الثلاثاء، ٣ أبريل ٢٠٠٧

تدبيسة تاني من شيرمين

السلام عليكم و رحمة الله
الظاهر اني لازم احرم اجاوب على تاجات عشان الناس بتبعتلي زي الرز
أمري إلى الله
التاج ده من العزيزة شيرمين
أما نجاوب بقا و امرنا الى الله
------
س: اية اللي حيحصل لايميلك لما تموت ؟
والله مش عارف بس حزعل اوي والله لاني بحب كل حاجة بتاعتي وخصوصا ايميلي - مجنون بقا
وكمان فيه حاجات مهمة اوي و خلاصة حياتي تقريبا فيه و ذكرياتي
مرة اتسرق مني و رجعته (على الياهو) ومتتخيلوش كنت كالميت والمومياء اليومين اللي اتسرق فيهم لحد ما رجع تاني
والله كنت حموت بجد
السؤال ده شجعني احطه في وصيتي لما اعملها ان شاء الله و احط الباسورد كمان
س: اديت الباس وورد لحد قبل كده؟
اديت الباسورد اه لابن خالي عمر مرة واحدة و غيرتها بعديها
أنا بحبه أوي عمر ده
س: لو اه كانت طبيعة علاقتك بيه اية؟ أخويا و أنا وهو تنظيم مغلق على نفسينا (شكرا يا شيرمين) هاهاها
س : اسمك؟
عبدالله صلاح الدين
س: اسم الدلع المشهور وسط اصحابك؟
عوباد و عبدو
عمرك؟
أربعة و عشرون عاما و نصف
س : برجك؟
مفيهاش احراج يا هانم - الأسد
س : مجال دراستك؟ أصلا خريج برمجة بس دلوقتي بشتغل في الشبكات و ححاول اخلي الماجستير فيها برضو ان شاء الله
س : شخصيتك نوعها ايه؟
يعني اتغيرت كتير - اخر مرة اعرف فيها شخصيتي كانت هاديئ حبتين - عصبي احيانا - حزين و مكتئب دايما
س : المود بتاعك؟
النهاردة رايق - بس في الاغلب حزين :(
س: وقت فراغك بتعمل فيه ايه؟
أنا فاضي دايما - بس لما بكون مشغول شوية بطفي الكمبيوتر
س: الاكلة المفضلة؟
بيتزا الجمبري - مكرونة باشاميل برضو - بسلة ورز - رقاق باللحمة المفرومة -
وكمان السلطة عشان خاطرك يا ازميرالدا
س:الصفات اللي اخدتها من بابا؟
شكل وشي - لون جلدي - الطول واسم العيلة بس
س:الصفات اللي اخدتها من ماما؟
الطيبة - الشعر الخفيف وحرقة الدم احيانا يعني العصبية
س: اكتر6حاجات بتكرهها؟
الانتظار
الكذب
الخيانة
البعد عن ربنا
التدخين - بكرهه أوي أوي أوي
البخل
س:اكتر 6 حاجات بتحبها؟
القران
الصلاة
الكمبيوتر
الأكل عموما
النوم
الشغل
س:الشغل بالنسبة لك ايه؟
قلبي و روحي و عمري
س: السفر؟
أنت جيتي على الجرح - بس أنا مدمن سفر و متخيلشي نفسي مش مسافر
س: هل لديك اقوال اخري؟
آه - أنت مين يا؟ عبارتي المفضلة :)
شكرا يا شيرمين و طبعا زي ما قولت قبل كده انا مقبرة التاجات و بتموت عندي
مش حمرر لحد
:)

هناك ١٨ تعليقًا:

الوردة السوداء يقول...

ايه الاجابات العملية دى

شكلك كدة يابنى هتطلع بسبس مان

Esmeralda يقول...

لسه حاتستنى لماتعمل وصيتك؟؟؟؟؟ هو حد عارف حيموت امتى؟؟؟؟؟ لا مؤاخذه يعنى

التنظيم داه ماتفتحش تانى؟؟؟
ااااااااااااااه
يمكن مش لاقيين النفتاح


مبسوطة انك رايق :)


فين يا ابنى السلاطه؟؟؟؟؟؟

الخيانة فرع من فروع الكدب
بس طبعا ابشع
نعديها ديه :)

احسن انك مش حاتمرر لحد


الباقى كله حلو مش محتاج اغلس و انت رايق كده :)

Anima يقول...

مش عارفة ليه فكرتني بطبيب الأسنان لما بيتكلم
ههههههههههههه

ibn nasser- ابن ناصر يقول...

اجابات لطيفه
تحياتي

shermen يقول...

ميرسي يا عبدالله انك جاوبت على التاج يا أسد وما تتريقش عليا ايه يعني برج الجدي رمز الحكمة بردوه ولا يهمني

esraa يقول...

مبرووووووووووك علي التاج.
بس مال مجال دراستك ورائد الفضاء ده انا كنت اتبسطت وقلت هتاخدني معاك سياحه ببلاش.

gohayna يقول...

ايه يا ابني دا انا سبتك يومين
ارجع الاقي تاجين من ورايا
نهارك مش
مش

مش

او ممكن يعدي




فيه حد بيقولك اججباتك فكرتني بدكتور سنان

سؤال صغير قبل ما اللموضوع يخرج من ايدي

وبسوط واطي اوي
مااااااااااااااااااااااله دكتور الاسنان


تحياتي يا سيدي

وعلي فكره انا بهزر

Noony يقول...

