الثلاثاء، ١ مايو ٢٠٠٧

تجربة 1

بسم الله الرحمن الرحيم لما لاقيت نفسي مسافر و بعيد و في بلاد غريبة وبعيدة ولما لاقيت نفسي في روتين شديد قولت اسلي وقتي بالتعرف على الناس و الخروجات ولما لاقيت الناس خنيقة ومملة ومش التيب بتاعي قولت طيب يبقى ادور على عروسة ولما مالاقيتشي العروسة و فضلت اخبط كتير و اخد فوق نافوخي قولت يبقى مبدهاش نشوف مواقع التزويج دي والحقيقة ان المواقع دي بدأ الموضوع معاها بفضول بس ومش مقتنع الى الان ان عليها ناس كويسة او على الاقل الناس الكويسة فيها قليلة جدا طبعا كويسة يعني تنفعني و بتحقق مواصفاتي اللي عايزها مش كويسة يعني ان جينيرال لان مفيش حد كويس مطلقا المهم المواقع دي منها اصناف عديدة يعني منها منتديات و مواقع باشتراكات اغلبها و في منها مجاني و في منها سافل و قليل الادب وفي منها محترم جدا وفي منها مدونات كمان هاهاها بس دي سر :( خليني بقا اوريكم شوية نماذج من اللي شفته في المواقع دي --------- أول نموذج حنتكلم عنه النهاردة هو نموذج المنتديات مثالنا فيه منتدى ظريف حوريكم عينة منتقاة من البنات اللي شفتها عليه و طلباتهم - صباح العاهات أولا - بنات من مصر: - واحدة لا ترغب فيه مسافر خارج البلاد وشعرها كستنائي - خدوا بالكم من دي عشان صفة مهمة جدا - طيب واحنا مالنا - واحدة عايزاه طيب جدا جدا جدا جدا زيها - اه والله كاتباها اربع مرات - وشعرها كستنائي برضو - واحنا مالنا - واحدة عايزاه موظف في مركز عالي - بتحلمي يا طانط - واحدة ترغب في ارتداء النقاب - وعايزاه شاب يتصف بالشخصيه القويه والرجوله ملتزم متدين على خلق جامعى يعينها على طاعه الله ويجاهد معها فى سبيل الله الى الجنه - حلو الحماس ده بس فين الراجل ده؟ - واحدة بتقول حلوة و رشيقة و عايزاه حلو ورشيق - ربنا يوعدنا يا ستي حد يكره - واحدة عايزاه شرقى جدا سى السيد يعنى - لا تعليق !!!! - واحد بيدور على عريس لأخته وبيقول لو مهتم كلمني على الميل - بيقول أهم حاجة يحترمني أنا أخوها - هاهاها شكله متعقد يا عيني - واحدة عايزاه عصبي و مثقف - شعرها كستنائي برضو - ايه الحكاية؟ -عايزاه زي مين يعني؟ - واحدة عايزة واحد من مصر الا يكون معارا مش طالع اعارة يعني -شعرها كستنائي برضو - طيب ينفع مهاجر؟ - واحدة بتقول عايزاه بسيط جدا بس - ربنا يبسطك يا رب - واحدة مدخنة و عايزاه مدخن - صحيح والله الطيبون للطيبات - واحدة نفسها تحب حب حقيقي - الغريب انها لسه 18 سنة بس - كستنائي برضو - واحدة بتلعب سلة و سباحة و كاراتيه و يد - ما شاء الله - أكيد عايزة تتجوز رونالدو - واحدة عايزة عمود نور لا يقل طوله عن 190 سنتي - ليه بتلعبي سلة انت كمان؟ - كستنائي على فكرة - واحدة عايزاه ابيض وله شخصيه قويه عنيد يحب المغامرة ولد مخلص - لا تعليق !! - دي ظريفة: واحدة كاتبة i need my dram man ..... my dram ربنا يجيبه بالسلامة يا رب ياختشي - واحدة كاتبة بالفرنسي - الظاهر ثقافتها الماني - كستنائي برضو - واحدة عايزاه مهذب ومحترم ومتدين وروش ومن عائلة محترمة ويقدس الحياة الزوجية - لا تعليق !! - واحدة بتقول انها كوول جيرل و عايزة كوول مان - ربنا يسقعلك واحد يا رب - واحدة بتقول مش عايزة مصري عايزة فلسطيني سوري لبناني ليبي - اشمعنى؟ كل دولا يا مفترية؟ - واحدة مدخنة و عايزاه مدخن متدين يقدس الحياة الزوجية - و يقدس السيجارة كمان؟ ثانيا نماذج من بعض الدول العربية: - واحدة لا يهمها وضعه المادي - ما شاء الله - ربنا يهدي - واحدة بتقول انها دلوعة عايزة واحد يدلعها و يلف بيها العالم كله - اكيد مش اسمه بطوطة؟ - واحدة لا يهمها المستوى العلمي - أول مرة أشوفها دي - واحدة عايزاه بيعرف يطبخ اكل سوري - اشمعنى؟ يعني مش كفاية انه بيطبخ لا كمان و سوري - شحاتة وبتتأمر - واحدة عايزاه من جزر القمر والله - عادي جدا بس حاطة اسمك ليه تحت سوريا؟ - ملاحظة في السريع ان كتير مدخنات :( وشعر كستنائي برضو - اشمعنى يعني؟ - واحدة عايزاه مقيم بالامارات - طيب جزر القمر ينفع؟ - كلمة ميسور الحال بتتكرر كتير - انتم بتسمعوا كاظم؟ - واحدة عايزاه اردني مقيم في هولندا وهي عايشة في امريكا - اشمعنى؟ مجلس الأمن؟ أجيبلك كوفي عنان اسمراني وحليوة؟ - واحدة خليجية و بتقول مش عايزة خليجي - غريبة - واحدة كستنائي برضو بتقول انها من هواياتها انها العصبية - لا تعليق - واحدة كل اللي كاتباه - لا لجواز المسيار- لا لا لا - واحدة عندها 18 سنة و بتقول معاها ماجستير - ما شاء الله على 40 سنة حيكون معاكي دبلومة؟ - واحدة عايزاه تعليم متوسط - ليه؟ فين الطموح؟ - واحدة عايزاه بيحب الشوبينج - هو في راجل بيكرهه؟ هاهاهاها - واحدة مش من السعودية عايزاه سعودي و من الرياض من حي معين تحديدا - بقولك متكلميه في التليفون و تقوليله اتحرك يا ابو الهول؟ - واحدة بتقول عايزاه غير لبناني و هي لبنانية - ربنا يعين اهل تلك البلاد يا رب - واحدة بتقول اي راجل في العالم غير الكويتي؟ ليه بس والله الكويت فيها جدعان اوي - واحدة بتقول انا فرييي وعايزاه فريي زيي - ببلاش يعني؟ - واحدة تانية عايزاه مدخن برضو؟ - وكستنائي كمان حضرتك؟ - واحدة عايزاه عادي زي كل الناس و صريح طبعا زيي - اه انت شايفة ايه؟ - واحدة عايزاه بيصلي في المسجد كل الصلوات و كاتبه انها وقت الصلاة حتطرده من البيت - ياعيني يابني وقت التراويح حتعمل فيك ايه؟ متجيبلهاش سيرة قيام الليل طيب - واحدة عايزاه ايراني يسكن في بغداد - طيب ينفع امريكي يسكن في طهران؟ - واحدة بتقول انها انثوية مرررررررررررررررررررة - طيب حد قال عليكي راجل؟ - واحدة كتسنائي برضو بتقول انا فتاة جميلة بالمرة يعني ممكن اللي يشوفني مايصدق الشي اللي راح يشوفه - ليه عفريت؟ - واحدة بتقول شبه هيفاء وهبي - قطيعة !! - واحدة بتقول عايزاه متوسط لا شيعي و لا سني - يعني ايه؟ مسيحي؟ ولا يهودي؟ أقولك علماني احسن - نعم؟ - واحدة عايزاه سباح - الظاهر عليها قبطان هي كمان - واحدة بتقول عايزاه من قبائل نجد - بس كاتبة في منتدى مصر - يمكن نجد فيها مصريين كتير - واحدة عايزاه بشرته برونزيه يعني نفس المذيع محمد الشهري الي في صدى الملاعب - قولتلك من الأول رونالدو - واحدة عمرها ما دخلت سينما - هه؟ - واحدة بتقول ابغى تعارف عبر الماسنجر ماابغى احد يتلعب عليي اوكيك - هه؟ نعم؟ - واحدة عايزة زواج مسيار بمدينة الطائف - تدفعي كام؟ - واحدة بتقول انا غير قابله للتلاعب - يعني ايه؟ - واحدة بتقول لا يهم شكله او حجمه ولا ماله ولا جنسيته - يعني هو كله مش مهم برضو؟ على رأيك قلته أحسن - واحدة عندها 50 سنة و بتقول انا شابة - بتعملي ايه هنا يا طانط؟ - واحدة عايزاه اسباني - من لعيبة ريال مدريد و لا برشلونة؟ - المغرب و الجزاير و تونس كاتبين بالفرنسي كتير أوي - ليه بس مالها العربي - واحدة بتقول انها بتسرح كتير و عايزاه يسرح معاها - اجيبلكم مناديل؟ - واحدة عايزاه جوود مان - هو انت جوود وومان؟ - واحدة عايزاه عنيف وعصبي - مبروم على مبروم ميلفش يا صاحبي - واحدة مدخنة هواياتها كتابة مسيجات النقال وعايزة شاب تحت العشرين - واكيد بيعرف يلعب في مناخيره - واحدة عندها 26 سنة و عايزة شاب من 16 الى 26 - دي طفولة متأخرة؟ - واحدة اهم شرط ليها عدم النوم خارج المنزل مطلقا - أحييكي - واحدة عايزة راجل لا هو قطري و لا عماني و لا بحريني و لا سعودي ولا اماراتي و لا عراقي - طيب ينفع أمريكي؟ ما رأيكم دام فضلكم؟

