الاثنين، 12 مارس 2007

س ن ا ع

ازيكم يا جماعة
جوود أفتر نووون بتوقيت ماناساس البلد
أنا فعلا فخور بالناس اللي كلمتني و ردت عليا والله حسيت ان الدنيا مش سايعاني
طيب ليه النكد بأه و الكلام في الموضوع المنكد بتاع الع... ده؟ لا انا وعدتكم و لازم اوفي بوعدي
الأول اقترح عليكم تقرأو المقالة دي
لأنها حتوفر عليا كلام كتير أوي أوي في أسلوب قصصي ممتع - أيوة أنا ممل و اللي مش عاجبه يطلع برا
المهم لازم ناخد بالنا من حاجات كتير منها:
1 - صعوبة الحصول على عمل بمرتب يكفي الشاب للزواج و بالتالي يكون جاهز في سن متأخر (مشكلة مجتمع)
2- قلة الوعي و الثقافة لدى كثير من البنات في المعايير الصحيحة لاختيار عريس الغفلة (مشكلة تربية و ثقافة)
3- ولما يجي عريس الغفلة قلة الوعي لدى أهلها والطلبات المادية المغالى فيها و البت زي العبيطة قاعدة تتفرج على أبوها يقطع في الواد و يمرمط بيه الأرض و أمها بتقولها يا عبيطة (ماهي وراثة) ده لمصلحتك (صباح الجهل)
4- صعوبة الحصول على مسكن مناسب بأسعار معقولة و طبعا غباء الكثيرين (يعني ماله القانون الجديد؟ لازم تمليك و منظرة؟)
5- الأحلام الوردية الغير واقعية يعني مش لازم تتجوزي سوبر مان ممكن برضو تتجوزي واحد زيي هو صحيح مش سوبر او سوبر نص لبه بس احسن من مفيش
6- مش القاعدة طبعا ان البنت تتجوز ولد اصغر منها و لا نحبذ هذا لكن وماله برضو لو حصل مش عيب و لا حرام وبالعكس نبينا عليه الصلاة و السلام فعلها يعني في قدوة تمام في أن لو هي البنت لاقت عريس لقطة ممكن تضحي حبتين بفرق السن و أهم حاجة السعادة يعني هما لو حبو بعض و عاشو في سعادة حتفرق مين الكبير؟ أما عبط صحيح
7- طيب وحاجة تانية مهمة جدا لما البنت تلاقي عريس كويس و هو مش واخد باله منها يبقى مش عيب خالص انها هي اللي تتقدمله طبعا مش تجيب السيد الوالد وتروح تخطبه؟ لا الصح انها تعمل اي حاجة تراها هي مناسبة و اخطب لبنتك و لا تخطب لابنك و لو أبوها بيفهم و متفتح ميفرطشي فيه و يخطبه لبنته انا ياما جالي عروض جواز من اباء لبناتهم و خيلان لبنات اخواتهم بس انا اللي بقف بعيد عنكم وعيني فارغة و معرفتش كده غير لما طارو العرايس
8- طيب ولما عريس يلاقي بنت كويسة و يتردد و يتردد و يتردد لحد ماتطير عشان هو جبان و معندوش جرأة يبقى العيب فيه لازم
يتقدم و يكون جريء و لو ليه نصيب حيحصل لكن يسبل للبنت سنة و يخطبها واحد في الاخر في سانية
9- خوف البنات و عدم ا لتوكل على الله و بعد الشباب عن الالتزام و المسخرة و الحياة اللاهية العابثة و فجأة يقرر يتجوز طبعا محدش حيجوزه و البنات يعتقدو ان العملية باديهم لا ده نصيب و قدر يعني لا ابوكي و لا اطخن طخين حيقدر يوقف الجوازة دي يا فؤادة لو ربنا أراد تتجوزي عباس فاعتمدي على ربنا مش على فلان و علان
يا اخواني يا اصحابي يا جيراني....
المرة الجاية حتكلم عن نتيجة التصويت - سمعونا بقا الحس العالي
سلاااااااااااااااااااااااااااام

هناك 21 تعليقًا:

Noony يقول...

