الأحد، 1 أبريل 2007

حكاية حب - 2 من 2

السلام عليكم و رحمة الله و بركاته
مش عارف أقول ايه بس أنا سعيد فعلا بيكم و بمظاهرة الحب اللي بشوفها منكم مع كل بوست
ياخوفي تقلب بانقلاب
الساعة دلوقتي 3 صباحا وعندي شغل بكرة بس ولوووو فداكم والله ازيكم الاول ؟ يا رب تكونو بخير
انا يا جماعة في دوامة ادعولي اطلع منها
دلوقتي بقا نكمل الحكاية
---------------
آه يا بابا سعيد اه سعيد
اه يا عمو اتجنن ههاهاها اتجنن اه ياعمو
ولد يا جروم
نعم يا حمو
امشي اطلع برا
مالكشي دعوة بابني و خليك محترم بدل ما اقبقبلك
آه العملية قلبت محل جزم طيب خلاص يا عمو انا ماشي والله كانت نيتي خير
سلاااااااام
جروووووووووووم - لا ياعم معرفكشي خلاص انا خايف من باباك هو طيب بس طردني برا
ايوة عشان اعرف اكمل الحكاية براحتي من غير شباشب يا جروم
طيب
خلاص سلام انا عشان ورايا شغل الصبح كمل انت الحكاية لوحدك
طيب حشوفك عالقهوة بعدين - سلام
وهنا خلع جروم و بقيت هنا لوحدي
-------------
اه بجد يا بابا دلوقتي
ايوة يا احمد
بابا انا بحب بنت و عايز اتقدملها
ياااااه والله و كبرت يا احمد يااااااه ربنا يحميك يبني
قوللي بقا مين سعيدة الحظ دي؟ أنا في تلك الساعة لما ابني حبيبي يبقى عريس؟ اطلع منها انت يا جروم و امشي من ورا باب الشقة عيب كده أنا شايفك و ساكت من بدري :((
- حاضر يا حمو - اسف - سلام
أيوة يا بابا دي بنت معايا في الجمعية الخيرية أدب ايه و أخلاق ايه و جمال ايه مقولكشي والله يا بابا
طيب يبني انت عارف اني مش ضد الموضوع ده بس هل انت شايف انك مستعد نفسيا؟ طبعا الفلوس مهمة مش كل حاجة و بتروح و تيجي بس المهم انت شايف انك قد المسئولية دي؟
اه يا بابا ان شاء الله ربنا يعين و يكرم
طيب على بكرة الله بس مضطر اسيبك لوحدك تواجه والدتك وانا حهديها وربنا يعينك على اختك
آه
بس انا قولت اطمن منك انت الاول يا بابا
يبني انا معاك على طول الخط وتوكل على الله و شوف حتقنع والدتك ازاي
-------------
أسف على المقاطعة تاني - أنا جروم
الولد حكالي كل التفاصيل دي بس محاكاليش غير موقف اخته الي جاي في السكة والدته محكاليش الحوار دار ازاي بس انا ححاول الخصلكم والمهم النتيجة
:(
شكرا لحسن الاصغاء
- وامانة عليكم متضايقوش من اي حد في القصة دي و ادعولهم كلهم لان احمد ده عزيز عليا أوي
------
نوتة (دي اخته)
انت شفتي صور حفلة التخرج؟
اه يبني مليون مرة دانا لسه سايبة السي دي في الجهاز
طيب و ملفتتش نظرك أي بنت فيها؟
وانا قولت الكلمة دي من هنا و هي جريت من غير ما تبصلي و لا تكلمني و بمنتهى الحماس جريت فتحت الجهاز واستنت اما الويندوز فتحت و راحت مشغلة السيديهاية و هاتك يا فحص و تمحيص صورة صورة
:)
بصتلي مرتين.....
وبصت للشاشة مرتين و هاتك يا عياط
ايه يبنتي في ايه؟
بس اوعى تقول ان هي دي اهيء اهيء اهيء
يبنتي هي مين انت بتشاوري على الصورة الجماعية بتاعت الدفعة كلها
اه بس اوعى تكون دي اهيء اهيء اهيء
اللهم اخزيك يا شيطان مين طيب هو انا قلتلك على حد انت لسه عرفتي مين؟
اه انا حاسة ان هي دي صح؟ اهيئ اهيء اهيء
وراحت مشاورة عليها تمام و صح الصح - طلعتها منين دي مش عارف
وانا طبعا اذبهليت و نص ساعة على مافوقت تاني
- انا عارف ان في ناس اتبسطت من النص ساعة الاولانية حتى اقروا الكومينتات على البوست بتاعت جروم هاهاها ظريف انت والله يا جروم
ايوة ظريف
ولا ياجروم انزل من الشجرة و نط من البلكونة و اياك تتصنت تاني يا قليل الادب
يبني مش عشان اعرف احكي الحكاية كويس؟ - خلاص ماشي متزوقش
زيييييييييييييييييو طوب ااااااه يا ضهري
احسن تستاهل اديك وقعت من البلكونة عقبال ما تقع من طيارة يا شقي
الللل ااا ه ييي سسسااممحك يا ااححمممااااددد اااااااه يااااااا ضاااااااهريييييي سلااااااااااااااااااام
