السبت، 26 مايو 2007

بوست خفيف 4

بسم الله الرحمن الرحيم أحب أفكركم ان لسه التصويت مستمر لأفضل تعريف للحب أنا ناوي أسيبه لأطول فترة ممكنة أحب أعرفكم كمان ان Dr. Sea لازال عند وعده لينا بالمدونة - بيبلغكم تحياته شكرا يا دكتورة تخاريف لأنك فكرتيني أسأل عليه

اشتغالة و انيما وياسمينا و ابيتاف عاملين شغل جامد اوي ربنا يكرمكم جميعا :))) نيجي للبوست بتاعنا ------------- البوست ده ححاول يكون خفيف خالص ححكيلكم فيه شوية مواقف من حياتي الأول - تقريبا وانا في اعدادي يوما ما كنا نازلين مصر بالعربية ووقفنا في نويبع في الجمرك نخلص الجمارك - كان فيه جراش او مش عارف حفرة في الارض بتاعت ميكانيكية - كان فيه بنت صغيرة أمورة أوي وعسولة بضفيرتين طوال بتلعب فيه ومدلدلة رجلها في الحفرة وبتتدور تلف عشان تقوم راح جاي عربية نص نقل سايقها سواق بكرهه بشده وفاكر وشه ليومنا هذا وداس على رجلها -البنت سرخت والراجل فرمل ووقف - وقف على رجلها الله ينتقم منه - فضلت الناس تصوتله عشان يفوق ويبعد وفين وفين لما خلصوها من تحت الكاوشت و راح جري بيها راجل على عربية اسعاف جديدة وحلوة واقفة في مكان ما - لاقاها مقفولة و مركونة - ومفيش حد - خدوها في عربية بتاعت ناس مسافريين زينا كتر الله خيرهم وجزاهم الجنة - معرفشي عنها حاجة البنت دي لحد دلوقتي - بس كل ما بفتكرها بدعيلها - دي بالظبط دلوقتي في سن 21 او 22 سنة تقريبا :(( الله المنتقم - والله لازلت زعلان عليها زي زعلي على فلسطين والعراق وأمتنا كلها :(((( اسف يا جماعة حبيت بس اشارككم الموقف عشان تدعولها :) ربنا يجمعني بيها في الجنة يا رب عشان اقولها انا كمان دعيتلك :) الثاني - امبارح كنت مروح للبيت من ماناساس البلد الى ستيرلينج البلد وير اي ليف ناو - مشيت في طريق طويل اسمه الشارع الثامن والعشرون هو طريق داخلي في الولاية ماسكها من شمالها لجنوبها والعكس طبعا :) سرحت فيه في التفكير اوي لحد ما وصلت البيت - ياااااه بقالي سنة و تلات شهور في امريكا - عملت فيهم ايه؟ يااااااااااااه = ربنا كريم اوي يا ناس الثالث - 18 مارس 99 يوم نزولي المطار لأول مرة كمصري مقيم و ليس زائر - ماتت فيا احساسات كتير يومها - نزلت وحدي انا وامي فقط - روحت لبيت عمتي ومضيت استمارة الثانوية وكان اخر يوم للتقديم ليها 19 مارس 99 وبيت في بيت خالتي يومها - يومها بليل كلمت انتيمي حبيبي من مصر على اني بكلمه من الامارات وتليفونه مفيهوش ترنك - من الاخر اه اشتغلته على اني بكلمه من الامارات و روحتله البيت تاني يوم فجعته - بس الولد انبسط وخدني في حضنه 5 دقايق كاملين - ياااااااااااااه بحبك يا صاحبي الرابع - 15 يوليو 99 روحت انا وابويا نجيب امي و اخواتي من المطار - كلت يوميها مسقعة باللحمة المفرومة وعيش كتير من كشري شيخ البلد في عباس العقاد وبعدين روحنا المطار - ماما يوميها جابتلي بيبسي من الامارات وطعمه احلى مليون مرة من مصر - قولتلها ايوة حاجة ترم العضم وقربعته في بق واحد زي المفاجيع - حمدت ربنا و استمتعت برؤية المطار - أصلي بتلكك في اي روحة للمطار حتى هنا في امريكا انا ساكن جنبيه ب 3 دقايق وبعدي عليه كل يوم :)