أنا مش هعترض كتير على اللي انت قلته..غير إنك متحامل كتير أوي خالص على البنات و تقريباً محملهم ذنب الليلة كاملة في مشكلة الجواز اليومين دول (أكيد مشكلة طبعاً إلا مكنتش انت كتبت البلوج دة و سميته "عايز أتجوز" رداً على بلوج برايد)...والله بقى البنت منا بتبقى قاعدة في بيتها لا بيها ولا عليها ويجيلها أحد الشخصيات التي تتميز بجميع المواصفات غير المرغوب فيها بالمرة..ويعقدها في عيشتها والسلام...أغلب الرجال اللي بيدوروا على عروسة عايزينها صورة طبق الأصل من والدتهم والبعض الآخر عايز يتقمص شخصية سي السيد و يتصور وهو قاعد على كرسي ولابس الطربوش وهي قاعدة تحت رجله ويعلق الصورة على باب الشقة عشان يقول أنا أهو...طبعاً مفيش حد يقبل كدة
خليني قاعدة ساكتة أحسن
نصيحة..حاول تطلع برة الصندوق (النظرة المحدودة) وتشوف الصورة كاملة من برة وقارنها بالصورة اللي جوة الصندوق واكتب رأيك وقولنا...لعل وعسى (وبلاش تعميم...لأن دايماً لكل قاعدة استثناءات)

وبلاش الافكارات السوداويات اللي عندك دي...برايد سبقت وكلت النبق وحازت على السبق الصحفي
:)

سلامااات
نهاد

The Groom يقول...

انت تقدري تعترضي؟ اخ نسيت اني ديموقراطي طيب ما علينا

انا مش محمل حد ذنب حاجة بالعكس انا رأيي ان البنات ذنبهم زي الولاد تمام بس في اغلب الامر للامانة البنت هي اللي بترفض يا نهاد يعني شوفي كام مرة العريس بيتقدم لواحدة و في الاخر متعجبوش و يسيبها و كام مرة بيتقدم لواحدة و يترفض؟ وفي الغالب برضو اسباب تافهة او اسباب ثقافية ما انزل الله بها من سلطان - وراجعلي كلامي كويس حتلاقيني بدافع عن البنات والله دانا غلبان متقطعيش عيشنا حتى اقراي تعليقي على أكرم في مدونة برايد

أما المشكلة فهي طبعا مشكلة ولو انها مش سبب اني عملت البلوج دي السبب و متقوليش لحد وش وش وش هو اني حابب ارغي حبتين و اطلع اللي في نفسي باسلوب حضاري بدل الاساليب العربية

واضح ان انت اللي تجاربك مش كويسة خصوصا مع اللي بيلبسو طرابيش الظاهر
برضو انك انت قديمة أوي :)

انا على فكرة الحمدلله نظري كويس و الوحيد الحمدلله اللي من غير نضارة في عيلتنا كلها و عيلتنا دي ما شاء الله تملا عين الشمس يعني الصندوق بتاعي كبير شوية وصدقيني انا بحاول بقولك بقالي 5 سنين و نص و كام يوم بمعدل كل كام اسبوع مرة صدقيني انا مخضرم دلوقتي هاهاها ومع ذلك بترفض لانه نصيب في الاخر

طيب و الافكار السودا؟ لا انا طيب و غلبان والله بس انت متحاملة عليا اوي و شايفة ان افكاري سودا مع انها رصاصي بس و برايد يا ستي سبقت و كلت النبق و انا حاضحك أخيرا بس هي دي العوبارة

ايه علاقة السبق الصحفي بكونك كاتبة؟ انت تبع مين؟ قري و اعترفي وانا حسامحك اوعي تكوني جاسوسة برايد

سلااااااااااااااااام

Noony يقول...