المهم بعد ما غار الواد جروم رحت زي الشاطر وفوقت من النص ساعة اذبهلال حقيقي بجد يا جماعة
روحت اكلم اختي مالها بقا منى دي يانوتة؟ ماهي زي الفل اهي
ياااااي دي مش مستوانا يا احمد دي مش حلوة اوي وبعدين لبسها كده ... يااااي
يبنتي مالها ماهي زي الفل اهي وماله لبسها دي محترمة ما شاء الله اهي؟
نسيت اقولكم انها في الصورة زي الفل فعلا و اجمل صورة ليها انا شفتها - طبعا في الحقيقة هي احلى
نسيت اقولكم كمان ان البنت دي دفعتي من زمان مشفتهاش يعني من سنة تقريبا غير في الجمعية الخيرية
اكيد فهمتهم كده بس دي للي لسه مفهمشي :)
المهم روحت متنرفز يعني يا نوتة مالها بالظبط يعني ماهي حلوة اهي ايه اللي مش عاجبك فيها بجد؟
اه يا احمد مش عارفة يعني مش حاسة انها لايقة عليك كده مش من مستوانا (الله يخرب بيت الكلمة دي - دي مني أنا جروم)
يعني حاسة كده انها انها ........... مش عارفة
طيب خلاص خلاص
--------
أنا جروم تاني
الواد معرفشي عمل ايه تاني مع امه و اخته بس راي امه تقريبا كان مع راي اخته مية في المية
المهم هو بعد مداولات و شد و جذب قالي بقية الحكاية بس انا مش حعرف أألف قصة أمه معاه خلينا في الي اعرفه للاسف
--------
أنا طبعا بعد ما اتخانقت و بالعافية اقنعت ماما و نوتة ان احنا نروح نشوفهم
- يعني مالها مصر الجديدة لما يناسبو من العاشر يعني
- ما كلنا بشر و لاد تسعة
- الله يخرب بيت الفقر
المهم يا جماعة في الاخر و بالاكراه ماما و بابا و نوتة حبيبتي نزلو معايا و ركبنا العربية و عدينا جبنا هدية حلوة و رحنالهم البيت وطول الطريق انا بفكر حيحصل ايه و حتكلم ازاي ياريتك معايا يبني يا جروم لاني لخمة في الكلام ده
معاك يا واد :)
- اتاري الواد العفريت كان في شنطة العربية - خليك لا بابا يحس بيك
اييييييييييييييييييييييييييييءءءءءء
تاااااااااااااااااااااااااااااااااااااااك
الحقونيييييييييييييي
اااااااااااااااااااااااااااااااااااه
تاااااك
فررررررووووووممممم
أتاري بابا فرمل فجأة ونزل فتح شنطة العربية و رمى الواد جروم من الشنطة من فوق كبري اكتوبر و كمل طريقه عادي
وكل ده في دقيقة وفي الدقيقة التانية انا كنت ببص لنوتة و بندحك من قلبنا على جروم على الرغم من فداحة الموقف بس مقدرناش:)
وبعدين ده بسبع ترواح ده تلاقيه حيصحى من الحلم قبل ما يغرق في النيل و لا حاجة هاهاها
المهم فضلت سرحان شوية تاني لحد ما وصلنا بيتهم
بابا خاف من الاحراج و لا حب يخلي الامور خفيفة في الاول مش عارف -اكيد بابا حبيبي كان عارف النتيجة من الاول :(
---------
جروم تاني :)
أنا عومت لحد التحرير عادي انا مش بعرف اعوم
خدت ميكرو لحد العاشر بس بيت البنت كان حص منيع
لكن اللي اعرفه عن اللي حصل انهم خرجو بعد شوية مكشرين
----------
أنا خرجت من البيت مذبهل لتالت مرة و بضرب كف على كف و ببص لنفسي و مش قادر ابص ورايا و عيني في الأرض
ايه اللي حصل ده؟ نص ساعة بس؟وبسرعة كده؟بالسهولة دي؟
ماما و نوتة كانو خارجين خروجة نابليون لما بينتصر في كل معركة و يطلع السيجار الكوبي الفاخر يحطه في بوقه
و يقول:هاهاهاها - انتصااااااااااااااارت
ويلوك السيجار بفمه من دون ان يشعله
احم احم
- كمل يا واد
- لا مش حقدر
--------
أنا جروم تاني دلوقتي
انا اللي حكمل
فعلا الواد يا جماعة فضل طول الطريق يوميها مروح وهو تعبان أوي عشان نلخص والباقي تفاصيل مش مهمة و انا مالليش نفس اكمل الصراحة المهم أمه و أخته قامو بالواجب و راحو معاه بس عشان يجاملوه لكن من الاول نيتهم مبيته يتريقو على كل حاجة و يفشكلو الجوازة و مش مقتنعين ب العاشر ولا بالبنت و لا اهلها - فكروني والله بأبوها سواق ميكروباص يمكن؟
(على فكرة احمد ده غير حمادة بتاعنا)
الله يلعن ابليس المهم الواد طيب أوي و مش بيقدر يقول لأهله لا
