الخميس، 24 مايو 2007

دانكين دونتس

بسم الله الرحمن الرحيم
طول عمري بكره الدونتس عما - امبارح اتعزمت من شخص عزيز عليا على دانكن دونتس
للي ميعرفشي هو عامل زي بيت الدونتس في مصر عندنا محل مشهور للاختراع الفاشل اللي كله تلبك معوي الي اسمه دونتس ده
بس عليهم قهوة محصلتشي ولا تقولي ستار باكس و لا كوستا و لا حتى عمايل ايديها وحيات عينيها
لكن طبعا عمايل ايديها تكسب في الاخر لانها من ايديها - ايه بحب القهوة و المكان كله قهوة
الجو كله قهوان الجو كله شبعان واللي مش عاجبه باب المدونة يفوت شوالين بن
:P
كان يوم ظريف أوي - تعلمت فيه حاجة مهمة أوي - كن كما أنت ترى الدنيا جميلة
يكفيني في الحياة وجود ذلك الشخص العزيز في حياتي - جزاه الله خيرا عني ورزقه الجنة
أما بقا القهوة فكانت ظريفة - ديكاف - وشوجار فرييي - وعليها كريييم
ده كما قولت للبنت الاسيوية اللي كانت بتبيع في المحل و طبعا مقولكوش لهلوبة دي لو في منها اتنين في مصر كنت فتحت محلين واحد في اسوان و التاني في استنكرية - وحشتني قوي يابوسمرة
عموما مش حطول عليكم و لا عزاء لكارهي القهوة :))))
ولتنامو بدري
ولتفتحو الشباك
وليسرح الناموس
وليقرص البعوض
ولا تصبحون الا على خير - وبدون هرش
سامع يا استبحس؟
تحياتي لكم من ماناساس البلد
تحديث
في حب القهوة
صباح القهوة و احلى صباح يا بهوات
لا في احلى منها و لا غيرها يصبر عالبنات
تشرب منها ومن غيرها مش تعرف تبات
ريحة البن - يا سيدي - احلى من الشربات
واطحن واتهنى واشربي واتخني يا فتكات
القهوة تتخن؟ تؤ تؤ تؤ دي بس خزعبلات
القهوة تسلوع؟ تؤ تؤ تؤ سيبكم منها دي فتكات
القهوة تضيع؟ اه واه ونص مالكيش دعوة يا جملات
القهوة تشبع؟ اسهر ذاكر دي احلى هلوسات
تشرب شاي؟ لا اشرب قهوة وللبن هاااااات
تشم البن؟ احلى من الكلة و البسطرمة والشرابات
تسمح تتطلع برا؟
طيب متزوقش - وعندك واحد كاراميللللللللللا
:))

هناك 20 تعليقًا:

Noony يقول...

يا صباااح التهييس والهرش في الاستبحس
(على رأيك)
انت اية حكايتك مع القهوة؟
انت من كتر مانت اتكلمت عليها في الكام بوست اللي فاتوا ...طلبت معايا قهوة سادة حلوة وجميلة امبارح..مع إني بخاف منها عشان بترفع الضغط
:(

بس سيبك انت....ربنا يخلي لك الشخص العزيز دة عليك...ويخليكم لبعض
:)

البنت الأسيوية كانت برضه مركبة في صباعها سوستة!؟
;)

وبعدين ازاي الناموس يسرح والبعوض هو اللي يقرص؟ أيها المؤذي!!؟
(وش مطلع لسانه)

صباح جديد
صباح سعيد
هههههههههه
نوني

Bride Zone يقول...

هو استبحس ده رجع تاني يهرش في المنكوش؟
يا ساتر يا رب
من الصبح كده؟
ربنا يهدي ويوفق يارب..

انا مادقتش دنكن دونتس ومش حدوقو لأنه مقاطع من ضمن البضائع الأمريكية هو وستاربكس.. بس بحب اوي اوي اشرب تيرماسو لاتيه في كوستا.. الغريب لما طلبته وانا في بريطانيا قالت لي ده بنعملوه في الكريسماس بس اما عندنا بقى يتعمل طول ايام السنة..

انته بقى عمال كل شوي بتحط لنا رائحة القهوة في البوستات.. لحد ما حسيت اني قاعدة في كوفي شوب :))

أنا بحب القهوة بس مش بشربها كتير عشان تاثيرها علي وحش..

