الأربعاء، 18 أبريل 2007

تاج بثلاثة رؤوس

السلام عليكم و رحمة الله وبركاته الظاهر اني حقضي حياتي أجاوب تيجان بس ولو أنا مقبرتها :( --------- التاج الأول هنا من أميرة البلطجية وكوكو الكميلة ربنا يكرمهما يا رب أحب شخص لقلبك فى الدنيا؟ اه سؤال بيزعل ويحرج بس حقولكم انها زوجتي التي لم تحبني بعد فحاليا سأكتفي بقول أمي انسان مستعد تضحي بحياتك –ركز فى كلمة حياتك- عشانه؟ انها زوجتي التي لم تحبني بعدفحاليا سأكتفي بقول أمي مرة أخرى انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟ بطبعي لا أكره كثيرا لكنني اذا كرهت كرهت بعنف مممممم قاتل عمر بن الخطاب رضي الله عنه

ما هو:اسم أجمل كتاب كتبه بشر قرأته ومحتفظ به حتى الان؟ نسيت أكثر ما قرأت وحاليا لا أقرأ ولا أذكر أجمل ما مر علي

:(

اسم كتاب-كتبه بشر برضة- انت متعلق بيه وبتقرأه كل فترة؟ كان زمان و جبر - دلوقتي مش بنقرأ اهم جهاز منزلى انت متعلق بيه او بتستخدمه كتير؟ طبعا الحاسووووب - أنا من زمان متفرجتش على التليفيزيون و عمري ما كنت سميع راديو صحيح بحب التلاجة و الفرن لانها قمة التناقضات لكن الحاسوب حياتي و روحي و عمري وحبي الحقيقي حتى أجده

شىء تحس بالراحة النفسية عندما تنظر اليه؟ ممم شيء دي بالتالي معناها استثناء البشر اذن هي 3 أشياء متساوية عندي جهاز حاسوبي ساعة يدي مدونتان لشخصين عزيزين مكان تحس فيه بالحنين الى شىء لا تدرى ماهو و ذكريات جارفة الى لاشىء؟ كلما وقفت أمام البحر - وأمام منزلي بالتساوي مكان تحس بالراحة عندما تدخله؟ غرفة الشيخ محمود امام مسجدنا في مصر - وبيت أمي اجمل مدينة زرتها داخل مصر؟ الاسكندرية

أجمل مكان طبيعي رأيته داخل مصر؟ الشعب المرجانية - نويبع - البحر الأحمر

شخصية كارتونية بتحبها؟ بالتساوي رعد العملاق - نصف بطل نوع هاتفك المحمول؟ نوكيا 6600 سرعة بروسيسور جهازك؟ مليش جهاز بتاعي - بس جهاز الشغل سرعته 1.66 GHZ