الخامس - نحس متواصل على رأي صاحبي - بس انا مبسوط لاني متفرد متفرد متفرد مرة بوطي ابص على ساعة في فاترينة جنب سلم متحرك في مول ووقع عليا كيس مليان هدوم مرة واقف في طابور التنسيق اسحب الاستمارة و على دوري ليديز فيرست خليت البنت تدخل ولما جيه دوري بعد ساعة انتظار الورق خلص يا بيه وراح نص ساعة و جيه بورق جديد اخدت كيميا وفيزيا ورياضة اتنين في سنة واحدة على راي صاحبي وشي وانا عارفه مرة بجري مع اصحابي في الامارات ومخدتش بالي كلهم نطو من فوقيها وانا وقعت في البلاعة - يااااااع المرة الوحيدة اللي شجعت فيها نادي ودخلت استاد كان لنادي العين الاماراتي و اتغلب الماتش اياه واحد صفر في العين من فريق ايراني اي كلام - الماتش الي قبله كان فاز تلاتة واحد على الهلال السعودي اللي كان جامد ساعتها و الماتش الي بعده فاز 6 صفر على باختاكور الاوزبكي - هاهاها نصيبهم كده مرة اتقدمت لبنت اخطبها طلعت مخطوبة - الحمدلله على الاقل انها مكانتش متجوزة مرة استاذ الانجليزي في اولى ثانوي وقفني اجاوب سؤال محدش في المدرسة كلها عرف يجاوبه واول ما بفتح بقي اتكلم دخلت دبانة في بقي ولا اراديا تفيتها في وشه - حرمني من حصته يومين وطبعا انا ما صدقت - هاهاهاها مرة ربيت حمامة ووصلت لمرحلة اني الوحيد بس الي مسموحله يلمسها او يكلمها او يقرب منها - خدتها معايا اماكن كتير - في يوم بطيرها تسرح شوية اصطادها الصقر بتاع جارنا - انا مش عارف بيربو الصقور ليه؟ --------- جزاكم الله خيرا على استحمال غلاساتي - الظاهر اني لازم اغير اسم البوست لبوست تقييييل تحياتي لكم من ماناساس البلد :))

هناك 23 تعليقًا:

Sherif يقول...

أظن إن العنوان لازم يكون إسمه "نكت سريعه" ......مره واحد عبده جيه يوطي علشان يشووف حاجه في الفاترينه......كيس هدوم وقع عليه....و مره واحد عبده جيه يجاوب دخل في بقه دبانه.......كده العنوان يبقى أجمل
:)

سجدة يقول...

متعرفش اى اخبار عن البنت اللى العربية خبطت رجلها
لو عرفت ابقى قولى الله يكرمك

yasmina يقول...

الله يخليك يا عبد الله بتعمل لنا دعاية كمان

- انت ان شاء الله تدخل الجنة بس من كثر ما في ناس بتدعيلك
:))

- ادعو معك ان ربنا يكون شفا وحما البنت اللي داسها واحد غبي

- سنة وثلاث شهور مروا اكيد انت عملت فيهم كثير حاجات وانجزت كثير وقف بس شوي مع نفسك وانت تعرفهم

- مش عارفة ليش بس انا كمان بحب اروح المطار حتى لو ما بدي سافر باين عندنا عقدة سفر او بنحب الطيارات زي الاطفال او بنحب نغير اماكن
:)

- المواقف اللي انت كاتبها فعلا نحس ضحكتني كثير وتنفع نكات والله

- لا تقلق البوست مش تقيل بالعكس خفيف دم بس يمكن طويل شوي لناس
مش لي على كل حال

سلام

غير معرف يقول...

looooooooool @ Sherif's Comment! LoL

M3LESH ma2dertesh amsek nafsy hehehehehe loool! :D

eh mawaqef w tara2ef dih LoL

LA begad.. as3ad Allahu ayamak!!

m3 t7yat Epi MN TA7T ANQAD EL 3ARABAY lol!!

غير معرف يقول...

by the way

seriously speaking

a whole long year
means a different Abdullah..to the better I assume
new achievments
set goals

means change...means hope..means Nostalgia !!

means..Rabena yekremek w yewfa2ak!
:))

أيامنا الحلوة يقول...

