الأربعاء، ١٤ مارس ٢٠٠٧

أبوها سواق ميكروباص

سلامو عليكو يا حلوين
ده سلام مربع لاصحابنا الحلوين اللي بينوروني في البلوج بتاعي أو المدونة باللغة العربية الحلوة
ان شاء الله تكونو لسه فاكريني كويس
انا كنت وعدتكم ان المرة دي حتكلم عن نتيجة التصويت (طبعا جابو المطافي و كانت ليلة) لكن لا بما أن التصويت لسه مخلصشي وكان فيه صعوبات تقنية نعتذر عنها عزيز المشاهد
بما أنه يعني مخلصشي ححكيلكم حكاية ظريفة بتاعت واحد صاحبي
أنا مستأذنتوش في الكلام عنها بس مش مهم وانا من امتى مؤدب و بستأذن؟ ها مش عاجبك؟ اطلع برا
الرواية كالآتي
صاحبي حمادة ده ولد ظريف و لطيف (على فكرة مالوش دعوة بحمادة بتاع برايد) عنده كام و عشرين سنة و بيشتغل في شركة ....ات و نفسه يتجوز
المهم صاحبي الحبوب ده كان قاعد مرة على النت (واخ من النت اخ) وبيتفرج على المدونات بتاعت الناس و المنتديات و مش بيفتح مواقع وحشة خااااالص ولا ليه في قلة الأدب (لا صحيح بعرف أجامل) المهم صاحبنا ده - ايوة ما خلاص بقا صاحبنا- لاقيته في يوم بيكلمني على المزنجر و انا في مناساس البلد لسه صاحي من النوم بالليل كده
المهم صباح الخير يا جاري وبتاع وبعدين يا جروم انا عايزك في موضوع؟
خير اللهم اجعله خير؟ قال بيقول انه اتعرف على بنت حلوة و محترمة على النت وبيحبها
قلتله يا حبيبي؟ وماله يبني دوس في الحوار (أنا روش أوي صح؟) و عرفني ايه اللي حيحصل معاك ولو عايز استنى لما انزل مصر واجي معاك نخطبهالك
الواد ياعيني يا ولداه باباه منفضله
المهم قاللي لا معتقدشي انه حينفع؟
ليييييييييييه؟
أصل انا عرفتها من على النت
طيب وماله؟ هي معرفة النت حرام؟ ولا فيها حاجة لا سمح الله؟ يعني هي الصالونات جالنا منها ايه؟
الواد بصلي بصة (عن طريق الويب كام) كأني ارتكبت جريمة
طبعا رحت جاري و طافي الكاميرا و كملت زي العبيط - أهو ده عيبكم يا مصريين (أكني مش مصري) دايما عاملين من الحبة قبة و كل حاجة عندكم عيب و حرام - يبني مش البنت طيبة و محترمة و كويسة؟
آه أوي يبني دي بتنقط عسل
طيب و مالهاش في قلة الأدب و بتتكلم معاك باحترام؟
آه اكيد طبعا انت عبيط؟
طيب وانت بتحبها؟
آه بموت فيها الصراحة
طيب وهي بتحبك؟
آه ده هي حتى اللي قالتلي الأول بعد ما تقابلنا يجي 50 مرة
طيب وأهلها يعرفو الحوار؟
لا عادي يعني ماجتشي مناسبة و هي مش حتقولهم غير لما اتقدم رسمي
طيب ممكن لو عرفو يعملو مشكلة ليها؟
لا دولا نفسهم يجوزوها
طيب انت شفتها وقابلتها في الحقيقة و قعدتو مع بعض؟
آه طبعا بقولك قالتلي بحبك
طيب وكل حاجة فيها عاجباك؟
آه كلها على بعضها كده داخلة دماغي طحن - بحبها يا مان بحبها
حبك برص - طيب وانت معاك فلوس تفتح بيت دلوقتي؟
آه معايا يعني على قدي
طيب وهي ترضى؟
آه رجلها على رجلي و عارفة ظروفي
طيب انت عاجبك مستواها العلمي و شخصيتها؟
آه ذكية جدا و ما شاء الله خريجة فنون
طيب يعني ايه المشكلة دلوقتي كاتك آواه؟
مش عارف انا عرفتها من على النت و بابا وماما مش حيوافقوا عليها وبعدين الناس تقول ايه عليا؟ معرفشي ينقي؟
قلتله طظ فيك و في بابا و ماما (مع احترامي) بس يعني البنت بالمواصفات دي كلها و زي الفل و جميلة وانت بتحبها وكله تمام وهي كمان بتحبك و راضية بظروفك و كله تمام؟ ايه اللي ناقص يا لكعي؟ اخطبها انا بدالك يامان؟
راح الواد ساكت شوية وبعدين قال:انت تعرف انا اعرفها من يجي 3 شهور ولا حاجة
قلتله يااه و كل ده و ساكت
قال ماهو اعمل ايه انا متردد أصل مستواهم يعني مش أوي أصل أبوها بيشتغل ....... يعني و دي شغلانة مش ولا بد
ياااااااااااااااااااااااي
الكلمة دي صدمتني الصراحة
يعني ايه يا بقف انت؟ (معلشي أصل لساني بيطول حبتين لما بتنرفز) يعني ايه؟
قال: أصل أبوها بيشتغل حاجة كده على قده و معاهوش مؤهل
قلتله يا عيب الشوم عليك؟ واسمالله على بابا بتاع انت و لا حتى البابا بتاع انا؟ يعني كانو وارسين و لا قرايب ارسين لوبين؟ ولا حتى معاهم يأكلونا؟ يبني وماله لما يكون أبوها انشالله سواق ميكروباص ايه المشكلة؟ طالما راجل محترم و مربي عياله و اخلاقهم و دينهم كويسين و مش عيب خالص انهم ساكنين في الحتة دي يعني لازم يكونو في متشينة نسر ولا السمالك يعني؟
(أصله ساكن هناك في متشينة نسر)
ورحت بقا داخل فيه شمال و يمين لما قطعته
وخليته في الاخر يفكر في الموضوع تاني و يفكر يتقدملها بجد
لاقيت ليه بقا حديث شيق بيقول ايه
(ومن بطأ به عمله لم يسرع به نسبه)
صدق رسول الله
يعني يا جماعة
(لا فضل لعربي على أعجمي الا بالتقوى)
صدق رسول الله
بس مين يفهم؟
انتم ايه رأيكم دام فضلكم؟ هل انتم معاه في رأيه؟ ولا يتقدم ليها و على بركة الله؟ همتكم معايا عشان المرة الجاية في البوست الجاي العملية حتسخن أوي و حتكلم في الحوارات دي بقلب مفتوح - مش مفضوح يا هواة العكننة
مستني ردودكم و تصبحو على خير بتوقيت ماناساس البلد
سلااااااااااااااااااااااااام عليكم

هناك ٥٠ تعليقًا:

Shower-Mirror يقول...