حجم ذاكرة –هارد- جهازك؟ الذاكرة غير الهارد - الذاكرة 512 MegaByte أما الهارد 80 GigaByte المساحة التى تشغلها المواد الاسلامية على جهازك؟ صغيرة جدا - لأنه جهاز الشغل نفس المساحة السالف ذكرها فى قلبك-الاجابة لنفسك عشان الرياء يا اخواننا-؟ خلاص الاجابة في قلبي - يا بتاع الرياء أنت أهم هدف انت واضعه لحياتك دلوئتى؟ أن يرضى الله عني ويرضيها هي عني قبل الموت مواصفات فتاة الأحلام بالنسبة لك؟ اه جينا للاحراج بقا انت كده حتطفش العرايس يا بيه طيب أمري إلى الله أن تعرف ربها ودينها وحقوقها قبل حقوقي جيدا ثم أن تتحدث اللغة العربية بطلاقة ثم أن تعوضني خيرا مما مضى ثم أن تأمرني بالخير و تحثني عليه ثم أن تجدني وأجدها قبل الموت صف ما يأتى: شعورك لما بتسمع كلمة مصر؟ مزيج متعدد من الحب واليأس والفخر والمووووت شعورك لما بتسمع كلام عن اليهود؟ عساني ألا أكون مثلهم شعورك لما بتشوف ظابط شرطة؟ في أمريكا - رهبة الاحترام و مهابة المنصب والاستغاثة احيانا في مصر - احترام ممزوج بسخرية و حوقلة في الامارات - حب جارف لهم لأنهم ودودون جدا جدا في فرنسا - ربنا يشفي في ألمانيا - كره شديد - وشوشهم خشب في عمان - أنظر نظرة بلاهة خاوية اليهم لما بتشوف الكناس العجوز فى الطريق؟ من أعظم المواقف التي أكلت من قلبي نصفه لا أدري هل أحتضنه حضنا دافئا أعوضه و يعوضني غدر الزمان أم أعطي له كل ما في قلبي و جيبي شاعرا بالامتنان؟ عموما أدعو له في كل الأحيان و تفر من عيني دمعة وأمضي في طريقي لون البطانية اللى بتتغطى بيها فى الشتاء؟ بطانية واحدة مفيش غيرها معايا من سنة و شهرين صيف بتغطى بيها من برد المكيفات - و شتا بتغطى بيها من برد السماء هي مزيج من ألوان يطغى عليها اللون البني ولست أذكر ما المرسوم عليها لكنها جميلة - تريح عيناي و مناسبة لشخصيتي لون الجورب-الشراب- المفضل لديك؟ أبيض أو رصاصي احساسك اذا داست قدمك فى الطريق على مخلفات اخراج حيوان- *** ولا مؤاخذة-؟ أصلي ناقص هم - أستغفر الله العظيم افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟ ممممم - دعونا نتفق أولا أن الجلابية بيضاء كانت أو سوداء فهي ملابس جميلة و كنت ألبسها و أحب أن البسها يوميا في المدرسة لمدة 11 سنة من عمري بالعكس انظروا اليها كيف تبدو منها الهيبة قصرها نفسه سنة من الرسول و لا ضير في ذلك أما العمامة فتغطية الرأس سنة ولكني لست أدري أهي العمامة أم شيء آخر اللحية سنة و في حالتي أتحسس بشدة من حلاقتها لكنها خفيفة في كل الأحوال السواك مطهر عظيم و سنة كبيرة تكاد تندثر المصحف معجزة الله في الأرض ولا يحتاج مبررا لتواجده في اي مكان ولللللللللللاااااااااااااااااكن المنظر العام لهم قميء -لأنه في غير موضعه - لم يأمرنا الله سبحانه و تعالى بمخالفة أعراف مجتمعاتنا ولأن تلك الصورة تأتي في أذهان الناس أول ما تأتي لشخص متجهم يضرب الناس و لا ييتسم في وجهك ويأمرك بالاسلام و هو يدعيه و ينكر عليك عملك و قد يكون مقصرا أكثر منك تركوا الجوهر و اهتموا بالمظهر صورتهم تلك ذنبهم والتحزب و التعصب مذهبهم هداهم الله وهداني قبلهم لصراطه المستقيم قبل أن نموت جميعا احساس يراودك فى اشارة مرور مغلقة بسبب مسئول كبير؟ ألا يلقي بالا لكم الدعوات التي تنهال عليه؟ صدقت يا عمر حين عدلت فأمنت فنمت وأيضا أشعر بأنني بطة سوداء ------------- فيييووو كان تاج صعب أوي -------------- التاجين التانيين جايين من دكتورة دياموند العزيزة انت مين؟ سؤال غبي مين يعني اسمي ايه؟ ولا امثل ايه؟ ولا مين في دولا وليستة بشوية اسماء اغبياء؟ ولا ايه بالظبط؟ انت حتناسبني؟ على العموم أنا من أنا - عندك عروسة؟ أكتر ست أشخاص بتحبهم؟ زوجتي التي لم تحبني بعد ماما ماما بابا اخواتي كل من أحبني بنفس حبي له انت سعيد؟ لا لو زنقت حسنى مبارك ف اوضة لوحدكم تعمل معاه ايه؟ سؤال غبي تان لانه لا يمكن أن يحدث ولو حدث حيكون هو اللي زانقني بس في كل الأحوال حقوله باحترام شديد ربنا يصلح حالك و حالنا يا رب فرضنا انك قمت من النوم لقيت نفسك بالأندر وير وسط ميدان عام هيبقى ايه شعورك؟ أنا مش عارف ليه ثقافة ناس كتير اختزلت في الاندر وير؟ عموما ولا حاجة برضو سؤال غبي و لن يحدث لكن انا مرة ماما صحتني من النوم بالبيجامة على باب الشقة و كنت خارج ده لو انت عايز تضحك شوية يا عم الغلس اللي مألف التاج بتحب مصر؟ أينعم و بشدة بتحب البنات؟ حد بيكرههم؟ انت مسلم؟ اه الحمدلله ليه؟ "وما خلقت الجن و الإنس إلا ليعبدون" التااااااااج الأخير مين أكتر شخصية متقدرش تستغنى عنها في حياتك؟ ماما ثم زوجتي التي لم تأت بعد ايه أكتر موقف محرج تعرضت ليه؟ ممممم ياما كتير احرجت و بقيت في ربع هدومي كل المواقف محرجة والاحراج احراج مهما صغر او كبر لكن فيه احراج كان نفسي فيه اوي و محصلشي كان نفسي أقبل ايد ماما وانكسفت وكانت الفرصة موجودة - وانا انكسفت وتقريبا مكانشي ينفع ساعتها بس ندمان دلوقتي الأمنية اللى بتدعى دايما ربنا انه يحققها ليك؟ أن يرضى الله عني ثم اني اتجوز زوجة صالحة ثم اموت على الاسلام ------------- شكرا لكن جميعا يا جماعة أنا دلوقتي بقيت عامل زي المهرج بمليون تاج :) تحياتي لكم من ماناساس البلد