على فكرة أنا بهرج..متخدتش كلامي جد..حكاية "الأفكارات السوداويات" دي لازمة عندي...ولسة شوية شوية هتبقى "مأسويات"...أنا لا جاسوسة ولا كاتبة ولا حاجة أنا بني آديمة عادية جداً...والحمد لله، تجاربي مش سيئة أوي يعني...لسة صامدة..وبعدين إخص عليك..أنا قديمة أوي؟...بس والله في ناس تفكيرهم كدة فعلاً...نقول ايةبس...الحمد لله على كل حال

هو مفيش غيري اللي بتكلم وانت بترد عليها ولا اية؟
(حبة نكد هههههههه)

نهاد

Shower-Mirror يقول...

هاى جروم ..كلامك حلو و متكلف تمام زى خالتك برايد ( الظاهر ان قلة الجواز بتظهر المواهب ) :) انا مستغرب ليه انت و الاخت نهاد اللى معاك على الخط مصممين تحطوا قواعد و حدود للموضوع !!! انا على فكره متجوز و مخلف عدد 2 دكر :) بس من ساعة ماعرفت مراتى و حبيتها و ارتبطنا و اتخطبنا و اتجوزنا ماقدرتش احط قاعده للموضوع خالص و التخطيط ممكن يكون فى الحاجات الماديه الملموسه يعنى .. بس فى حاجات ماينفعلهاش قواعد ..!! و بالاخص بداية العلاقه او التعارف دى فعلا حاجه مالهاش قاعده و لا ينفع لها تخطيط .. انا فوجئت انى دلوقتى باستخدم كلمة القسمه و النصيب هو ده فعلا بداية اى علاقه زواج ناجحه .. و اى حاجه تانيه قابله للتخطيط - انت فين ياواد ينيلك انت نمت والا ايه ؟؟ - طب قوم ياخويا اتشطف و تعالى زورنى فى مدونتى و اقرا كويس من الاول خالص للأخر -- نعم ياخويا ؟؟ مش فاضى ؟؟ طب سيب اللى فى ايدك و اقعد اقرا بلاش كلام فارغ ..... تحياتى من دبى

The Groom يقول...

هو انا يعني اللي بتكلم جد؟ طيب دانا مفيش كلمة من كلامي جد أساسا

المهم انت تطردي الافكار السوداويات دي لان انا جربتها زمان و الموضوع قلب بجد و ربنا ستر عليا من السرايا الصفرا انا كان بيني و بينها شعرة بس الحمدلله ربنا نجاني بس في بوست تاني ححكيلكم على اللي حصل

و على فكرة انت زعلانة ليه انك قديمة؟ انت عارفة انا دلوقتي تقريبا اقدم من كل الخمرة اللي في ماناساس البلد لاني مرة سالت واحد امريكي اقدم حاجة عندكم ايه قاللي لو محسبناش اللي في مخزن جون مايرز (من 1950) يبقى اقدم حاجة من 1983 يعني انا اكبر منها و اقدم منها اصل ماناساس البلد دي زي الفلاحين عندنا يعرفو حتى اسامي البهايم بهيمة بهيمة

يا بنتي القديمة تحلى و عمرها ما كانت وحلة و اسأليني أنا

وبعدين انا مصدقت ان انت بتتكلمي وانا برد عليكي عشان محسش اني بدن في اهل مالطا اللي تقريبا اسلموا كلهم خلاص اهو الوحدة تعمل اكتر من كده واحمدي ربك ان ليكي اصحاب انا من البيت للشغل و من الشغل للبيت و حتى في البيت (اللي هو بيت خالي) محبوس زي البوبي في البدروم و شوية دراما بقا

ما علينا ربنا يصلح الحال

زيديني نكدا زيديني لاني مفرفش على الاخر و الحياة متحلوش غير بالنكد و الملح و الفلفل و الليمون

سلاااااااااام

The Groom يقول...

