قتل أنا قلت بس أعلن نتيجة التصويت

اللينك اتغير أهو يا ستي أنت تؤمري بس

حارة العوانس؟ يا ساتر يا رب :(

ليه بس الكلمة دي وحشة والله

ربنا يصلح الحال يا رب

يعم علي اسكت ده وقتك دلوقتي انت جاي تكمل عليا؟ :(

شكرا يا شيرمين وحشنا تعليقاتك

-----

لا يا نوني مالكيش حق خالص والله خالص

أولا بالشرع المهر من حق العروسة و هي اللي المفروض تحدده و لو تركت الموضوع ده للرجالة يبقى لازم على الأقل تكون موافقة على اللي بيحددوه يعني مش تسيبهم يقطعو في الواد و يفرضو عليها مهر ممكن هي عايزة أقل أو أكتر منه

يعني من حقك أنت يا عبيطة
:)

لا تمتنعي عن التصويت دي سلبية - أجيبلك أبيتاف تبهدلك؟

أنا زرتك في مدونتك و سبتلك كومينت وهمي كمان :)

شكرا على امتناعك عن التصويت و خطوتك العزيزة :(

------

أهلا أهلا مين؟ الحاجة فيروز بذاتها هنا؟ اخ نسيت انت صوتها بس

صحيح صوتها احسن منها

ازيك يا سيدتي؟

شكرا على الاطراء و المجاملة الرقيقة

صحيح الزواج حكمة كبيرة أوي و هي أحد غايات الخلق بعد عبادة الله عز و جل

صحيح والله يا صوت فيروز أنا فعلا بدور على حاجة ضايعة مني

بس أنا حتكسف أقولها على الملأ كده

خليها في بوست لوحديها بس ابقي فكريني

شكرا على احساسك بيا من زمان محدش حس بيا والوحيدة اللي ممكن تحس بيا في مصر دلوقتي :(

اوعي تكوني بس بتسقطي عليا وجت على الجرح

اللهم صل عليه و سلم

امييييييييييييين

شكرا :)

-------

ارتعاشة حبيبي

اسف يا مان كل شوية انساك والله لكن انت في قلبي من جوا

بقولك لو فضلت في المعدل ده يبقى اكتب فرانكو اراب و امرنا الى الله نقرالك لأنك العربي بتاعك احسن :)

بس ولو كمل كتابة عربي يا مان انت ظريف أوي والله و بحب اسمع رأيك دايما

أنت في سنة كام طب صحيح؟

امين يا رب

شكرا على زيارتك
------

اوووه رافينديل العزيزة تاني

أهلا أهلا

عفوا عفوا

صحيح الأغنية جت كملت عليا بالليل و نيمتني متنكد حبتين

أنت فين يا ايموس

لكن كلامك صحيح على موضوع السن و رأيي من رأيك و احنا قلنا الدين و الاخلاق و التفاهم و انت لخصتيها في كليك

صحيح خط اتصالات بكام دلوقتي؟

صحيح مبروك تاني الف الف مبروك على الرخصة شوفي لو سقطتي كانو قالولك من الأول انا كنت عارف انك بطلة و حتطلعيها

وجايلك في البلوج النهاردة ان شاء الله عالطول

ألف مبروك تاني و الله فرحتلك كده تبقي مستقلة و لا حد يذلك في مشوار زي ماكنت بذا اخواتي

ربنا ما يجيب ذل لحد يا رب

شكرا على الزيارة

------

والله شرفتوني و ظبتو يومي على الصبح

شكرا لكم

تخاريف يقول...

أنا صوت...هناك يعنى...
الفضفضه اللى ف اخر البوست ده...فظيييييييييييييعه

جامده جدا...

The Groom يقول...


دكتورة تخاريف

تقبلي أحرالتعازي

ربنا يصلح حالنا و حالك يا رب

شكرا على الزيارة العزيزة

نورتيني بالليل :)


أي خدمة و في أي وقت قوليلي وأنا أفضفضلك دايما

شكرا

سلااااام من ماناساس البلد

يعقــوب أو فانتــي يقول...

عبد الله ! سؤال واحد بس بعد إذنك ! انتوا عمالين تلتوا و تعجنوا ف الموضوع ده كتير ليه؟؟؟؟ أنت نفسك قلت ان الواحد لما يحب مش حتفرق معاه أي حاجة، طب ليه بقي الكلام الكتير؟ ما هو حتي لو الناس هنا المفروض انها بتدي رأيها، ساعة لما واحد أو واحدة فيهم يقابلوا نصيبهم ساعتها حيتجوزوا حتي لو الفرق كان عكس ما كانوا مقررين انه يكون !!! شفلك وحياة والدك يابني حاجة تانية تسف فيها، كان معاك الفنتي

الوردة السوداء يقول...

هو فعلا الموضوع مكرر
بس هو مهما اتكلمنا فيه النتيجة واحد

سيكولوجية الراجل هى هى
والبنت برده مش هتتغير
لازم الراجل يحس انو اكبر من البنت عشان يتميز عنها فى التفكيير
ولازم البنت تحس الاحتواء

انا شايفة ان مفيش عمر معين للحب

انت ممكن تقع فى حب واحدة انت بنتك يعنى
زى مابتقول انت تربيها
وممكن تحب واحدة اكبر منك

انا عن نفسى افضل ان الراجل
يكون اكبر بمعدل من 4 ل8 سنين

موضوع حلو

Anima يقول...

يابني أنا قلت قبل كده إنه فرق السن مش مهم

ايه ده يا ول إنت بتحب واحدة أكبر منك ولا ايه؟؟؟؟؟؟؟؟؟؟هههههه

يعقــــوب .... يقول...

يابن أنا مش من زمان ولا حاجة ده انا تقريبا لسة مكمل سنة جواز من كام يوم...بس انا أصلي مليش في التواريخ و الحاجات ده.حتى تاريخ جوازي مفتكروش إلا لو بسيط في الدبلة.حتى يوم جوازي مفتكرتوش و كان شكلي منيل بستين نيلة