قابل البنت تاني في الجمعية و اعتذرلها عن موقف اهله بشده أوي و كان حيعيط بس في حاجة - أرجوكم في الكومينتات لا تقسوا عليه و لا تشتموه أو تمسوه لأني حزعل فيها شخصيا دي
هو عارف غلطه كويس و ندمان
المهم البنت بعدين مشفهاش تاني و الحمدلله ربنا كرمه و سافر المانيا يعمل الماجستير دلوقتي
لكن في حاجة دايما في قلبه
المهم من كام شهر قبل مانزل انا مصر دخلي على المسنجر و كان الحوار التالي:
أنت عارف يا جروم انا حلمت بايه من اسبوع كده؟
خير يا مان اللهم اجعله خير
ده نص الكلام
ma7aketsh el 7elm le7ad khales
7elemt inny rege3t masr we ro7t el koleya
we kan fih masra7eya shaghala, el talaba 3amelnha
we ana kont nawy akallimha we a2ollaha ne7awel nesalla7 el mawdu3 sawa, bass
lw heya 3ayzawe ba3din ro7t la2itha a3da
طيب؟
el masra7eya kanet prova
طيب
bass heya kanet labsa aragooz lebs melwaen keda we 3ala rasha baruka
we weshaha melwaen
zay fil serk bel zabt
لا حول ولا قوة الا بالله
a3adt gambaha wana mesh mesadda2
طيب كمل وحصل ايه تاني؟
masdum we makhdud milli ana shayfoh, we ba3din fi west el nass oltelha ta3ali 3ayez akallimik
heya tab3an itfag2et beya 3ashan makanetsh te3raf inny rege3t mil safarwe kanet fi noss hudumha
هي من الاول في نص هدوم الاراجوز ما علينا
bass ana kont 7ases bel zamb awy, we oltelha ana mesh 3arif a2ool eh, bass kolloh momken yetsalla7
كمل ياللي مبتعرفشي تحلم هاهاها
kont 7ases inn ana elle sebtaha tetbahdel
ههاهااها انت السبب في الاراجوز؟ انت لازم تشوف الفيلم بتاع الاراجوز بتاع عمر الشريف
we ma3reftesh aratteb kalam we a2ooloh we kont mortabek giddan we se77et mil noom, met3aknin giddan
7atefdal tettarya2 zay el 3eyalana ghaltan tozz fik fi3lan
فاصل صمت منه و شوية عياط مني و ندم و بجد انا بهرج في ايه يا مان و شوية مواساة ثم
ana fi3lan bat3aknin awy , we ayyam tawila kaman lamma bafakar fil mawdu3sebny a3raf azaker lemti7anaty
لا خالص المفروض تكون شجاع و يا تنهي الموضوع بانك تتقدم تاني و تصمم عليها لحد ما تتجوزها
يا تنهيه بانك تنساه متعلما منه درس انك تقاوم للنهاية في ما تريد
و ياريت لو يتحول الموضوع لذكرى جميلة لطيف مر عليك في زمن ما اخذت منه ما اخذت و تركت منه ما تركت
وسمع كلمتي و قالي كلمة واحدة
شكرا
وصمت تام وبعدين انا رزعته شوية فضفوضات من قلبي
رزعتها و بتألم في ساعتها علطول
عشان كده البوست ده مفيهوش فضفضة كل مرة - معلشي يا دكتورة تخاريف - اسف
----------
ياما زمان كانت الاحلام و ياما جالي في المنام انسان
شكله كأنه طير لكن ماهو طير ليه وجه بالحزن مليان
يا هل ترى مين كان السبب و مين اللي بدأ الاحزان
لو كان في المقام كلام و لو كان في النفس اشجان
كنت ما توانيت و لا تأخرت في السؤال مين القادم الحيران
مين اللي كل هذا على وجهه و فيه من الألم ألوان؟
انت مين يا انسان انت مين يا انسان؟
مش انت بل انا الحيران
نظر في وجهي نظرة العتاب و مضى في عالم النسيان
ياليتني ياليتني كنت أنا أنا في ما مضى من الشجعان
حكمة الله في خلقه و مليت انا من النوم و صحيت زعلان
لكن تظل في القلب ذكرى و طيف و صباح الخير يا انسان
----------
اول مرة في حياتي ارمي كلام على حاجة معينة بتخيلها
المهم احمد بعديها قالي كلمة واحدة
ana me7tag araha sett marrat kaman
وسابني و راح اوفلاين و انا عيطت - عادي انا دمعتي قريبة شوية وبس انتهى البوست - لو سمحتم محدش يغلط فيه و لا في عيلته و لو بتريأه والا حمسح بيه الأرض آآآه - الوش الخشب بيطلع وقت اللزوم
مستني تعليقات حنينة تواسيه و تواسيني
وشوية عقل تحياتي من ماناساس البلد