و عليكم الهاي يا حبيبي

من رحم المعاناة تولد الأدمغة المتكلفة و مش قلة الجواز يا مان لكن البهدلة لان المتجوزين برضو ليهم مواهب و انت اول مثال

الدنيا لازم تكون واضحة يا مان و اي حاجة في الدنيا ليها قاعدة و ملايين الاستثناءات لكن لازم الاول نحط قاعدة و بعدين نكسرها و نستثني منها عشان الدنيا تحلو هذا طبعا لا ينفي القسمة و النصيب ولكنه يتماشى معه في تناسق أخاذ - هاه؟ أنت مين؟

المهم ما علينا و سلملي على دبي كتير أوي و أنا بحب أهدي أغنية دبي دانة الدنيا لماما و بابا و سوسو و دودو

وبعدين مينفعشي اجي كده على مدونتك لازم اتشطف الاول؟ يبني انا بستحما في اليوم مرتين و قربت أبووووش - مش بكلمك يا عم بوش

سلاااااااااام يا .... يا شاور

غير معرف يقول...
أزال أحد مشرفي المدونة هذا التعليق.
جبهة التهييس الشعبية يقول...

القصاص لأسرانا الشهداء رجاء التوقيع وارسال الرسائل

صاحبة نوني يقول...

حلو جدًا
بس موضوع إن البنت تخطب الولد اللي عاجبها ده إحنا اللي مخترعينه من زمان، صح يا نوني، بس طبعًا الكلام سهل جدًا، إنما عشان الواحدة تلاقي حد تحس إنه يستاهل إنها تحاول تخطبه، وتكون عندها الجرأة والاقتناع إنها تعمل كده، الوضع الطبيعي إن يتوفر شرطين:
1. إن البنت تكون ناضجة بما يكفي إنها تفهم إن ده مش عيب وتعرف الفرق بين إنها تخطب وإنها تعاكس، وده معناه إنها مش ممكون تكون أصغر من 25 أو 26 سنة .
2. إن الشخص ده يكون يستاهل بجد،ومناسب لواحده ناضجة وعندها 25 أو 26، ده معناه إنه هيكون في نفس المرحلة العمرية أو أكبر كمان عشان يقدر النضج ومايفرحش بنفسه ويفتكر نفسه دنجوان
النتيجة: الشخص الذي يتسم بصفات تجعله يلفت انتباه فتاة ناضجة لدرجة إنها تخطبه ويكون متفهم لدرجة أنه لا يعتبر تصرف مثل هذا من طرف الفتاة امتهان لكرامتها أو إنعدام أخلاق، غالبًا ما سيكون على درجة من الامتياز تحول دون بقاءه دون ارتباط إلى هذه السن (من 25--30 سنة)صح؟

The Groom يقول...


صباح الخير يا ماناساس البلد

شوفي يا صاحبة نوني
الموضوع ممكن يكون بطريق غير مباشر مثلا ان البنت عن طريق أخوها أو أبوها تحوط على الراجل لحد ما تظبطه بس في حاجة طبعا النضوج و الثقافة مهمين و للأسف فعلا قليل اللي بيكونو أصغر من سن 25 أو 26 عشان يفكرو في الموضوع ده بس أحب أؤكد ليكي انهم موجودين و أنا شفت حالات زي كده كتير و كمان مرة أو اتنين البنات حاولو هما يلمحولي و مرة واحد صاحبي قالهالي على بلاطة ان اخته شايفاني ولد مناسب بس أنا كنت مش مستعد ساعتها يعني كنت بفكر في بنت تانية و أديني في الاخر مطلتش لا دي و لا دي لأن الموضوع كله نصيب

ولو ان فيه والله شباب ناضجين جدا من 22و 23 سنة بس البنات يدورو كويس و لا ييأسو

وبعدين هي فين نوني؟ انت الناطق الرسمي؟ الله يسهله يا عم بقا ليه متحدث رسمي و محدش عارف يكلمه

سلاااااام

Noony يقول...

