الخميس، ٣١ مايو ٢٠٠٧

مايو 2007

السلام عليكم ورحمة الله وبركاته
كالعادة وأول ما كملت 6 شهور باليوم في شغلي ده اترفدت - وكالعادة الشركة فلست ومفيش مرتبات
الحمدلله وكالعادة 6 شهور بالمقاس - الحمدلله وكالعادة عزلت ليجي عاشر مرة
الحمدلله وكالعادة دي تالت مرة في سنتين
مش مضايق ولا زعلان خالص بالعكس ولله الحمد أنا أكثر تفاؤلا من نص الناس اللي دخلت في المدونة قالتلي تفائل يا رجل وأنا فعلا متفائل الحمدلله
:)
أنا بكيت لشيء مختلف تماما الحمدلله وراح لحاله خلاص
أما بقا على الجملة في اخر بوست فهي جملتي المشهورة وانا بعزل - لكن الحمدلله وحاشا لله ليست هروبا من قضائه او اعتراضا على مشيئته - خالص - كل الفكرة انه لا يحتملك مثل بيت أبيك وحضن أمك وبسمة اخوانك ومستقبلا زوجتك ان شاء الله ولن يقسو عليك شيئ مثل نفسك
عموما ادعولي يا جماعة
مش عارف حلحق أكمل امتى تدوين تاني لان الامور ملخبطة قوي دلوقتي وعامل زي الفرقع لوز ما بين الجامعة و بيوت الناس
بس احسن حاجة حصلت امبارح اني اول مرة اتمشى كتير اوي كده من يوم ما جيت امريكا مع الشخص العزيز :)
اللهم لك الحمد كما ينبغي لجلال وجهك وعظيم سلطانك
تحياتي لكم من ماناساس البلد
:))
تحديث
نروح ونغيب ونتمطوح وفي الاخر نجيلك تاني يا ماناساس يا بلد - يا بلد من غير ولد - اه لو كنت فاضي

هناك ١٥ تعليقًا:

dondn يقول...

دى الحياه ولا بلاش كلها احداث ومفاجاءت...بسيطه خالص يا عبدالله تغيير برده عشان مش تزهق دنيا بتحب تعمل لك تغيير كل شويه..وانت ماشاء الله عليك راضى بكل اللى ربنا بيبعته لك..ربنا يهديك ويكرمك لانك والله تستحق وانا عارفه انه ربنا بيدخر لك الاحسن دايما..ومادام انت كويس يبقا كل حاجه سهله وتتعوض انت المهم يا راااجل ههههه..كله ان شالله يتظبط وانت ادها وادود يعنى...برده ادعيلى عشان ربنا يكرمك

Rosa يقول...

جميل ايمانك و رضاك بالي ربنا قاسمه ليك
واذا احب الله عبدا ابتلاه ليختيره
وانا عارفه وكل الناس عارفه انك قد الاختبار
وربنا هيكرمك اكيد انشاء الله
عشان تستاهل كل خير
وعسى ان تكرهوا شيئا ويجعل الله فيه خير كثيرا
وان شاء الله خير
وان شاء الله تلاقي شركة احسن للشغل
انت دلوقتي بقيت عندك خبره اكتر
وربنا يعينك يا رب ان شاء الله
دايما في دعواتي :)

Bride Zone يقول...

قبل ما اتوظف في وظيفتي الحالية.. غيرت شغلي اربع مرات... في خلال تقريبا سنتين او اقل..
اول مرة اترفضت بعد ما خلصت فترة التدريب واتظلمت فيها اوي وسبحان الله الشركة قفلت فرعها في البحرين بعديها بفترة لأن الله يمهل ولا يهمل.. والظالم بياخذ جزاه..

ثاني مرة اشتغلت في شركة وكنت مبيعات وكنا ثنتين بس اللي معانا بكالوريوس والباقي كلو ثانوية.. وكلنا نفس المرتب.. وجينا بعد الثلاث شهور كانوا عاوزين يعملوا كت اوف كوست ويطلعوا نص الموظفين بس ربنا سلم معايا وجت سليمة كملت معاهم ست شهور ومشيت على عرض افضل..

ثالث مرة داومت فيها في مصنع.. واشتغلت عندهم يوم واحد بس.. ازاي دي فيها تفاصيل كتير بس المهم ان ربنا حفظني في اليوم ده من المدير اللي فارش له اوضة نوم كاملة في مكتبة وانا كنت حبقى السكرتيرة!

ورابع مرة اترفضت عشان مرات المدير كانت بتغار مني.. بس ليه انا بصراحة معرفش..

فضلت بعديها ثلاث شهور من غير مرتب لغاية ما ابتديت شغل في وظيفتي الحالية ومن يوميها الحمدلله الاوضاع مستقرة..

ربنا يحفظك يا عبدالله وكلنا بنمر بازمات بس الثقة اللي معاك دي هي اللي حتثبتك باذن الله..

تمنياتي لك بالتوفيق

yasmina يقول...

ان شاء الله يا عبد الله ربنا يعوض صبرك خير
ويكون اللي جاي احسن من اللي مضى
والحياة كلها تجارب مرة تصيب ومرة تخيب على قولتكم في مصر
:)

اهم شي انك متفائل وعندك ايمان قوي برب العالمين

قف وارفع راسك عاليا
فأغصانك لن تكلها الرياح
عرفت فيك اخا قويا
صامدا لا يخضع للرماح
فالبراعم الخضراء في حقولك
وعصافيرك لا زالت تغرد كل صباح
ومن تحلى بإيمان وجد
قضى الدهر بارتياح

سلام

بندقه يقول...

