الاثنين، 9 أبريل 2007

حلم جميل - الجزأ الأول

السلام عليكم و رحمة الله
أول بوست في سلسلة أحلام جميلة
مش كلها أحلام نوم - فيها أحلام يقظة
بس طويل شوية - اللي مالوش نفس يبقا ميلومنيش بقا اني بعمله على أجزاء
:)
ادعولي
----
حطيت البارفان بتاعي - روما أومو - وروحت لابس الجاكيت وبصيت بصة اخيرة في المراية
يعني مانا لازم اطمن برضو ان المراية مش حتتخانق معايا زي كل يوم و اضطر مبصش فيها - دا حتى النهاردة مناسبة عزيزة
انت يا مرايتي ايه رايك النهاردة؟
ممم قمر ياخواتي بس سرح الحتة دي و قص الشعراية البيضا دي
ايه بيضا؟ ينهار؟ لا خلاص مش حبص في المراية تاني - هذا يعني انها غير موجودة - انت مين يا؟
اللهم حسن خلقي كما حسنت خلقتي - دعاء النظر في المرآة
اه والساعة و كله تمام و كده الطقم مظبط
الحق انزل بقا تلاقي الواد سمير فطسان تحت في الحر مستنيني في المرسيدس بتاعتهم - موديل اس 128 برضو
:)
أحمد سمير ده حبيبي وقرة عيني - طبيبي النفسي من ايام زمان و بحب دايما اغلس عليه
:)
ورحت واخد بعضي وطالع من الاوضة و خدت بالي اني لابس الشراب اللي ماشي مع البدلة و اخر تمام - اه تلاقي الجزمة هناك اهي
الله يكرمك يا نيما (اختي) لانك لمعتيها ليا - يا سلاااااااااااام الدنيا حلوة قوي
ورحت لابس الجزمة - حبيبتي الجزمة دي معايا من حفلة التخرج و مش بتقول لا ومكشرة عالطول لا بتفتح بقها و لا بتاع
من روكسي بتمانين جنيه بس شكلها ولا اجدعها ماركة مش عارف ايه
بييييييييييب بييييييييييييييييييييييب
طيب يا سمير متزوقش انا جاي اهو و رحت رازع باب الشقة ونازل جري
طبعا لازم ريحة يامال الشام تزكم انفي و انا نازل بس مش مشكلة
واحنا راجعين بقا انا لسه واكل - ايه الطفاسة دي
ولاقيت سمير و المرسيدس البيضا مستنيني
ايييييييييه يا عم اتاخرت كده ليه - وايه الشياكة دي انت رايح تتجوز؟
ايه يابوسمرة؟ مالك؟ يبني انت ناسي اني عايز اتجوز ولا ايه؟ لازم اكون شيك
صحيح من غير رصيد بس بكرة ربنا يفرجها مالك انت بقا
سوق وانت ساكت
سواق انا عندك اياك؟
اه :)
وراح الواد طالع طلعة امريكاني ال يعني بقا مستعجل
وخد المطب و طلع على اول الشارع و لاقيت محطة الاوتوبيس وشوية ذكريات ضربت في دماغي
بس مش وقت بلالين دلوقتي لحسن في ناس بتزعل
ودخلنا شارع النزهة و بدأت أنا في السرحان
يا ترى لما نروح هناك حقابل مين ولا مين؟
أول واحد حيكون مستنيني هناك مين؟ مين يا ترى؟
يا ترى حقابل مين؟ خلينا نشوف
والحمدلله بعد شوية بهدلة والدنيا حر والساعة 10 الصبح - صيف اغسطس بقا الحار
وصلنا المكان المنشود - سمير نزلني على الباب و سيبته يركن و يحصلني
ونزلت انا علطول و دخلت من الباب الرئيسي
أهههللللللاااااااااااااااااااااااااااااااان أهلا أهلا
عارفين مين كان في وشي؟
أنا قابلت برج كبير و طويل كده ما شاء الله حاجة بتاع مترين
عمري مشفته قبل كده بس عرفته عالطول - كان حبيب قلبي الحاج شاور