أهلاً يا صاحبتي...أيوة كدة خليهم يسمعوا صوتنا عشان بيقولوا كلام كتير..وأهو كله كلام!!!
ربنا يستر علينا كلنا!!!

أنا موجودة...ومتابعة بس الشغل لذيييذ جداً وعظيم للغاية ومش بيخلص...وبعدين اية المشكلة لما صاحبتي تبقى الناطق الرسمي بلساني!!؟
اهو قروكو دة هو اللي جايبنا ورا

:)

The Groom يقول...


أيوة أيوة وقعنا في حارة احنا و محدش سما علينا
هو صحيح ربنا يستر بس ياختشي ولو فعلا مش عاجبك الكلام بتتكلمي ليه؟

شغل ايه اللي انت جاية تقولي عليه؟ انا كمان شغلي لذيذ و مش بيخلص أو انا اللي مش عايزه يخلص يعني انا قاعد على قلبهم صحيح من غير اوفر تايم بس احسن ماروح بيت خالي و أدب خناقة زي كل يوم

انا بقا بحقد عليكي و بحسدك عشان عندك صاحبتك ترد معاكي أنا معنديش حد يساندني و مقطوع من سجرة

ربنا ينتقم من اللي كان السبب

وكل اللي بيرد عليا اتنين متحالفين عليا و أكرم مش طايق نفسه

أنا مسبش طاري أبدا

سلاااااام

ياسمين يقول...

يا عم انت عاوز تتجوز ليه
دة الجواز مشروع فاشل فاشل فاشل

وبعدين اللى بياخد واحدة بالرخيص بيبيعها بالرخيص برضه

انا واهلى سهلنا كل حاجة لجوزى كل حاجة بمعنى كل حاجة بجد

ولما بقى معاه فلوس بعد 5 سنين جواز راح اتجوز علية بت روسية معفنة وكلف جوازه منها الشىء الفلانى

تفتكر لو كنت أنا أختك كنت عملت ايه

تحية من قلب مجروح

The Groom يقول...


يااااااه براحة عليا شوية يا ياسمين انت يا بنتي ليك الحق والله في وجع صف السنان كله مش سنة واحدة بس

انت داخلة شمال ليه؟ أنا غلبان والله وعلى فكرة الجواز مشروع فاشل الا اذا أردنا له النجاح فهو ناجح ناجح ناجح

دي مسألة نسبية و قسمة و نصيب

متفق معك أن ما يسهل الحصول عليه يسهل فقدانه لكن في فرق جوهري

لا أنت بضاعة و لا هو تاجر

انت شريكه حياته و هو شريك حياتك وكونك سهلتيله انت واهلك الموضوع من الاول فإياك تندمي على كده - بالعكس ثوابك عند ربنا كبير و افتكري انه شايف وبيحاسب بس في الوقت المناسب

مفيش في الجواز رخيص وغالي لكن في من الناس رخيص زي الراجل ده الله يسامحه و غالي زيك انت - أنت عارفة المثل بتاع يروح المال و يبقى ال... على حاله؟ انا بس مش عايز اشتم لكن افتكري ان الفلوس بتروح وتيجي ويبقى الانسان

وعشان تعرفي انه رخيص بجد البت اللي كلف نفسه عليها دي روسية و دولا ارخص بنات للجواز في العالم كله من اللي شفته في دبي و هنا و في مصر كمان

ولا يهشك يا بنتي

أنا عايز أتجوز ليه؟ سؤال وجيه والرد عليه كلمة واحدة - زهقت من الوحدة
أنا عندي أتجوز نكدية بكرهها بعد الشر تعمل فيا العمايل ولا اني اكلم نفسي بين اربع حيطان زي دلوقتي كده