حبيب قلبى .... ازيك عامل ايه و اخبار ماناساس البلد ايه .... على فكره اخويا عايش جنبك فى سياتل المحطه مركز واشنطن :) و بيشتغل عند المعلم بيل جيتس بجلالة قدره :)

نرجع لموضوعنا .. قصدى موضوعك انت و صاحبك .. بص بقى و كلام بجد مش كلام افلام ..الحب حاجه و الجواز حاجه تانيه فعلا ، لازم يكون فيه توافق فى الظروف الاجتماعيه و ده اهم من الحب نفسه . .. و انا باعيد تانى - عشان الناس ماتحزقش قوى - الظروف الاجتماعيه مالهاش علاقه بالحاله الماديه .. فى الغرب ممكن الموضوع ده يمشى علشان الجواز هناك علاقه بين اثنين و بس و علاقتهم بالاهل بتكون محدوده .. لكن عندنا فى مصر الجواز هو جواز اهل .. جواز بين عيلتين بحالهم مش جواز شخصين - طبعا هاتلبسلى و ش محمود ياسين و تقولى المهم انهم بيحبوا بعض و لازم يتجوزوا و يعيشوا مع بعض - هاقولك و بجد الكلام ده فى الافلام بس ..!! عارف ليه ؟ لان الفيلم بيخلص لما البطل و البطله بيتجوزوا و لكن فى الحقيقه الحياه بتكمل و بتبدأ المشاكل اللى مش سهله ...و فى حالة صاحبك ده المشاكل هاتبدأ أول ما يفتح بقه و يقول انا عايز اخطب ... بص ياجرووم اهل العروسه دول مش ناس هاتخطب منهم البنت و تاخدها و تجرى لا دول هايبقوا اهلك انت كمان و اجداد واخوال ولادك - و خلى بالك من النقطه دى جدا جدا - و مافيش حاجه اسمها طظ فى الناس المهم انهم يتجوزوا هاقولك غلط و اسمع بقى صوت الخبره بكل بساطه الحب قرار من القلب ( او العواطف ) و لكن الزواج قرار من العقل و لازم يتحسب بالورقه و القلم و المسطره .. و عشان الصوره تتضح هاديلك مثال توضيحى .

بعد الجواز و خلفة اول طفل ها تتفاجئ ان كل تفكيرك و حياتك و تخطيطك انت و مراتك هو كيفية تربية الولد و جعله احسن الناس و بجد بتفكر فيه 100 % من الوقت فاتخيل لما تكون انت مربيه بطريقه معينه و معلمه فى مستوى معين طلع عينك عشانه ... و يروح عند اهل مراتك و يسمع كلام تانى بأسلوب معين و شتايم فى الشارع و لخبطه عن اللى انت رسمتهوله ...طبعا هاتتضايق و تتعفرت و تتخانق مع المدام و تقولها انتى و اهلك السبب ....الخ الخ الخ ..

بص انا حاسس انك نمت منى و انا طولت عليك .. بس الخلاصه قول لصاحبك لو الناس على قد حالهم ماديا بس اجتماعيا محترمين و متعلمين و على نفس المستوى الثقافى يبقى يتكل على الله و طظ فى الفلوس ... و لو المشكله انهم كمان فى مستوى اجتماعى و ثقافى مختلف - و مافيش بينهم حتى مجال مشترك فى الحوار يعنى مش هايعرفوا يتكلموا مع بعض - يبقى يبعد احسن علشان حياتهم هاتبقى جحييم و هايبقى ظلم نفسه و ظلمها لأنها هاتكون حساسه من الاول وهى حاسه انهم اقل من عيلته ..لو عايزين يتجوزوا ممكن بس يبعدوا عن الناس خالص و يستقلوا بحياتهم تماما و الا هايبعدوا عن الناس غصب عنهم ... فتح مخك وقولى رأيك من غير حدف طووب :) تحياتى

Noony يقول...

السلام عليكم ورحمة الله وبركاته
أنا أتفق مع
shower-mirror
إن الوسط الاجتماعي مهم جداً--الاجتماعي مش المادي...فيه فرق شاسع بين الاتنين...لأن الماديات دي رزق من عند ربنا وربنا هو الرزاق-- لأنه هيتجوز البنت بعيلتها...يعني انه مش ينفع ان تكون الواحدة عايشة عمرها كله في وسط معين وبأسلوب حياة معين وهو يجي ياخدها منه ويفترض انها ممكن تتأقلم على أسلوب حياته ووسطه الاجتماعي كدة لأنهم بكل بساطة بيحبوا بعض (وطبعاً الكلام دة برضه ينطبق على الرجل)...وكمان هو مش هيتجوزها ويخليها تتبرأ من أهلها...لأن أهلها دول قبل ما هيكونوا أهله هو كمان (اللي هو المفروض يعني) هيكونوا أجداد وأخوال وأهل أولاده...لازم يبقى فيه توافق في المستوى الاجتماعي...دة شئ لا يقبل التنازل عنه...مش زي الماديات
وعلى فكرة الحب مش كل حاجة في الدنيا...الحب لوحده مش كفاية ان يقوم عليه الجواز

ودة رأيي بكل تواضع...واتمنى انك متخبطش تاني في سكان متشينة نسر!!

سلامااات

The Groom يقول...


و عليكم السلام و رحمة الله و بركاته يا سيد شاور و سيدة نوني

أنا حدخل فيكم شمال دلوقتي وححدف طوب

أولا - سلملي على اخوك وأخويا كتير وقوله ليك ناس في ماناساس البلد واسكندرية وال دي سي و فيرفاكس كمان - ولو انه بعيد حبتين عني وأنا كمان مابطيقشي مايكروزفت وبيل غيليس

أما بقا الموضوع بتاع المستوى الاجتماعي والله لو الاتنين متدينين و فاهمين اللي ليهم و الي عليهم صح يبقى خلاص مفيش مشاكل لو كان هو من المريخ و هي من الزهرة أوالعكس طالما متفقين و بينهم توافق وهي حتكون أحرص على تربية الأولاد حتى منه

في حالة صاحبي هما مستواهم التعليمي كويس الفكرة ان والدها على قده بس عياله كلهم تعليم عالي بس

حكاية أن أهل العروسة أهل يبقو اهل العريس طبعا و هذا أمر لا مفر منه لكن الفكرة في ان العريس لو أهل العروسة مش عاجبينه من الأول خلاص لكن حالة صاحبي انه هما عاجبينه أو على الأقل مفيش مشاكل من ناحيتهم بس البابا و الماما مش موافقين عليهم طيب ماهو باباه ومامته تعليمهم على قدهم كل الفكرة انهم عاشو في السعودية 20 سنة وعملولهم قرشين
يعني في الاخر الفلوس زادت معاهم لكن محدش فيهم مستواه التفكيري أو العلمي اتغير
وبدل مايعيشو في الصعيد عاشو في متشينة نصر وانا على فكرة انا كنت عايش فيها وكمان في احسن حتة فيها في ارض الجولف فوق يامال الشام اللي مسيطنا يعني بس الفكرة اني بكره العنصرية و التعالي و بتاع متشينة نصر يتنطط على بتاع الديزة و العكس أو بتاع شبرا
لا يعيب الانسان أين يسكن أبدا واحسن اصحاب ليا وفي اكبر الشركات في مصر في اي بي ام و مايكروزفت كانو في بولاق الدكرور و صفط اللبن
الانسان وظيفته تغيير الواقع يا ناس