هناك 24 تعليقًا:

أميرة البلطجية يقول...

فين التاج يا ابني
(ملحوظة)..لو واحد فكيك سألك وقالك..واشمعني سؤال عن الشاب المتلحي اللي ماسك مصحف..ابقي قوله ان الحط التاج ملتحي وزعلان ان الناس واحدة فكرة المتلحين
اصلى اتشتمت يا سيدي في حته تانية بسبب السؤال ده

Shower-Mirror يقول...

خبر عاجل :

ايموس قفلت البلوج بتاعها بالضبه و المفتاح

انا ضميرى بيأنبنى ياواد يا عبد الله ...

لحسن نكون بستفنا البنت جامد و زعلت

... ؟؟؟

انا امبارح شفتها كاتبه بوست جديد ...و كانت بتتكلم عن الدين انا مافهمتش منه حاجه ...كنت باقراه و انا نايم ..

بس فى اتنين ردوا عليها فى التعليقات ...الظاهر انها خرفت جامد فى الدين ... و الاتنين بهدلوها ياعينى ؟؟؟


انا ضميرى و اجعنى يا عوباد

البس الجلابيه و انزل دور عليها و النبى ...دى زى اختك برده

Anima يقول...

حشوف ايموس مالها و أرجع لك يا ولا

Anima يقول...

ولا عندك ايميل إيموس؟

koukou el kemil يقول...

اجابات منمقه تدل علي شخصيه منظمه اوي

عبدالله يقول...

اجابات كتير بس فيها حاجات محتاجه تعليق و مش فاضي دلوقتي هبقي اعلق بعيدن انا مسافر كمان نص ساعه لما ارجع كمان تلات ايام نبقي نقول بقي
سلام

emos يقول...

heyya 2egabatak 7elwa bs el tag 3ageeb
eh el 2as2ela el 3'areba deh?
bs beravo ennak radeet 3aleha ana makontesh ha3raf

يعقــــوب .... يقول...

برافو عليك يابني والله

Just a Reader يقول...

أكثر الله من أمثالك. لو نص ومش هقول كل الشباب الي في سنك تفكر كده ...كانت الدنيا بقت حاجة تانية .
ربنا يبارك فيك

تخاريف يقول...

اجاباتك حلوة يا جرووووم

بس حاول ترجع تقرأ كتب تانى...

غير معرف يقول...

عمو عمو...اجاباتك حلوه و الله...

انا متفق معاك في موضوع الجلابيه يا كبير...

و كمان اشارة المسؤل الكبير..

و الله في جزء من اجابة التاج بتاع الاندروير ده..:)..انا كنت كاتب اخر سطر بالظبط..:)

emos يقول...

ana 3aysha ya shower manta7rtesh el 7amd lelah

Anima يقول...

أدينا جينا ولا حد عبرنا

أيوة يا عم ماشية معاك حلاوة كل شوية تاجات

ههههههههههه

حصة القر

Esmeralda يقول...

بدي افهم شي شغله

اش عرفك يا أوسأاز ان مراتك ديه مش حاتطلع واحده تطلع عينك ؟؟؟ هو كلام بتقوله يتحسب عليك و خلاص؟؟

و بعدين ايه حكايه اتقان اللغه العربيه ديه ؟؟؟؟ انت غريب اوى يا اخى

قصدك مش عايز تبقى يهودى يعنى ؟؟؟

مين حوقله ده؟؟؟

اه صحيح





يعنى ايه بطانيه مناسبه لشخصيتك ؟؟؟؟؟؟؟

ربنا يوفقك و يكملك بعقلك ويكرمك بالزوجه ديه اللى حتمووووت عليها

:)

أميرة البلطجية يقول...

يا عبد الله
اولا ترجع بالسلامة ومتنساناش في دعاء
دعاء المسافر مستجاب يا عم
:)
ما شاء الله..انا انهرت جدا لما لقيتك رحت كل البلاد دي..بسم الله ما شاء الله..اجمل حاجة في الدنيا السفر..واجمل منه انك ما شاء الله ملتزم وبتحب دينك كده ومعتز بيه واللف في العالم متولكش
ربنا يسعدك يا عبد الله
:)
سلام

Rivendell** يقول...