هناك ٣١ تعليقًا:

tamtam يقول...

هههههه
تحفة المرادي يا جروم باشا

_عقبال ماتبقى اسم على مسمى ياابني_

بس انا حاسة ان الموضوعتسلية مش جواز فعلا

هي الناس دي مش بتؤمن بالنصيب

:))
بوست حلو ياعبدالله
حطيت ايدك على منطقة خطرة في نظام الجواز

استمر استمر

emos يقول...

el nas deh ya emma hebl
ya emma fakdeen el amal

7'sosan tant elly mesh far2a ma3aha shaklo wala malo wala 2ay 7aga

ta2reban deh heyya elly hateksab:)

kaman 10 seneen keda isa hatla2y el banat kolaha 3ayza el mowasafat deh

kol dool hatla2ehom bey2olo 3ayzeen raaaaaaaaaaaaaaagel 2ay wa7ed me3addy fel share3 w 7'alas

rabena yehdy

mata7'odlak wa7da sha3raha kestena2y ya groom

deh meza raheba
howa 7ad yetool yetgawez wa7da sha3raha kestena2y

7'alas mabrook 3aleek el kestena2y

groom fara7o tom. ya regala

lololololyyyyyyyyyyyyyyyyyyyyyy

ياسمين يقول...

والله أنا أول واحدة قرت البوست دة أول ما نزل
وقعدت أضحك لما عنية دمعت
ورحت عملت كدة شوية حاجات ورجعت لقيت اتنين معلقين قبلى
غيرت منهم بقى وقلت يا ريتنى علقت عشان أبقى اول واحدة تعلق عنك وأنول الشرف دة
بوست تحفة ودمه خفيف مووووت
والله ما تفرق الإعلانات دى عن اعلانات باب أريد زوجا أريد زوجة فى جريدة الجمهورية
كنت برضه بقراها وأقعد أضحك أنا وصحابى على المواصفات الغريبة والطلبات الأغرب
تحياتى

تخاريف يقول...

رائع يا جروووووووووووم

بجد تحفه جدا...انا عماله اضحك قدام الجهاز..وهما عمالين هنا فى البيت يقولولى فى ايه بتضحكى على ايه؟؟
:D
:D
بجد اضحك الله سنك دائما...طريقتك اساسا فى الرد بالكلام الاخضر فظيعه..
:D

اما بخصوص المنتديات دى..فربنا معاهم..
بجد..
عالم فاضيه..
بس ثوانى

واحدة عايزاه مهذب ومحترم ومتدين وروش ومن عائلة محترمة ويقدس الحياة الزوجية - لا تعليق !!

ليه لا تعليق...
مهى كويسه اهى..
!!!
:)
وعقبال مانحضر فرحك يا فندم..على اى واحده من الخمشتاشناشر اللى انت كاتب عنهم
:D
ربنا يوفقك..
:D

Dr.SEA يقول...

Very nice post :)
Ya seedy rabena yesahelohom we yehdehom ... kol wahed leh demagho ely meraya7ah :)
bas damohom khafef fe3lan we zareefa awy ely 3andaha 18 sana we m3aha magesteer deh ... da ana 3andy 27 we lessa makhadtoosh :( ab2a fashel b2a
:) Waiting more from u

Noony يقول...