كمان في حديث للرسول عليه الصلاة و السلام يقول (لم ير للمتحابين مثل الزواج) و صححه الألباني
أما بقا الوضع اللي احنا فيه فهو بسبب ان احنا ناس بنفكر تفكير متخلف و تعالو شوفو الناس هنا المسلمين بيتجوزو من بعض ازاي بدون تعقيداتنا دي وبيعيشو في حياة سعيدة و على فكرة أمريكا فيها حتت زي شبرا و بولاق يعني مستوى تعليمي متدني لكن الناس مش بتعيب في بعضيها اهم حاجة الانسان و الانسانة اللي حيتجوزو متفقين على كل صغيرة و كبيرة قبل الزواج وللاسف في مصر لا يتفقون ولو اتفقو لا يوفون لكن هنا لو اتفقو يبقى كلام زي السيف
طبعا فيه استثناءات بس الواقع هنا أفضل بمراحل من مصر لأن العادات التاريخية الموروثة التي اتحدى اي حد يجيب ليها أصل في ديننا الحنيف مش موجودة لكن فقط محاولة اتباع الدين الوسط الصحيح

يعني انا مثلا جدي لأبويا كان ايه حتتة مفتش تموين و جدي التاني لأمي كان مفتش في الجيش و جداتي الاتنين مبيعرفوش يقرو ولا يكتبو الفكرة ان ولادهم اتعلمو وخرجو من مستواهم ده حكاية المستوى دي هي اللي احنا اخترعناها لكن ما كانت أيام الرسول عليه السلام و لا يجب ان تكون في ايامنا هذه الأصل هو الدين و الاخلاق و طبعا التوافق في الشخصيات و الطباع بتاعت العرسان و طبعا الدين لما بنقوله يبقى يشمل الاسرة كلها وتاني مثلا اصحابي دولا اباؤهم في ادنى مستويات التعليم و لكن ربوهم تربية صح حمتهم من شتايم الشارع و حشاشين البانجو و ما الى ذلك

ايه رايك؟؟ عايز طوب تاني؟ عندي دبش ماركة اسمنت ماناساس والعبارة في الشكارة

أما انت بقا يا أخت نوني تعالي هنا فحكاية الوسط دي تعتمد على العريس و العروسة نفسهم يعني هما اللي بيختارو يعيشو ازاي و زي مابقولك التفاهم من الاول هو الاساس وهو اللي بيحل كل المشاكل والله لو قعدتي تبصي في الناس المتجوزين من كل الاشكال دلوقتي تتجبي كيف سبحان الله الراجل ده رضي او حب البنت دي أو حتى الناس دي او الفايس فيرسا حتلاقي ان العملية كلها نصيب و اظفر بذات الدين تربت يداك و بس

أما بقا سكان متشينة نصر فأنا بخبط في المتعاليين منهم فقط لكن المتواضعين زي حالاتك و حالاتي (يا سيدي عليا) يبقى تومام و مفيش تخبيط لان العنصرية دي شيء قبيح وأتمنى أن تزول هي و الطبقية و المراتب و العفش كله

صحيح نسيت

احلى صباح الخير من ماناساس البلد

سلااااااااام عليكم ورحمة الله

wanna b a bride يقول...

هاي عليكم يا جماعة

المستوى الإجتماعي

البنت يعني لو طلعت لقت نفسها عايشة في مكان مش راقي لأن باباها و مامتها لما جم يتجوزوا كانوا في بداية حياتهم و هو ده المكان اللي لاقوه ..أو هو أصلا كان مكان راقي و بعدين تدهور مع الزمن

كل ده مش مبرر لإن صاحبك يخلع

المهم البنت و مستواها الثقافي و العقلي

ياما ناس محترمين جدا و مظلومين في المكان اللي عايشين فيه

كل أهالينا موظفين ..و للعلم المستوى المادي مش مرادف للمستوى الإجتماعي

ياما ناس ساكنين في أفخر الأماكن و أرقاها و هما أصلا زبالة و أخلاقهم زبالة .بس هما صفايح وبالة ماليانة فلوس

و ياما ناس مستورة و أخلاقهم و عقلهم أنضف من مليون واحد عايش في مكان راقي

بالنسبة لصاحبك خليه يفكر يفكر يفكر لحد البنت ماتتجوز و تجيبلها عيلين تلاتة

أصلا هو واضح ان مخه مش تمام و أصلا مايستاهلهاش

سلام

The Groom يقول...


والله زمان يا برايد شرفتينا

أهو ده الكلام يا برايد يا سلام عليكي صح لسانك يالشاعر

بجد صحيح انا كنت عايز أوصل نفس المنطق ده في سطر أو اتنين لكن لاقيت نفسي كالعادة برمي الكلام رمي

شكرا على مجيئك

سلاااااااام من ماناساس البلد

emos يقول...

يا خرابىىىىىىىىىى لأ ميتقدملهاش و لو على الدين الدين بيقول ان لازم يكون فى توافق برضو مش كوسة هى و كمان 3 شهور مش كفاية خالص عشان يعرف حد دة انا اتخطبت سنة و معرفتش خطيبى على حقيقتة اللا بعد ما فسخنا الخطوبة
و بلاش النت ده ونبى لحسن بيوددى فى داهية

emos يقول...

يا جماااااااااااااااعة المستوى مش معناة هما معاهم شهادة ولا لأ لما وحدة يبقى ابوها جزار مثلا احفادو هيبصولوا ازاى هيتعلموا منة اية بنتوا متربية ازاى انتو نظرتكم سطحية اوى

The Groom يقول...


مش كل النت بيودي في داهية يا ايموس

طيب ماهو النت ده فيه ناس زي الفل اهو زي الحاج شاور و زيي طبعا احم احم

الفكرة ان النت ده وسيلة لكن احنا بنستعملها ازاي؟

أما بقا المستوى طيب يا بنتي واحد صاحبي والله اتمنى اجوزه لحد من اخواتي البنات بس كلهم صغيرين عليه اوي المهم صاحبي ده ابوه ميكانيكي في بولاق الدكرور لكن لما دخلت بيته و ذاكرنا سوا و شفت اهله و ابوه و امه والله ناس عسل

يعني تجربة تستحق لواحد عاش في الامارات و لما نزل مصر عاش في متشينة نصر عشان يعرف ان كل البشر متساوون في الحقوق و الواجبات و لا فضل لعربي على اعجمي الا بالتقوى

ممكن الجزار اللي بتقولي عليه ده على رأي برايد يطلع احسن من مليون واحد

فكري كويس تاني كده بالعقل لو انت وعريسك متفقين و متحدين حتربو عيالكم بالطريقة اللي تعجبكم و ان شاء الله ربنا يعينكم و محدش حيقدر يأثر عليهم غير بالطريقة اللي انتم عايزينها

الأصل في التربية و الأب و الأم يا ايموس

ربنا يوفقنا جميعا

سلااااااااام

emos يقول...

ايوااااااااااا الاصل فى التربية و الاب و الام يعنى ابوها و مامتها ربوها ازااااااااى بص هو اولان و اخيران نصييب بس عايز تعرف اللى اودامك نرفزو انا مع شور الصراحة و بعدين انا قرأت فى الموضوع ده فى كتب الدين كتيير اوى و من المستحب ان العريس و العروسة مستواهم يكون مناسب لبعض هو مش حرام و حاجة تانية ان اهل العريس مالهمش الحق انهم يقولو للعريس اتجوز دى و دى لا حتى لو مش عجباهم )قلت اقول كلمة حق برضو) و بعديين هو لازم يعرفها كويس قبل اى حاجة 3 شهووووووور مش كفاية عشان يحكم عليها

The Groom يقول...


على فكرة هو لما يتقدملها رسمي حيعرفها يعني انت مسلان عرفتي خطيبك على حقيقته بعد سنة و يمكن محصلشي نصيب
فانا كنت بقوله كده لكن يتخلى عنها لاوالف لا

طبعا الموضوع نصيب بس في حاجة احنا برضو اللي بنختار و تذكري انه لا يرد القدر الا الدعاء

طبعا مستحب تقارب المستوى في الدين بس برضو لو حبو بعض بجد يبقى الاصل في الدين اتمام الزواج وبناء الاسرة
وربنا يعين الجميع

سلااااااااام

emos يقول...