هناك 23 تعليقًا:

THE_DREAMER يقول...

عندما يدق القلب بالحب ..
عندما تهفو النفس للقاء ..
عندما تسهر العين من الإشتياق ..
عندها.. ندرك حقيقة الحياة !!
وسيحين بعدها الفراق
ولكن ستظل الذكريات..
دائماً هناك ..
نسطر منها الكلمات ..
ونستحضر بها العبرات ..
لنذكر من أحببنا..
كيف كنا ..
وكيف كانوا !!
مش عارف ليه افتكرت الكلام ده بعد ما قريت البوست بتاع النهارده مع ان بقالى فترة مكتكبتش حاجة بس فكرتنى يا ولد يا جرووم بالذى مضى ؛) يمكن ابقى احكيلكو حكايتى فى مرة بس مش عارف بقى مين يا ترى هيبقى صاحب السبق الصحفى الجامد ده صاحبتنا برايد ولا أخونا جرووم :) يالا كده يا أولاد شجعوني و قدمولى عروضكوا مش برضو الجرايد و القنوات الفضائية بتدفع فى المواضيع الجامدة وبعد كده يضحكوا علينا و يقولك Exclusive
اما نشوف شطارتكو بقى :)
المهم اولاً اهنيك يا جرووم على البلوج اللطيف ده والله أول مرة ابعت كومنت لحد و ثانيا عندى بس كلمتين لصاحبك أحمد يعنى اعتقد انو معملش اللى عليه بما فيه الكفاية فى الموضوع ده و بيتهايئلى كمان ان ترتيبه مكنش مظبوط يعنى مكنش المفروض يدخل بيت الناس الا و هو مالى ايده من اهله طالما هو زى حالاتنا كده مبيحبش يزعل اهله ! نصيحتى انه يجس نبض البنت (معلش دكتور بقى ) و بعدين يحاول مع اهله تانى بهدوء وعقل لأه مش حاجه سهلة انك تلاقى حد ترتاحلة و تحبه و يبقى مناسب ليك . أو بقى زى ما قلت يا جرووم ينسى بقى و اديه كده كده بعيد فالنسيان هيبقى اسهل كتييييييييييير من اللى زى حالاتى كده !!!
وكل سنة و انتم طيبين :) سلام

Noony يقول...