عرفته من طوله و من حاجة تانية - كان شايل في ايده مراية حمام
:)
اهلا يا حاج ازيك عامل ايه انت جيت من دبي مخصوص؟ ربنا يكرمك يا حبي
لا مجيتشي مخصوص هاهاها انا نازل اجازة بس
طيب :( استمتع بقا بالدنيا خليني اشوف مين تاني
الحاج شاور بالمناسبة كان لابس بدلة نبيتي مش عارف ليه - دي تتلبس في النهار؟ يمكن
وكان أليط كده و شيك و بتاع حسيت انه حياكل مني الجو - ربنا يكرمه يا رب
لا والله مش بحرضه على حاجة يا مراته - لا والله دانا غلبااااااااااااااان :)
وروحت سايبه يستمتع بشمس مصر عشان الي عندهم في دبي دي حريقة مش شمس
ولمحت بطرف عيني واحد قاعد تحت شمسية ظريفة كده أكنه على البلاج وشكله جاي من عمرة
أأأأأأه ده عوباد بتفكرني بنفسي دايما يا حبي
طبعا مقولكوش ما شاء الله حاجة كده طول بعرض ربنا يكرمه و يزيده - مش بنق أهو ما شاء الله
ولاقيته بيستمتع بالأزوزة الحمرة و حالق زلبطة عشان كده عرفته عالطول
مش بقولكم بيفكرني بنفسي؟ عبدالله حبيبي
ازيك يا عوبااااااااااااااااااااااد
اهلا اهلا ازيك يا مان عامل ايه؟ حمدالله على السلامة
الله يسلمك انت ازيك و ازي السعودية منورنا والله يا مان
اديني بستمتع بشمس مصر انا كمان اهو يا سيدي
كان لابس بدلة سودا مش عارف ليه - بيتهيألي الجو حر عليها
قولتله استريح يا حبييبي انا جايلك تاني نكمل كلام بس اشوف مين تاني هنا
انت ياض انت بتنفضلي؟
اخ نسيتك خالص والله يابو سمرة معلشي
الواد سمير كان لحق ركن العربية وداخل معايا - أنا لازم أجوزه الواد ده حبيب قلبي :)
نسيت أقولكم كلمة حبيب قلبي دي لما بيسمعها مني بيحس ان في مصيبة جاية - بتخوفه بجد
المهم رحت واخده وقولنا بقا الجو حر خلينا ندخل القاعة نشوف مين تاني هنا - غريبة الظاهر الكل هربان من الحرارة
ما عدا الاتنين حبايبي شمس مصر بالنسبة ليهم شتا بيستمتعو بيها
صحيح الجو كويس بس حر حبتين
المهم انا دخلت و لاقيت مفاجأة كبيرة أوييييييي
أهلااااااااااااااااااااااااااااااااااااااااااااااااااااااااااااااااااااااااااااااااان
لاقيت كل النااس جوا مستنيين
أول واحد منهم جري وخدني بالحضن - الغريبة انه كان بيرعش من الفرحة
طبعا عرفتوه = ارتعاشة حبيبي
يا عيني يبني انت خاسس ليه؟ كله من الطب و سنينه يخرب بيته
المهم يا سيدي الحمدلله اني شفتك وخدته بالاحضان و سمير بيقولي ايه يبني الناس دي كلها؟ انت تعرفهم منين
قولتله نق علينا بقا نق - مانت لو ليك مدونة كنت قابلت كل الحبايب دولا بس انت مالكش نصيب يا كسول
وطبعا الواد الوايت هوني ارتعاشة حبيبي راح قايلي كلمة في ودني حقولكم عليها بعدين
:)
ارتعاشة بقا كان لابس قميض اخضر مشجر يعني فيه شجر و بتاع وبنطلون اسود كده شيك
بيحسسني ان الدنيا كووول كده و حلوة - يا رب ارزقه ببنت رومانسية يا رب
انت تستاهل كل خير يا ارتعاشة يا حبي
وسمير طبعا عمال يبحلق مشدوها - أصل سمير ده يعني بيتاخد من الاماكن اللي فيها ناس كتير زيي كده