تصدق عندك حق فى حتت انو يتخلى عنها دى بس هو خلاص قالها بحبك و مش سهل ان حد يجرح حد بالسهولة دى ربنا يوفقهم و يهديهم و يستر بس انا برضو مع شور

Noony يقول...

وانا كمان مع شاور
:)
يقول صلى الله عليه وسلم
"تنكح المرأة لأربع : لمالها ، ولحسبها ، ولجمالها ، ولدينها . فاظفر بذات الدين تربت يداك "
الراوي: أبو هريرة - خلاصة الدرجة: صحيح - المحدث: مسلم - المصدر: المسند الصحيح - الصفحة أو الرقم: 1466

النسب مهم جداً

سلاااام

The Groom يقول...


مقلناش حاجة يا نهاااد

اللهم صل على محمد وصحبه و سلم

لكن

هذا لا يختلف مع ما قلته
كل ما قلته أنه أحبها و أحبته فهل يتخلى عنها بمنتهى السهولة؟

وبعدين هو ايه اللي ممكن يطعن في النسب؟ بقولك ذنبها أن أبوها سواق مثلا أو ميكانيكي أو أي مهنة "شريفة" و عيلتهم مش اخرها "علي" زي القرندلي و الموصلي و الدرملي؟ و مش عارف ايه؟؟
طيب ذنبها انها متعلمة و متدينة و زي الفل بس أبوها دبلوم صنايع و لا حاجة؟ خلاص بقا العرسان ولاد الناس المحترمين زينا احم احم ميرضوش بيها؟
لا طبعا مش ذنبها

طيب بلاش حطي انت نفسك مكانها؟ لو ده موقفه منك تعملي ايه؟ يعني الواحد بقا يدفن الحب؟ لا طبعا
كل الفكرة أنه يحسبها صح

أنا طبعا مش بعمم يعني في حالات معينة لازم فيها التوافق التام

لكن خلينا صرحاء شوية

الولد حمادة ده مسلا مستواه المادي اخره يجيب مفروش لحد ما يقسط مثلا حاجة يستلمها بعد 5 سنين ولا حاجة في احسن الاحوال يعني من الاخر جيرانا في المنطقة مسلا (هو كان جاري في متشينة نسر) مش حيرضو يجوزوه بنتهم مسلا يعني هو اخره بالعربي كده يأجر في اخر متشينة نصر في حتت لا تفرق كتير بل بالعكس شبرا احسن منها (حيث تسكن محبوبته)طيب يعمل ايه؟ يقول بقا المستوى؟
يعني اهو شفتي؟ المستوى عامل ازاي؟ مع ان الناس دي مسلا تلاقيها كلها كانت ايه و الفلوس عملت فيها ايه


متخلطيش بين النسب و الطبقية النسب يعني مش من عيلة حشاشين لا سمح الله و لا حرامية لكن النسب يعني أصل طيب و محترم وبس مش مهم مهنتهم ايه طالما شريفة و الأسرة كريمة و متدينة

حديث الرسول صلى الله عليه وسلم يقصد به أن كل هذه الأمور مهمة لكن أهمها الدين الذي ان توافر يبقى الحاجات التانية بالعامية بتاعت ماناساس ووركابل
workable
يعني يمكن التغلب عليها و تطويعها وطبعا بحدود الممكن مش حيضرب الارض تطلع عرايس يعني كان زماني مكتبتش كلمة على النت

ربنا يصلح الحال يا رب



سلاااااااام

Shower-Mirror يقول...

يابنى خلاص كلهم قالولك احنا مع شاور :) افهم بقى انا اللى كسبت ....

سيبك بقى من الفيلم بتاعك وبتاع صاحبك ده ... انت يا واد مالك بشبرا ياواد .. انت مالقيتش يعنى الا شبرا تضرب بيها المثل .. على فكره بجد انت غلطان فى حاجه شبرا المستوى التعليمى فيها مش متدنى ولا حاجه انت اكيد بس ماتعرفش حد هناك ...هو المستوى المادى للناس هناك هو اللى بسيط ... و برده مش زى الافلام مابتقول شبرا 70 % منها اغنيا و اغنيا جدا بس المشكله ان محدش بيقدر يسيب شبرا لأنهم بيموتوا فيها :) ...هو انا صحيح كنت ساكن هناك على النيل فى اغاخان و دى من افخر الاماكن فى مصر كلها ... و لكن انا و كل اصحابى مرتبطين بشبرا نفسها جدا اللى اتربينا فيها و اتعلمنا فيها .... و بعد ماتجوزت سكنت فى المقطم - اللى باعتبرها من اجمل و رقى اماكن مصر - وبرده مانسيتش شبرا و بعد ماشتريت شقه الرحاب و بعد ماعيشت فى دبى برده مش ناسى شبرا ....

لأ باقولك ايه كله الا شبرا دول اربعه مليون يابنى يقطعوك انت و ماناساس ..

اعترف بهزيمتك بقى و قولى جود جيم ...

ملحوظه : انا مبسوط جدا بالكلام معاكوا هنا ... بجد عيال تفرح احنا

emos يقول...

هو كلنا مع شور بس نقطة الحب دى صعبة بردو يا جماعة ان واحد يجرح بنت مش سهلة هو الغلط من الاول ان يحب من غير ميعرف هو بيحب ميين يعنى هو دبس نفسو من الاخر يشرب بقى

The Groom يقول...


حزب أعداء النجاح منك ليه ليها
:(

صحيح احنا مش في حرب بس انت برضو مكسبتش لأن ببساطة أنا قلت من الأول هي ساكنة في شبرا الخيمه

شبرا زيها زي أي حتة في مصر كلها مصر حبيبتي والله لو من بولاق و البنت محترمه وعاجباني ما حيفرق معايا

المشكلة في حاجة واحدة بس
في عقولنا - الولد ده حمادة صاحبي ده معتبر ان شبرا أقل في المستوى من مدينة نصر وفي الحقيقة أنا أعتقد أن القاهرة و اسكندرية تقريبا مفيهومشي أمية أو على الأقل متوسط المستوى التعليمي فيهم عالي و دلوقتي كل المناطق دي سواء كانت من أفخم مناطق مصر أو أقلها ماديا في النهاية متوسط المستوى التعليمي بتاعها كويس و تقريبا متساوي

يعني الخلاصة ان مصر كلها أمي و نيلها في دمي لحد ما جالي تسمم

يبقى احنا الاتنين كسبانين في النقطة دي

نيجي بقا لنقطة تانية أنا كسبت فيها لوحدي

وهي نقطة مهمة جدا بتاعت الدين يا مان - الدين هو اللي بيفرق و لو متقي الله صح و مش متدين على الوش بس يعني فاهم الدين و اللي ليه و عليه صح ولو الزوجة كمان كده يبقى والله لو الراجل من المريخ و الست من الشسمس مش حتفرق أبدا

هو ده الشيء اللي بيوحد المسلمين كلهم - دينهم لا حتقولي مصري ولا أمريكا لكن الدين - يعني نظرة شاملة للبشر

أما بقا يا ايموس الله يسامحك أنت المفروض تقفي جنبي مش تكوني مع شاور عليا وبعدين لما القلب بيحب المفروض العقل ميقولوش لا - عمرك شفتي حد عقله بيمشي قلبه؟-أما حزب أعداء النجاح بصحيح

مستني رد نوني و برايد

أنا والله كمان مبسوط أوي بحديثي معاكم - أنا أول عيل يفرح فيكم هاهاها عشان أنا أعيل واحد فيكم

على فكرة سكان ماناساس ظراف أوي ومش حيجيلك قلب تهبش فيهم انت و أهل شبرا - بجد حيصعبوا عليك - دولا شوية فلاحين غلابة و طيبين

سلااااااااام - من ماناساس اللي مش عاجبة حد - آه يا بلد

emos يقول...