يا رب دايماً تفضل رايق...بس أنا مش فاهمة حكاية لما تكون مشغول تقفل الكمبيوتر و لا حكاية دكتور الأسنان
:)

نوني

يعقــوب أو فانتــي يقول...

بتفكرني بفانتي يابني و بنفسي ساعات برضه لمل نكون مشغولين بنشتغل حبة

ياسمين يقول...

انا كمان بأكره الخيانة والبخل قوى
اجابات مختصرة ومركزة
وعجبتنى

غير معرف يقول...

انا بكره التدخين وييي اوييي اويييي اكتر منك :)
ربن يوفقك يابني في دراستك و ماجستيرك و تتجوز و تملا البي كومبيوترات قادر يا كريم

The Groom يقول...


الوردة السوداء

أهلا وفخور جدا بكونك أول تعليق هنا

انت اللي الكومينت بتاعك عملي جدا

مالهم البسبس مان؟

تحياتي
----

أزميرالدا

شكراجزيلا لك

أنا فعلا كنت رايق ساعتها و مش ناقصك

مرحبا بك في أي وقت

تحياتي

----

صحيح يا انيما ايه حكاية طبيب الاسنان دي؟

شرفتيني و شكرا لك

----

شكرا جزيلا لك يا فانديتا :)

شرفني دايما بزيارتك

تحياتي
----

شيرمين انا مش بتريق على حاجة والله

أنا فعلا مش شايف فيها حاجة وبعدين فعلا برج الجدي رمز الحكمة

انا فقط لا أؤمن بالأبراج خالص و لا تفرق معايا أنت برج ايه

شكرا لك و تحياتي
----

هاهاها ماهو ده التمويه يا اسراء عشان محدش ياخد باله غير و انا على القمر و بقولكم من هناك بااااي

تشرفيني و التذكرة على حسابي و المشاريب عليكي

تحياتي

----

سيدتي و مولاتي جهينة

أنت تؤمري و لو مش عايزة اليوم يعدي ابقي قولي بدري شوية اصله عدى خلاص

:)

وأضم صوتي الى صوتك و أقول ماله دكتور الثنان؟

تحياتي و شكرا لزيارتك
----

نوني العزيزة اهلا اهلا

شوفي يا ستي انا فاضي على طول و لما بكون مشغول شوية بقفل الكمبيوتر

صعبة دي؟؟

دكتور السنان و الله معرفشي فيها ايه؟ و لا حكايتها ايه اللي يعرف يقولي

:)

شكرا لك وتحياتي
----

يعقوب والفانتي

صباح الفل :)

تشكر يا مان
----

ياسمين هنا؟ يا مرحبا يا مرحبا

ربنا يكرمك

شكرا لك على زيارتك وان اجاباتي عجبتك

بارك الله فيك و تحياتي
----

ارتعاشة حبيبي

يبني انت عسل وايت هاني

هاني مين؟ هاهاها

ربنا يكرمك يا رب

بس مين قالك اني لما اخلف حخلف ان شاء الله كمبيوترات؟ انا يبني بالعافية حخلف شوية الات حاسبة ماركة كاسيو

شكرا لك على تعليقك الظريف و امين يا رب

تحياتي للجميع من ماناساس البلد

emos يقول...

انا برضو قلت انك نكدى
مجبتش حاجة من عندى
لأ انا عايزة فرفشة و نعنشة
مش بحب النكد دة هو الواحد ناقص
نرفزتوووووووونى
م مين اللى بتقول نفتاح دى؟
ماشى مااااااااااشى

The Groom يقول...


وانا مش ناقص نرفزتك يا ايموس

ربنا يكرمك

تحياتي

تخاريف يقول...

هتحط الباسورد ف الوصيه...
هههههههههههههه
بجد اضحكتنى.
:)

بس بجد ربنا يكرمك ع الغربه..وتحقق كل امالك..

وربنا يقدرك على تدبيسه التاجات..
:)

lojain يقول...

نقلا عن كلام سيادتكم فى موضوع "ابو ركبة" احب اعرف يعنى ايه دكتور السنان
يعنى ايه دكتور السنان
اكرر : يعنى ايه دكتور السنان.
والصراحة الاجابات نموذجية ميه ميه
والامتحان مخرجشى عن كتاب الوزارة
وفى مستوى الطالب الضعيف
وسلامنا للفاموليا

The Groom يقول...


دكتورة تخاريف

أه ناوي ان شاء الله احط الباسورد في الوصية بس عشان الايميل فيه حاجات كويسة عايز الناس تشوفها فقط بعد ما موت

امين يا رب على دعائك وجزاك الله خيرا
-----

لجين

أنا الحقيقة وفي الواقع و تقريبا معرفشي ايه علاقة دكتور السنان بيا؟

أختي دكتورة سنان ينفع الموضوع ده؟

شكرا لك

تحياتي من ماناساس البلد

عبدالله يقول...

ازيك يا عوبد سوري يا جميل بقالي زمن مش بفتح المدونات اهه الناهرده رايق قولت اجي ادحرج التماسي الاقيك كاتب كل ده يا مفتري
علي العموم ابقي ابعتلي الباص ورد بتاعتك علي الايميل و هبقي افتحه اول ما تموت مش تقلق \
:)
ماشي ياعم الهادي يسعد صباحك
عاملي فيها هادي و حزين صباح الرومانسيه ياعم شويه وتقول اوقات فراغي بعد النجوم
:)))))

تحياتي