الأحد، ٢٠ مايو ٢٠٠٧

الملك عبدالله طلع قله

هو الملك ميكونشي ملك غير بتاج؟ هات السلطانية يا ولا
بسم الله الرحمن الرحيم
جالي التاج ده من قريب من العزيزة ياسمينا :) صاحبة مدونة كلمات من داخل 48
التاج بيقول:
أكثر 10 أشياء تستمتع بها عندما تفعلها طيب في الحقيقة و الواقع والصراحة و بيني وبينكم و يمكن و تقريبا والظاهر و كما أرى الموضوع و مخبيش عليكم و ........ هاهاها متزهقوش انا جاي اهو في الكلام بس أحب أنبه ان الحاجات دي مش بترتيب الاكثر استمتاعا ولكنها فقط بترتيب ورودها على بالي واحد - فنجان قهوة ببن عربي مطحون في بيت وليس في مطحنة - عمايل ايديها وحيات عينيها يعني - وكتاب جميل أو مدونة جميلة وممكن يكون كاظم شغال أو لا بس مش أي أغنية ليه اللي على مزاجي بس :)) ثنتان - ان شاء الله من غير مقاطعة لما مراتي تيجي يعني - قعدة حلوة معاها نرغي لما نقول يا بس ويطلع عليا النهار و اخد اليوم اجازة عشان انام من كتر التعب ثلاثة - قعدة جميلة على القهوة مع بن معفن و قهوة اتشربت قبل كده وصحبة حلوة سواء من صحاب الكلية او اي حد المهم صحبة حلوة أربعة - نومة حلوة هنية و احلام سعيدة في سريري العزيز في بيتنا في مصر اللي افتقدته أوي أوي أوي :(( خمسة - صلاة في الحرم المكي ثم في المدني ثم في الاقصى مع الدعاء ومعي كل من أحب نصلي سوية هناك ستة - تلاوة جميلة للقرآن تستمع اليها فتحمسك أن تقرأ بشدة لتدرك دوما أن صوتك هو أجمل ما خلق الله من الأصوات فقط لأنه صوتك سبعة - كتاب البداية و النهاية و جردل قهوة عمايل ايديها لاني مش بعرف اعمل قهوة ومش عايز أتعلم تمانية - التأمل دوما في وجه أمي الحبيبة - طلعة ملائكية لها نور عظيم تبعث في قلبي السرور وتنسيني الهموم تسعة - جولة زيارات العيلة خصوصا في البلد - حاجة تفتح النفس و ترد الروح - جميل أن تعشق اختلاف الاخرين وترى فيهم ما ينقصك عشرة - وأنا بقرأ كومينتات الناس على المدونة - ما بين مادح لما لا استحق و شاتم في ما لا يستحق ومحايد لا ينطق أو أحيانا جلمود لا ينفك يهرطق - بس فعلا فعلا بحس أني طاير في السماء - أحيانا تعليقات الناس أحسن من البوست نفسه تم بحمد الله تاج خفيف وظريف - اتعلموا يا ناس التاجات الخفيفة مش البعاجير اللي بنشوفها في كل مكان؟
- اعذريني يا ياسمينا لأني مقبرة التاجات بس جزاك الله خيرا عليه تحياتي لكم جميعا من ماناساس البلد

هناك ٢١ تعليقًا:

Noony يقول...

السلام عليكم ورحمة الله وبركاته

ايه حكاية القهوة معاك؟...وكمان مش بتعرف تعملها !؟ يادي الخيبة
طيب إن مكنتش بتعرف تعمل قهوة، إيه الحل بقى؟

ربنا يحققلك كل أحلامك يا رب
:)
نوني

عبدالله يقول...

ايه ياعم موضوع القهوه ده كله قهوه كده مفيش شاي
وهي مين الي بتعملك القهوه دي يا واد
:)
انت عايش مع فين في امريكا يا ابني هبدا اشك فيك كده
:))))))
ومين بقي جلمود الي بيهرطق ده اكيد بيقول برضه فيه هرطقه
يالا بقي مبروك التاج عقبال السلاطنيه الي ملاينه اكل

سلام

شيرين يقول...

عارف بتمنالك جدا ترجع لبلدك .. لان اشتياقك لبيتك اللي في مصر خلاني اشعر بمعاناتك بالغربة .. ولكن بتواصلك معنا بالمدونات .. مع أهل بلدك اكيد بيخفف شوية عنك الغربة ..