قولت بقا اخد الطربيزات واحدة واحدة من على اليمين
يعني اسلم على الحاضرين واحد واحد وواحدة واحدة
حوار باللغة الانجليزية عالي المستوى انا سامعه جاي من تلك الطاولة؟
اه صحيح - واد يا سمير انجليزي ده يا عبد الفتاح؟ معرفشي يا مرسي والله
يعني متعرفشي بيقولو ايه؟ أومال بس سنة في امريكا و بتاع
يبني انا بتكلم امريكاني لكن ده انجليزي عالي المستوى بقولك يعني انجليزي وهمي
والاقيلك الواد سمير يقولي طيب روح سلم و شوف مين دولا
قلتله طيب
أنا لاقيت بنتين ما شاء الله يعني
بس انا طبعا معرفهومشي بس قولت أشبه كده
الانجليزي الي كانت تفوح منه رائحة القاموس يبقى دي أكييييد نوووووووني
أهلااااااااااااااااااان السلااااااااام عليييييييييكككككوووووممم انت هنا؟ كويس والله انك جيتي انا كنت فاكر ان عمنا ابو دربالة ده مش حيسيبك في حالك
حمدالله على السلامة - انما ايه الشياكة دي انت جاية تدوري على عريس ولا ايه؟ يعني برايد تغير منك دلوقتي؟
انا بهدي النفوس بس - :)
ازيك انت يا جرووم؟ حمدالله على السلامة ربنا يكرمك يا رب
بحب كومينتاتك دايما يا نوني عشان كلها دعوات - بس لو متنسيش بس
أما بقا الانجليزي اللي تشم منه رائحة الأدب الانجليزي العتيق بتاع الشيخ زبير
يبقى أكيد أكيد دي أبيتاف صاحبة نظرات الصقر كده وعيون بتلمع و تحسسني انها متحفزة دايما
اهلاااااان ازيك يا 87 - بقا أنت غلبانة؟ أومال أنا اقول ايه بس دانا طلعت حمار انجليزي
دانا طلعت بغل صغنن - احم احم دي بتاعتي انا دي يا جروووم
طيب يا بوسمرة متزوقش يعني الله يرحم أيامك ;)
ازيك يا ايبي؟ انا عاتب عليكي بس عشان زياراتك لمدونتي قلت أوي
بس ولا يهمك برضو مستنيكي دايما
معلشي يا جروم مشاغل بقا و بتاع بس أوعدك أكتبلك حته بوست مخصوص عشانك فيه شوية انجليزي شكسبيري
طيب ياختي اهو ده اللي انت فالحة فيه تعقديني
اشحال اما ابويا مكانشي مدرس انجليزي؟ كنت عملت ايه؟
حرجعلكم تاني يا جماعة اما اسلم على بقية الناس
نسيت طبعا أعرفكم على سمير؟ سمير؟ انت فين ياض؟
الواد طبعا زهق مني و من الناس اللي ميعرفهومشي وجري قعد في الركن لوحده كده
اصل سمير ده مزاجه عالي أوي و عشان كده شخصيته ماشية معايا تمام - انتيمي يعني
وكمان بيحب الاركان زيي
طبعا القاعة فسيحة اضائتها متوسطة مريحة للعين و مستغلين نور الشمس في تناسق جيد عشان ينورو بيه جزأ من القاعة
والله اللي اختارت المكان ده بنت وهمية فعلا.....
أنا بقا سيبت ايبي ونوني يكملو البوست الوهمي اللي كانو شغالين فيه - قصدي الحوار الانجليزي الساخن ده لاني كنت عامل زي قرطاس اللب فيه او كيس الجوافة ولا أقولكم - شوال بطاطس لابس بدلة - و قولت اشوف مين صاحبة الرداء الأزرق اللي هناك دي
دي أكيد أكيد اسراء - عرفتها من الأذرق بتاعها
أيوة بس مين اللي جنبيها دي؟ آآآآآآآآآه دي أزميرالدا
-----
وهنا جاء معاد الشغل - نكمل في بوست تاني - شكرا لحسن المتابعة
:)

