السبت، 14 أبريل 2007

بوست خفيف - 1

السلام عليكم ورحمة الله وبركاته يا اخواننا أنا مكانشي قصدي والله المرة اللي فاتت اني اضايق حد البوست اللي فات كان هدفه شوية فضفضة و اني اخرج كلام مخنوق في صدري من 8 سنين كاملة ربنا يكرمكم جميعا يا رب آآآآآآآآآآآآآآسف جدا جدا و أعتذر بشده لكل من أدميت قلبه و أوجعت عينيه ولكل من بكى علي أقول له جزاك الله خيرا و بكتك الملائكة يا رب ربنا يكرمكم جيمعا يا رب و يجمعني بيكم دايما على خير في الدنيا وفي جنة الخلد في الاخرة يا رب العالمين خدوا بقا البوست الظريف ده: :) ----------- الشيخ محمود حبيبي و حبيب قلبي و قلب كل شباب الحتة راجل سكرة و زي العسل عرفته من أكتر من 6 سنين ما شاء الله و لازلت مبسوطا منه ربنا يكرمه و يدخله الجنة يا رب قولو امين بدل ما تطلعو برا :P المهم الراجل السكرة ده عايزكم تدعوله كتير هو ما شاء الله عليه شباب و حيوية و نشاط وأهم حاجة فيه انه ما شاء الله بيسعى في تزويج الشباب وبكل ما أوتي من قوة طيب أقولكم سر؟ هو ما شاء الله مشي في جوازات كتير ودبس عيال كتير في بعض :) ربنا يجازيه خير يا رب أحكيلكم بقا شوية مواقف بتاعتي طريفة و ظريفة معاه -------- أول مرة عرفته أوي كان بيقولي يا ولد يا جروم و دايما يندهلي يا ولد مع انه قريب مني شوية في السن لكن برضو انا بحب يا ولد دي و هي بتطلع منه زي العسل بتحسسني اني عيل و دي حاجة محببة ليا :) طبعا مش من اي حد :@:@ المهم أنا أقوله نعم يا شيخ يقولي انت يا ولد روح لقسم السيدات فوق (أصل مسجدنا دورين) و هات منهم الورق التالي من طنطك فلانة طيب وانا كان عمري كام سنة ساعتها؟ كنت 19 سنة طيب ليه بيبعتني أنا بالذات؟ كنت أقوله ليه أنا بالذات يا شيخ؟ يقولي روح و لما تيجي حقولك ليه المهم أنا طلعت لطنطكم فلانة دي و بعد ما قعدت تطقس مني اخباري ايه و ابن مين و بنت مين تبقى اختي و لا ايه ومش عارف اخواتي فين و فين ماما مش بتيجي المسجد كتير ليه و بتاع أنا قولت في سر بالي أكيد يا ولا الست دي مش طبيعية و بالفعل لما خلصت منها بالعافية و أسألتها الكتير و بعضها محرج و بتاع ونزلت للشيخ تحت في مكتبه في صحن المسجد وانت يا عم الشيخ مين دي اللي باعتني ليها دي دا في الاف بي اي مش بيعملو في الناس كده قاللي ها انبسطت منها؟ قولتله اوعى تكون جايبلي عروسة يا شيخ قالي اه دي أم بنت من البنات و بتدور على عريس لبنتها وانا فطست من الضحك و انقلبت على ضهري و مقدرتش أقوم أتاريها عمالة تنفضني كان ناقص تطلع من جيبها بندقة ووريني سنانك يا حبيبي هاهاها هو انا بقرة حتسنن هاهاها المهم الشيخ بصلي وضحك هاهاها وقالي انت عبيط والله دي بنتها زي السكر قولتله طيب يا شيخ سنة عقل شوية هي كام سنة؟ قالي 25 سنة قولتله حرام عليك يا شيخ و فطست اكتر من الضحك انا لسه غلبااااااااااان وعيل هاهاها واترميت على سرير الملك قصدي سرير الشيخ وفطست من الضحك رجليا مش شايلاني المهم قالي ليييييييييه هو انت كام يا ولد؟ قولتله قول انت يا شيخ قال مش انت برضو 25؟ اهاهاهاهاها انقلبت تاني على ضهري هاهاهاها يا شيخ انا مجرد 19 سنة هاهاها الشيخ سكت و سهم و كتم نفسه من الضحك المتين وقالي بصوت رخيم قوم بينا نصلي العصر
روح ارفع الأذان يا ولد :):) ----------- مرة تانية كان اتنين اصحابي علي و محسن و دي طبعا اسماء رمزية كانو قاعدين معاه في غرفته الوهمية في المسجد دي مكان يا جماعة تدخله تحس ان الروح ردت فيك و انك مش عايز تطلع منها ابدا ما شاء الله بجد ربنا مدي فيها بركة عجيبة انا كنت بذاكر فيها زمان بس دي حكاية تانية المهم علي و محسن في مرة قبل الصلاة قاعدين معاه بيكلموه فعلي بيقوله يا شيخنا متشوفلي عروسة الحمدلله لسه متخرج اهو و ربنا يكرم المهم الشيخ قاله انت كام سنة يا علي قاله 23 قاله طيب انت جاهز قاله يعني ربنا يعين ويكرم ولو لينا نصيب حنتجوز قاله طيب سواني وراح رافع سماعة الموبايل وزي ما بقولكم كده والله راح رافعه و طالب نمرة واستنا على الخط شوية وبعدين قال ازيك يا فلانة عاملة ايه و سلامات و تحيات وبعدين انا جايبلك عريس علي بن فلان خريج هندسة السنة دي 23 سنة و تاريخ ميلاده سانية واحدة انت تاريخ ميلادك كام يا ولد؟ هاهاها كذا يا شيخ وتاريخ ميلاده كذا يا بنتي ينفعك؟ المههم محدش سمع قالت ايه وبعدين قالها طيب خلاص على بركة الله وراح قافل السكة وقاله خد ورقة و قلم واكتب عندك حتيجي معايا انت واهلك يوم الخميس الجاي نزور البنت و اهلها و تتعرف عليها هي خريجة صيدلة و قدك يعني او اصغر شوية و مفيش مشاكل وخلاص اعتبر الموضوع تم المهم الواد ازبهل و اتلون بكل الالوان والله بحب اوي الناس المخلصة دي وبمكالمة تليفون خلص الحوار هاهاهاها المهم قامو صلو العصر برضو وروحو وبعدين عرفت من محسن ان ام البنت استصغرت علي عليها مع ان البنت رضيت بيه واهو كله نصيب انا قولتلك يا علي يا حبي من الاول انت مالكش في الجواز و عمرك ما حتتجوز هاهاها أنا قولتلك من الأول انت مش وش جواز وحتفضل بينا دايما العازب الاشهر ربنا يكرمكم جميعا يا رب كفاية عليكم كده و نكمل مغامراتنا مع الشيخ محمود حبيبي قريب ان شاء الله