وكمان عجبني اوي استمتاعك بتلاوة القرآن الكريم ..

بس ايه حكاية القهوة دي .. يادي الخيبة .. يابني دي القهوة سهلة لم تتعلم الطريقة بتاعتها ابقي قولي

تحياتي

سجدة يقول...

اجاباتك جميلة اوى بجد
بس القهوة مضرة بالصحة
بلاش قهوة كتير
خليك فى الزنجبيل احسن

غير معرف يقول...

1-coffee..! hmm..the only thing I can drink ..though I am anti-caffeine! :D,, 2ahwa turkey me7wega ya salaaaaam! kefaya re7et el bon :D
bas 3'aleban bashrabha 3shan el mozkra :D W fi el a7'er banam bardo LoL

2-hmm.. that wish of your wife.. ya salam law soma bet3'any wel balkona wel gaw gameeeeeeel..w sahra le3'ayet el fager..teslo wento motma2ny el qeloob!! Allah :)Rabena yerzo2ak el zoga el sale7a insha Allah! :)

3-yep..FRIENDS and the good company and the flow of memories..w el 2ahwa el 3alya..w carmela :D

4-Egypt..security..emrbraced with love.. all you said in your choice of your warm bed in your house...insha Allah :))

5-No comment ! Prayers..Rabena yatqbal w yektebha li kol el Muslmeen wel Muslmat insha Allah!!

6-Allah! I never thought about recitation of the Holy Qur'an from that perspective ever.. yeah we do read..and we like to listen to others.. but how you spoke of one's voice..I like this one!!

7-2ahwa taaaaaaany! :D

8-your Mum! the angel of your life! May you be reconciled soon insha Allah..!!

9-Family is all!! that bond and tie one has to maintain..by the way..how's your aunt? hope she's doing better insha Allah!! ya salam 3ala lamet el 3eila fi Ramdan ..! :)) Rabna yebl3'na Ramdan insha Allah!!

10-the comments..well you blog always deserves the best.. for you have this nice company around you masha Allah! :)) Rabena yezeed w yebarek dayman! :))

Kol Tag wenta tayyeb:)

and wish you dozens of things that make you happy..not just TEN! :))

sorry for my long comment!!:)

Doba يقول...

أولا: مين اللى بيعملك القهوة لانى بموت فيها وعاوزاك تعزمنى على واحد قهوة محوج بيتى من عمايلها برده لانك فاااااااشل قهوة

ثانيا انت محسسنى وانت فى مانساس البلد كأنك فى كوكب تاااااااااانى

بس حقيقى شكلك مصرى اصيل وانت بتحب تلف كده وتدور عالاقارب والخلان

اجاباتك صادقة تنبع من القلب وتنمنياتى بتحقيقها دائما وابدا

سلاموووووووووووز

gohayna يقول...

قهوه يا عني
سنانك هتبوظ

ولازم تروح عند دكتور اسنان علشان تظبط نفسك

وساعتها هتقع في ايدي ومش هرحمك ابدا

ومنغير بنج

شوفت الافتري بقي

المهم انا قريت القصه الي فاتت وعلقت عليها

متزعلش لو بتأخر عليك

حقك عليا

والراجل والله بسالك عليه

اشوفك علي خير

تحياتي

yasmina يقول...

شكرا لك لانك رديت بسرعة على التاج يا عبد الله

بيني وبينك اكثر شي عجبني حكاية القهوة لانك تشبهني تمام بس الفرق اني بعرف اعملها
واحد- ما قلت لك ابعثلك ما رضيت
انت نقلتها عني متأكدة :))

اثنان- ان شاء الله تتزوج وتتكلم قد ما انت عاوز
ثلاثة- فعلا القعدة ما بتكون حلوة الا بصحبة حلوة
اربعة- يا رب تعود سالما الى اهلك وتنام قرير العين
خمسة- ادعو الله ان نكون معك
سته- قراءة القران اخشع موقف ففيها تتجلى عظمة الخالق احييك عليها
سبعة- لا تعليق لاني مثلك تماما
ثمانية- الله يخلي لك امك
تسعة- جيد انك تأخذ الافضل من مثل هذه القعدات فانا لا احبذها
عشرة- كلامك مؤثر ويدل على شفافية وحب الناس

اخر شي انا مبسوطة انك بتقبر التاجات وبتريحنا منها

سلام

Rosa يقول...