يا جرووم يا جروم

اية المصايب دي كلها
بس ماتنكريش الشعر الكستنائي ميزة وهمية برضه :)

ربنا يسهلهم ويرزقهم
بس دول عالم دماغها فيها صراصير..أغلبهم طبعاً

أما انت فانت تتجوز زاحدة شعرها كستنائي زي ما إيموس قالتلك وكله يبقى تمام

ههههههههههههه

ناس عايشة في البعد × صحيح

نوني

FrEe.PhArAoH يقول...

بوست جااااامد بجد

هههههههههههههههههههههههههههه

اشمعنى الكستنائى طيب

ولا اللى عايزاه مقدس للتدخين

تعليقاتك روووعة

تحياتى

Rivendell** يقول...

وانت يا باشا كنت داخل عالمنتديات دي تعمل ايه
ماتقولش تدور على عروسة
لحسن الطريقة دي

تؤتؤتؤ
خاااااالص



هههههههههههههههههه
انا بغلس بس


ربنا يهدي الكل وان شاء الله تجيلك عروسة عينيها صفرا وشعرها ااخضرة
ههههههههه

Bride Zone يقول...

صحيح اصحاب العقول في راحة!

الحمدلله الذي عافانا مما ابتلى به كثير من عباده..

انا قريت البوست كده عالسريع وانا نص نايمة بس عجبني..
حرجع اقراه على رواقه كده تاني يابو شعر كستنائي :))

بوست موفق بصراحة

Nothing To Lose يقول...

ههههههههههههههههههههه
البوست دمه خفيف اوى
لا وتعليقاتك جامدة

بس واقع مرير

Nothing To Lose يقول...

نسيت اقولك
الميوزك جامدة جدا
اختيار موفق
وياريت تقولى بتجيبهم منين :D

اشتغالة يقول...

السلام عليكم


هاهاهاها .. مدونات بتجوز ؟ و دي فين دي ياخويا ؟ ;)

على فكرة .. في حكاية مواصفات فارس الأحلام دي .. قرأت مقالة تجنن تجنن

هدور عليها بس وسط الهيصة اللي هنا و اجيبهالكم

بجد تحفة

و بعدين ماتعرفش ان الشعر الكستنائي ده موضه ؟ أومال ايه اللي هيليق ع البدل النبيتي ؟

bos bos يقول...

ههههههههههههههههه
بجد والله كل ده بيكون تسلية مش جواز ابدأ
ربنا يهدينا ويهديهم

Anima يقول...

المغرب و الجزاير و تونس كاتبين بالفرنسي كتير أوي-----نعم يا عمرررررر دي اتعلمتها من يا مراكبي ههههههههه

ألا ياض يا جرووم يعني ايه كستنائي؟

ما كنت تدور على عروسة بين المدونات
المصريات أحسن لك و الله باتكلم جد

Esmeralda يقول...

ألاااعاااااا
ايه كستبائى ده؟؟؟
زى ابو فروه كده؟؟؟؟؟

و الله مسخره

خيخيخيخيخخخخخ

Қhawlằh يقول...

LOOOOOOOOL

ناس تضحك و تبكي, بس في أحد من جد بيتزوج بدي الطريقة؟ طب بتنجح؟ مو كأنو اوردر فساتين؟

Sa7bet Nouny يقول...

هو الكيستنائي اللي هو أنهو لون؟

غير معرف يقول...

يا مصيبتشي يا مصيبتشي!!! أنا عارفة إني ناقصني حاجات كتيرة قوي عشان أتجوز... بس كمان لون الشعر طلع مش هينفع... أنا شعري مش كستنائي!!!!

غير معرف يقول...

هما كلهم مستخدمين نفس الصبغة الكستنائي ديه و لا ايه

ههههههههههههه

بجد من اجمد ما قرأت مؤخرا

و عريسنا عليك يا رب هههههههه


تحياتي

أميرة البلطجية يقول...

ههههههههههههههههههههههههههههههههههه
ههههههههههههههههههههههههههههههههههههه
هههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههههه
هههههههههههههههههههههههههههههههههه
ههههههههههههههههههههههههههههههه
هههههههههههههههههههههههههههههههههههههه
مش ممكن...اروح اكمل ضحك واجى

Just a Reader يقول...

ربنا يكرم الجميع بس أعتقد هما بيهزروا أو داخلين المواقع دي على سبيل الفضول والتسلية.
في رأيى إن النت مش هي المكان اللي أي حد ممكن يلاقي فيه حد مناسب....تعليقاتك الخضرا دي ضحكتني.
ربنا يصلح الحال ويرزق الجميع

The Groom يقول...