السلام عليكم ورحمة الله وبركاته

أولاً...الساعة 3 الفجر وعندك شغل بكرة وقاعد تكتب بوست جديد يا مفتري؟ صحتك أولى يا بني...مش عارفة هتسمعوا الكلام امتى
ثانياً...أسلوبك مسخرة...بجد تحفة..ليك مستقبل باهر بجد...اكتب كتير حاجات من النوعية دي...خيالك خصب فعلاً في تداخل الأحداث بعضها ببعض
ثالثاً...من الآخر كدة، صاحبك يشوف أهله الأول، لو فيه منهم أمل وهيتنازلوا عن نقطة المستوى دي يروح يتقدم فوراً دون تردد أول ما ينزل مصر..أما إذا هو شايف انهم هيفضلوا متمسكين بوجهة نظرههم ومش مقتنعين بالجوازة دي..ينسى الموضوع وربنا يعوضه بالزوجة الصالحة إن شاء الله
لأن صعب إنك تبني حياتك على عدم رضا الأهل...الجواز دة "صهر" و"نسب" يعني لازم العيلتين ينصهروا في بعض ويبقى فيه بينهم توافق من الأول عشان الحياة تبقى سلسة

ربنا يلهمه الصبر والصواب يا رب

مغلطناش أهو يا حج جروم...متهيألي مش هتلاقي حيادية أكتر من كدة
:)

سلامات
نوني

Esmeralda يقول...

بص مخابيش عليك
انا اتلغبط شويه فى الاول

يا ريت نركز بقى مش ناقصين توهان

انا حاقراه تانى و امرى لله

سلام

shermen يقول...

أخص عليك يا جرووم كده بردوه مش انا قولتلك بلاش النهايات المأساوية بتاع الأفلام العربي دي أهم أفترقوا كده خلتني أبكي والله زعلت كان نفسي أفرح هاتهولي حارة العوانس ينضم للفريق
إهيء إهيء إهيء
معاك مناديل ؟؟؟

يعقــــوب .... يقول...

ايه يابني الحاجات ده!!!مانت كنت تمام و الحكاوي فل..انا عشان اجمع الموضوع قريته يتاع 3 مرات..حست ان فهمي بأه بطيْ

emos يقول...

انا جيت اتخانق اهو
يا جررررررروم اكتب الكلام اللى انت بتقولة بلون و الكلام اللى صحبك بقولو بلون تانى عشان اللى مش فاهم يفهم
بص بقى
للللللللازم اى واحد يتجوز او اى واحدة تتجوز اهلهم يكونو راضين عن العريس او العروسة عشان ميحصلش اللى احنا شفناة دة
لة حصل بقى و خطب و الاهل وافق يبقى مش المفروض يرجعو فى كلامهم لان بيبقى فى مشاعر و حجات معقدة كدة المفروض يراعوها
انما بقى لو هم مش موافقون من قبلاها يبقى ميحاولش انا عارفة انة كلام محبط بس الخطوبة او الجواز مش النهاية
لو الموضوع مشى فى الخطوبة مش هيمشى فى الجواز
و اللى هيتظلم هيكون الولد مش حد تانى
لو اهلو زعلوها هتنكد علية عيشتو و هتخصمو و هيعض يصالح فيها بقيت عمرة
و لو هى فيها حلجة مش عاجبة اهلة هيقعدو يتريقو عليها و يقولو عليها كلام يضاقة بقيت عمرة
يعنى هيعيش فى نكد
الا فى حالت لو كانت شخصيتة قوية طحححححححححن و يكتم الطرفين بس لما يبقى فى عيال بقى ييييييييييييا سلام
مامتة هتشوف احفدها ازاى و هتتعامل معاهم ازاى و اية الفكرة اللى اولادك هيخدوها عن تيتة

نسيبنا بقى من البنت و حماتها و نخش على الحماتين مع بعض
يااااااااااا عينى
لو مسكو فى بعض الام هتقوم بنتها و التانية هتقوم ابنها و هيييييييييييصة
هو موضوع معقد و لازم صحبك يزعل بس يزعل حبتيين دلوقتى بدل ميعيش فى مشاكل علاطوول
و دة رايى و محدش يزعل

تخاريف يقول...

مممممممم
هو صاحبك ممكن يحاول يكلم اهله تانى ويفهمه كده بالراحه انه بيعز البنت دى فعلا ومش قادر ينساها وان شاء الله يكون سعيد معاها

لو رضيوا يبقى تمام الحمد لله
اما بقى لو مارضيوش فيفوض امره لله بجد ويحاول يقنع نفسه بان كل شئ نصيب..
وبلاش بقى يعيش دور الشاب الشجاع الهمام اللى هيروح يتقدملها ويتجوزها غصب عن عين مامته واخته..
لانه لو عمل كده..وربنا قدر ان الجوازه تتم..هيندم بعد كده ميت مره..لان المشاكل هتبتدى..وماحدش هيسيبهم فى حالهم..