الله عليك وعلى اكتر 10 حاجات بتحبهم يا جروم
بس سؤال في الخباسه كدا
قهوه من عمايل ليد مين؟؟ ها ؟ ها؟ ها؟
تحياتي
:)

رينـــــــــــا يقول...

الله الله
تصدق كل اللى قلته نفسى اعمله
لا اجابات جامدة

احلى حاجة واهم حاجة القهوة

ربنا يحقق كل امانيك
ويرجعك بالسلامه

تخاريف يقول...

ربنا يكرمك يا جروووم
وتعيش حياتك كلها فى دايرة العشر حاجات دول...
بجد هى دى تبقى الحياه الحقيقيه...


:)))))))))))

Esmeralda يقول...

يا دى القهوة!!!!!!!!
يا رب اشوفك و انت فى الكوشه عشان تهمد بقى

قلت لى بلدكوا ايييييييه؟؟؟؟؟؟

أحمد سلامة يقول...

والله يا استاذ جروم مش عارف اقولك ايه
كل دي كمية قهوة
دانتا كده هتقعد تلات سنين سهلاان
:)
بس الذ تاج قريته اليومين دول في سلسلة التاجات التي لا تنتهي
تحياتي

The Groom يقول...


نونيييييي

وعليكم السلام ورحمة الله وبركاته

القهوة دي ادماني يا بنتي

أنا متعمد معرفشي أعملها لأن القهوة عندي = مشاركة يعني من غير ما نكون اتنين مشربهاش وبالتالي لو بعرف أعملها حتفقد معناها لأني حشربها لوحدي

الحل اني اتجوز :)

:P

تحياتي لك و ربنا يكرمك يا رب

امييييييين
----------

عبدو المتين

لا مفيش شاي يا حبي الشاي للطبقة الوسطى اللي انا مش منها

هاهاها اللي بتعملي القهوة دي يا حبي ماما أو اخواتي أو خالاتي لكن مش في أمريكا يا جميل

عايش مع جماعة مكسيكان معمروهمشي سمعو عن القهوة العربي - ازيك بجا؟

امين يا رب نلاقي سلطانية مليانة أكل كده بس أهم حاجة ميكونش أكل مكسيكان

تحياتي لك يا حبي و الجلمود ده واحد معرفوش

:))
----------
شيريين

اميييين يا رب و ربنا يحقق أمنيتك دي يا رب
:))

مش عايز أتعلم - طالع الرد على نوني أعلاه

ربنا يكرمك

تحياتي لك



--------

The Groom يقول...



سجدة

خطوة عزيزة يا سيدتي

جزاك الله خيرا

زنجبيل؟ وش مشدوووه

لا يا بنتي القهوة شر لا بد منه :)

تحياتي لك :)
-----------

ابيتاااااف

1- بس بس ريحة البن و قهوة تركي انت حتتعبيني كده اوي أما عن النوم فمين سمعك كلها جردل قهوة و أحلم أحلام سعيدة عالطول

2- مراتي و سوما والبلكونة؟ انت مصممة تفرسيني؟ يسمع منك ربنا يا رب استجييييييييب

3- صحيح يااااه على الذكريات والكاراميلا :)) شكرا لك على تذكيري كانت أيام حلوة والله

4- مصر التي في خاطري و في دمي لحد ما جالي تسمم - بس برضو بحبها :))
امييين يا رب

5- امييييين يا رب

6- :))

7- آه تاااااني - أجيبلك فنجان؟

8- اميييين يا رب

9- اللهم امين - عمتي بخير الحمدلله جزاك الله خيرا على السؤال

10- *blush*

:))

بل جزاك الله خيرا عليه :))

تحياتي لك

------

دوبا

اللي بيعملهالي يا ستي يا اما ماما يا اما اخواتي يا اما ان شاء الله مراتي

في كل الاحوال لازم واخد ست تعملها من غير كده تبقى مش حلوة

رغم ان بابا بيعملها حلو بس بطل من زمان تقريبا من يوم ما تجوز :))

عموما تعالي في أي وقت أنا فيه في مصر تشربي أحلى قهوة

اه ماناساس البلد دي كوكب تاني فعلا أهلا بيكي هناك

الله يكرمك صلة الرحم مالهاش جنسية غير الاسلام :))