لكن القهوة العربية الخليجية بالهيل والزعفران دي بقى مش بنستغني.. يا سلالالالالالالالام لو معاها تمر تبقى فلة

يا صباح القهوة يا معلم :))

Rivendell** يقول...

صباحه يا فندم

ربنا يهنيك .. بس ايه الدي كاف دي هي القهوة تبقى قهوة من غير الكافيين اللي فيها ..

وبعدين تعالى هنا واخدها شوجر فري وحاطط عليها كريمة

ههههههههههههههههههههههه

فكرتني بطنط اعرفها في مناسبة عائلية قالتلنا بلاش سكر في الشاي لاني عاملة دايت وكانت نازلة حتتك بتتك عالجاتوه
يلا بالهنا والشفا

في نغمة انبساط في كلامك ودي اهم حاجة

انا هاقوم اعمل لروحي فنجان قهوة
;)
صنعة ايديا وحياة عنيا

ياسمين يقول...

طبعا انك تيجى مصر ونشوفك أحلى خبر
وبعدين أنا بأموت فى الدوناتس يا باشا

بحبه جدا جدا
انت ليه مش بتحيه طيب؟

القهوة بعد كل دة طلعت ديكاف .. يعنى خالية من الكافايين

هى دى تبقى قهوة

طب تعالى بس مصر واشرب قهوة تركى على قهوة المعلم حكشة وقولى الفرق
:))))

أنا بحب القهوة برضه بس مش ديكاف ولا حتى تركى
:))))))))

غير معرف يقول...

منا قلتلك شكلك من عشاق القهوة:)))))

النهاردة اثبتلي انك مش عشاقها

ده جنان يا ابني

ربنا يكون في عونها ..دي ايديها حتتعب اوي:))))

كالعادة طمطم بس مكسلة
امتحانات بقى

غير معرف يقول...

ههههههههه
هي الكارميلا

عارف ايه احلي حاجة ضحكتني
ومكنتش متخيلة انك تكون شفتها برضه و تستشهد بيها في كلامك
؟

الحتة بتاعة و لا تصبحون علي خير
ههههههههههههههه
اصلي باموووووت في محمد صبحي لما اقلد كل بتوع الجزيرة
وعلي القاهرة
ان تعلم
ان ورائها عيون ساهرة
فلينام الجميع
وقتل من قتل
و جاع من جاع
فلتناموا
ولتغلقوا الشباك
ولتفتحوا الباب
و ليموت الناموس
ولا تصبحون علي خير
ههههههههههههههههههه

عارف الفيديو ده؟
http://www.youtube.com/watch?v=_-o7C0yMx3E&mode=related&search=

انا كنت باقولها في كلامي لصاحبتي
فليعلم الجميع ان الطلبة ورائها اهالي ساهرة
فلينام الدكاترة
ونجح من نجح
و سقط من سقط
فليموتوا
فلتفتحوا اللجان
و تحلوا الامتحانات
ولا تنجحون علي خير
هههههههههههههههههه


تحياتي

هلوسة بعد الامتحان

emos يقول...

el post dah ma7'sooooooooos 3ashan tenarfezny saaaaaaaaaaaa7?

mashy mashy

tela2y senanak lonha brown men kotr el ahwa

w mo22ak hayeb2a brown w hateb2a clown :)))))

bs 7'alas

narfeztenyyyyyyyyyyyy

غير معرف يقول...

نسيييييييييييت
حتتي المفضلة

و ليسرح العناكيب
فوق الغضب
ولا تصبحون علي خير

هههههههههههه

جزاك الله خيرا فكرتني بالفيديو ده
عمالة اتفرج عليه اصلا

ههههههههه

Esmeralda يقول...

كيييييييييييييييييييييييف قهوه انت

:)

كفك :)

shermen يقول...

يابني خلاص بقى عرفنا انك بتحب القهوة
أنت كمان بتكتب فيها شعر
ده انت غريب أوي


انا كنت بحبها كرهتها عشانك
بس دلوقتي بشرب كابتشينو
تاخد مج
-----------------------

وبعدين ت عالى هنا قولي
انت بتنزل بوست كل خمس دقايق
أسيبك يوم أرجع ألاقيك منزل 3 أربع بوستات
يكونش ده تإثير القهوة

yasmina يقول...