هناك 28 تعليقًا:

dondn يقول...

ايوة كده دى الحكايات ولا بلاش حقنا فعلا بعد ما خديتنا المدونه اللى فاتت

مااااشى يا عمنا العريس المستهدف بس برده بتطلع كل مره منها بسسس ان شالله هتيجى المرة اللى هتدبس ومش تعرف تطلع منها بجد..ربنا يوفقك ويهنيك في حياتك

نا مبسوطه ليا المرة دى السبق الصحفى اول كومننت

dr_diamond86 يقول...

ولا يهمك يا عبدالله
اكتب اللى تحبه يا ابنى
نكد، نكد علينا
فرح، فرحنا
جنان ، جننا
كله ماشى
بس بجد ايه ده احنا مش هنعرف ندبسك ونخلص منك بقى
اذا كان الراجل المبروك ده معرفش يخلص منك احنا هنعمل ايه
يلا مسيرك تقع برده
ابقى ابعتلنا الشيخ دة خلينا نخلص على شوية بنات وشباب ، قصدي يعنى نجوزهم
يلا عقبالك انت وعلىىىىىى

Noony يقول...

طالما الشيخ واخد على عاتقه المهمة دي ماتجيب لنا عنون الجامع دة..يمكن ربنا يجعله سبب في فك عقد البنات ويجوزهم...وأهو كله ثواب
;)
فكرتني بشيخ مقرب للعائلة شاب برضه..بيحب يجوز الشباب أوي..كنت بخاف كل مرة لما يصل بينا
:)

ربنا يرزقك بالزوجة الصالحة يا رب
وبرزق البنات اللي لسة متجوزوش بالأزواج الصالحة إن شاء الله

سلامات
نوني

غير معرف يقول...

هاههاههاهاهاهاههاهاههاهاهااا
انا عايز شيخ من ده في الجامع بتاعنا...

Nothing To Lose يقول...

ماشاء الله
ربنا يجعله فى ميزان حساناته يارب
ويعف شباب وبنات المسلمين يارب

yasmina يقول...

طيب كويس لو في شيخ زي هذا
ما تشوفه يا جروم يدور لك على بنت الحلال
ولا لسه بدري؟!!!!!!!
حلو جدا البوست
سلام

Anima يقول...