اسف جدا يا جماعة على التأخير في الرد

----

طماطم

امين يا بنتي امين

صحيح مش بيؤمنوا بالقدر و النصيب و انه لا يرده سوى الدعاء وكمان اكيد واضح انها تسالي الليالي

تحياتي لك
---------

ايموس النرفوزة

هاهاهاها صحيح هما الاتنين

ايموس انت دبستيني في جوازة كستنائي وهربتي؟ ربنا يهديكي يا رب

يعني ايه كستنائي بالمناسبة؟

تحياتي لك
--------

ياسمين

يشرفني بجد كونك أول من قرأه و مش مهم أول من علق عليه

ربنا يفرحك و يبسطك دايما يا رب

ربنا يصلح الحال يا ستي و يهدي الناس دي كلها و يهدينا

عقبال أما نفرح بيكي

تحياتي لك
-------

دكتورة تخاريف

:)))))))))
:)))))))))

الحمدلله اللي قدرني أضحكك محدش واخد منها حاجة يا بنتي

الله يكرمك يا رب بس انا زعلان منك حبتين

ليه عايزة تدبسيني في العاهات دي؟

تحياتي لك
---------

دكتور سييي

صحيح يا مان صحيح ربنا يهدي يا رب

يا مان النجاح في الحياة بالزواج فقط هااهاهاها ماستر ايه انت التاني

ربنا يكرمك ويوفقك يا رب

تحياتي لك
--------

نونيييي نونيييي

نعااااااام؟

يعني ايه كستنائي يا طانط؟

البعد x

أنت مين يا؟

تحياتي لك
---------

الفرعون الحر فرافيرو :))

مش عارف أنا يا مان والله الناس دي؟

قولهم بقا

تحياتي لك وشرفتني بزيارتك ويارب متكون الاخيرة
--------

رافينديل

هاههاا لا خالص والله انا كنت بقضي حاجة المتبحر

عينيها صفرة و شعرها اخضرة؟

انت مين يا؟

:))

تحياتي لك
---------

برايد زوون

صديقتي العزيزة ربنا يكرمك على دعائك ده يا رب

هاهاها أنا شعري كستنائي؟

يعني ايه؟

تحياتي لك
----------

نوثينج تو لووووز

الله يكرمك يا رب

شكرا على الخطوة العزيزة دي

تحياتي لك و يا رب تشرفيني انت وصاحباتك
---------

نوثينج

الموسيقى تحت امرك هما 20 تراك ببدل فيهم

شكرا لك

قوليلي في اي وقت انزلهملك عالطول

تحياتي لك
----------

اشتغالة

اهلا اهلا وعليكم السلام ورحمة الله

منتديات يا طانط وليست مدونات

هاهاهاها كستنائي على بدلة نبيتي
فكرتيني بخالي لما كان بيقول والله زمان يا سلاح

تحياتي لك
--------

بسبوسة

صحيح تسلية فعلا

امين يا رب

تحياتي لك وخطوة عزيزة
--------

أنيما

هاهاهاهاها ربنا يكرمك يا رب

معرفشي يعني ايه ياطانط والله كستنائي دي ونسيت لما الناس قالتلي يعني ايه

أما بقا على المدونات المصريات فمفيش واحدة فيهم استاهلها

ربنا يكرمك و انا بتكلم جد انا كمان

تحياتي لك
--------

ازميرالدا

نعم يا معلمتي

كستنائي؟ يعني ايه؟

ربنا يفرحك يا رب

:))

تحياتي لك
--------

تحياتي لكم جميعا من ماناساس البلد

The Groom يقول...



خولة

ما شاء الله اسمك جميل جدا جدا

اه في ناس بتتجوز بالطريقة دي للأسف
مش عارف مش بتنجح تقريبا هاهاها

اوردر فساتين كستنائي على نبيتي

تحياتي لك و خطوة عزيزة
--------

صاحبة نوني

ازيك يا لماضة

اسألي صاحبتك انا والله معرفشي

تحياتي لك و خطوة عزيزة
---------

أنونيماس

مصيبتك في الدين فقط غير كده تبقى حنكشة بس في دنيتك

ربنا يكرمك يا رب

هاهاهاها انت منمرة على مين بالظبط؟

انت مين يا؟

تحياتي لك وخطوة عزيزة
-------

بيتاااااف

هاهاها تقريبا عاملين عليا حزب كستنائي

تحياتي لك و عروستنا عليك يا رب

ربنا يكرمك
--------

أميرة البلطجية

أنا ضحكت على ضحكتك

ربنا يكرمك يا رب

أضحك الله سنك

تحياتي لك بس اوعي تموتي من الضحك بعد الشر

-----------

جااست أ رييدار

:))

