الجمعة، 27 أبريل 2007

حكاية حب - 1 من 2

بسم الله الرحمن الرحيم حكاية جديدة حكاية صاحبي العالي والغالي

-------------

هااااااااااااااااوم - زيييييييييييءء طاك طاااااااااك ترررااااااااك أعوذ بالله من الشيطان الرجيم بكره الصحيان من النوم العصر - والدنيا قربت تليل - بحس بالاكتئاب رغم انها تقريبا سنة - مش فاكر مين قالي الحديث بتاع القيلولة أمري لله أقوم أتوضا و أصلي العصر - اللهم اني أعوذ بك من الخبث والخبائث ----- برهة من الزمن ----- مممم طيب نعمل ايه دلوقتي؟ - الوقت بيعدي كده بلا داعي - بقالي فترة طويلة نفسي مسدودة - الحمدلله ان فيه يوم أجازة في الأسبوع كل يوم بنفضل صاحيين من صباحية ربنا كده وطلعان عينينيا لحد الساعة اتنين بالليل - الله يهد افتراك يا فوزي (ده المدير بتاعي) يا رب ولا يوم ما خلانا نبات في الشغل اظاهر انه استحلاها وبقيت ريتم ثابت كل أسبوعين تلاتة مرتين تلاتة ربنا يستر علينا يا رب - اللهم لك الحمد - كم لك علينا من نعم مممم سبحان الله - الحمدلله على التوبة فعلا الراحة النفسية أحلى من كل شيئ - كان زمان الواحد دلوقتي قاعد بيتسلى على النت و ليستة المسنجر مليانة ما شاء الله أشكال و ألوان بس سيبك انت - أنا قررت أتلم بقا و أركز شوية من تعفف عن الحرام أبدله الله بالحلال بالتأكيد - اللهم تقبل طيب نكلم الواد جروووم نشوف ايه النظام - الواد ده وحشني قوي - بس غريبة هو مش داخل اونلاين دلوقتي خير خير أول ما يخش أونلاين حدخل فيه شمال - حبيب قلبي والواد حسين وعومار وعبفتاح و ... ترررررن تررررررن ترررررن تررررررن اخص عليك وده وقتك - أعمل أنا ايه في الحبل اللي انقطع دلوقتي؟ أما نشوف ألو السلام عليكم ورحمة الله وعليكم السلاااااام ورحمة الله - ازيك يا ولد يا عالي أهلا أهلا - ازيك يا حاااااااج؟ عامل ايه؟ وازاي الأهل كلهم والأولاد - يادي النور يادي النور أنا بخير الحمدلله وكله تمام والأهل زي الفل الحمدلله بقولك يا عالي - انت فين يبني بقالي أسبوع متشحتف عليك - كل ماسأل عليك في المسجد أو في البيت يقولوا في الشغل انت مالكش مواعيد ثابتة فيه؟ معلشي والله يا حاج علي أصلي مطحون فيه والله والراجل فوزي صاحب الشغل ده ربنا يكرمه هادد حيلنا كل يوم وبنروح وش الفجر ساعات - نعمل ايه بقا أكل العيش يا حاج طيب ربنا يعينك يابني - قولي مش انت تخصصك الكمبيوتر؟ مجالك يعني؟ هاهاهاهاهاها - أيوة يا عم الحاج طبعا - أومال أنا بغني في ايه من 5 سنين - لا مكانشي العشم يا حاج علي تنسانا لا يبني والله مش القصد أنا بس دايما بتلخبط من اسم كلية الحسابات بتاعتكم دي - اسمها حاسبات يا حاج حاسباااااااااات يا سيدي مش فارقة كتير المهم يبني - الكمبيوتر عندنا في البيت فيه مشكلة كل ما نشغله ميشتغلشي وفيه كده مشاكل كتير وأنا قولت أكيد مفيش غيرك أنت اللي حتقدر تصلحه عفريت من يومك ما شاء الله يا حاج عفريت ايه بس - الله المستعان - ادعيلنا انت بس - عينيا طبعا تحب أجيلكم امتى؟ صحيح ايه السؤال السخيف ده - هااهاها أنا تقريبا مش فاضي طول الأسبوع غير النهاردة و زي النهاردة الأسبوع الجاي خلاص تعال النهاردة لو مش يضايقك عينيا يا حاج اديني ساعة كده أخلص شوية حاجات و أنزلك عالطول اتفقنا على بركة الله - تشرف يبني مستنيينك السلام عليكم وعليكم السلام و الرحمة -------