من الاخر بقى يا عريس خذ النصيحة من مجرب و انا و شاور مجربين اسأل اى واحد خاطب او متجوز و هو هيقول لك نفس الكلام لكن انت و برايد مش مجربين (عقبال منشفكوا مجربين يا رب) عشان كدة نظرتكم للموضوع دة سطحية و رومانسية

The Groom يقول...


شوفي أنا مش حتكلم على برايد لكن حتكلم عن نفسي

يا سيدتي أنا صحيح حاولت أتجوز و أخطب ياما و مظبطش الموضوع بس في نفس الوقت ياما كنت أنا ولي أمر ناس راحت تخطب يعني أنا باخدهم من ايديهم واروح معاهم بيت العروسة و نخطبها من أبوها
والحمدلله حصل مرة أو مرتين ان الجوازة تمت - أصل الباقي فشلوا للأسف

المهم صدقيني أنا ياما شفت واللي خلاني أقتنع أن العملية في الاخر تفتيح دماغ من الطرفين عشان المسألة تستمر و طبعا توافق طباع شخصية و ليس مستوى اجتماعي - طبعا لو المستوى توافق فبها و نعمت لكن لو لا يبقى على الاقل الطرفين متفاهمين جدا بما يتيح التغلب على هذه المشكلة

أتمنى أن أكون قد أفحمتكم هاهاهاها

سعيد بصحبتكم

سلااااااام من ماناساس البلد

Noony يقول...

يا سلااااااااام

هي الحكاية حرب ولا اية؟...الموضوع بجد أسهل من كدة بكتير

أولاً..محدش قال أن الدين مش مهم..بالعكس دة أهم حاجة...وانا شخصياً مجبتش سيرة الموضوع دة عشان دة شئ بديهي..يعني أنا لو اتقدملي واحد مش متدين..مش هرضا أبداً أصلاً أدخله بيتنا...دة شئ مفروغ منه...وعلى ما أعتقد الكلام دة ينطبق مع كل الناس هنا

أما بالنسبة لصاحبك حمادة...بص يا سيدي... لو أقنع أهله بالبنت دي وأهله مقتنعين بوجهة نظرك للحياة دي..ميفكرش كتير ويروح يتقدملها بسرعة قبل ماتكون اتجوزت وجابتلها عيلين على رأي برايد

أنا ما زلت مع شاور..إن الوسط الإجتماعي مهم جداً لإنجاح الزواج...وانا مش بعترض حباً في الاعتراض...بس لما تبقى انت برة الموضوع سهل انك تقول الكلام دة مش زي لما تبقى انت في موقفه...الموقف يختلف (عن تجربة)...لو انت مهمكش الوسط الإجتماعي أهلك هيهتموا...وإن مهتموش، بعد الجواز هيبان الفرق بين الاتنين والمشاكل كلها...وأكتر واحدة هتعاني هي البنت...وعشان الناس اللي بتقولي طيب هم بيحبوا بعض...إن ربنا كاتبلهم يبقوا لبعض الموضوع إن شاء هيتم والصعاب كلها هتتيسر بإذن الله (بس هم لازم يكونوا فعلاً مقتنعين ببعض)...أما لو الموضوع كلكع من دلوقتي...يستحسن انه يتقفل في أقرب فرصة عشان كل ما الوقت بيمر كل ما هيبقى أصعب

أنا مبسوطة بجد أني بتكلم معاكم...الحوار معاكم ممتع بجد

The Groom يقول...



العملية مش عملية كلكعة الفكرة بس أن الولد ده معتبر أن عشان أبوها دبلوم مش جامعي يبقى البنت مستواها مش أوي و دي طبعا مالوش حق فيها

أنا مش عارف أحلفلكم و لا أعمل ايه عشان أثبتلكم اني بتكلم من واقع التجربة

طيب ححكيلكم حدوتة صغنونة
أنا هنا في أمريكا دخلي المادي و مستواي العلمي يمكن أقل من كل اللي في سني حتى الماجستير اللي بعمله في جامعة عاملة زي جامعة بيروت العربية مقارنة بجامعة القاهرة يعني في مكان ولا حاجة

يبقى أنا لما أتقدم لأي بنت كويسة هنا وأغلب العرب بيدخلو بناتهم هنا جامعات ممتازة ما شاء الله
طيب أنا لما أتقدم مش بس المستوى العلمي اجتماعيا كمان انا ماليش حد هنا يعني تقريبا مستوايا هنا صفر أو أقل بقليل مقارنة بأقل مستوى هنا ممكن أتقدم ليه

طيب ايه اللي ممكن يخلي بنت هنا ترضا بيا و تتجوزني؟ الدين يا جماعة
طيب والمستوى؟ لا دي ليس لها اعتبار هنا

طيب فروق المستوى بين هنا و مصر أكيد موجودة بس صدقوني برضو في حاجات هنا نسبيا برضو زي مصر
يعني ماناساس البلد اللي أنا ساكن فيها دي الناس هنا بتحتقرها و في ناس عمرها ما راحتها مع أنها أنضف من القاهرة نفسها بمراحل
طيب العيب في المدينة أو في مستوايا؟ لا العيب في الناس و تفكيرها

لأن الاسلام دين عالمي يبقى الأصل أن أي حد يتقدم لأي حد يتوافق عليه طبعا مع وضع المستوى في الاعتبار وايش حال ان ماكانشي الولد ده صاحبي مسلا احسن منها في المستوى؟ طيب ماهو قلنا من قبل مايقدرشي على مستوى المنطقة اللي هو عايش فيها؟

شفتو من غير مانفتح مخنا و نحسب العملية بالدين و العقل و الحب العملية بتكون صعبة ازاي؟

حد عنده رأي تاني؟ مواااااافقة

رفعت الجلسة - اللي بعده
مفيش بعده يا بيه - طيب يللا نروح

سلاااااااااام

emos يقول...

واضح انكم تعبتو من الناقشة شوفو يا جماعة مافيش واحدة هتتجوز غير جوزها و مافيش واحد هيتجوز غير مراتة يعنى دة نصيب خاللى صاحبك يصلى استخارة و يخش بقلب جامد و اللى هيحصل هيبقى نتيجة صلاة الاستخارة
و بعدين المستوى مش المستوى التعليمى
المستوى المستوى الاخلاقى على فكرة انا حماتى كان معاها ثانوية عامة بس ابنها مهندس محترم مافهاش مشاكل هما طلعو عيلة زبالة بس انا اول واحدة مبصتش للموضوع دة عشان كنت بحب

عبدالله يقول...