ههههههههههههه حلو اوي البوست ده .. دي نكت .. وحلوة اوي حكاية الدبانة والمدرس اللي حرمك من الحصة .. البوست فعلا خفيف ياجروم ويارب دايما متألق كده في مدونتك

تحياتي

عبدالله يقول...

ايه يا ابني وش السعد الي انت فيه ده
انا بقول بقي تستخبي بقيت حياتك في بيت معزول احس محدش ضامن حاجه
:)
حتي لما جيت تخطب مش نقيت غير مخطوبه
:)
وياتري بقي دي من زمان و لا من قريب
:))))))))))))


تحياتي

TAMTAM يقول...


الاول: ربنا يرحمها ويخفف عنها وينتقم من البشر اللي مابتشوفش دي

الثاني: اكيد ياابني عملت حاجات كتير ..

الثالث:ازاي نزلت انت ومامتك بس..وتاني يوم نزلت انت وباباك تجيب مامتك واخواتك؟؟!!
*عارفة شعور انك نازل مقيم...اسوء شعور ممكن يمر بواحد مصري اتربى في اول حياته برا وقالوله ارجع لبلدك

حتقولهم ماعرفهاش

:الرابع
" أصلي بتلكك في اي روحة للمطار "
كل اللي جرب المطار عنده العقدة دي
انا اللي بيسألني امنيتك ايه اقوله نفسي اشوف بيتي ومدرستي في الدمام واروحلهم بطياره :)))))

الخامس:
"
المرة الوحيدة اللي شجعت فيها نادي ودخلت استاد كان لنادي العين الاماراتي.....هاهاها نصيبهم كده"
على غرار نصيبهم كدة
امبارح كانت مدونتك ترتيبها 215
دخلت قيمتك ودخلت النهاردة اشوف الفرق لاقيتك 216
هاهاها نصيبك كدة:))))

على الفقر اللي عندي مااقولكش


تحياتي من اسكندرية البلد

بندقه يقول...

ايه ده؟ هو انت كل مواقفك كده
دى حاجات تهلك من الضحك
مش ممكن كده

Rosa يقول...

تقيل ايه بس يا جرووووووووم
اصلا طول مانا بقرأ البوست ابتسامه عريـــــــــــــــضه على وشي
كل يوم بتثبت امك حد طيب قوي يا جروم ونادر كمان مش بس عبدالله
:D
تحياتي لكل اهل مانساس البلد نفر نفر
:)

The Groom يقول...


شريف حبيبي

الله يكرمك يا حبي

مبرووووك التخرج عايز أشوف الشهادة الكبيرة قريب بقا :))

ستظل تحفة كعادتك

يا كوسوووووك :))

تحياتي لك يا حبي من ماناساس البلد و أضحك الله سنك
:))
-----------

سجدة

لا والله معرفشي خالص - أتمنى لو أعرف - أعصابي بايظة وفيها حاجة مش مظبوطة من يومها والله

ربنا يجازيكي خير على السؤال عليها - ادعيلها وادعيلي

تحياتي لك من ماناساس البلد و خطوة عزيزة يا فندم

---------

ياسمينا

تعليقاتك الجميلة دي بتبسطني اوي ما شاء الله

امين يا رب

امين يا رب

اه والله السنة دي مش عارف مرت ازاي
ادعيلي بقا :(

اه والله المطار ده ااااااااااه حاجة دايما جميلة تقدري تقولي انا اتولدت في المطار

:))

ربنا يكرمك يا رب :)

تحياتي لك من ماناساس البلد

---------

ابيتاف

اه شريف ده مش ممكن نسيت أقولكم يا جماعة انه المهرج بتاع المنطقة وأكتر شاب حبوب فيها :))

ربنا يكرمه يا رب

ولا يهمك متمسكيش نفسك خالص هو يستاهل :))

الله يسعدك يا رب

هاهاها عملتي ايه في العربي؟

ربنا يحميكي

تحياتي لك من ماناساس البلد

------------

ابيتاف تاني

يااااااه كلمتك دي ليها وقع تاني في نفسي بجد

جزاك الله خيرا :)

تحياتي لك من ماناساس البلد

-----------

شيرين

هاهاهاها شفتي والله كلها حاجات حقيقية

الله يكرمك :))

