الثلاثاء، ٢٢ مايو ٢٠٠٧

تجربة 3

بسم الله الرحمن الرحيم مع تجربة أخرى من التجارب المريرة في مواقع الزواج الالكترونية عشان تعرفو بس قد ايه السايبر سبيييس متخلف في الحاجات دي طبعا أنا بس بوريكم العاهات لكن الحمدلله فيه ناس جامدة جدا في المواقع دي بس قليليين للأسف عموما نبدأ ---------- الموقع بتاعنا النهاردة يقول أنه مختص بالعرب فقط طيب تيجي تبص على جنسيات البنات اللي فيه تلاقيهم فعلا يا عرب يا أما من أصول عربية لكن مواليد أمريكا أو غيرها من بلاد المسلمين طيب الموقع بيقدملك خدمات مجانية زي انك تغمز للبنت غمزة الكترونية wink أو حتى تتفرج على صورتها أو البروفايل بتاعها لكن بقا لو نفسك وسوستلك و قولت في عقل بالك يا ولا - ده لو كان لبالك عقل أساسا - أنك تكلمها او تمسجلها اتفرج بقا على اللي حيطلعلك رسائل أخطاء كثيرة و اعتراضات فجة تطلب منك الكريدت كارد وتاريخ عيلتك كله وانا مالي هو انا حناسبها؟ دانا كنت حعلقها بس لكن الظاهر ان حتى التعليق بقا مش ببلاش اليومين دولا وطبعا العبد لله لا ليه في التعليق و لا ليه في الكريدت كارد دانا شايلها عياقة بس طيب يبقى نشوف بقا التلاقيح عملت أنا بروفايل في الموقع بتاع سنة فاتت كده و مطنشه من يومها - لكن بين الحين والأخر بيجيلي عليه حاجات ظريفة أوي وقررت أشيل البروفايل بتاعي من عليه قريب فقولت اوريكم العاهات قبل ما قفله واضحككم شوية مثلا تجيلي غمزات الكترونية كتير أوي - أيوة غمزات ايه انا مش حلو ولا ايه؟ - أو سعات رسائل تفطس من الضحك مثلا جاتلي رسالة من واحدة أقل ما يجب أن يقال لها اذا بليتم فاستتروا - يعني خلقة ربنا و مالناش اعتراض عليها لكن تتفنني كمان في انك تبيني جمالك الأخاذ ده لن ممكن أبدا الرسالة بتقول - شكرا لأنك غمزتلي و انا كمان عجبني البروفايل بتاعك دي بقا يا اماتان مسطووولة يا اماتان تلاقييييييييييييح و جر شكل - الحمدلله ان عضويتي مجانية و الا كنت رديت عليها رد قاسي أوي :( واحدة تانية كاتبة بكل ثقة لن تقدر أن تقاوم البروفايل بتاعي - مستنية رسالتك - فعلا البروفايل بتاعها كله هيروين وحشيش لدرجة اني حتى مفتحتوش أنا مش ناقص بلاوي التالتة كاتبالي عمرك رحت نيويورك؟ طبعا أنا مش حرد عليها ربنا يسامحها بقا فكرتني ان بقالي سنة في امريكا و عمري مارحت نيويورك ولا حتى شلالات نياغراااااااااااااعاعاعاعاعا :)) - برضو الحمدلله ان عضويتي مجانية الرابعة في انجلترا و بتقولي عمرك جيت الحتة دي من العالم؟ لا والله الحمدلله انا ماليش في العوالم لا سفلية و لا محاسن انا اخري العوالم الموازية في دماغي يعني اخري لما بسرح بروح السعودية في عقد عمل او برجع بيتنا في مصر و يمكن ازور الامارات زيارة سريعة الحمدلله انها مجانية الخامسة بقا دي ظريفة أوي واحدة أم لبنت مش حاطة صورة بنتها و باعتالي غمزة الكترونية بس - بفتح البروفايل اشوف مين دي لاقيت انها بنت مسكينة بتكمل تعليمها و بتشتغل شغلتين و مخلفة عيلين من زواج سابق انتهى بالطلاق و تشترط ان يكون لبناني شيعي؟ طيب وانا مالي؟ لو حد يعرف يقولها لاني شخصيا معرفشي انا مالي؟ دانا حتى مانيش لبناني - حبقى أدعيلها سبحان الله القاسم المشترك فيهم كلهم اصلهم من لبنان - كأن فجأة كل بنات الأرض أو على الأقل الموقع ده أصلهم من لبنان التعميم غلط يا جماعة السادسة اه دي رسالة من الادمين بتاع الموقع بيقول احنا ادينالك عضوية مجانية في الموقع الشقيق الفلاني لأنك عضو متميز - اه الظاهر عشان ولد حليوة بيعيش في امريكا و كل يوم يجيله رسالة - مع اني والله كاتب في البروفايل عايزها مش بتشرب لكن الظاهر ان الادمين نفسه شارب الموقع الشكيك بتاعهم ده مش بيفتح - شكيك فعلا السابعة انا مش بشرب و لا بدخن بس عايزة حد يعلمني وش مذبهل - لا تعليق الثامنة واحدة كاتبالي رسالة طويلة أوي من الجزائر - بالفرنسي - أنا مفهمتش غير بونجور وميرسي أهو أنت - وش مطلع لسانه التاسعة واحدة رياضية جدا و عايزة انسان أثليت ومتميز و باعتالي و بتقولي انت بتتمرن في أنهي جيم؟ الحمدلله ان عضويتي مجانية - أنا لا ليا في الجيم و لا في القاف أنا أخري الاكسرسايز وأكل مرة في اليوم ويادوبك نحافظ ان مفيش كرش الرياضة ليها ناسها يا هانم - اللهم احفظنا العاشرة من جزر الكناري في أسبانيا - 30 سنة و لسه هاي سكول - لا تعمل - مممم أنا شامم ريحة مش ولا بوود - الظاهر فاكراني عصفور كناري اه يا ناري انا يا ني ناس معندهاش دم على رأي خلة --------- أسيبكم بقا تضحكو شوية تحياتي لكم من ماناساس البلد