وابقى قولنا رأيك يا جروووم

Esmeralda يقول...

انا جيت لك تانى اهه

بص يا عم المحامى , بتدافع عنه حضرتك؟؟؟؟
انا شايفة الحاجة الوحيدة اللى غلط هى امه, ايوة امه و اوعى حد يرد عليا
كان ممكن اوى متروحش خالص , انما تروح للناس فى بيوتهم و تجرحهم لأ
انا شايفة احمد مش غلطان ,لأنه قال لاهله و بالعقل كده مدام امه وافقت تروح يبقى نص الموضوع عدى
انا رأى ينساها لأن بعد ما امه اهانتها حيدخل بانهى وش بيتهم تانى
و ربنا مش بيضيع حق حد , هى نسيت ان عندها بنت ؟؟؟

dondon يقول...

انا كنت عارفه مفيش مرة هدخل عندك بيتك غير ما الازم ارد على اللى بتقوله اسلوبك في حكايه تحفه ويجنن ويمكن ده الحاجه الصح الوحيده في حكايه اللى مش تمام دى..صحبك مش غلطان بس لازم ينسا البنت دى خالص مينفعش هيروح لها باى وش وكده هيجرحها لتانى مرة...وببساطه مامته عندها بنت واخته كمان متعرفش انه ممكن تتحط في نفس الوقت..مفيش حاجه بتروح عند ربنا....مهم انت اكتب كتاباتك بتفرق معايا كتير اوى والله

Rivendell** يقول...

طيب انا هاسكت خااالص اهو ومش هتكلم


لكن احمد كدا عامل زي اللي بيرقصوا عالسلم لا هما فوق ولا هما تحت


بص واضح انه مش هيقدر يقف في وش عيلته ولو اجبرهم دلوقتي بعد شوية هيبقى في اولاد وهما اللي هيتظلموا في النص لانهم هيسمعوا الاهانات اللي اكيد هتبقى متبادلة بين الطرفين وهيحسوا بتوتر العلاقات ودا هيأزمهم


ممكن ربنا يهدي والدته واخته لكن أشك


الحل الوحيد انه يستعين بالله وينسى البنت دي ويدعيلها ويدعي لنفسه بالعوض من ربنا , وماحدش بيموت من الحب , بس يستعين بالله

هو اكيد صعبان عليا بس انا لما قريت الجزء الاولاني بس كنت بجد هادخل ادي كلمتين في العضم وبعد كدا لما قولت انه متعذب بالشكل دا صعب عليا


الحل الوحيد انه يستعين بالله ويتوكل عليه اوي ويرمي نفسه ليه اوي عشان يعديه من الأزمة دي
وبعدين لو هو مصر اوي ممكن يبدأ يفتح الكلام مع اخته ويحاول يكسبها في صفه ولو قدر تبقى هي معاه على مامته


يااااه انا طولت اوي بس اصل الموضوع دا نيلللة خالص ويجيب اكتئاب

esraa يقول...

أنا مررتلك تاجين.
أدخل عندي خدهم وحلهم.
وهدخل تاني ان شاء الله أعلق علي البوست.

غير معرف يقول...

ايه يا ابني دا
الموضوع خرج من ايد الوالد خالص امه بقيت في الموضوع
انسي يا معلم
مستحيل تتم الجوازه
مدام الامهات بتتدخل يبقي انتهي
اسألني انا
انا شوفت بلاوي من دي كتير وفي الاخر ام الولد بتطلع منتصره دايما
بس احمد لازم تكون شخصيته اقوي من كدا هوا الي هيتجوز مش مامته
ميعجبنيش الراجل الي مش بيكون متمسك بالي بيحبها
لو مامته حسيت انه مصر ممكن تتنازل عن موقفها وكمان تروح تعتزر
بس هو واضح انه مش قوي الشخصيه
او مش قادر علي مامته
يبقي يشرب ويقابلني لو اتجوز في سنته دي

زمرسي علي الورده مع انك بداتها بالانتربول
يعني كنت ناوي علي الشر
بس انا مبسوطه انك عقلت ورجعت عن قرارك
دا لمصلحتك


انا بهزر اوع تزعل
ومدونتي نورت بدخولك
وضفتك عندي يا باشا

تحياتي
gohayna
دوي الصمت

gohayna يقول...

نسيت اسألك انت عرفت منين اني سرقت الورده منك
والله انا لسه سرقاها امبارح بس
ورجاء خاص حط واحده تانيه واكيد هدخل اسرقها برضه
تحياتي تاني مره

الوردة السوداء يقول...