ويمكن يكون حظي احسن من حظك وحتى لو لا يكفيني شرف المحاولة

شوفي يا أختي - أه أختي

أنا كنت عملت فيه العبر - يمكن أنا مش من النوع العنيف أوي بس الناس اللي زي دي ممكن أطلع فيهم شيء و شويات ولو في حاجة ممكن أعملها قوليلي؟ تحبي أجيبلك عريس غيره؟ أنت أؤمري بس وربنا يعين

أنت أكيد سمعتي كلمه نيفر ساي توو لييت
never say too late
طبعا انا كتبتها بالعربي بس عشان شكلها جميييييييل - أصل العربية أجمل لغات العالم

ربنا يا ياسمين بيختبرنا و انت قلبك اتجرح وغيرك ياما ناس اتبهدلت و اتعذبت

هل كل الناس دفنت نفسها؟ ولا رمت نفسها في البحر؟ بالعكس انت عاملة مدونة زي الفل ما شاء الله لا تدل أبدا على ما تحمليه في قلبك

حاولي مرة تانية يا ياسمين أنا يمكن معرفشي تفاصيل مشكلتك لكن دايما تأكدي من حاجتين:

أول حاجة ان مع العسر يسرا

تاني حاجة لو صحتلك فرصة تاني حاولي انما الحياة أمل و عمل

أرجو أني أكون خففت عنك شوية

مستني ردك

سلاااااااااااام



فـضـفـضـة:
ناس بتبكي و ناس في الهلس غرقانة
ناس بتكتب و ناس بتقرا زعلانة
ناس لئيمة و ناس طيبة و صبرانة
ناس ضايعة و ناس تانية بردانة
ناس بتـحب و ناس من الحقد عميانة
ناس مجروحة و ناس بالأمل مليانة

Noony يقول...

ياسمين
يقول الله تعالى
" يَا أَيُّهَا الَّذِينَ آمَنُوا اسْتَعِينُوا بِالصَّبْرِ وَالصَّلاةِ إِنَّ اللَّهَ مَعَ الصَّابِرِينَ"
صدق الله العظيم
البقرة:153

ربنا يعينيك...ويعوضك خير إن شاء الله
بس مش معنى كدة إن الجواز (على العموم) اختراع فاشل...مش كل المتجوزين مبسوطين ومش كلهم مخنوقين أو متضايقين...كله نصيب

كلامك على المدونة بتاعتك بيقول ان قلبك كبير

تفاءلوا خيراً تجدوه بإذن الله

أونكل جروم
طار؟ هو فهلاً طار في الهوا شاشي
احقد زي مانت عايز...ولا يحوق...انت ممكن تكون قاعد لوحدك بس حواليك كل الناس بس فيه ناس تانية حواليهم ناس كتير بس برضه لوحدهم...اية الكلام الكبير دة!!...ما علينا
انت بتطردني من مدوتنك ولا اية؟
على فكرنا أنا قلتلك من الأول خالص اني مش معترضة على كلامك..بالعكس أنا موافقة عليه..المشكلة الوحيدة اللي شايفاها ان الكلام سهل و حلو أوي (مش قصدي كلامك انت بس) وان الواقع مختلف تمام الاختلاف
وعشان كدة ربنا يستر علينا جميعاً
والحمد لله على كل حال
That's all for now :)

The Groom يقول...