"وَأَنْكِحُوا الأَيَامَى مِنْكُمْ وَالصَّالِحِينَ مِنْ عِبَادِكُمْ وَإِمَائِكُمْ إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِهِ وَاللَّهُ وَاسِعٌ عَلِيمٌ " (سورة النور - آية 32) الحمدلله خلصنا ورد القرآن - يا سلااااااام راحة نفسية الحمدلله نقول الأذكار واحنا بنلبس بقا ------- وبعد برهة من الزمن ------- "اللهم حسن خلقي كما حسنت خلقتي"تشك تشك تشك بتسرح في ايه كاتك خيبة - هاهاهاها بس والله قمر برضوا المهم فين السيديهات؟ اه سيدي الويندوز الوهمي بتاعي اهي - سيدي الاوفيس - ممممم بقولك ايه هات الهارد كله ان شالله ماحد حوش وأدي كل حاجة تمام - باذن الله ماااااااااامااااااااااااااااااااااااااا أنا نازل لحد جارنا الحاج علي - عايزة حاجة يا ماما من تحت؟ الله يكرمك يابني سلامتك - و سلملنا على الحاجة و الأولاد يوصل ان شاء الله يا ماما السلام عليكم ورحمة الله --------- تي رييييييييييييييييييييينج تي رييييييييييييييييييييينج زييييييييييييء السلااااااااام عليكم ورحمة الله وعليكم السلام و رحمة الله وبركاته أهلا أهلا يادي النور ازيك يا ولد يا عالي --------- شوية أحضان و مقدمات الضيافة بقا --------- مممممم الظاهر كده يا حاج حصل حاجة في الويندوز ليه كده يبني؟ ماكان شغال وزي الفل؟ احنا من كام يوم كنا شغالين عليه وكان تمام زي الحصان عادي بقا يا حاج - كل حاجات مايكروزفت كده - بتخرب لوحديها - بس ان شاء الله أنا حظبطهولك و أخليه حصان تاني أهاهاهاهاهاها - استغلست نفسي على النكتة بس الحمد لله عدت المرة دي والكل ضحكوا هاهاها طيب سواني يبني أنده البت غالية بنتي عشان تقعد معانا تشوف فيه ايه أنا عايزها تتعلم منك و تشوف انت بتعمل ايه كل مرة عشان تصلحه لان احنا تقلنا عليك أوي ومش عايزين كل شوية نجيبك كده على ملا وشك - وأهو برضو هي مش حتفضل جاهلة في الحاجات دي كده عالطول لازم تتعلم عينيا ليكم يا حاج - متقولشي كده والله أنا تحت أمركم في أي وقت هي بس زحمة الشغل والله ربنا يعينك يبني و يوفقك - يا أم غالية اندهي البنت تيجي تقعد معانا اتفضل العصير يبني البنت زمانها جاية - الله يكرمك يا حاجة تسلم ايدك ----------- نكمل المرة الجاية :))))

هناك 21 تعليقًا:

غير معرف يقول...

eh dah!!

mafeesh nekmel el marady!!!!!

eh ely 7asal huh huh???

I visualised the scene
wel mo2serat el sawtya dih sha3'ala tamam

7ansma3 zaghreet wala eh ;)

:D mat3'ebsh 3aliha ALLAH yekremak

ew3a yekon qeset 7ob ma bein el computer w howa w 7atenso 3'alyya!!

mestnya aho...:)

Bride Zone يقول...

مش بحب النهايات المفتوحة!
ما تكمل يابني عالي حب غالية واتجوزوا؟ :)

Rivendell** يقول...

Waaaiting

david santos يقول...

Thanks for you work, is very, very nice, and have a good weekend

أميرة البلطجية يقول...

اممممم
الموضوع فيه إنه
!!

تخاريف يقول...

كمل يا جروووم..

اما نشوف عالى هيعمل ايه مع غاليه...

حلو اوى اسم غاليه..


كمل بقى فى السريع..

Dr.SEA يقول...

يا عبده لو سمحت عايزين نهاية سعيدة المرة دى ادينا امل :) خلاااااص تعبنا
:)

تخاريف يقول...

اه صح نسيت...
ايه سوانى دى؟؟؟

اسمها ثوانى...
:P

yasmina يقول...

يلا بداية تفاؤل عندك بس الله يستر من نهاياتك يا جميل

اصنع لنفسك مثالا وهاجا
ولتفح نفسك بعبير الزهر
ولا تكف الايادي عن العطاء
ولا تمنعن صنوف الحب

اي كلام

أحمد سلامة يقول...

طب يعني مش تقول من الاول ان في اجزاء
طيب
نشوف في ايه هايحصل

محض روح يقول...

هههههههههه
حلوه
الموسيقه التصويريه المصاحبه
للبوست

نفسي افهم حبك في الاجزاء
طيب متكمل مره وحده
ياعني بحكم الزهايمر الوراثي
الواحد بينسى
الجزء الاول كان بيقول ايه

على العموم ربنا معاك
وفي انتظار البقيه
:)
تحياتي يا فندم

Rosa يقول...

