السبت، ١٠ مارس ٢٠٠٧

التلاتيــــــن

صباح الخييييييييييييييييييييييييييير

برضو بتوقيت مناساس البلد - فيرجينيا - يو اس ايييييييييييه ها؟ بتقول ايه؟ اطلع برا تاااااااني آل أغير التوقيت آل بقولكم ايه انا مش فاضي للعب العيال ده - توقيت ماناساس البلد يبقى ماناساس البلد و بس واوعى حد يتكلم المهم انا اسف لاخوانا الي مالهومشي ذنب في الدخلة الشمال دي بس اعمل ايه كل شوية ينفرزوني و انا متنرفز خلقة من نفسي دانا حتى و انا صغير كنت مولود بسنان و كل الممرضات و الدكاترة و اخواتي و ماما و بابا وعيلتي كلها يا ما خدو مني عض و دراعاتهم ورمت اه نعمل ايه بس يعني ماجربشي سناني الجديدة؟ يرضيكم؟ برضو ما علينا - النهاردة انا فايق على غير العادة يمكن عشان السبت و أول مرة من زمن طويل اصحى بدري يوم السبت- طبعا بتوقيت ايه؟ ايوة كده شطار الموضوع بتاعي في البوست دي هو التلاتـــــين لا مش التلاتين بتاع فيصل و لا كفر التلاتين اللي مش عارف فين لا مش دولا روحو اقروا مدونة برايد و انت تعرفو تلاتين ايه بس طيب ايه اللي بيخلي المجتمع يطلق هذا اللقب القميء على العانـــ.... كان ولد ولا بنت؟ طبعا انا مش حكمل الكلمة متعمدا لان اولا انا بكره الكلمة دي ثانيا دي بتطلق على الرجالة كمان هي يكثر استعمالها في الاوساط الحريمي بس برضو الرجالة كمان بيقولوها كتير فيما بينهم و لا ايه يا صاحبي؟ اللقب ده حاجة كده متخلفة حعملها بوست لوحديها عشان اتخانق فيها براحتي وانزل ضرب في اللي يرد عليا و أبعت اجيب طقم قباقيب جديدة ماركة شجرة الدر - لكن انا دلوقتي حتكلم على السن بتاع العنـــ اشمعنى بيكون 30؟ التلاتين ده سن جميل جدا - انا واحد من الناس مقتنع جدا ان التلاتين ده سن النضج و الانسان فيه في أوج عطاءه وهو لسه كمان مقارب لمنتصف العمر اللي هو الاربعين و كفر الاربعين و روحو تاني ادرسو جغرافيا الانسان لما بيكون عنده تلاتين سنه و لسه متجوزشي؟ عادي ايه المشكلة؟ المتوسط في سن الجواز في اوروبا و الدول المتخلفة - ماعادا ماناساس البلد محدش يغلط فيها - بيكون حوالي من 30 الى 40 وده طبعا كبير علينا صحيح نسبة اللي بيتجوزوا في هذا السن في بلادنا عالية بعض الشيء (نوع من المواساة) لكن برضو مش أعلى من الدول التعبانة دي - في المقابل بقا لما تيجي تبص على العرب هنا كاتهم نيله في امريكا تلاقيهم بيجوزوا عيالهم بدري من اول مايوصلو سن 22 او 23 سنة خلاص تلاقيهم اتجوزوا - مش مصدقيني؟ طيب انا اعز اصاحبي هنا اللي اتعرفت عليهم كلهم اصغر مني بكام سنة و كلهم ما شاء الله يا متجوزين يا خاطبين وباقي على الحلو تكة طيب ليه في بلادنا - تحيا جمهورية الفراخ و الملوخية - المتوسط في سن الجواز يميل للارتفاع؟ احسن ما يكون واطي وعشان ميتقالشي عليه يا واطي أكيييييييد مش ده السبب - السبب طبعا البنات - وأنا بقولها بكل جرأة البنات يعني مسلا (اه بدأت اخبط في اللغة و مالكشي دعوة يا صبري -> مدرس العربي) البنات لما يكونو من 18 الى 24 يبدأو يتشرطو وهما طول عمرهم اساسا مطلعين عينينا احنا الرجالة (متستنوش كلام احسن من كده مني انا عندي 5 اخوات بنات) وطول النهار خناق و طلبات و دولا لسه مامتك و اخواتك طيب ولما يكبرو بقا ويجيلهم عرسان؟ هاهاها اتفرج على اللي بيحصل و اوعى وشك و احمد ربنا ألف مرة ان انت متقدمتش واتنيلت و حتخطب واحدة زي اختك لما البنت تطلب من الواد الهلفوت (قبل 28 او 29 سنة بيبقى هلفوت خصوصا عند الاباء) كل الطلبات دي وايشي مش عارف ايه و ايشي ايه و كله لسه في الاول وهو على البر قبل ما يغرق طيب الولد المسكين يعمل ايه؟ لو كان من بتوع العواطف و الرومانسية و الهوب و الغراميات اه الهوب و اللي مش عاجبه يطلع برا - لو كان من بتاع الكلام الفاضي ده يبقى غصب عنه حينخ - طيب و لو مش بتاع الكلام ده؟ حينفض للبنت طبعا والنتيجة؟ البنت عمالة تطفش العرسان كل يوم وأبوها عمال يطلع عينيهم و يكشرلهم و يطردهم وأمها عمالة تتريق عليهم و طبعا طنط حشرية كمان بتاخد عمولتها لحد ما احيانا حتى البنت بيتعملها سمعة انها بتطفش العرسان وانا طبعا عبيط و حتقدملها لاني بحب العند أوي هههههه يعني الخلاصة ان سن العنــ بيتحدد بكيف الولد او البنت - في الاخر الموضوع يا جماعة قسمة و نصيب و اللي نصيبه يكون وحيد حبتين من عمره خلاص يرضى و يشكر ربنا و يتفرج على الناس اللي اتجوزو بدري عملو ايه يعني؟ كل يوم خناقات و بتاع دانا حتى اليومين دولا مسلف الكنبة بتاعتي (بتتعمل سرير) لواحد صاحبي متجوز وطبعا كل بنت عارفة كويس ليه كده؟ وكل ولد عارف كويس انه لازم يعمل حساب المستقبل في كنبة ممتازة يعني جاست اين كييييس كيس مين؟ ما علينا - المهم انت او انت اللي بتحدد او بتحددي سن العنوسة - اوبس مين اللي قال الكلمة دي؟ انطق؟ قر واعترف؟ كيش كيش كيش وطاخ طاخ طاخ بريء يا بيه بريء طيب خلاص سماح المرادي بس المرة الجاية كلمتي لن ممكن تنزل الارض ابدا - حنفي - طيب خلاص معلشي لسه صاحي و مفطرتش - الانسان لو اعزف عن الزواج يبقى هو اللي بيحدد السن دي بنفسه يعني هي كل العملية لا تفقد الأمل أبدا و خلي أملك في ربنا كبير و متبطلشي تحاول لو انت بنت مش عيب ابدا انت اللي تدوري على العريس في زمانا الاغبر ده و سيبك من كلام الناس اللي بيتكلمو في كل الاحوال زي مانا بتكلم كده عادي يعني ولو انت ولد يبقى كل بنت ترفضك او اهلها يرفضوك - طبعا هما يطولو؟ يخرب بيت الثقة - خلي الرفض سبب أقوى للتقدم للبنت اللي بعديها يعني اوعى تيأس واعملي اللي عليكي و انت يا ولد اعمل اللي عليك و سيبكم من المجتمع الذي في كل الاحوال لا و لن يرحمكم و لن يترك لكم فرصة تستمتعو بحياتكم أومال انا ايه اللي طفشني برا بلادي؟ كفاية بقا عليكم كده عشان أروح انا افطر طبعا مش من عند عم صبحي بتاع الفول (الله يرحم ايامه) لا انا دلوقتي في بيت خالي و حاكل فول من بتاع مرات خالي (حاسس بيك يا خالي والله) و ........ و يجعله عامر البوست الجاي ان شاء الله عن الكلمة القبيحة - اللي اولها ع و اخرها سين و في النص ان أصلها كلمة مبتنزليش من زور سلاااااااااااااااااااااااااااااااااااام

هناك ١٤ تعليقًا:

يعقـ&# يقول...