اه متفكرينيش بالدبانة دي هاهاهاها

جزاك الله خيرا

تحياتي لك من ماناساس البلد

------------

عبدالله يا حبي

هاهاهاها وش السعد فعلا يا حبي

هاهاها استخبى فعلا اديني يابني مستخبي اهو

الكلام ده من زمان قريب يا حبي

تحياتي لك من ماناساس البلد و حمدالله على السلامة

---------

طماااااااطم

الله يكرمك يا بنتي

شوفي انا وماما نزلنا مصر سوا وهي رجعت تاني

ابويا جيه بعديها تاني على مصر لوحده

وبعدين في يوليو روحنا نجيبهم من المطار ماماو اخواتي

هاهاهاها متصوتيليش تاني

النوستالجيا اااااه منها

ربنا يكرمك يا رب

ادعيلي يا طماطم

تحياتي لك من ماناساس البلد

---------

بندقة

مبروك الكمبيوتر

نعمل ايه بقا يا بندقة

الله يكرمك

ادعيلي بقا

تحياتي لك من ماناساس البلد

غير معرف يقول...

looooooooooooool

Abdullah..My exam is TOMORROW
insha Allah

:D

3aaaaaaaaaaaaaaa

mal2eesh m3ak meshabek! :D

The Groom يقول...


روزا العزيزة

:))

الله يكرمك يا رب و يخليكي كلامك كبير اوي عليا يعني ولا استحق نصفه تقريبا

أضحك الله سنك دوما

تحياتي لك من ماناساس البلد نفر نفر

----------

ابيتاف تالت مرة :))

بنبسط بكومنتاتك دي هاهاها

يا ستي يبقى احسن عشان انا مدعيتلكيش امبارح بس ادعيلك النهاردة ان شاء الله في الامتحان ربنا يعينك يا رب وبكرة نسمع انك فتحت مدينة سيبويه واحتليتيها :)

ربنا يكرمك يا رب

كيلو مشبك يا هبااااااااااااااا

:))

تحياتي لك من ماناساس البلد

reri يقول...

أول مره أدخل عندك
أولا الأغنيه اللي إنت حاطيطها تحفه وحلوه جدا
ثانيا البوست ده في موقف مؤلم بتاع البنت ... بس بعد كده فيه مواقف موتتني علي نفسي من الضحك خاصة بتاع الدبانه والبلاعه
ههههههههههه
الدنيا حظوظ
هههههههه
إسلوبك جميل في السرد

سلامااااااااااااااات

أخت جرووم يقول...

السلام عليكم

ياااااااااه أنا عمري ما هنسى الموقف بتاع نويبع دة ........أنا فاكرة اني كنت صغيرة أوي و مكنتش فاهمة إيه اللي حصل كله بس كنت شايفة الدم على الأرض و الناس بتصرخ و بتعيط
و البنت الصغيرة اللي كانت بتلعب أدامي هي و أخوها اختفت

موقف صعب أوي

و بالنسبة ل 15\7\1999
لا تعليق .......ربنا يثبتنا و يعينا

ادعيلي يا جرووم ...أنا بتطحن دلوقتي
شفوي و نظري و عملي حاجة جامدة كدة

ربنا يكرمك و يوفقك

اشتغالة يقول...

دبانة ؟


هاهاهاهاهاهاهاهاها
هاهاهاهاهاهاهاهاهاه
هاهاهاهاهاهاهاهاهاها

كيس هدوم ؟

هاهاهاهاهاهاهاهاها
هاهاهاهاهاهاهاهاهاه
هاهاهاهاهاهاهاهاهاها

خمستاشر سبعة تسعة و تسعين ؟؟؟

وااااااااااااااااااااااااااااااء

تخاريف يقول...

احلى حاجه بصراحه بتاعه المدرس..
كان لاوم يعنى ..فى وشه..
:D
فكرتنى اما اروح اراجع شويه ذكريات كده..
:)
تحياتى..

shermen يقول...