قشطه عليك يا مان قصه في الجون
:)
و الحرب الي شغاله هنا ده معناها الجون كان تسلل
:)
بص مفيش حاجه نقدر نخليها بصفه احكام يعني نقول الوسط مش ينفع و لا مش عارف ايه مش ينفع
الصح دايما في اي قصه بتاع من دول ياخد اهله و يروحلهم و هناك هيشوف بنفسه و مع الوقت هيقرر هيقدر يستحمل فروقات و لا لا

تحياتي

The Groom يقول...



100% @ emos

أدي كمان واحدة في صفي يا حاج شاور - ربنا يكرمك و تحج يا مان يا رب

استسلم بقا يا مان هاهاها

هو فعلا من الاخر الموضوع قدر و نصيب و أنا بحاول أقول من الأول ان الانسان يسعى و يعمل اللي عليه و النصيب يحكم في الاخر بس احنا نقوم بواجبنا

وانت كمان يا عوباد في صفي يا سلام يا سلام

انتم لو تقرو البوست كويس حتلاقو ان أنا رأيي من البداية كده أنه يدوس في الموضوع و لو محصلشي نصيب يبقى خلاص و طبعا الاستخارة دي مفروغ منها

ربنا يخليني ليكم يا رب و لا يحرمكوش مني

سلاااااااام

Noony يقول...

لا فوض فوك يا إيموس
أنتي جبتي من الآخر

عبد الله، انت قلت فعلاً حل واقعي جداً..يروح مع أهله لغاية بيتها ويقعدوا مع أهلها وربنا ييسر الأحوال

جرووم
تبقى تقولنا صاحبك عمل اية في الآخر

سلاماات

emos يقول...

شوفتو انا جامدة ازاى عايزة رأيوكو انتم بقى فى البوست الجديد بتاعى http://emosemos.blogspot.com

shermen يقول...

هوه الحل الوحيد ف الموضوع ده بجد من غير تهريج بجد يصلي أستخارة ويمشي ف الموضوع ويروح يتقدملها طالما هوه شايف انها مناسبة فإذا كان فيه خير يبقى واثق ان ربنا سبحانه وتعالى هيوفقهم للي فيه الخير أما لو ماكانش فيه نصيب فهتلاقي الموضوع اتفركش لوحده
أما بقى بالنسبة لمدونتك فهي ف الحقيقة حلوه اوي انا بحييك عليك

The Groom يقول...


شيرمين:
ماناساس ملهمتي ترد لك التحية

أنا من الأول قلتله يعمل كده وهو اقتنع وقريب ان شاء الله حيتخذ خطوة ايجابية لكن أنا حبيت أشارككم القصة دي في المدونة عشان نتعارك شوية لأني دايما خلف خلاف هاهاها

ربنا يكرمكم كلكم حليتو أيامي

سلاااااام

emos يقول...

اعتقد ان الخناقة خلصت و دى حاجة مزعلانى ماتتصل بصاحبك و تكتبلنا هو عمل اية عشان نعمل خناقة جديدة

The Groom يقول...


صاحبي لسه متردد يا ايموس وأول ما يجد جديد في موضوعه هقولك ان شاء الله

الحياة لازم تمضي و الخناقة الجاية و كل عام و انت بخير

متزعليش

سلااااااام من ماناساس البلد

emos يقول...

و هو هيفضل متردد كدة كتير قول لة يخلص خالية يصلى استخارة و يروح لواحدة الاول

The Groom يقول...



بقوله كل يوم والله يا بنتي انه يروح يخطبها وهو لسه متردد حبتين

على العموم انا وراه وراه ان شاء الله - و كمان هو بيستخير وقريب بيقول حيسمعني اخبار كويسة

يا مسهل

سلااااام

koukawy يقول...

اهو انا كاتبه بوستايه بخصوص الموضوع ده اسمها ؛ يا واخد القرد
انا من رأي انه لو مقتنع بيها هيتجوزها لو ايهههههه
بس في نفس الوقت مش عارفه هل العيلتين هيتفقوا ثقافيا و لا لأ
هو ممكن يتوفق ما بينهم بس مش دايما بيحصل
بس انا انصحه يجرب

TAMTAM يقول...

emos
يا جماااااااااااااااعة المستوى مش معناة هما معاهم شهادة ولا لأ لما وحدة يبقى ابوها جزار مثلا احفادو هيبصولوا ازاى هيتعلموا منة اية بنتوا متربية ازاى انتو نظرتكم سطحية اوى

ده كان كلام ايموس في اول الحرب بتاعتكم وانا حبيت ارد عليها رد صغير
انا جدي لبابا كان جزار وجدي انا كان سواق والحمد لله عياله بقى_ يعني عيلتي _طلعو محاميين وباشمهندسين ومدرسين والناس اللي غاوية دراسة وماجيستير
من الاخر كدة انا بابايا كان دبلوم تجاره وباباه اتوفى وهو في الجيش وكان لازم عليه يربي 9 اخواته مع مامته وكمل تعليمه ودخل الحقوق ومامتي مدرسة وانا باشمهندسة واخويا محامي والبقية تأتي
ولا احنا رادحين ولا عايشين بسواطير ولا الحاجات دي عشان جدي كان جزار

وانا مع الاستاذ شاور في كل كلمة قالها

وعلى فكرة معرفة النت مش كلها وحشة وانا شخصيا اعرف ناس مخطوبة ومتجوزة من على النت

وكلمة لحمادة ياابني لو البنت انت مقتنع بيها وهي فعلا تصلح لزوجة متتأخرش وتندم بعد كدةواحنا ماتولدناش في بقنا معلقة دهب انا زيي زيك عشت في السعودية وتمتعت بكل النعم بتاعت الفلوس بس مش دي اللي تخلينا نتعنطز على الناس

راجع نفسك واللي ربنا يريده حيصير

emos يقول...

الصراحة يا طماطم انا معرفش جزارين بس اللى انا قلتة دة من ما هو معروف فى التلفزيون و مش دايما التلفيزيون بيدينا صورة حقيقية
هى مش فكرة جزار هى فكرة عادات و تقاليد مش الاصد جزار
يعنى انا كنت اعرف ناس من عادتهم ان الكبار هم اللى بيتصرفو يعنى ابنهم لو بقى عاندو 50 سنة هيفضل برضو صغير و لو مسمعش كلامهم هيبقى قليل الزوق و مش بيحترم الكبير
انا بقى اهلى عاملنلى رأى ولما بقول حاجة صح او بعمل حاجة مش عجباهم ممكن اقنعهم بيها و لما تعاملت مع عائلة الولد دة بنفس الطريقة اللى تعاملت بيها مه اهلى بان ان انا مش بحترم الكبير و مش عاملاهم قيمة و ياما حصلت ما بينانا مشاكل و كل واحد فينا دلوقتى واخد فكرة سودة عن التانى
احنا شافين الولد ابن امة و مالوش لازمة و هم شايفنى بجحة و قليلة الادب
بغض النظر عن باباة اية و مامتة اية
فكرة المحيط اللى اتربى فية عامل ازاى

و انا شافة ان المنطقة اللى الواحد بيسكن فيها و الناس اللى بيحتك بيهم فيها ليهم عامل كبير فى موضوع العادات و التقاليد دة

متزعليش منى انا جزار دى مقصدش بيها اتكلم عن الجزارين انا بتكلم عن المبادىء
يعنى بالتأكيد مبدأ المهندس هيكون مختلف عن مبدأ واحد خريج اداب و كدة يعنى
انا اسفة مرة تانية

TAMTAM يقول...