ياعم ربنا معاك بس فعلا مدونة فقرية و دمها خفيف,ولعلمك ممكن تشدلك كام عروسة منها

Akram يقول...

3ala fekra ana 3amalt new post 3and bride, fi mawdoo3 as2ela meganenany, ya reet teb2a troo7 te2rah wi sorry en my post taweeeeeeeel

Nehad يقول...

السلام عليكم ورحمة الله وبركاته
أولاً: مبروك على البلوج
ثانياً: انت عندك حق ان الوضع اللي احنا (شباب وبنات فيه دلوقتي حاجتين تقريباً..الأولى هي الطلبات والحركات والبرك والمستنقعات الي بتطلب من أي شاب يتقدم لأي بنت وغن البنت اتنازلت شوة أهلها دايماً هيفكروها إنها مش أقل من فلانة وعلانة (ويا سلام يا سلام لو أصلاً وجه المقارنة بينها وبين أختها--نصيبة سودة وطبعاً الشباب الله يكون في عونهم أصلاً هيلقوها من فين ولا من فين!!! يعني يدوروا على شغل وبعدين الشغل دة يقدر يكفيهم ويفتح بيت و المفروض ان البيت دة يجي الأول ويت

The Groom يقول...

و عليكم السلام و رحمة الله وبركاته

انا طبعا كلامي صح طول عمري يا ناهد أومال ايه؟ انا نظرية يا بنتي كده و حاجة هلامية

المهم كمان البوست بتاعك حلو يا أكرم وانا قريته كله و يمكن أكون رديت عليه

أما انت يا عم الفقري او الفقرية اللي عملي اول كوممينت فطبعا انت عارف ان انا انتمي الى الفقريات و كذلك البلوج بتاعتي ولا انت شايفني من اللافقريات او من الطحالب؟ (مالكش دعوة يا موسى
أصل موسى ده مدرس الأحياء و فضل يتطور لما بقى حاجة كده صعبة أوي الله يمسيه بالخير

سلام يا ناس يا عسل وتصبحو على خير بتوقيت ماناساس البلد - فيرجينيا - يو اس ايييييييه

Noony يقول...

على فكرة اسمي نهاد مش ناهد...في فرق شاسع بين الاسمين

وبعدين اية حكايتك مع المدرسين بتوعك؟ هو من الحب ما قتل ولا عقدة نفسية ومن كتر احترامك ليهم ولا اية بالضبط؟

The Groom يقول...

ولا يهمك يا نهااااااااد أنا اسف يا ستي أصلي لما بصحى الصبح بكون مسطل حبتين

المدرسين بتوعي دول طول عمرهم حبايبي وأصحابي قبل مايكونو أعدائي (في وقت الامتحانات بس)

يعني انت لسه مشفتيش حاجة من عقدي النفسية

المهم انت احكيلنا قصتك وأنا مستعد أنشرلك نكاية في برايد

سلام

Sampateek يقول...

مين قال ان العن.. من سن التلاتين
و بعدين الراجل ميتسماش عا..يتسمى شايخ
ههههههه
او عدى عليه القطر
او فرمة الونش
او طالع من بق معزة
او راحت عليه
او بقى ماسح
او ايش ياخد الريح من البلاط
حبقى ارجع اكملك الاسماء المرادفة للعن.. المرة الجاية

---
متحسبوش يا اولاد ان الجواز راحة

The Groom يقول...

لا يا سمبتيك (المرة دي صح يا نهااااد)

الراجل برضو مكن يع... و يتقاله يا عا....