شفتي يا ياسمين الدنيا لسه بخير

في ناس أهي كلامها كبير أوي

شاش ايه و بتاع ايه؟ انت مين يا؟

ما عاش ولا كان اللي يطردك من المدونة دانت تقريبا اللي بتردي عليا أقوم أطردك؟ لا أنا لسه عندي شوية شهامة مش أمريكاني على الاخر يعني

صحيح الكلام سهل أوي و صحيح الواقع مختلف تمام الاختلاف بس لو حبينا نغير و أصرينا على التغيير حننجح و حنغير و لو بعد حين وكام مرة غيرت انت حاجة في حياتك مكنتش تتخيلي أنك لو أصريتي عليها حتغيريها؟ سؤال بريء

التغيير يأتي من الداخل

وبعدين تعالي هنا يا ماما؟ أونكل مين دي لما يأنكلك
أنا عمو وبس أونكل دي في مصر بس سامعة؟ شباب اليومين دولا أدب سيس خرسيس رمسيس

وربنا يستر علينا تاني يا رب والحمدلله فعلا اللهم لك الحمد

ذاتس أول فور ناو و جوود نايت يا ماناساس يا بلد

فضفضة:
ناس ليها في المشاكل و ناس غلبانة
وناس ترميك بالطوب و ناس بلبانة
وناس تديها فلوس ترميك في الزبالة
وناس تحقد وعليك تقر و ناس منك زهقانة
وناس طيبة ومالهاش في شغل اللمامة
وسلملي على الطرماي يا حمامة

صاحبة نوني يقول...

هو عشان قلت إني صاحبة نوني أبقى برد بالنيابة عنها؟ أنا باتكلم عن نفسي... وبعدين نوني تعرف ترد عن نفسها كويس قوي...
وبعدين يعني إيه "دورو يا بنات" بقى؟؟ دوروا إزاي يعني؟

The Groom يقول...


مش عارف حتة الصندوق بتاعت نوني و انا بقرأها دلوقتي فكرتني بمدرس الجغرافيا لما مرة بيقولي أنصحك أن تحشر نفسك في الزوايا الضيقة - مش عارف ابن الايه ده كان قصده ايه؟ تفتكرو في علاقة؟

وبعدين أه انت صاحبة نوني و بتدافعي عنها و عاملين عليا رباطية - تيجي يا شاور نتفق عليهم و نحاربهم؟ وبعدين بتتكلمي عن نفسك يبقى تقولي انت مين؟؟ مش تستخبي ورا اسمها؟ أما عن رد نوني فآآآآه طبعا نوني دي ما شاء الله تعرف ترد كويس اوي في مقام 50 محامي يعني ميتخافشي عليها بجد

اما بقا حكاية التدوير انت مسلا لو قريتي مدونة برايد حتلاقي انه احيانا بيقع في طريقك شخص مناسب تحسي انه ولد محترم و يصلح زوج ليكي طيب وليه مش انت اللي تاخدي الخطوة الاولى؟ طبعا انت حتعملي تحرياتك و حتخلي الموضوع في الاخر يجي منه يعني طبعا مش حتروحي و تخطبيه من اهله و بتاع
بس على الاقل لازم البنت تكون جريئة شوية في زمن التخلف بتاعنا ده عشان تنجز في الوقت حبتين لان الولاد اليومين دولا متخلفين زي حالاتي و بطيئيييين انا أول تلات مرات حاولت فيهم كانت المشكلة اللي فركشت الموضوع هي البطء

التردد في اتخاذ القرار سمة غالبة في عيال اليومين دولا
على العموم ربنا يوفقني و يوفقكم جميعا في الزوج الصالح و الزوجة الصالحة

ويا ماناساس يا بلد - اعذروني في عشقي لماناساس اصلها بتفكرني بمدينة العين في الامارات حيث تربيت هي زيها تمام وعشان كده دخلت قلبي من اول نظرة

سلام عليكم و رحمة الله

dr_diamond86 يقول...