أولا بضم صوتي لصوتك وبدعي للبنت اللي انت حكيت عنها
بجد ربنا يكون في عونها
أصلي عارفه الوجع ده أد إيه مؤلم ويارب تكون بصحه وخير دلوقتي
---------------
ثانيا
كله كوم والنحس اللي عندك كوم
وموضوع الدبانه ده كوم تاني
أهو ده فضلت أضحك عليه مده طويله
بجد ربنا يكون ف عون استاذك
تتف ف وشه
ياخبر ابيض ليه حق يحرمك من الحصه
وانت ما صدقت طبعا
ههههههههههههههههههه
بجد اللي فات كوم والحته دي كوم تاني

سلام يا جرووم

عـلا - من غـزة يقول...



شوف,, قبل ما انسى ,, انا جاية علشان اشكرك على القصيدة العصماء الي كتبتها عند ابيتاف

ايه يا عم الابداع والعبقرية دي يا راجل

اكتبها هنا عندك والنبي علشان حرام تضيع في زحمة التعليقات

حاروح بقى اقرأ البوست

تحياتي

عـلا - من غـزة يقول...



ايه ده !؟

انت كمان كنت عايش في العين

!!!

انت تاني واحد اكتشف انه عاش في الامارات : التانية كانت نقطة مية


انا عشت في العين طفولتي واحلى ايام حياتي


قوللي يا عبد الله هو النحس ده من ايه لا مؤاخذة ؟ يعني بتصحى من النوم تلاقي نفسك منحوس ولا بتيجيلك على شكل حمى

هههههههه

سوري بمزح والله


ان شالله تكون ايامك الجاية نحس فري


تحياتي

مرة تانية

Rodrigo يقول...

Oi, achei teu blog pelo google tá bem interessante gostei desse post. Quando der dá uma passada pelo meu blog, é sobre camisetas personalizadas, mostra passo a passo como criar uma camiseta personalizada bem maneira. Até mais.

The Groom يقول...


ريري

الله يكرمك يا رب - شكرا على مرورك و تعليقك - يا رب تزوريني دايما

:)) الاغنية كانت حلوة لاني غيرتها خلاص

لو عايزاها اديهالك في اي وقت ان شاء الله

الله يكرمك يا رب

صحيح فعلا حظوظ الناس بتختلف

تحياتي لك من ماناساس البلد والله يسلمك و يكرمك يا رب

-----------

أختي الحبيبة

صحيح كان موقف يموت والله انا بعيط كل ما بفتكره :((

ربنا يكرمك ويعينك على الطحن والمذاكرة والطحين يا رب

تحياتي لك من ماناساس البلد

---------

اشتغالة العزيزة

اه دبانة

وكيس هدوم

معلشي بقا تاريخ ومكتوب علينا

تحياتي لك من ماناساس البلد

-----------

تخاريف

هاهاها والله كانت غصب عني كان موقفني اجاوب وكان واقف قدامي بالظبط

نصيبه بقا

روحي راجعي كل الذكريات ولو في حاجة ناسياها نحاول نفتكر سوا

تحياتي لك من ماناساس البلد

----------
شيرمين

امييييين يا رب

ربنا يستجيب يا رب

هاهاها نعمل ايه بقا النحس لما بيركب بيركب ويدلدل هاهاها

ربنا يكرمك يا رب

هاهاها يا رب تفضلي دايما تكوميلي اكوام اكوام كده

ربنا يحميكي

تحياتي لك من ماناساس البلد

----------

عزة من غزة
:P

شوفي الشعر الي انا كتبته عند ابيتاف ليس من تأليفي

ولكني وجدته ساموير وكان منقول

لك الحق في نقله لكن مليش حق انشره هنا لاني مش اعرف مين ألفه

تحياتي لك من ماناساس البلد

----------

عزة من غزة

ما شاء الله انت كنت في العين؟

طيب ماتيجي نتشات شوية ونفتكر العين؟
:))

ربنا يرجعك ليها يوما ما بالسلامة يا رب

وأنا كمان بعتبرها أجمل مدينة في العالم كله لليوم وجنة الله في الأرض

انا كمان عشت فيها طفولتي وحياتي ربنا يخليها لينا يا رب

امين يا رب على دعائك

تحياتي لك من ماناساس البلد

------------

عمونا رودريجو

فوت علينا بكرة

تحياتي لك من ماناساس البلد

Қhawlằh يقول...

تحفة, هي صحيح مواقف منحوسة على قولك, بس زريفة برضو

الله يسعد و يوفقك البنت و كل المصابين و السليمين من المسلمين.