انا محبش ادخل فى مواضيع الجواز دى

المهم الف سلامة عليك

وبعدين انا زعلانة بقى تدينى الوردة السودا

وبعد كدة تهديها لجوهينة

انت ماشى توزعها يابنى
دى حقوق ملكية لو سمحت

انا جاية اهدى النفوس
سلام

esraa يقول...

بص يابني, صاحبك لو بيحبها بجد يبقي لازم يصر عليها, وأهله لما هو هيصمم هيوافقو في النهايه, هم قالو انه شويه وهينساها, لكن لو أتأكدو انه مش ممكن ينساها ومصمم عليها هيوافقو في الأخر.

The Groom يقول...


The Dreamer

الذي مضى يا مان ممكن ترجعه تاني بس لو حبيت - نحن نملك الارادة

شكرا ليك على الاطراء
ثانيا أحمد كان حاسس ان والدته واخته حيعملو كده -

انا صحيح معرفشي كل التفاصيل أوي بس اللي اعرفه ان هو مش بايده حاجة غير اللي حصل

ربنا يصلح الحال

هو بعيد و مش عارف ينسى برضو

للاسف

شكرا ليك على زيارتك و كررها تاني يا مان

------

أولا يا نوني شكرا ليك بجد على اهتمامك بس أنا عادي يعني شغلي كان 12 الضهر :)
أنا دلوقتي برد عليكي و انا نايم في الشغل المرة دي - محبتشي انام في بيتنا النهاردة لان النت قاطع و انا معرفشي انام من غير ما اشيك على النت

قلت بقا مبدهاش :)

تانيا شكرا لك مرة اخرى على الاشادة بأسلوبي في الكتابة و كما قلت لك سابقا الوحدة تفعل أكثر من ذلك

ثالثا كلامك عين العقل و انا قولتله كده بس زودت انه لازم ينسى الموضوع بسرعة و بس ولا تستغرقه الاحزان

وعلى فكرة حبيبي ده دلوقتي في مصر

100% على الحيادية

تعليقات دايما وهمية - شكرا
-------

اقرأيه تاني يا ازميرالدا
معلشي تلاقيكي بس مش متعودة على الاساليب التعبانة دي - نيجي فين احنا جنب الادباء العظام

انا صفر على الشمال - أنا صرصار - أنا ولا حاجة - أنا ....

كفاية :)

بس عادي انا مش مضايق خالص

أنا هو أنا و راضي بكوني أنا الحمدلله

شكرا لك مرة أخرى
-------

اسف والله يا شيرمين والله كان عازز عليا و انا بكتب البوست انك حتقريه و حتقولي البوقين دولا

اسف تاني و الله بس دي الحقيقة يعني مش ينفع نخبيها - صح؟

ايوة عايزة فاين و لا كارمين؟

هو حيجيلك حارة العرايس قريب أوي ان شاء الله

شكرا
-----

عم يعقوب

اسف والله

انا كمان لاقيت صعوبة في الفهم

أعتزل؟ طيب لملي شوية فلوس عشان اعتزل و انا مطمن

شكرا لزيارتك العزيزة
-------

والله العظيم كنت ناوي اعمل كده يا ايموس بس والله كنت حزين ومقموص و ماليش نفس عشان كده مكتبتش بالالوان

اسف مرة تانية

دانا حتى شلت الاغاني من المدونة

كلامك برضو عين العقل و مش حتخانق معاكي المرة دي

معتقدشي حد يقدر يزعل من رايك يا ايموس

شكرا لك
-------

دكتورة تخاريف مرحبا بك

كلكم يا جماعة عاقلين و ممتازين ما شاء الله - والله مبسوط بيكم

متخافيش هو مش بتاع المغامرات الطرزانية دي

شكرا لك

رأيي من رأيك تماما و كلامك وكلام نوني كان تقريبا نض كلامي بشوية تعديلات في طريقة النطق بس
:)

شكرا لك مرة اخرى
-------

ازميرالدا

انا مش بدافع عنه

أنا بس بقولكم محدش يغلط فيه و في أهله

مامته مش بتجرح الناس

مامته بس محبتش تجرحه فراحت معاه و انا اسف انا غلطت في وصف ما حصل لكنها مهزأتهمشي في بيتهم

هي بس قالتله بعد ما خرجت انها مش مرتاحة ليهم و الجوازة دي مش لازم تتم

بس

مامته طيبة أوي على فكرة كل الحكاية هي مزوداها حبتين في مواصفات البنت اللي هي عايزاها ليه

بس

خفي بقا عليها يا ازميرالدا

سعدت بزيارتك
------

دوندووووووووون

أخيرا جيتي يا بنتي

شكرا جزيلا لك والله
You Made My Night

بالعربي اهو

معلشي امسحيها في المرة دي ان اسلوبي هو الحاجة الصح الوحيدة

كلامك صح و هو بيحاول يعمل كده

لا تقسي على أمه فهي معذورة برضو

وربنا يصلح الحال ادعيلهم بس

اكتب انا بقا انهي كتاب فيهم؟
;)

شكرا لزيارتك التي أسعدتني جدا و في انتظار ال.....