أولا: ايه العنف ده ، انت كل شوية تطردنا برة. احنا لازقين بقة
وبعدين هو حد اعترض يا عم على كلامك
ثانيا: أرد بقى ع البوست
1- أكيد الشاب مش لاقى شغل يكفيه مواصلاته علشان يكفيه مصاريفه فمابالك بمسئولية بيت وعيال
بس الواحد لازم ميفقدش الأمل ف ربنا وشباب كتير الوقتى بيشتغلوا ف الدراسة وأكيد بتفرق
2- معايير اختيار عريس الغفلة مينفعش تحددها يعنى بالمسطرة ولو مجاش نسخة كربون تخلع منه
وبعدين الوقتى- أو على أيامنا بمعنى أصح أصل الموضوع اختلف أوى اليومين دول-البنت بتهتم بدراستها وموضوع المعايير ده مبتفكرش فيه غير لما تتدبس
ده غير أن الاعلام دلوقتى مبيعرضش غير مسلسلات رجال الأعمال والموضوع بيأثر أكيد
3- نفس الرد اللى فات. اللى بعده
4-مش فكرة منظرة بس احساس بالأمان يعنى انها تبقى حاسة أنه بيتها مش كل شوية هتروح مكان جديد
و بعدين شاب مين اللى يقدر يدفع ايجار جديد. الله يسهله يا ابنى
5- مش لازم سوبر مان ولا حاجة بس بنى ادم، راجل بجد. يحترمها و يعاملها بالحسنى وبس. يا ابنى ده البنات طيبين والله- مش أوي يعنى- بس ممكن تطلع فيك وكل اللى عاوزاه منك كلمة حلوة تلاقى كل ده راح حتى لو تناسته مش نسته بس هتلاقى كل الضباب انقشع- فصحى بقى-
وبعدين سوبر مان ليه ده لو كان فرانكنشتاين وربنا كاتبهولها هيكون هو ده ، ده قبول من عند الله
6-ف الحقيقة ان الشاب هو اللى بيدور على فرق السن ف الأول مش البنت
حاليا البنات بيدورا على السن الأكبر لما اتلسعوا من الشباب الطايش الذي يتنقل بين الفراشات مختالا بشبابه- عرق فصحى نقح بقى- ولو أنها مبتفرقش كتير والله ممكن العاقل يجرح ويجرح أوى كمان
7-دي بقى كارثة لوعملتها بنت ف مجتمعنا الشرقى هيقام عليها الحد
انا موافقة على رأيك قلبا وقالبا بس مش بشكل مباشر يعنى. أخوها، عمها، خالها ، صاحبتها، كده يعنى
بس الشاب بقى اللى بقى بايده الرفض او القبول تفكيره ازاى ف البنت بقى
لو قبلها هيذل اللى جابوها بعد كده انها هى اللى كانت عايزاه. ال يعنى هو اتجوزها فضل وجبر خواطر
ولو رفضها أمة لا اله الا الله هتعرف ان فلانه كانت عاوزاه بس هو مرضاش
وابقى هاتلى شاب عاقل بقى يفهم كلامك
8-دي بقى اللى كارثة بجد لما كمان الشاب هيخاف ويتردد. بصراحة يستاهل اللى يجراله بقى.
9- أكيد كلنا خايفين ، ده قرار مصيري مش بلوزة هأزهق منها وأغيرها السنة اللى بعدها . ده قرار مصيري
و بعدنا عن ربنا كلنا بجد غرقانين فيه. ربنا يتولانا ويهدينا جميعا يا رب

The Groom يقول...


دكتورة دياموند

أنت خطيرة

أحييكي - وبارك الله فيكي

ردك متفحم قصدي أفحمني

خلاص حعتزل

كل سنة و انت طيبة

شكرا لك

سلام عليكم من ماناساس البلد

تخاريف خاصه! يقول...

وانا بقلب فى المدونه..الاقى الفضفوضه الرائعه دى فى الكومنتس!!!!!

ناس بتبكي و ناس في الهلس غرقانة
ناس بتكتب و ناس بتقرا زعلانة
ناس لئيمة و ناس طيبة و صبرانة
ناس ضايعة و ناس تانية بردانة
ناس بتـحب و ناس من الحقد عميانة
ناس مجروحة و ناس بالأمل مليانة

جامده جدا يا جرووووووووم