ربنا يكرمك و يكرم الشيخ محمود
الظاهر اني حاروح أزوره
يمكن يلاقي ليا عريس ههههههه

emos يقول...

جرروم
تبقى تكتب نمرت عم الشيخ دة عشان شكلنا كدة كلنا هنرحلة
و بعديين ازلى تبقى عارف عم الشيخ دة و مش متجوز
نرفزتنىىىىىىى

الوردة السوداء يقول...

على
ولايهمك
خيرها فى غيرها

groom
يابنى دى سمعة ناس
بلاش تجيب فى سيرة الناس
ههههههههه

Shower-Mirror يقول...

انا مش فاهم انتوا مطيورين على الجواز ليه

يابنى اصبر ...اصبر ... ان الله مع الصابرين

اعمل زييى ..اتجوز و انت عندك 27سنه

حتى اسأل الشيخ محمود كده ... :)

david santos يقول...

Hello, the Groom!
Thanks for you work and have a good weekend.

غير معرف يقول...

loooooool

dah ragel sokkara awy!!

ana a3raf set w gozha - a very decent family- masha Allah bey3melo keda bardo.. tawfee2 rasein fi el 7alal :D

bas..hmm.. enta moqtane3 bel idea aslan..?! :D

Rivendell** يقول...

هههههه

دا راجل عسللللل


بس ايه يا بابا المزيكا اللي انت مشغلها عالبلوج دي

دا انت طالبلها مترجم ... هههههه انا دماغي وجعتني منها

gohayna يقول...

اولا بقي بعد ما تجولت في البوستات الي فتتني

احلامك الاربعه بجد تحفه وكاتبهم بطريقه مشوقه متخليش الواحد يزهق وهو بيقرء

اما البوست بتاع ماذا لو مت الان

بجد خليت قلبي ينقبض
ودماغي تطرح نفس السؤال فعلا مين الي هيزعل عليا لمل اموت


ورجعت تاني لمودك الجميل مع الشيخ التحفه دا
بجد عايزين نعرف نمرته ولا اي معلومات عنه يمكن ربنا يكرمنا


متزعلش مني انا مقصره في دخولي لمدونتك بس والله غصب عني علشان مسافره قريب من مصر خالص


عموما هصلحك واسرق الورده السوده الجديده دي من غير ما تاخد بالك


تحياتي ليك يا جرووم

عبدالله يقول...

الا مقولتش هوا الشيخ ده اصلا مجوز و لا لا
غالبا كده من كلامك مش مجوز و بيجرب في الناس الاول يشوف ايه النظام
او يمكن اجوز و عنده تجربه وحشه و عاوز يعاقب البشر كلهم و يخليهم يجوزوا ويشوفوا الي شافه
:)))))))
علي العموم البنانيت الامامير هنا كلهم عاوزين تلفونه علي العموم هوا بيقدم ضمان الي مش هتتجوز هيجوزها هوا
:))))))

يالا ربنا يصلح احوالنا و يجوز بناتنا ويسفر شبابنا بره قبل ما يتقبض عليهم :)
الحق استخبي الايام دي بيقبضوا في الناس الي بتكتب و انت السي اي ايه هتجيبك يعني هتحيبك روح استخبي في مدغشقر بقي

تحياتي

تخاريف يقول...

مممممم

بص يا جرووم

بالنسبه للبوست اللى فات ...
معلش اصل فى كلمتين زنقنى ولازم اطلعهم ..ماشي
عشان اموت وان مستريحه

اللى انت كتبته ده واللى انت فكرت فيه ..:لنا فعلا فكرنا فى الموضوع ده..هنموت...ازاى؟؟؟وهنعمل ايه؟؟ونقعد نتخيل..كده زى مانت عملت..
بس المهم فعلا ان الواحد يطلع بحاجه من القصه دى...مايبقاش مجرد فزع وخوف..ونكد وخلاص

لا الاهم يبقى فعلا تذكرة ليناا كلنااااااا

وبالنسبه للبوست الجديد...
فربنا يكرم الراجل ده فعلااا..
بجد فعلا ادى الشيوخ ولا بلاش...
متبقى تقوله ع الجامع اللى جنب بيتى...
:)

Tamer Nabil يقول...

بوست لذيذ

ما تدينى عنوان الشيخ دة

\هههههههههه


تحياتى

ماسة الحب يقول...

عارف ان فعلا ناس كتير بتتجوز كده بس المهم ماتدبسش في جوازة من بتوع الشيخ محمود
لانه باين سره باتع

BinO يقول...