الله يكرمك يا رب

تحياتي لك :)

---------

جوهاينا

والله أنا مش مصدق نفسي انك جيتي تاني

ربنا يكرمك يا رب

ماهو انا عايزها تبوظ عشان نكون زباين

الرحمة الرحمة

:P

الله يكرمك يا رب و جزاك الله خيرا على اهتمامك بالموضوع

تحياتي لك
--------

ياسمينا

عفوا يا بنتي أنا مبحبش أأخر التاجات محدش ضامن عمره

1- هاهاها طبعا بنقل منك انت الخير و البركة

2- اميييين يا رب

3- اكيد ويا رب يجمعنا باصحابنا واحبابنا دايما يا رب

4- امين يا رب

5- يا رب اللهم استجب

6- وأدعوك لها وأن تزيدي منها - تقبل الله منك و مني

7- :))

8- الله يخليكي ويحفظك يا رب

9- :)) يعني أنا بعشق التعرف على عادات الناس المختلفة

10- الله يكرمك و فعلا أنا بحب الجميع

صحيح التاجات دي شر لازم ينقبر :))

تحياتي لك
---------

روزا

الله عليكي انت :) :P

هاهاها أقولك؟ أقولك؟

دي عمايل ماما أو حد من اخواتي أو مراتي ان شاء الله

:P

تحياتي لك
----------

رينااااا

خطوة عزيزة يا فندم

الله يكرمك يا رب

لسه فيه وقت روحي و اعملي

امين يا رب و يكرمك و يخليكي

تحياتي لك

---------

تخاريييف

الله يوفقك و يكرمك يا دكتورة

صحيح والله ومين سمعك :))))))
:)):))

تحياتي لك :))

------------

أزميرالدا

صحيح والله القهوة دي ادمان يا بنتي

هاهاهاها امين يا رب

بلدنا؟ تفتكري ايه؟

تحياتي لك من ماناساس البلد

:)
------------

أحمد سلامة

يا عمي انت الأستاذ و المبدع و الكاتب و الوهمي و كل حاجة حلوة

يا عم انا تلاقيني اصغر منك و انت مش واخد بالك

عموما ربنا يكرمك يا رب

هاهاها لا حقعد تلات سنين نيمان قصدك

صحيح التاج لذيذ والبركة في ياسمينا الله يكرمها

تحياتي لك من ماناساس البلد

shermen يقول...

اممممم
ما بتعرفش تعمل قهوة ما تشربهاش
ربنا يرزقك بواحدة ماتعرفش تعملها
هههههههههههه
هيبقى حظك حلو

تحياتي

emos يقول...

howa leh kol 7aga feha 2ahwa keda
2ahwa w bon
ra3;m ennak ma2oltesh 7aga nakad bs lazem teda7'al 2ahwa fel mawdoo3
ya sater nekady

narfeztenyyyyyyyyyyyyyyyyyyy

w kaman hatsa77y meratak lelsob7

ya sater
regala 2a7'er zaman

narfeztenyyyyyyyyyyyyyyy

The Groom يقول...


شيرميين

:((((

ليه كده بس دانا غلبان والله

بس برضو حفضل أشرب القهوة نكاية فيكي بس و مش ححاول أتعلمها
:P

تحياتي لك

--------

ايموس النرفوزة

أهو انت اثبت انك بتتنرفزي عمال على بطال

مالها القهوة يا بنتي؟

ناس غريبة صحيح

تحياتي لك :))

مسـتنـية الفـرج يقول...

انا بتاعة الحمله
ممكن تتصل بالتليفون علي الرقم المكتوب
وتديهم اسمك واسماء اسرتك بعد الاتفاق معهم


تحياتي:)

أميرة البلطجية يقول...

عبد الله
اخبارك ايه
معلش غابت شوية
بس رجعت تاني
تاجك جميل اوي
وربنا ينولك اللي بالك
اخبارك ايه؟

The Groom يقول...


مستنية الفرج

علم و ينفذ

جزاك الله خيرا

تحياتي لك
---------
أميرة البلطجية

أنا بخير يا أميرة انت عاملة ايه؟

ولا يهمك خطوة عزيزة و حمدالله على السلامة

طمنينا عليكي دايما

أنا بخير الحمدلله :)

ادعيلي بقا

تحياتي لك
--------