اهم حاجه انك تكون كويس دلوقتى ومش متضايق ولا زعلان

وربنا يوعدك بشغل احسن من اللى فات

صباح يقول...

ياسيدى هو يعنى اللى فى شغله مرتاح
اهى حياه تزهق وخلاص
المهم عامل حسابك ليوم زى ده؟؟؟؟؟؟؟؟
واديك اهو بتقول انك مؤمن
شوفلك بيت عزاب واقعد معاهم لغاية الازمه دى ماتعدى ولا عندكم بطاله زينا ربنا معاك ويديلك على قد ايمانك ويعوضك خير امييييييييييييييين

غير معرف يقول...

معرفش اقولك حاجة
غير بكرة اكيد احسن من اللي جي
ان شاء الله

ابتلاء من ربنا
عشان تقوم من تاني
وتحمده علي كل شئ

عشان يوم ما تستقر
والامور تبقي تمام
ترجع تبص للايام دي و تقول يااااااااه
قد ايه انا تعبت و اترفدت و نقلت
بس دلوقتي الحمد لله
وابتسامة رضا علي وشك

اللهم لك الحمد كما ينبغي لجلال وجهك و عظيم سلطانك

wanna b a bride يقول...

قل لن يصيبنا إلا ما كتب الله لنا

الجاي أحسن
إن شاء الله

ربنا يوفقك

Just a Reader يقول...

معلش المؤمن دائما مبتلى وده مش عشان إن ربنا مش مهتم بيه لأ ده من حب ربنا ليه وحبه إنه يسمع صوت دعائه وشكره بعد كده عندما تنفرج أزمته.
وتذكر "ما من دابة في الأرض إلا على الله رزقها" أنا عارفه إنها بتبقى دربكه بس بجد محدش عارف الخير فين وأكيد ربنا شايلك حاجه أحسن ودي ممكن تكون فرصة إنك تشتغل في شركة تاني وتشوف ناس جديده وخبرات جديدة ويمكن تلاقي كمان البرايد اللي بتدور عليها هناك :)
خلى دايما عندك حسن ظن بالله وتأكد إن عمره ما هيسيبك لوحدك ...بجد أيام الابتلاء دي بيبقى فيها قرب من ربنا غريب جدا وعلى قد ما الواحد بيتمنى إنه يخرج منها على قد ما بيتمنى غن الحالة الإيمانية دي تدوم عليه.
خد وقتك ورتب أفكارك وأهدافك واستعن بالله ولا تعجز ...ربنا بيحب المؤمن القوي وتأكد إن الرضا اللي انت فيه ده هو مفتاح الفرج إن شاء الله
ربنا يعينك ويثبتك ويوفقك إلى ما يحب ويرضي عاجلا إن شاء الله

تخاريف يقول...

ربنايعينك ويوفقك..
الحمد لله انك متفاااااائل...
:))))))))))
يارب دايما..
:)))))))))

تحياتى من مصر المحروسه

S ... يقول...

يقول تعالى ..:(لتبلون في أموالكم وأنفسكم، ولتسمعن من الذين أوتوا الكتاب ...)
(...وإن تصبروا وتتقوا فإن ذلك من عزم الأمور )
عارف الايه فى سورة ايه ؟ :)... و تذكر ان اكثر الناس ابتلاءا .. الانبياء ثم الاتقى فالاتقى ..
فتوكل على الله .. و استعن بالله .. و استبشر بما عند الله .. فالقادم افضل ...باذن الله

إنـســانـة يقول...

مع انى بسمع عن امريكا كتير

بس لما لاقيت مكتوب مانساس افتكرتها بلد هنا فى مصر ولا قرية ولا حاجة

قوم اييييييييه تطلع فى امريكااااا

ده الدنيا صغيرة اوى وانا مش واخدة بالى

اول مرة ادخل هنا بس احترمت المدونة جدا

وربنا يارب يوفقك ويكرمك وبكرة اكيد احلى بعون الله

:D
سلام عليكم

ياسمين يقول...

زعلانة انك زعلانة
وزعلانة انك لوحدك فى غربة
وزعلانة انى مش عارفة أساعد وأمد ايدى
وزعلانة من شحطتنا فى البلاد
وزعلانة انك حاسس كدة
وزعلانة انك ممكن تبعد وتغيب
مش هقولك الكلام المرسل اياه عن الصبر والعوض والرزق بس هقولك انى قلبى معاك وحاساك
تحياتى لك يا صديقى العزيز

غير معرف يقول...

Alsalamu alaykum wa rahmat allah wa barakatuh...

This is my first time to comment on your blog... I believe that this is not my perfect begining... and maybe also I'm not picking my exact right words...

anyway.. all what I want to say is that all this mess that you may think you are in is just a step that you must take towards something better for you... if you didn't make this step... you will never reach this "something"..

I've always believed that our lives are just like a puzzle that you keep on collecting together piece by piece...sometimes while doing this process you couldn't understand some of those pieces.. you feel they are so unrelated.. but at the end.. you can reach and see the full picture.. a picture that maybe describing something very beautiful...something that really worth all this...

Just keep on collecting your own pieces.. and never give up :)..

Noony يقول...

ما شاقت إلا ما فرجت
إن شاء الله خير يا عبد الله
والله يعوضك أحسن من الشغل اللي فات
ربنا ييسرلك الحال ويفك كربك
ويديم عليك التفاؤل
لعله خير

نوني