مستني و خلاص :)
------

رافينديل العزيزة لا تشكي في قدرة الله على هداية الناس
أبدا

انا عارف ان مش قصدك تقولي كده بس مفيش حاجة بعيد على ربنا

معلشي اهي حاجة تفتح نفسك :) بنكتبها عشان البوست الجاي لما اتكلم براحتي تكونو على الاخر و تحسو ان اسلوبي احلو شوية

هاهاها لا والله ربنا يكرمك

انا سعيد بزيارتك
------

كلامك صح يا جهينة

هزري براحتك خالص يا جهينة انا و الوردة و المدونة تحت امرك

شكرا لزيارتك الكريمة - كرريها كتير

------

أييي يعني مقدرتش أفلت منك يا اسراء

حاضر

كان نفسي أول من يمررلي تاج يكون ........

بس ربنا يكرم ملحوقة

شكرا على زيارتك
-------

جهينه تاني

اوعدك لو لاقيت وردة تانية احلى ححطها و اهديها ليكي تاني هاهاها

شكرا

--------

الله يسلمك يا وردة

انت الوحيدة اللي خدتي بالك اني محتاج دعاء الناس

الله يكرمك و يجازيكي عني خير يا رب

أما بقى الوردة انت الوردة السوداء و أنا لما اهديتها لك في الأول فهي فقط صورة و انت الحقيقة

صحيح أنا ماشي أوزعها لأني لا أملكها

لكن في نفس الوقت أنا عندي منها كتير

لكن أنت الأصل برضو

شفتي أنا بعرف أهدي النفوس ازاي؟

:)

شكرا لزيارتك العزيزة بجد مبسوط بيها
--------

كلامك جميل يا اسراء وأنا مستنيه يرجع دلوقتي من مصر و يقول ناوي على ايه أو عمل ايه هناك

المشكلة اني مش عارف اتلم عليه من ساعت ما سافر مصر

شكرا لتعليقك

------------

شكرا لكم جميعا يا جماعة و ادعولي

تسلمولي كلكم

تحياتي من الشغل و ماناساس البلد

يعقــــوب .... يقول...

يا عم عيب عليك تعتزل ميين!!! امال مين يروق دماغنا على الصبح أو قبل النوم...و بعدين هو في حد بيعتزل اليومين دول برضه

Anima يقول...

تنهيدة من القلب

The Groom يقول...


معلشي يا يعقوب على الكلمة دي

لكن نورتني والله ربنا يخليك ليا

شكرا على اهتمامك

-----

أنيما

آهة على تنهيدتك

شكرا لك - واستني حقيقة تلك التنهيدة

شكرا لك

تحياتي من ماناساس البلد

غير معرف يقول...

والله ما عارف اقولك ايه يا جروم.....
بجد يعني عايزه ينسى كده و يهدى ولو مؤقتا عشان امتحانه و ربنا معاه يا رب.....
وان شاء الله لو ربنا كاتبلهم يكونوا مع بعضهيكونوا لو كل لدنيا وقفت في وشهم..هو بس يخلص و يفوق للموضوع ده و يحاول يتصرف فيه...
انا و الله ما عارف الأهل دول عايزن ايه و الله....!!!...

غير معرف يقول...

انا كمان دمعتي قريبه..و شعرك جميل و مليان حزن والله

The Groom يقول...


ارتعاشة حبيبي

انت والله يبني تتحط على الجرح يطيب

ربنا يكرمك يا رب

وشكرا لك بجد الوحيد اللي عبر شعري

شكرا جزيلا لك

تحياتي من ماناساس البلد

koukawy يقول...

هو فعلا الصح ان يصر لحد ما يتجوزها رأيه هو اهم حاجه
انما الظاهر ان مامته و اخته قهروه يا حرام
طالب بحقك في الاختيار انت اللي هتتجوز مش هما