مممممم الظاهر ان الواد العلي هيدبس في بنت الغالي
تحفه يا جروم والمؤسرات الصوتيه والموسيقى التصويريه جامده قوي ههههههههه اكتر حاجه بتشدني المؤسرات الصوتيه بس نصيحه يا جروم تقولها لصاحبك العالي دا يعني لو ربنا وفق كدا بلاش يسرح شعره قدام العروسه احسن تتخض اصل تشي تشي تشي صاعبه قوي على شعر انا متخيله المنظر هههههه
تحياتي ليك ولقصصك الجميله
وبسرعة بليز يا جروم كامل بقيت القصة دا حتى خير البر عاجله :)

Noony يقول...

امتى عدوى الأجزاء دي هتبعد بقى؟
يا رب
اسمه "عالي"؟...أول مرة أسمع الاسم دة
مش هقول حاجة غير لما أقرأ الجزء التاني

المؤثرات الصوتية جاكدة بجد والدقة في سرد التفاصيل المثيرة للاهتمام
:)

نوني
متطولش بقى

شيرين يقول...

ياريت متطولش وتنزل الجزء الثاني بسرعة البرق .. مدونتك جميلة ..تحياتي

BackBone يقول...

يابني والله انا مهندس كمبيوتر برده و كل مايحبوا يوروني عروسه يقلولي اصل الكمبيوتر باظ و كنا عايزينك تصلحوا


....


حاجه جامده موووووووت

Anima يقول...

أنا أحتج
مش قادرة أستنى

عايزة أعرف الباقي ياض ههههههه

Esmeralda يقول...

و الله يشوف و مش يخسر حاجه
هو ده الشيخ بتاع المرة اللى فاتت؟؟؟

معلش اذعرنى لسه راجعه من اجازة محتاجه رفريش

gohayna يقول...

عارف لو طلعت النهايه مأساويه

تصدق هعمل فيك ايه؟

مش هقولك هتشوف بنفسك

انا مستنيه اهه
كمل بسرعه

shermen يقول...

شكلها حكاية جواز مش حكاية حب

The Groom يقول...


أبيتاف العزيزة

هاهاها حتعرفي اللي حصل المرة الجاية

أي خدعة

هاهاها لا أنا مش نصاب

الله يكرمك و تحياتي لك
-------
برايد زون

حتشوفي وصبرك بالله

ربنا يكرمك يا رب

تحياتي لك
-------

رافينديييييل

وأنا كمان مستني :P

تحياتي لك

-------

David Santos

دا انت اللي نايس والله
:)

تحياتي لك
-------

أميرة البلطجية

طبعا فيه انه

واحنا بنلعب هنا؟

تحياتي لك
-------

دكتورة شيماء تخاريف

صحيح اسمها حلو ما شاء الله

ربنا يكرمك أيواااا جاااااااااي

تحياتي لك
-------

دكتور سي

حاضر يا مان :)

تحياتي لك
-------

هاهاها يا دكتورة تخاريف

سواني واكتب الباقي
:P

-------
ياسمينا العزيزة

ايه رأيك؟

ما شاء الله عليكي

لا والله مش أي كلام :)))))

تحياتي لك
---------

أحمد سلامة

شرفتني يا حبيبي

أيوة انا قايل 1 من 2

عموما تحياتي لك وخد بالك من نفسك

كرر الخطوة العزيزة دي تاني

--------

محض روح

سلامتك من الزهايمر

ربنا يكرمك و خدي بالك من نفسك

أما القصة خلاص بطلنا الأجزاء

أي خدعة

تحياتي لك
---------

روساااا

خطوة عزيزة يا فندم

عينيا يا بنتي

تحياتي لك
--------

نونييييييييييي

ربنا يكرمك و يوفقك يا رب

حاضر عينيا

تحياتي لك
--------

شيرين

شكرا لك :)

تحياتي لك و كرري الزيارة

مرحبا بك
--------

باكبووون

هاهاهها وماله يبني ماتدوس انت لاقي؟

تحياتي لك
--------

أنيما

روحي مجلس الأمن يا طانط

تحياتي لك
----------

أزميرالدا

أيوة يا عم من لاقى احبابه بقا نسا أصحابه

تحياتي لك و كلي سمن بلدي
----------

جوهاينا العزيزة

لا ميهونشي عليا

تحياتي لك :)
----------

شيرمين العزيزة

يسمع من بقك ربنا

تحياتي لك
----------

تحياتي لكم جميعا من ماناساس البلد يا اخواني
:)))

NOHA RADI يقول...

النهايات المفتوحة مشوقة بس ياريت تكملها و على فكرة مدونتك حلوة و اتمنى انك تزور مدونتي يمكن تخليني اغير رايي بدل ما اقول انشاالله عني ما اتجوزت اقول عايزة اتجوز زي برايد