الحمدلله الذي أضحكك على يدي

شوفي يا ستي أنا أخالفك الرأي تماما أنا شايف ان النت ممكن يكون مكان وهمي ألاقي فيه شريكة الحياة الوهمية

ربنا يصلح الحال يا رب

عموما نتناقش فيها بعدين

تحياتي لك
----------

تحياتي لكم جميعا من ماناساس البلد

Sa7bet Nouny يقول...

بصراحة يا جرووم، خودها من قصيرها وخلي حد من أهلك يشوفلك عروسة صالونات بنت عشرين سنة... مش أكتر من عشرين يا جروووم... صدقني... البنات لمّا بتكبر دماغها بتنشف وبتبقى غريبة... بيبقى عندها أفكار كتير مختلفة وطلبات كتيرة... وبيبقى الاستعداد للتنازل والتحمل أقل.. رغم إنه تفهم الظروف والقدرة على التحمل نفسها يتهيألي بتبقى أكبر.... إلحق نفسك ببنوتة صغنونة كده بدل ما تلبس في إحدى بنات التلاتين وماتعرفش تعمل أي حاجة في حياتك دون الدخول في مداولات ومناقشات وقضايا جدلية.

محض روح يقول...

هههههه
ايه كل دول ناس عايزين يتجوز
يمكن هما مشتركين في اكتر من حاجه
نفس الشعر الكستنائي
والموصفات الغريبه
ديه تبقى مصيبه
هو في بنات بتفكر كده دلوقتي
هو مين الي بيروح لمين
ده اسلوب عرض زي مابتكون وحده بتعرض
نفسها
مش عارفه حساه امتهان لكرمتهم
دول اكرم ليهم يعدو في بيت اهلهم

ربنا يرحمنا برحمته

The Groom يقول...


صاحبة نوني

انت شايلة مني ليه دانا غلبان والله

:P

صالونات ايه بس

السن مش مشكلة بالنسبالي خالص و اتجادل معا مراتي ونتخانق احسن عندي ما تكون صغيرة و هبلة

صالونات بقا جربناها ومنفعتشي

ازيك بجا؟

تحياتي لك من ماناساس البلد
-----

محض روح

خطوة عزيزة يا فندم وربنا يكرمك ويجازيكي خير على متابعتك الدائمة

تحياتي لك من ماناساس البلد

yasmina يقول...

انا باين جيت متأخرة بس بجد ضحكت من كل قلبي
بوست جنان
هو في ناس بتتزوج هيك
ما احنا مع المواصفات عالمكشوف مش نافع وكيف بالالغاز
اللون الكستنائي مش حلو
وكمان التدخين عند البنات ظاهرة لا تعليق عليها

انت مواضيعك رائعة
تحياتي لقلمك

shermen يقول...

أنا أتخنقت وماكملتش قرايه

ايه الحكايه كلهم شعرهم كستنائي

طيب والشعر الأسمر ماله

وحش يعني

ربنا يهدي

تحياتي

The Groom يقول...


ياسمينا

أكيد طبعا مفيش ناس بتتكلم كده دي تسالي بس

ربنا يكرمك يا رب

مستني الكتاب
:))
تحياتي لك
-------

شيرمين

هاهاهاها البوست ظريف

بس صحيح والله قوليلهم انا مش عارف ماله الأسود يعني الكستنائي أصلا يطلع ايه؟

تحياتي لك

Rosa يقول...

هههههههههههه
طب ملاقيش واحد فحلقي و ودنه الشمال اصغر من اليمين و يقدس اكل السافانا؟؟
انا سمعت ان في خصومات جامده على الي شعرهم فوشيه ياترى العرض دا لسه ساري؟؟
هوا بجد في كدا؟؟؟
بجد ضحكتني موت , دمك خفيف وتعليقاتك تحفه
تحياتي لكل اهل مانساس البلد نفر نفر

The Groom يقول...


روزا هنا يا مرحبا يا مرحبا

اه في تخفيضات على الكستنائي والفوشيا والفحلقي

تاخدي شوية؟

ماناساس واهلها بيسلمو عليكي

تحياتي لك