هناك ٢٨ تعليقًا:

Bride Zone يقول...

التعليق الأول مني :))
حلو الشعور ده

انت يبني بتتلم على التلاقيح دي ازاي؟
ولا البروفايل بتاعك فيه ماجنيت فيلد ما بيجبش غير العاهات زي اللي بيتقدموا لي كده؟ :)

الحمدلله ان عضويتك مجانية برضه اصلها لو كانت بفلوس كانوا فضوا جيبك وطلعوك من المولد بلا حمص ولا حتى عدس!

بس عارف حاجة..؟ الاشتراك في المواقع دي له فايدة.. اصلك بتشوف عاهات وبتشكر ربنا انه ما ابتلاك زي ما ابتلاهم..

الحمدلله الذي عافانا مما ابتلى به كثير من خلقه وفضلنا عليهم تفضيلا..

تحياتي من البحرين البلد :)))

.:.-=- ELGaZaLy-=-.:. يقول...

هههههههههههههههههههههه


ربنا يرزقك ببنت الحلال ويكرمك

تخاريف يقول...

هههههههه

تحفه يا جروووم...

بس ربنا يستر وربنا مايوقعكش فى شر اعمالك..
اما نشووووف

:D

Just a Reader يقول...

أنا تعبتلك من الناس الغريبة اللي بتشوفها دي :)
وقلتلك قبل كده شوفلك طريقه غير الكور 2 ديو :))) مش بينفع:)
ربنا يكرمك بزوجه صالحه قريبا إن شاء الله.

Noony يقول...

لا حول ولا قوة إلا بالله
تعرف..تستاهل انك تشوف العاهات دي...عشان تعمل عضوية في مواقع زي دي حتى وإن كانت العضوية مجانية

بس الحمد لله رب العالمين على كل حال
مش عارفة..أنا مضحكتش..أنا اتضايقت ان في ناس زي دي وبتفكر بالتفكير دي موجودة في الدنيا

ربنا يتولانا برحمته الواسعة
:(
نهاد

غير معرف يقول...

lol

I would have never thought such things exist until you have spoken of them!!

غير معرف يقول...

معلش يا جروم اللي يعيش ياما يشوف

بس ايه حكاية الغمزة دي

يعني انت بتعاكسها وهي بتقولك مرسي على الغمزة؟؟!!