ربنا يهدي بالك ويريحك
ويتوب علينا وعليك
أمين
جزاكم الله خيراً

The Groom يقول...


دندووون العزيزة

هاهاها تدبيسة حلوة والله ربنا يكرمك و يدبسك انت كمان يا رب

وأنا كمان مبسوط ومتشرف أنك أول كومينت

تحياتي لك
-------

دكتورة دياموند

والله مايهون عليا ازعلكم و لا احزنكم

انا مابصدق تفرحو وافرح معاكم

ربنا يكرمك و يخليكي ليا يا رب و يسعد قلبك دايما


امين يا رب على دعائك وانا نفسي ادبس احلى تدبيسة بقا ان شاء الله

ربنا يكرمك و تحياتي لك
-----

نونييييي العزيزة

حاضر البوست الجاي بناء على طلب الجماهير حيكون عن الشيخ حبيبي ده

ربنا يدبسك في شيخ زيه يا رب هاهاها

ربنا يكرمك يا رب و يحميكي و يوفقك و يسعدك دايما يا رب

تحياتي الخالصة لك و امين على دعائك

-----

ارتعاشة حبيبي

تعالى عندنا و انا اظبطك :)

تحياتي يا حبي

-----

Nothing to Lose

أمين يا رب على دعائك و يكرمك انت كمان يا رب

تحياتي لك وشكرا بجد على الخطوة العزيزة
-----
ياسمينا العزيزة

اهلا بيكي و بأهل فلسطين

ربنا يكرمكم يا رب

الشيخ موجود فعلا انت مش قريتي البوست و لا ايه؟ هاهاها
هو بيشوفلي فعلا :P

حتعرفي بعدين :)

تحياتي الخالصة لك و لفلسطين
-----

أنيما

شكرا ليكي بجد على الترجمة

عينيا والله تعالي انت بس و انا اخليه يظبطك للاسف هو اخره مدينة نصر و مصر الجديدة

تحياتي الحارة لك
------

ايموس العزيزة النرفوزة

هاهاها انا اعرفه لكن وانا صغير

دلوقتي لما كبرت انا بعيييد للاسف :(

بس لما انزل مصر قريب ان شاء الله حخليه يظبطني

تحياتي الحارة لك
----
وردتي السوداء يا أجمل وردة

صحيح انا قولت لعلي ولا يهمك كله نصيب

متخافيش سمعة الناس محفوظة علي حبيبي اسمه الحقيقي مش علي و كلها اسامي سينما

ربنا يكرمك يا رب

نورتيني :)

تحياتي لك
-----

الحاج شاور حبيبي

اهلا يا مان شرفتني يا نبيتي :)

مانا صابر اهو بقالي 5 سنين و نص يا حبي

يا رب اتجوز قبليك و انا عندي 25 بس

هاهاها الشيخ محمود يا حبي بيقولي اتجوز وانت 15 هاهاها

جبتك يا عبد المعين

ربنا يكرمك يا حبي

تحياتي الحارة لك
-----

دافيد سانتوس

شكرا بجد ليك أيها الزائر اللطيف

Thanks a lot for your comments. :)

Greetings...
------

ابيتاف العزيزة

هو سكرة و كلكم سكاكر جمع سكر

ايوة الفكرة ممتازة و حل اسلامي شرعي مودرين ولا انت رايك ايه؟

أقوله عليكي؟ :P

تحياتي الحارة لك
-----

رافينديل

أيوة يا رافينديل هو عسل وانت عسل

انا قولت لأنيما تترجمها و هي متأخرتش ربنا يكرمها يا رب

أنا فاهم منها كتير اوي بس العادي محدش حيفهمها

ححط الترجمة قريب

ربنا يكرمك يا رب

تحياتي لك
-----

جوهايناااا

الله يكرمك يا رب بعض ما عندكم
:$

حاضر في البوست الجاي حتعرفو انا حعمل ايه مع الشيخ ده

لكن دلوقتي قوليلي انت مسافرة فين؟ ربنا يجيبك لينا بالسلامة يا رب و ادعيلي معاكي كتير دعائك مستجاب

ربنا يكرمك ويوفقك و يصلح بالك و حالك يا رب

تحياتي الصادقة و الخالصة لك و خدي بالك من نفسك و اهلك

خدي الوردة يا ستي هدية خالصة

تحياتي
----

عوباد حبيبي يا لئيم انت

:)