مساء الخير على حبيب القهوة

والله ريحة القهوة صارت بانفي
انت بس بتحكي ما تعزمنا معك على فنجان ولا بخيل
:))

حلوة هاي اللي مش عاجبه يخرج

انا من انصار القهوة بانواعها بس طبعا القهوة الفلسطينية اكثر شي

الله يخليلك الشخص العزيز
:)

كن كما أنت ترى الدنيا جميلة

جملة رائعة فعلا عجبتني

اشرب قهوتك ولا يهمك حد
اشرب قهوتك فكل وقت
اشرب قهوتك في ماناساس البلد
:)

وعقبال ما ترجع مصر وتشربها هناك
براحتك

سلام

تخاريف يقول...

بالهنااااا والشفاااااااااااا


ناس من القهوه مستلزيه
وناس فى الكريمر دايبه و متهنيه..
وناس تبات من الناموس مستخبيه..
وناس من المزاكرة طهقانه ومستطقيه"
هتطق يعنى"
:D

اى كلااام على رأيك..

:)
بس ابقى اعزم يا اخى..
انا مابحبش القهوه بس بشربها عشان افوق واركز..
:D
دواااااااا يعنى

بندقه يقول...

يعنى هو كل ده من القهوه دا كويس بقه انى مش بشربها
انا بشرب نسكافيه بس خلاص مابقاش بياثر

وبعدين انت علقتنا وما قولتش مين صاحبك يعنى
وهو اللى هيشرب القهوه اللى انت عاملها اعلانات دى هيجيلو نوم برضه............لا لالالالا دا هيفضل صاحى يضرب فى الناموس والنامس يقرص فيه
وسلامات يا نوم

esraa يقول...

انت عارف ان القهوه جي ببردو دنيا
أنا بحب الشاي أكتر
بس بيجي عليا أوقات بيكون نفسي أشرب قهوه
وقهوه مش نسكافيه
مره عملت كده انا ومنة والحاله دي جاتلنا بالليل طبعا فضلنا سهرانين طول الليل مفيش نوم بقي, بس فعلا كانت حلوه اوي

The Groom يقول...



نونييييييي

هاهاها الاستبحس يهرش في المنكوش

اياكي تلعبي في الامثال اللي مش تعرفيها

امييين يا رب و سلامتك الف سلامة و ربنا يعافيكي يا رب

هاهاها لا دي كانت عادية بس عجبني سرعتها ونضافتها فكرتني بتميز بنات مصر برضو

صباح الخير يا ناموسة

تحياتي لك من ماناس البلد

---------

برايد زوووون

اه شفتي بقا

اميييين يا رب

صحيح انت ليه مش بتقاطعي البريطاني كمان؟ وبعدين انا عايش هنا ازاي اقاطعهم بقا؟ والمحلات العربي هنا تطفش وتستاهل المقاطعة

الله يجازيكي خير يا رب فكرتيني بالقهوة العربي الخليجي و الزعفران والهيل و التمر ياااااااااه

جوعتيني و عطشتيني

ربنا يكرمك ويحميكي يا رب

تحياتي لك من ماناساس البلد

-------------

رافينديل

صباح الخير يا سيدتي

امين يا رب

يابنتي كريم يعني لبن مش كريمة يعني كريمة مختار افهمو بقا

الحمدلله طبعا حد يشوف الشخص العزيز ده و مش يجيله الانبساط والفرحة

ربنا يكرمك يا رب

تحياتي لك من ماناساس البلد

هاها قومي اعملي لنفسك و اشربيها لوحدك :P

هي أساس القهوة اللمة الحلوة

تحياتي لك
------------

ياسمين

حمدالله على سلامتك

الحمدلله ادعيلي بقا ربنا يجيبني بالسلامة ويتمم على خير

مش بحب الدونتس لانها بتطخن و كمان مش بحب السكر كتيرا

الديكاف شيئ اساسي يا بنتي للسهر

لا انا بموت فيها تركي بس تكون عمايل واخد ست مش عمايل قهوة معلمين

تحياتي لك
--------
طماااااااطم

هاهاها عالطول مكسلة و امتحانات يا طماطم؟ ربنا يعينك يا رب

تحياتي لك

--------

ابيتاف

هاهاهاها صحيح الكاراميلا ;)

صحيح محمد صبحي ده مصيبة لن تتكرر في البشرية مرة اخرى

ربنا يكرمه يا رب

حمدالله على السلامة بعد الامتحان

تحياتي لك من ماناساس البلد

----------

ايموس

هاهاهاا ماله البراون والكلاون؟

دولا حتى خلقة ربنا

ربنا يكرمك يا رب

تحياتي لك من ماناساس البلد

------------

ابيتاف تاني

جزانا واياكم يا ستي

:))