التاج دا مستفز شوية

مش عارفة ليه

حاسة اسئلته غتيتة حبتين

وبعدين انا مع ازميرالدا .. انت اش عرفك انك هتحبها يعني ما انت ممكن تلبس في الحيطة زي ناس كتيررر


مختلفة معاك في موضوع السؤال بتاع الجلباب والتقصير دا
انا شايفة ان كل واحد حر في اختيار مظهره .. بشرط ما يجيش يفرضه عليا

طبعا التاج دا ذهب الى مقبرة التاجات والله كان نفسي اجاوب على كام سؤال فيه .. هستنى يمكن ينحدف عليا من اي حتة تانية

سلام يا فندم

Noony يقول...

عبد الله

يا بخت زوجتك بيك...بتحبها من قبل ما تعرفها

أنا مش عارفة لية أغلب الناس بتحب الأسكندرية؟ فيها اية فظيع يعني!؟
عشان البحر؟...ما هو موجود في أماكن تانية

للأسف، بالرغم من ثقافتي الكرتونية..مش عارفة مين رعد العملاق ونصف بطل
:(

تاج عسير بس انت طلعت منه بسلام...حمد الله على السلامة

ربنا يرزقك بالزوجة الصالحة..يا رب

سلامات أيها التحفة

أختك نوني

غير معرف يقول...

ماشاء الله
ايه مستودع التاجات ده
:)))))))

حلوة اجاباتك يا باشا و ربنا يحقق لك كل ما تتمناه

rosealia29 يقول...

تسجيل حضور أول مرة لمدونتك .. و تسجيل إعجابي بإجاباتك عن الكم الرهيب ده من التيجااان ..

يا مراكبي يقول...

فاكر لما أنا قلت إني هأقتتح مدونة للرد على التيجان بس ؟ هو إنت كده محتاج تطبق النجربة دي

ربنا يصلح لك الحال إن شاء الله

yasmina يقول...

اجاياتك حلوة وبالنسبة للملتحي والله معك حق
شعرت من اجاباتك انك تحب والدتك جدا فيا بختها فيك
وكمان يا بخت العروس اللي كل حاجة بتدخلها فيها بس لما تيجي
تحياتي

The Groom يقول...