يعنى بالتأكيد مبدأ المهندس هيكون مختلف عن مبدأ واحد خريج اداب و كدة يعني

ايمووووووووووووس
حعلن عليكي الحرب
مالهم بتوع اداب بقى ماانا باشمهندسة وهو حيبقى اداب بأذن الله

جروووووووووم انا ممكن اصور قتيل عندك

ابعد البت دي عني :((

The Groom يقول...


KouKawy

أنا طبعا نصحته يجرب و هو بيستخير دلوقتي يا جماعة و حيتخذ خطوة جد قريب جدا - ادعوله
---
tamtam
مالك سخنة أوي كده براحة - أقولك روحي لبرايد فضفضي هناك - السخونية دي دايما بتيجي عن تجارب - سعدت بتعليقك

في حاجة بس صغيرة - كلامك مختلف تماما في رايي مع كلام الحاج شاور - أما نشوف
---
emos

أرجع تاني وأقولك ان الاسلام دين عالمي يجمع بين كل الثقافات و العادات والتقاليد - فما بالك بولاد مدينة و احدة و ثقافة و احدة؟
راجعي كلامي السابق و كمان كلام طماطم
سورري طماطم مين؟ - طمطم يا ايموس طمطم
أل طماطم أل؟ أنت مين يا؟

على فكره يا ايموس انا عايز منك خدمة

عشان خاطري واحد كاميرا ديجيتال و أنا حبعت أجيب كل المؤثرات و القتيل الحلو المسمسم عشان طمطم ناوية تصور قتيل والصورة لازم تطلع حلوة - فتح ملبن تاكل عينك

اضحك الصورة تطلع وحشة

صوري يا طمطم و ماله؟ وأنا مالي

الحرب احلوت تاني أهي يا ايموس - هي الحالة ايه؟

أنا الصراحة لسه شوية متعكنن و مش في المود فأنتم اضربو بعض براحتكم وزيادة في التحفيز وعشان نهدي النفوس اللي تكسب يمكن أعرف أجيبلها عريس

ماناساس بتسلم عليكم

سلااام

الحصان الأسود يقول...

للأسف انا عندي تجربة في الموضوع دة مش كويسة

انا اتجوزت من وسط اقل مني ابوها كان نجار وربنا فتح علية وبقى عندة محل بيصنع ويبيع موبيليا

اللي عاوز اقولهولك ان الوسط الاجتماعي بيفرق فعلا

يعني لا بد ولا شك ان البنت واخدة من طباع وعادات والفاظ ابوها

وابوها سواق ميكروباص يبقى مش محتاج معرفة
انزل اركب ميكروباص واسمع الفاظهم وشوف خناقاتهم مع بعض ومع المارة والركاب
بلطجية من افخر الانواع

واكيد ان الالفاظ اللي بيتعامل بيها في الشارع بيتاعمل بيها في البيت

و بعيد مراتة اكيد من بيئتة ومن اخلاقة وطباعه
واكيد مستواهم وطريقتهم ونضافتهم في اكلهم ولبسهم مش حاتكون من نفس طريقتك ولا بيئتك ولا لبسك ةلا اكلك

حاتفرح لما تروح البيت عندهم وتبقى قرفان من اكلهم وماتقدرش تاكل معاهم
وتقرف من نضافة بيتهم وحمامهم ولبسهم

والبنت دي اكيد زي مامتها يعني حاتبقى قرفان منها ومن كعوب رجليها المقشفة و مشيها حافية في البيت وعدم اهتمامها بنضافتها الشخصية ولا نضافة البيت ولا نضافة هدومها و هدومك
ولما ييجي عيال حاتلاقيهم مش نضاف ولا هدومهم نضيفة ولاطباعهم ويمشوا في البيت حافيين زي امهم مثلا
وحاتبقى قرفان تزور بيت حماتك ولا تبعت عيالك عندهم و يتعلموا منهم الفاظ وطباع مش كويسة

دة غير الاهمال حاتلاقيها مهملة في العيال ومابتفهمش ولا حريصة عليهم وحاتلاقي الامراض من عدم الاهتمام بالنظافة ولا غسيل الخضروات
ولا الحوادث
البنت وقعت دراعها اتكسر وتكلمك في شغلك تيجي جري تجري بيها عالمستشفى تجبسهالها والست هانم مش دريانة ولا واخدة بالها
ولا ابنك وقع اتخبط في بوز المش عارف اية ودماغه اتفتحت و تجري بية عالمستشفي تخيطهالة

انا بقى شفت كل دة و قرفت من كل دة والنتيجه في الاخر فشل ذريع

The Groom يقول...


يا سيدي أنا ضد الحب الأعمى و محدش فينا خالص قال لو انت شفت كل ده قبل الجواز (وأكيد أنت حبك كان عاميك بس الحاجات دي ظاهرة أوي) يبقى تسكت عليها

اسمحلي

أنت الغلطان - العملية واضحة من الأول

ربنا يهديها ليك يا رب و يعوضك بصبرك خير في ولادك

سلااااااااام

TAMTAM يقول...

عجبتك الحرب يا جروم
طب بالعند فيك مش مكملة حرب معاها:D

بالنسبة للحصان الاسود
بالفعل انت غلطان من الاول وواضح ان كلنا مجمعين على ان المستوى الاجتماعي مهم والمستوى المادي لأ مش هو المهم

يعني انا معرفش جدي الجزار اجوز مين
بس جدو كسواق متجوز واحدة من البلد ومش بتعرف تقرا وتكتب _نينا يعني_ بس لما ربت عيالها دخلو كليات كويسة وبابا كمحامي اتجوز مدرسة وجدي لماما كان خياط فاهم يعني الاتنين في نفس المستوى الاجتماعي

يعني انا مش عشان مهندسة يتقدملي مهندس نظام نوادي وفسح وشرم الشيخ وكدة حقول ده عريس لقطة ومفرطش فيه بالعكس انا عمري ماحعرف اتفاهم معاه ولا اتعامل معاه وحختار واحد يفهمني وعيلته تتقبل بيا زي ماانا يعني عيشتنا في الاساس كانت متقاربة قبل ما نتجوز
اصل حكاية الحب دي انا مصرة انها بتقلب بتعود بعد الجواز وحكاية الحب يصنع المستحيل دي بجد افلام بس ، دي عائلات بتعيش مع بعض وعيال بتتربى وسط عيلتين

بص مش عشان جزار حتبقى عياله وحشة ،بالعكس ممكن الجزار ده يبقى عنده ابن دكتور او مهندس وبتحصل بجد ،واكيد الدكتور ده مش مامته دكتورة ،حتبقى ملائمة لباباه اكتر
بس المهندس ده مش حيتجوز واحدة زي مامته ، لأ حيدور على واحدة جامعية زيه بس اكيد من نفس المستوى يعني باباها جزار بقى موظف مش فارقة

مش عارفة كلامي اتفهم ولا لأ بس انا مصرة ان المستوى الاجتماعي لازم يتاخد في الاعتبار

emos يقول...

