الحب

السلام عليكم ورحمة الله

هلوسات بالليل

الحب واه من الحب

النهاردة روحت الجامعة وفضلت هناك طول النهار

صحيح انا بكره المكان ده لانه مكان قميء بس مضطر عشان النت ببلاش

:))

أصل أمريكا نادر فيها أوي النت كافيه هاهاها

المهم

انا سمعت هناك أغنية الليلة احساسي غريب لكاظم على يد واحد صاحبي

وقعدت أسرح

والي زود الموضوع اني لقيت اتنين متجوزين زمايلي

الاتنين في نفس الفصل معايا وبياخدو نفس الماستر

اعرفهم من يجي سنة من اول ما جيت امريكا - مبسوط اوي ليهم لانهم متفاهمين جدا

مرة زمان وصلتهم بالعربية ورفضت اخد منهم حق البنزين رغم اني يومها كنت مقشفر و بوصل الطلبة بفلوس زي التاكسي عشان القط رزقي - مش عارف ليه انبسطت ليهم اوي - بيشتغلوا كمان في مكان واحد هنا

حسيت انهم في قمة الاستقرار والراحة النفسية

يا ترى هل حقدر أوفر الاستقرار - الحب - العطف - الحنان - الراحة لزوجة المستقبل وحبيبة العمر؟ هل حنستحمل بعض؟ هل حنكون في قمة السعادة زي الثنائي اللي شفتهم دولا؟ هل حتعوضني عن بيع الناس ليا وتخلي الاحباب عني؟ هل حقدر أنسيها الهموم من نظرة؟ هل حرتاح من تعب الدنيا كله معاها؟

هل هنكون متفاهمين كده بشكل غريب؟ هل حتفهمني وافهمها من نظرة؟ او اشارة بسيطة؟ هل حننطق كلمة "بحبك" في نفس واحد؟

ربنا وحده يعلم أنا بفكرلها في ايه - ربنا وحده يعلم أنا نفسي في ايه نعمله سوا - طول عمري بستنى ومش بعمل حاجات كتير في حياتي بس عشان اشاركها فيها لأول مرة زي ما طول عمري كمان بقول ان أول حاجة في أي حاجة هي أهم حاجة

صدقت يا كاظم = صدري سما واحساسي طير

:))

اللهم اجمعني بحبي قريبا على خير يا رب العالمين :)

فعلا الليلة غير

تحياتي لكم من ماناساس البلد و تصبحوا على خير ومعلشي بوست هلوسة قبل النوم

:)

فضفضة:

ناس بتحب الحب وناس منه بتنادي الطبيب

ناس بتكتب في الحب وناس بتناجي الحبيب

يارب يا قادر علينا اجمعنا عالحب والنصيب

وطيبني واشفيني ولو بنظرة من الحبيـــب

اي كلام