أميرة البلطجية

أهلا بيكي يا بنتي و شكرا على التدبيسة الصعبة دي

التاج أهو؟ أجيبلك عدسات خضرا؟ :P

ما عاش والله اللي يشتمك

تحياتي لك
-------

الحاج شاور يا مرحبا يا مرحبا

خلاص يا مان موضوع ايموس انقفل وربنا يهديها و يكرمها يا رب

تحياتي الحارة لك و لها
---------

أنيما

الله يكرمك أيوة شوفي مالها

الموضوع اتقفل خلاص

تحياتي الحارة لك و لها
---------

كوكو الكميلة

حمدالله على السلامة و ان جهازك خف تاني

اجابات منمقة مين و منظمة مين؟ أنت مين؟

الله يكرمك يا رب دانا غلبان والله

تحياتي لك و خطوة عزيزة
------

عوباد حبيبي

تعالالي يا حبي

هات كل تعليقاتك و تعالى

قول اللي انت عايزه بس ادعيلي كتير اوي في العمرة

ربنا يوعدنا يا رب

تحياتي لك وادعي لعمتي المريضة
---------

ايموس العزيزة النرفوزة

الحمدلله على كل حال صحيح التاج عجيب و غريب و أسئلته صعبة أوي

تحياتي لك
----------

يعقوب حبيبي

واحشني يا مان والله

الله يكرمك و يعزك يا رب

في انتظار كتاباتك

تحياتي لك وسلامي للفانتي
--------

Just a Reader

ما شاء الله عليكي بجد

شكرا لك وتحياتي الحارة

والله أنا غلبان أوي وكومينتك ده أسعدني كثيرا جدا

وربنا يبارك فيكي انت كمان يا رب

تحياتي الخالصة لك
-------

دكتورة شيماء تخاريف الخنيقة :)) والعزيزة

الله يكرمك يا رب و يخليكي

شكرا لك

بحاول والله - ادعيلي
--------
ولدي ارتعاشة حبيبي

ازيك يابني؟

أيوة يا حبي عشان تعرف بس ان القلوب عند بعضها

الله يكرمك يا رب

تحياتي لك و لاخوك :)
---------

ايموس

دي رسالة للحاج شاور - لا تعليق

تحياتي لكما
---------

لا والله ماتهوني علينا يا أنيما

هاهاهاها قري زي مانت عايزة انا مسامحك

ربنا يكرمك يا رب

تحياتي لك
---------

أزميرالدا

اي مو على عيني

تؤمريني

حتى لو طلعت واحدة تطلع عيني

أنا ماليش غيرها وهي مالهاش غيري

وسأحتويها باذن الله تعالى و أخليها تحب عيني مش تطلعها

وحنشوف ان شاء الله

اه مش عايز أبقى يهودي و بعدين في احتمال قائم اني أتجوز من هنا بس فعشان كده بقول تعرف عربي كويس

الحوقلة يعني كلمة لا حول ولا قوة الا بالله

امين يا رب على دعائك

بطانية مناسبة لشخصيتي زي البلوفر كده اللي مناسب لشخصيتك انت

فهمتيني؟

تحياتي لك
-------

أميرة تاني أهلا أهلا أهلا

أولا امين يا رب و ربنا يكرمك و يوفقك يا رب

لا حول ولا قوة الا بالله انت انهرتي و لا انبهرتي؟ :P

لا مش أجمل حاجة في الدنيا السفر أجمل حاجة في الدنيا شريك الحياة الصالح

أنا سافرت ألمانيا و فرنسا ترانزيت بس

الامارات و عمان عشت فيهم والسعودية

وطبعا مصر أمي ووطني و عشت فيها 7 سنين وأنا في أمريكا دلوقتي بقالي سنة

والله اللف في العلم تولني بس ربنا يكرمك و يحفظك و يسعدك انت كمان

تحياتي لك و امين على دعائك
----------
رافينديل العزيزة

صحيح التاج ده مستفز جدا مش شوية بس

ردي عليكي زي ردي على أزميرالدا

وأنا مقولتش غير نفس رأيك في الجلباب و التقصير يا رافينديل لكن المشكلة انهم بيفرضوه علينا و انا اتحاربت كتير بسبب رفضي محاولاتهم لاجباري على مالا اقتنع به مع اني بلبس الجلابية و بربي دقني الحمدلله

تحياتي الحارة لك وربنا يرزقك بتاج من نور
-----------
نونييييييي

الاسكندرية ماريا يا بنتي
وأنا بحب ماريا :P

هاهاها لا اسكندرية دي عشقي لان فيها ذكريات جميلة ليا مع أمي وأمي التانية

يا رب أرزق بزوجتي دي قبل موتي يا رب

أوريكي أنا نصف بطل و رعد العملاق لو حابة عندي بعض الحلقات

امين يا رب و سلامات لك انت يا اخت التحفة

ربنا يكرمك و يوفقك يا رب

تحياتي
--------

ابيتاف

هاهاها شوفتي بقا؟ أنا بقيت عامل زي مهرج الملك بمليون تاج

ربنا يكرمك يا رب

ويحققلك كل امانيكي انت كمان
تحياتي لك وسلميلي على الحاج فالنطينو
---------

روزاليا العزيزة

أهلا وسهلا بك و شرفتيني و نورتيني

اتفضلي اشربي اسبريسو

أيوة انا غرقت في التيجان 5 مرة واحدة و اتنين قبل كده يبقى 7 في أقل من شهر :(

تحياتي لك
----------
يا مراكبي

خطوة عزيزة يا حبي

ربنا يكرمك و يخليك يا رب

تحياتي لك و يا رب يوفقك و يصلح حالك انت كمان يا رب و تيجي كل يوم هنا :)

تحياتي لك
------------

ياسمينا العزيزة

أهلا وسهلا بك و شكرا لزيارتك

صحيح ربنا يكرم و يهدي كل الناس

شكرا لك

ماما و ماما بحبهم الاتنين أوي - الحمدلله ربنا مديني اتنين

امين يا رب بس هي تيجي بس يا ياسمين

ربنا يكرمك يا رب

ربنا يحرر بلادنا يا رب و يرزقنا الشهادة و صلاة في المسجد الاقصى يا رب

ربنا يكرمك مرة اخرى

تحياتي لك
-----------

تحياتي لكم جميعا من ماناساس البلد
:))

TAMTAM يقول...

هو انا اغيب شهر ارجع الاقيك واخد التيجان بتاعت المدونات كلها عندك
ربنا يزيدك ياعم جروم

ويلا هش من هنا سيبني ااقرا اللي فاتني لحسن فاتني كتير

سلام رايح لمنساس البلد

The Groom يقول...


حمدالله على السلامة يا طمااااطم