مش عارفة مش قادرة استوعب ان في حد ممكن يفكر بالطريقة دي عشان يتجوز

وماحدش يقولي تسالي
ده وقت حيتحاسبو عليه يوم القيامة

الله يكون في عون الامة من اللي بنشوفه

غير معرف يقول...

انا طمطم على فكرة بس كالعادة مكسلة لسة اكتب الاميل والباسورد والمواويل دي

NeRmeeN يقول...

ههههه يا نهار ابيض ...كل دى عاهات ...بصراحة تستاهل :ح ...حد بردو يصدق حكاية جواز الكمبيوتر ده
ربنا ان شاء الله يرزقك ببنت الحلال..وماتكنش من اصل لبنانى او امريكى
تحياتى

الكلام نوعان :كلام فارغ وكلام مليان كلام فارغ يقول...

يابنى دي مش تلاقيح
دي حاجه كده عامله زي القمار يا صابت يا خابت
وبعدين دي لمجرد التسليه
يعنى بيتهيألى مفيش حد بيتجوز من على النت
ربنا يوقعك في بنت الحلال
حلوه يوقعك دي

أميرة البلطجية يقول...

انت لسه مبطلتش البلطجة دي يا عبد الله
كفاياك بنات بقي يا اخي..حتبور والله
ههههه

ghonaua يقول...

غمزتلك اززاى ؟

The Groom يقول...


برايد زون

أهلا أهلا يادي النور

:))

جميل فعلا أنك أول من تعلقي

نعمل ايه بقا الواحد كان بيستكشف بس خلاص فعلا الحمدلله الذي عافانا مما ابتلي به كثير من خلقه

هاهاها انت شايفة اي ماجنيت فيلد؟ دانا على كده مكهرب

تحياتي لك
--------

الغزالي

الله يكرمك و خطوة عزيزة

اميييييييين يا رب

جزاك الله خيرا

تحياتي لك
----------

دكتورة تخاريف

هاهاها يا رب يسترها بجد يا شيماء

:))
:))

تحياتي لك
---------
جاست أ ريدر

:)))

صحيح الكور دو 2 ده مالوش لازمة

خلاص أنا حغير على بروسيسور أي ام دي

اهاهاها

تحياتي لك
----------
نونيييييي

فعلا أستاهل أني عبرت الأماكن الحقيرة دي أساسا

فعلا أنا خلاص يا بنتي تبت منها وشلت عضويتي وربنا يسامحنا بقا

فكيها بقا

تحياتي لك
----------

ابيتاف

اللي يعيش ياما يشوف يا سيدتي

تحياتي لك
:))
----------
أنونيمس

أو طماطم

هاهاها لا خالص والله ما قربتلها

دي بتقولي شكرا على الغمزة كده منها ليا تلاقيح بقا رغم أني عمري ما قربتلها و لا حتى شفت البروفايل بتاعها قبل كده

صحيح والله ربنا حيحاسبهم عليه

تحياتي لك
-----------

نرميييين

خطوة عزيزة يا فندم و أهلا بك

هاهاهاا أنا كنت بستكشف بس و بتفرج يا بنتي

الجواز من الكمبيوتر او النت ممكن بس بشروط صعبة و عملية معقدة و طويلة

عموما جزاك الله خيرا على زيارتك ويا ريت تكرريها

تحياتي لك
----------

الكلام نوعان

اميييييين يا رب فعلا يا رب أقع في بنت الحلال وحتبقى وقعة بيضا ان شاء الله

تحياتي لك و خطوة عزيزة

:))

-----------
أميرة البلطجية

شوفي يا زعيمة أنا والله مش ببلطج على حد دانا كنت عامل البروفايل نوع من الاستكشاف

هاهاهاها كفايايا بنات؟ هاتيلي عروسة و انا ابطل

اللي يسمعك يقول اني بلاقيهم في كل حتة وبقول لا

هاها ربنا يكرمك يا رب ويرزقك و يرزقني الزوج الصالح

تحياتي لك
-----------

ghonaua

دي غمزة الكترونية

تحبي أقولك على الموقع تروحي تشوفي يعني ايه غمزة الكترونية؟

:P

تحياتي لك وكرري الزيارة يا فندم

:))
---------

تحياتي لكم جميعا من ماناساس البلد

بندقه يقول...