اية يا طمطم براحة عليا
مانا خريجت اداب اجدع ناس والله
شكلى كدة هتضرب
انتو اشرار
بس واضح ان محدش فاهم وجهة نظرى
هو الحصان الاسود الى حد ما فاهم وجة نظرى بس هو مزودها حبتين
دة بهدل العروسة خالص
انا نفسى اعرف اجبلكو مثال
هقول لكم
واحد كان زميلى فى المدرسة يا رب ميطلعش قريب طمطم
كان باباة متوحش
و مامتة عبارة عن الجارية اللى مشغلنها عندة
الولد دة يوم لمل هيتجوز طبعا مش هيلاقى بنت تقبل موضوع سى السيد دة مع ان الولد كان بيشوف مامتة بتركب ورا فى العربية و هو اللى بيركب جنب باباة عشان مفيش حاجة عندهم اسمها واحدة ست تجلس جنب راجل
الولد دة بقى لو عامل مراتة كدة و مراتة مامتها كانت هى اللى ممشية باباة بالتأكيد البنت هتتخنق

بلااااااش دى
واحدة صاحبتى لسة فاسخة خطوبتها قريب عشان خطيبها جة حكالها على مرات اخوة اللى خدت علقة سخنة من اخوة و جريت استخبت فى حماتها و اللى زود الطينة بلة انو فالها ان مامتة شخصيا بتضرب

واحد زى دة مش ممكن يضربها فى يوم من الايام مع العلم انهم كلهم كانو يعرفو ربنا و عارفين الدين

ربنا يستر و كلامى ميزعلش حد
صلى على النبى يا طمطم

emos يقول...

و بعدين يا طمطم انتى بتتكلمى على المستوى الثقافى انا بتكلم عن العادااااااااااااات

TAMTAM يقول...
أزال المؤلف هذا التعليق.
esraa يقول...

أنا موافقه علي كلامك انت, الانسان مش سهل انه يلاقي حد يحبه بجد, وهو بيحبها وهي بتحبه, يبقي ليه يبوظ الموضوع بقي, وبعدين هو هيتجوزها ولا هيتجوز باباها؟
خليه يروح يتقدملها يابني, وربنا معاهم(:

TAMTAM يقول...

عليه افضل الصلاة والسلام

اوك لغاية نقطة الاجتماعيات متفقين حلو اوي
بالنسبة للعادات انا معاكي اوي في النقطة دي
بس على فكرة حكاية الضرب دي مش بس في المستويات اللي بتتكلمي عنها
انا عن نفسي اعرف واحدة اطلقت من واحد كمستوى مادي وتعليمي وثقافي كبير اوي بس ضربها في الاخر ضربها

في كذا حاجة بس عايزة اوضحها:
1- لكل قاعده شواذ ودي حاجة لازم نبقى عارفينها اوي
2- يخلق من ضهر العالم فاسد ومن ضهر الفاسد عالم ودي برده اعتقد متفقين عليها
يبقى في حكاية الجواز دي بتبقى عايزة دراسة لأنه مشروع عقل مش قلب في المقام الاول
يبقى انا قبل مااتجوز اعرف الانسان اللي حعيش معاه مستواه الاجتماعي ايه وسلوكيات اهله ايه
في حكاية تانية بقى لازم تتغير في مجتمعنا ده
نظرة الناس للبنت اللي بتتفك خطوبتها
طب ماهي فترة الخطوبة معمولة عشان في الاساس الاتنين دول يعرفو ويدرسو بعض
طب متوفقوش وهما اتنين مش حينفع يستمرو فيها ايه بقى لو كل واحد كمل في طريق بعيد عن التاني؟؟!!

مازلت معاكي يا ايموس في وجه نظرك مع الاحتفاظ برأيي ان كل بني ادم وطريقة تربيته دي حاجة ملهاش علاقة بطبيعه الشغل

واحط تلاتة اربع خطوط تحت ان الشغل بيحط طبيعه معيشة للناس
يبقى بنت الجزار مش حتتجوز ابن الوزير وكدة احنا دخلنا في الاجتماعيات تاني
وحنفضل نلف في دايرة مغلقة لغاية لما حنقول ان الجواز قسمة ونصيب

على فكرة انا مسحت الكومنت اللي قبل ده عشان في حروف لزقت في بعض سوري يا جماعه وعندي دي

The Groom يقول...


يا جماعة

مش عارف كلامي ده ممكن يحل الحرب دي ولا لا

بس في حاجة كام نقطة

أول حاجة فاظفر بذات الدين تربت يداك

وكمان تخيروا لنطفكم

يبقى في الأصل اختار ذات الدين اللي مش حتتعبه بعدين لو فاهمة دينها صح

طيب في المقابل

ان جاءكم من (ترضون) دينه و خلقه فزوجوه

يبقى كمان هما يرضو دينه

طيب وباقي الحاجات

لو حاسس انه مستريح ليها و لأهلها مهما كانو يبقى خلاص يتوكل على الله

العملية في الاخر نصيب يا ناس و كمان في حاجة

أنه هو اللي بيختار و محدش ضربه أو ضربها على ايده

شوفو الناس هنا من كافة المستويات و الجنسيات بيتجوزوا و يتعاشيو ازاي مع بعض طبعا في مشاكل بتحصل و حالات طلاق لكن نسبة للغالبية = نجاح شبه مطلق

طيب أمريكا غير مصر أو بلادنا العربية؟ أه طيب يبقى مش احنا أولى؟

سلاااااام

وبعدين حكون سعيد يا طماطم لو الحرب خلصت - طماطم مين؟ أنت مين يا؟

yousef يقول...

اهم حاجه فى البنت اخلاقها وانها تكون لبقه وتحبك
صحبك طماع وبلغه اعتراضى على موقفه سلام

الحصان الأسود يقول...

لا والله يا أيموس مش مزودها حبتين ولا حاجة انا باتكلم عن واقع وتجربة مريرة مريت بيها في جوازتي الأولى

يعني مثال حي او بالدق عبرة لمن يعتبر

بس عاوز اضيف واقولك ان فترة الخطوبة دي كلها تمثيل في تمثيل

وافتعال للمثاليات في الرقة والهدوء والحرص والذوق في الملبس والمأكل والخروج والتعامل والمثاليات والطباع

وان كان الموضوع معي مختلف حيث كنت اعرفها فترة قبل الخطوبة

ولكن الخطأ كل الخطأ في التغاضي عن مظاهر ودلائل خاطئة يظن المرء انة قادر على تغييرها بعد الزواج

من الأخر كدة مافيش حد بيتغير

وربنا يجعل حظكم احسن من حظ اللي سبقوكم

يعقــــوب .... يقول...

يعني اللي بيقول مفيش مشكلة في المستوى الاجتماعي ده لو هي بنت و جالها سواق ميكروباص و كان فله و كل حاجة و فكره كبير و شكله نضيف و واد كده كامل بس سواق ميكروباص و كذا هتتجوزه؟؟ و لو كان ولد و جه لأخته هيجوزهالها

dr_diamond86 يقول...

ايه الحرب دي بس
ده الدنيا مولعة هنا يا جدعان
بصراحة التقارب ف المستوى الاجتماعى والثقافى والفكر والمادة وكل حاجة مهم
بس التقارب مش التطابق
انت بتقول ان صاحبك اساسا مش من بتوع لجنة السياسات يعنى والبنت كويسة دينيا وخلقيا
يبقى خلاص يروح يتقدملها ولما يرتبط بيها رسمى ساعتها هيقدر عن قرب يعرف و يشوف ويقرر هما هينفع يكملوا مع بعض ولا لأ
المهم بس ميخليش الحب يعميه، كل انسان بيظهر ف تعاملاته مهما حاول يتجمل
و ربنا يوفقه ويبارك فيه وفيها ويكرمه يوكرمنا جميعا بالأزواج والزوجات والذرية الصالحة

The Groom يقول...


ماهي المشكلة يا دكتورة دياموند ان صاحبي جبان

شكرا ليكي على زيارتك

تحياتي من ماناساس البلد