تحياتي لك

--------

ازميرالدا

كفك يا معلمتي

:))

تحياتي لك

---------

شيرمين

هاهاها الصبر يا شيرمين

وبعدين اه انا كلي على بعضي سريع بحب اعمل بوست كل يوم

هاهاها وانت مسيبتينيش يوم يعني ده كان سنة

تحياتي لك
----------

ياسمينا

مساء النور يا سيدتي

اتفضلي الجردل كله تحت امرك

صحيح والي مش عاجبه يروح يشرب في مكان تاني

:))

هاهاها ايه الاعلان الوهمي ده


اشرب قهوتك ولا يهمك حد
اشرب قهوتك فكل وقت
اشرب قهوتك في ماناساس البلد
:)

ربنا يكرمك يا رب

تحياتي لك

----------

تخارييييف

صباح الفضافيض

ربنا يكرمك يا رب

:))
:))

ربنا يصحيكي ويفوقك - اصحا طاط طاط طاط فوووق

تحياتي لك

----------
بندقة

هاهاهاها مبقاش يأثر؟

خلاص يبقى قهوة ونفضي للنسكا

هاهاهاه صاحي يضرب في الناموس؟ ربنا يستر علينا انا حروح انام احسن

تحياتي لك

------------

اسراء

اهاهاهاه انا بقا خنفسا بشرب القهوة وانام ملء الجفون و احلم كمان

ربنا يكرمك يا رب

سلميلي على حسام و قوليله يبطل شغل عيال و يكبر بقا

تحياتي لك و لمنة

---------

تحياتي لكم جميعا من ماناساس البلد

تسـنيم يقول...

قهوة... هههههههههههه أنا واحدة لما بتشرب النيسكافيه بتقعد تلات أيام صاحية.. أنا بطلت الصنف ده خالص تماما بعد الكلية وأيام المذاكرة والقهوة كنت مدمناها أيام ثانوي بس ربنا تاب عليا خلاص .. كبيري دلوقتي أشرب قهوة عربي واكل جنبها تمر مش تقولي قهوة دي حتى ريحتها أحلى من مذاقها.. ريحة البن المحوج وهو بيتحمص مزااج يعمل دماغ لوحده


تحياتي

حياه يقول...

ايه ياعم جروم مالها القهوه ومالك انا حاسه انها منافسه قويه للعروسه
انا هاوصى العروسه يكون الشربات يوم الفرح نسكافييه وممنوع لتحت العشرين اصل يصحوا ويصهللواويقلب الفرح حضانه عموما كدا ولا كدا الراجل ليه اربعه اتنين عرفيناهم بيرفعوا الضغط يارب الاثنين التانيني يظبطوه ههههههههههه
مع تحياتى

The Groom يقول...


خطوة عزيزة يا تسنيم

مممم القهوة دي مزاج انا مش بشربها للكلية او المذاكرة او كده دي مزاج عالي وبس

أما عن التمر طبعا مع القهوة العربي ادمان اخر ليا

ربنا يكرمك و شكرا على خطوتك العزيزة يا رب تكرريها تاني

تحياتي لك من ماناساس البلد

------------

حياة

جزاك الله خيرا على تشريفك لي

هاهاهاها صحيح لازم العروسة كمان تكون بتحب القهوة زيي

عموما تحت العشرين في فرحي حخليهم يهيصو

تصدقي فكرة انا حعمل في فرحي قهوة للي عايز

تحياتي لك من ماناساس البلد

اشتغالة يقول...


عبد الله

معلش انت عارف الامتحانات و البتاع

مش هبقى اخش هنا كتير بقى
وهحرمك من نعمة وجودي شوية على ما الامتحانات تخلص

جيت بس أسلم
و أقوللك
اني جبت مشطين كبااااااااار للاستبحس
و الحمد لله اتسرح خلاص و بطل يهرش تاني

و بعدين فيه حاجة

انتا بقى مش بتعرف تعمل قهوة ؟
بقى كدة ؟
(وش واحدة بتقول تؤ تؤ تؤ )

طب كدة أبلة نظيرة تزعل
هاهاهاها

مع السلامة

ادعيلي كتييييير

The Groom يقول...


اشتغالة

والله زمان يا هانم

هاهاها ربنا يوفقك و يكرمك يا رب في الامتحانات و في حياتك كلها و دايما طمنيني عليكي

هاهاها طظ في أبلة نظيرة القهوة دي لازم تتشرب من ايد واخد ست يا هانم

تحياتي لك من ماناساس البلد

-------------