هناك 13 تعليقًا:

Noony يقول...

يا سلام سا سلااام...كل دة حصل؟
بجد فطست على نفسي من الضحك

الانجليزي الي كانت تفوح منه رائحة القاموس يبقى دي أكييييد نوووووووني

أنا هاخد الكلام دة على انه مدح طبعاً وأقولك ربنا يكرمك يا رب..بس مش لدرجة قاموس ولا حاجة..دة أنا على باب الله

وأبو دربالة دة ربنا يسهله بعيد عني..وبلاش سيرة البعابيع عشان بش بحبها لما تطلع لي لا في الضلمة ولا في النور..وخصوصاً لما تطلع في يوم أجازة

بس انا مقولتش..القاعة دي فين بالضبط؟
نصيحة..بطل شغل الولاعات دي
:)
مش ناسية طبعاً ادعيليك...وادعيلكم كلكم
ربنا يرضى عنا وإياكم أجمعين

أهو أول حاجة أقراها وأغعلق عليها بعد ما رجعت من السفر

امتعنا بأحلامك...مين عارف ممكن تتحقق
:)
يا تحفة

shermen يقول...

والله مش قادره اكمل قراءة طويل اوي

SAHAR يقول...

انا اول مرة ازور مدونتك واول مرة الاقي واحد عاوز يتجوز لاني شايفة ان ازمة الجواز في مصر ان الشباب هما اللي مضربين عن الجواز وطالعين فيها

shermen يقول...

ايه يابني كل ده حلم كنت بتحلمه في كام ساعة
والله معاك حق يا ساهر أول مره أشوف واحد متفائل كده ونفسه يتجوز

Rivendell** يقول...

لا حلوة الفكرة تمام


انا مستنية اشوف هتقول ايه عنييي


:)


طبعا هتقول لقيت واحدة قاعدة في الكورنر فيها شبه جاااامد جدا من برجيت باردو
ولما قربت
لقيتها بتتكلم هنليلي في التليفون
واتضح انهم كانوا مرشحينها لجايزة نوبل وهي بتقولهم
لأ لأ
ماخدوش يابابا ماخدوش يابابا


عارف لو حرف من اللي انا كاتباهم دول اتغير هتصل بخالي الوزير اخليه يرفع عليك قضية في المحكمة وتبقى زيك زي باقي المدونين المشردين في محاكم الجامهورية
:D

emos يقول...

تصدق ان انا صدقت كل الكلام اللى بيتقال و اول لما الموضوع جة فى بنات قلت الولد بيحلم بجد

بس تحلم بكل دووووول و انا مش موجودة ماشى اخر مرة هتشوف وشى فى البلوج بتاعك

مخصماك بس

نرفزتونىىىىىىىىىى

Shower-Mirror يقول...

تصدق انى اتخطفت بجد

انا ماكنتش فاهم حاجه ...بس لقيت انى اول و احد قابله ..ابتديت افهم .. بجد فكره حلوه .... و الف شكر انك افتكرتنى

و بعدين انا برج ؟؟

و بعدين انا ....!! انا ...!! ؟ البس بدله نبيتى ... حرام عليك ده انا مضيع فلوسى على الشياكه ... هههههه

و فى راجل محترم زيى يمشى و فى ايده مرايه ... :) و الله انت و اد مسخره بجد ...

بس بجد كلام جامد يؤكد انك انسان حساس فعلا و بتتأثر بالعلاقات الحلوه بين الناس

تحياتى ...

FrEe.PhArAoH يقول...

ههههههههههههههههه

جمييييييييييييييل .. فكرتك حلوه اوى

اسلوبك ودود جدا

تحياتى

Bride To Be يقول...

عجبتني فكرة البوست ده.. والمدونة عموما دمها خفيف.. الله يسعدك ويرزقك ببنت حلال تكون على الاقل خفضت عدد العازبات من معرفش كم مليون الى معرفش كم مليون ناقص واحد وبرضه نعمة :)
وبعدين ما تروح تتجوز اخت اسماعيين دلوقتي منته بقيت باشمهندس قد الدنيا :)
يالهوي اخاف تدخل فيه شمال اقوم امشي بكرامتي احسن!
سلام
(عروس المستقبل)

khaled يقول...