اما بقا حكاية القطر و الونش و المعيز والبلاط و مش عارف ايه فهذا يدل على مدى حقدك الدفين على الرجالة
طيب ليه؟ داحنا والله غلابة أوي و في حالناوانتم اللي بترفضونا و بتبهدلونا و لما تقبلو بينا بتعايرونا
مش عارف ايه بس اللي ممكن يملأ عينكم؟
اه عرفت ولد تخين و جيبه مليان فلوس

وانت الظاهر كمان بتسمعي شرايط اغاني افراح اسلامية مش عارف سمعت انا الجملة (متحسبوش يا اولاد ان الجواز راحة ) دي فين قبل كده؟؟؟؟ على العموم مش مهم الحاجات دي مش بتفرق معايا ولو اني بحس ان 90% من اللي بيغنو الكلام ده مالهومشي فيها

ما علينا

جوود افترنووون

shermen يقول...

أنا تقولي العيب فيكي والعتب ع النظر
أسيحلك يعني هنا
يلا ربنا يسامحك
أما بقى موضوع التلاتين ده فبصراحه انت معاك حق وان اللي بيحدد الموضوع ده هما أصحاب المشكلة نفسها سواء الرجل أم الفتاة
والموضوع ف اللآخر قسمة ونصيب
لكن بردوه علينا نأخد بالأسباب
بس انا عجبتني اوي الجزئية بتاعت
-------------------------------
يخرب بيت الثقة - خلي الرفض سبب أقوى للتقدم للبنت اللي بعديها يعني اوعى تيأس
واعملي اللي عليكي و انت يا ولد اعمل اللي عليك و سيبكم من المجتمع الذي في كل الاحوال لا و لن يرحمكم و لن يترك لكم فرصة تستمتعو بحياتكم أومال انا ايه اللي طفشني برا بلادي؟
-------------------------------
نفسي اطفش انا كمان
ما تشوفلي عقد عمل عندكم ف منساس البلد دي

ويجعله عامر

غير معرف يقول...

يااااااااااااا صباح الفل حسب التوقيت مصرى

بجد انت معقول تفكيرك كده وانت سنك صغنون كده كل اللى اقدر اقوله لك ربنا يكملك بعقلك وياريت كان ناس بتفكر زيك مكنش حد زعل ولا حد ولاضايق ولا حد فارق حبيبه هاهاهاهاها فجائتنى والله لانى كنت خلاص وصلت لمرحله الياءس من تفكير البشر

غير معرف يقول...

عارف كمان انه فعلا الواحد مش عارف يعمم الكلام لانه كل حاله وليها ظروفها بس راىء ان سبب مصايب هوه تدخل الناس لكن لو هما سابوا كل واحد لحاله وظروفه وقتها بجد محدش وخصوصا البنات مشكلتهم تتحل وكلمه الوحشه بتاعت فاتها ... هتنتهى مش كده برده

The Groom يقول...


عايزين هنا خاطبة يا شيرمين؟

متبقى تيجي

------

أنونيموس

شكرا جزيلا على التعليق و تشرفنا يا فندم

متفق معك %100

شكرا لك

dr_diamond86 يقول...

هو ممكن يكون ليك حق جزئيا
بس والله مش كل البنات بتدور علي الفلوس وعلى العريس ابو جيب مليان
فيه كتيير بيدورا بس على واحد يحترمهم وميعتبرهمش كرسي ف الشقة
المشكلة الحقيقية ف مصر هي الناس
لو واحدة _ ودول كنير بجد_ جت تفكر انها تجيب ف بيتها اقل من الناس علشان ده اسراف وبجد حرام هتلاقى الف من يقولها طيب والناس وكلامهم واللى هيدخلوا شقتك وهيقولوا ويعيدوا
المشكلة بس اننا بنتدخل ف حياة غيرنا زيادة عن اللزوم
اسفة على الاطاله

The Groom يقول...


اذا دي اطالة اومال التعليقات التانية بتاعتك ايه؟

:)

بس شكرا على ردك و كلامك صحيح مقدرشي أقول حاجة عنه

سلام من ماناساس البلد