السلام عليكم
ايه اللى انت بتقوله ده يا جرووم
هى الناس دى موجوده فعلا
انا اول مره اعرف ان فى كده
سبيك من جواز الكمبيوتر ده لاحسن تقع فى واحد منه ............وساعتها بقى ياحلو.........ولا بلاش

ياسمين يقول...

موتنى من الضحك كالمعتاد
ايه دة بس يا ابنى دول عاهات

تعالى انت بس مصر ودور بنفسك
البنات هتموت فى دمك الخفيف

:)))))
أنا بقى مرة عرفت ان جوزى كل شوية يدخل على المواقع دى
قمت شفت الموقع اللى عمال ينصح به اصحابه ورحت عملت فيه بروفايل

فجاة وهو قاعد على النت راح ناده علية وهو مذهول ومصعوق
وسالنى وهو بيفتح الميل بتاعه
انا يا هانم جالى البروفايل بتاعك على الميل .. بقى أفتح ألاقيكى بتدورى على عريس وكمان حاطة صورتك؟؟
قلتله افهم من كدة انى عجبتك وعاوز تتجوزنى؟؟
:))))))))
طب والله حصل
تحياتى

emos يقول...

eh el balawy elly enta bted7'ol 3aleha deh

ya groom na22y el 7agat elly enta bted7'ol 3aleha mesh keda ya baba ya3ny enta tela2eek bete3mel keda 3ashan tenarfezny sa7?
narfeztenyyyyyyyyyyyyyyyyyyyyy

نفسنا يقول...

تم أفتتاح العدد الأول من مجلة نفسنا
نتمنى منكم زيارتنا

yasmina يقول...

عبد الله

انا باين جيت متاخرة هذه المرة فأعذرني

انا شايفة انك تبهدلت على عملتك مع اني عارفة انه مجرد حب استطلاع لا غير

يلا الحمد لله ان عضويتك مجانية ولا كنت مش بس تبهدلت وكمان فلست

اكيد الغمزات على اللحية
:)))

الله يحميك ويكفينا شر المعتوهين والمعتوهات

سلام

Shiko يقول...

وايه اللى رماك على المر يا بنى
الحاجات دى مضرة بالصحه
نصيحه منى خليك فى البلدى
على رأى القصرى الله يرحمه البلدى يوكل:)

غير معرف يقول...

اخي الكريم واسمحلي اناديك زميلي في الكفاح
اصل انا بقالي خمس سنين!!!!! بدور ولف

موضوع النت ده انا مشيت فيه بس للاسف محسيتش بالصدق اوي فيه

اخر مرة لقيت واحدة مصرية حاطة صورتها
طيب ايه المشكلة؟؟
المشكلة ان الصورة اللي هي حاطاها صورة لواحدة روسية في موقع زواج من الروسيات!!!!!!

طبعا اول ما شفت كدة لغيت كل الاشتراكات بتاعتي في مواقع الزواج على النت

ودلوقتي بقى؟؟؟ ادعيلي
سلام
اخوك
asameh3000@gmail.com

NeRmeeN يقول...

يااااه انت متفائل اوى...اى جواز او ارتباط عن طريق الكمبيوتر فاشللللل خدها كده منى حكمة...سواء عن طريق مواقع الزواج او الشات...انا شخصيا عاملة بوست كامل فى البلوج بتاعى عنوانه (حب الشات...صباح الاشتغالات :ي

سورى ان كنت دوشتك بتعليقى مرة تانية ..بس انا واخداها رسالة لازم توصل لكل الناس :ي حب الكمبيوتر باطل :)

تحياتى

Rosa يقول...

جروم هو مين بيودي على فين؟؟
:D

safa7_karmooz يقول...

انا اتقفشت يا جدعاااااااااااان

لقيت بتاع بيقولى يا سفاح ....قلت تؤ دى تهييس مذاكرة ...لقيت الجرووم ذات نفسه

حرما لغاية لما ترجع....