ايوة متجوز طبعا يا حبي

بس متخافشي نظريتك صح

هو بيؤمن بالتعدد والضمان اللي بتتكلم عليه ده موجود هاهاها

امين يا حبي

اما بقا على القبض فالعمر و احد و الرب واحد

تحياتي لك
-----

دكتورة شيماء تخاريف العزيزة

قولي يا حبيبتي من غير ما تكوني مزنوقة انا مش يرضيني تموتي بعد الشر و انت في نفسك حاجة والله ازعل اوي و اعيط طول الليل ده غير زعلي عليكي :(

الحمدلله لما كتبت كده لا خوف و لا نكد ولا فزع انا بس قصدت اني اعمل كده عشان اريح قلبي من كلام كاتم على نفسي بقاله اكتر من 8 سنين و انا بس بفضفض وانا بحاول اوصل رسالة معينة هي نفس الرسالة اللي انت وصلتيها دلوقتي :)

شكرا على انك فهمتيني

صحيح الشيخ ده وهمي اوي

خلاص ديل؟ اكلمه عليكي؟

:P

تحياتي لك
-----

تامر نبيل يا حبي

شكرا لتشريفك ليا

حاضر في البوست الجاي حتعرف

ربنا يكرمك يا رب

تحياتي لك
------

هاهاها ماسة الحب

ربنا يكرمك يا رب ونورتيني

فعلا سره باتع

تحياتي لك
-----

بينو

امين امين امين

شكرا لخطوتك العزيزة و شرفتني بجد

تحياتي لك
----

تحياتي الحارة ليكم جميعا من ماناساس البلد

Sampateek يقول...

ههههههه
انا قرات بس قصتك مع الشيخ محمود
انت تدي سن اكبر من سنك الراجل كان مغشوش فيك

ربنا يكرمك و يكرمه و يكرم ام البنت اللي عايزة تجوزها
يا رب زوج شباب المسلمين بالصالحين

تحياتي

gohayna يقول...

يا جرووم
ازي احوالك

ياسيدي انا مسافر الكويت عند والدي هشتغل هناك علشان بصراحه زهقت من هنا

وبعدين يا سيدي انت الي تدعيلي مش معاك الشيخ بتاعك الجميل دا

وصي عليا والنبي

وربنا يوفقك ويصلح احوالك
اميييييييييييين

The Groom يقول...


سمبتيك هنا يا مرحبا يا مرحبا

تحياتي لك و ربنا يكرم يا رب

اوعي ترجعي في كلامك في موضوع بنتك أصلي أومن بالتعدد

:P

تحياتي لك
-----

جوهاينا

أخبار الحليب ايه؟

انت عندك اكيد الخبر اليقين

يا ستي انا بخير الحمدلله

خدي بالك من نفسك

وندعي لبعض انت مسافرة و دعاء المسافر مستجاب

حاضر اكلمهولك بجد؟

مش بهرج والله

امين يا رب

تحياتي الخالصة لك من ماناساس البلد

ياسمين يقول...

ضحكتنى المرة دى بدل بوست الموت والدموع
تفتكر الجواز بالطريقة دى ممكن ينفع؟
هو عموما انا رأيى الن الجواز عموما وباى طريقة ما بينفعش
:))))))))

shermen يقول...

مش قلتلك بلاش تنشر الموضوع كل الناس عاوزين رقمه عاجبك كده الراجل هيزعل منك وكمان هيغير رقمه
تحياتي

أميرة البلطجية يقول...

ههههههههههه
الشيخ ده في امريكا؟
جميل اوي اوي دور المسجد عندكوا..ما شاء الله..عارف..انا برضه ليا صاحبة في كاليفورنيا وما شاء الله برضه بتحكيلي عن المسجد عندهم ..حاجة تفرح والله
ربنا يفك اسر مساجدنا هنا ويبقي للمسجد دور في كل جوانب حياتنا
تحياتي ليك يا عبد الله

The Groom يقول...


هاهاهاها طيب يا ياسمين

لا الجواز ينفع و حتثبتلك الأيام

يا رب اثبت ليها و عوضها يا رب

تحياتي لك :)))
----

هاهاها شيرمين العزيزة

مفيش حد حياخد رقمه لكن ممكن أكلمه ليكم كلكم عشان الراجل بيزي مان

تحياتي لك ومتطوليش الغيبة

-----

أميرة يا بلطجية

لا
الشيخ ده في مدينة نصر يا بتي

هاهاهاها
تحياتي لك انت من ماناساس البلد

koukou el kemil يقول...

اهو انا احب الناس المتدينه المرحه ملوش علاقه البوز و التكشيره بأنك تكون متدين و شيخ كمان
صث اخصش ساشنمخ يشةخ 7ذشبهب