ايه يا ابنى انتا مجتش ليه
انا ماشوفتكش اكيد هناك

The Groom يقول...


نووووني القاموس

شكرا لك بجدعلى كل حاجة و الدعاء

تحياتي

----
معلشي يا شيرمين عشان خاطري

:(

تحياتي
----

سحر ضيفتي العزيزة

أهلا بك في مدونتي المتواضعة

أنت امتى جيتي من الزهرة؟

أول مرة تشوفي واحد عايز يتجوز؟ يعيني يختي؟ بقا أنا مضرب؟ أنا طالع فيها؟

دانا غلبان

تتجوزيني؟ هاهاها أوعي تصدقي أنا مش عايز أتجوز خاااااالص

تحياتي
----

شيرمين

الحلم خد مني تقريبا كام يوم

عادي بقا لما بنام من التعب بحلم و احلام طويلة تتكتب في مدونات وبتاع

اصله حلم يقظة

:)

شكرا لك
----
رافينديل!!!

خالك وزير؟ طيب شوفيلي شغلانة في الوزارة ممكن مساعد وزير انا برضو كوميدي و حضحك الشعب

ربنا يستر علينا

حاااااضر

شكرا لك

----
ايموس النرفوزة

ايموس عزيزتي أصل الحلم مش ناقص نرفزة في أوله

:)

بس ولو استني انت بس

:)

خدي بالك من نفسك

شكرا لمتابعتك الدائمة

ربنا يكرمك يا رب

وبعدين ماهو حلم يعني مش بكيفي

تحياتي
----

الحاااااااج شاور

البوست ده و الحلم كله اهداء شخصي لسيادتك

تحياتي

----

الفرعون أبو بلاش

:)

تحياتي يا فندم ومتقطعش الزيارات تاني

سعدت بتعليقك بجد

شكرا لك

----

براااااااااايييييييدددددد

أخييييييرررررااااااا يا بنتي عبرتيني

اشحال اما كنتش عامل المدونة مخصوص عشانك

انت فين من زمان؟ عساكي بخير؟
اوعي تكوني اتدبستي من ورايا انا اعمل قفلة و اطرقع أو أولع في دايرة نص قطرها القاهرة الكبرى

أنا بقولك اهو

امين يا رب

لا موضوع اسماعين ده خلاص بوست و راح

متخافيش أنا دايما بدخل باليمين

بس انت طمنينا عليكي وبلاش الغيبة الطويلة دي

خدي بالك من نفسك و من الهارد الجديد
:)

تحياتي يا عروسة

-----

خالد

أنا اللي مجيتشي؟ أومال أنا كنت بحلم للجيران؟ يمكن

على العموم تحياتي يا فندم وشكرا بجد لزيارتك العزيزة لمدونتي

تحياتي
-----

سلاااااااام من ماناساس البلد يا اخواننا

غير معرف يقول...

hahhahahahhahhhahha
grooooooooooooooooooooooooom :D:D:D
rabena yekremak ya rabbb ya rabbb :D:D:D
eh dh :D:D ana b2et bakteb fe postat kman ana msh 2d dh kolo
rabena yekremak ya 7abeby enak dakhalteny fe 7elmak l2 w dakhalteny sheek kman rabena yekremak ya rabb wlahy ana mabsooot awyy :D:D
ameeen ya rab el 3alamen w ya rab enta kman ya 3am tetgwez bs matnsnash b2a fe el fara7...
7abeby wlahy..rabena ye3zzak ya rabb

غير معرف يقول...

loooooooooooool


I read it in the very early morning a long with the other part... and was so happy

but it was pretty late..and I was about to miss the bus..so i had to run

looooooooool

ربنا يكرمك يا رب

و اتمني ان هذا اللقاء قريبا يبقي كله حقيقي و اوعدك اني مش ح اتكلم انجليزي هههههههه

سلاماتي