انا هسمع الاغنية اللى عند كراكيب عادل واقوم اصلى الفجر :D

------------------

نيجى بقى لحوار العاهات ده ...هههههههههههه

انا كنت بحب ااشتغلهم مووت...كاتب انى عندى 47 سنة...وحاطط صورة واحد محروق حرقة سودا...ومرة واحده مصرية تقولى انت راجل مزة

ازاى راجل ومزة مش عارف ههههههههههههههههه

بس كله نصب فى نصب

حتى واحد زميل ليا فى الهاك ايام زماان كنا نرب الفيزا سوا...انا اشترى بيها برامج ولعب ...وهوا يدخل يسجل فى المواقع دى...هههههههههههههه

يابنى ااصرفها على حاجه تستفيد...يقولى ممكن لما ااكبر تجيلى عروسة ...ههههههههه

سيبك انت...ما فيش احسن من البلدى

لما يبقى يجى :p

أيامنا الحلوة يقول...

يادي الخيبة القوية يابني ميت مرة اقولك بلاش اللعب على النت مفيش فايدة فيك ..

تحياتي ودعواتي ليك بعروسة تطلع عليك القديم والجديد

The Groom يقول...


بندقة

وعليكم السلام ورحمة الله وبركاته

اه تخيلي
والله انا مش مصدق

عموما تبنا الى الله من الاماكن دي

هاهاها انا شامم ريحة في الاسلوب ده مش غريب عليا يا بندقة

عموما تحياتي لك

---------

ياسمين

خطوة عزيزة يا فندم ووالله نورتيني

بس في حاجة

بنات فين؟ ها؟ ها؟

:P

حتموت؟ يا خسارة انا قولت حيفرو بدمي الخفيف و انت بتقولي حتموت؟

ربنا يستر

حركة جوزك دي الحل الوحيد اللي تعمليه معاه في الامور دي

تسلم ايدك

تحياتي لك

-----------

ايموس النرفوزة

بقولك ايه انت بتجري شكل و شكل للبيع؟

:P

يعني بنحاول نضحكك تتنرفزي؟ ايه النظام؟

عموما ربنا يكرمك و يحميكي

تحياتي لك
-----------

نفسنا

اعلان ببلاش اهو يا مان

جايلكم هوا

تحياتي لكم

-----------
ياسمينا

انت تشرفيني في اي وقت متأخرة او بدري

الحمدلله انها مجانية

هاهاها لحية؟ يسمع من بقك ربنا

امين يا رب

تحياتي لك

----------

شيكو

اللي أمر منه يا شيكو

هاهاهاها انت رايك كده؟

طيب ايه راي البناتيت؟

تحياتي لك :P

------------

أنومينماس

زميلي في الكفاح وحبيبي

ربنا يحميك ويكرمك

جزاك الله خيرا

واوعى من الروسيات
:P
تحياتي لك
---------

نرمين

انا طبعا متفائل و طول عمري متفائل ان شاء الله وربنا يديم علينا التفاؤل - تاخدي حبة تفاؤل؟

لا انا برضو عندي و حقولك جواز النت ممكن بشروط

تحياتي لك

---------

روزا

عارفاه؟ اهو ده بيودي على هناك

تحياتي لك
----------

سفاح كرموز

امسك يا حلو

:))

انا بتاع؟

الله يكرمك و يسامحك مقبولة منك على قد سنك :P

صحيح مفيش احلى من البلدي - ولا رأيكم ايه يا بناتيت؟

مساء الخير يا راجل يا مزة

تحياتي لك

---------

أيامنا الحلوة

هاهاهاهاها لعب مين بس يا أبلة أنا بس بجرب حظي و بستكشف العاهات

عموما ربنا يكرمك و يحميكي

ههاهاهاها يا رب بس هي تيجي و انا حقر و اعترف من اول يوم

تحياتي لكم جميعا من ماناساس البلد

:))

safa7_karmooz يقول...

"انا بتاع؟

الله يكرمك و يسامحك مقبولة منك على قد سن"
تؤتؤتؤتؤتتؤتؤتؤ

مش ااقصدك انت

انا ااقصد الشات بوكس العجيب :D

بندقه يقول...

ايه يا جروم بتشبه علىا فى ايه؟؟؟؟

The Groom يقول...


سفاح كرموز

هاههاهاها أنا بس بعاكسك يا واد

متزعلشي مني

:))

تحياتي لك من ماناساس البلد و حظك المرة دي فلت مني مقدرتش اقفشك

---------

لا يا بندقة بشبه عليكي بس كان مش في محله حصل لخبطة افتكرتك حد تاني لما اول مرة حطيتي كومنت من غير لينك لمدونتك

تحياتي لك من ماناساس البلد