الأحد، 2 سبتمبر 2007

تميت 25 سنة - لن أبكي على سريري

------------------------------------------ شوفوا يا جماعة انا حكمل البوست الاولاني بس انا دلوقتي في ماناساس البلد في امريكا - رجعت من مصر يوم 31 اغسطس وربنا كريم بقا - ححكيكلم كل ما اتذكره وححاول اشوفلكم صور حلوة من اللي اصورتها هناك - ربنا يكرمكم يا رب جميعا وادعولي المهم انا طبعا فضلت في الحافلة دي لحد ما نزلنا منها - روحت انا على بيتي مع محمد واحمد اما عن خالتي ركبت مع خالتي التانية وابنها والسواق عربية نضيفة مكيفة وراحوا بيت خالتي التانية - والله الواد ابن خالتي ده راجل بجد ومتأخرشي عني في مصر طول الرحلة كلها - المهم انا روحت بعدها البيت وانا في الطريق افتكرت اني يووووه نسيت الرخصة والبطاقة بتوع مصر في امريكا يعني لا حعرف امشي رسمي الا بصورة الباسبور مثلا ومش حعرف اسوق خالص فعالطول قبل ما اروح خليت العيال نزلوني على قسم مرور مدينة نصر أسأل على بدل الفاقد بتاع الرخصة وطبعا اكتشفت الفاجعة انه محضر وبتاع وكمان اتنقلت العملية اخر الدنيا في قسم التجمع الخامس يعني خلاص انسى - والبطاقة مصر بصراحة حلوة فيها بتتجدد وانت في بيتكم من على النت وده فعلا خدمة سريعة ومضمونة كويسة بس انا خفت اجرب بقا لاني مصري جربان هاهاا :) لا والله انا كنت مستعجل بس هما كلهم عشرين يوم مش حضيعهم في كلام فاضي روحت مخلي الواد ماجد صاحبي لما اتصلت بيه في نفس اليوم يخش اوضتي في امريكا ويجيب البطاقة والرخصة ويبعتهم بريد سريع يوصلوا في يومين والحمدلله ده اللي حصل فعلا وظبطني بقية القعدة في مصر - شكرا فعلا يا ماجد جميل كبير قوي بعدها طبعا كان لازم اختم على نفسي الختم المتين وروحت نازل من العربية بتاعت صاحبي على كوكتيل وعصاير الصفا جارنا في سور دار الدفاع وخليتهم يشربوني احلى سوبيا وقصب وبعدين روحت واخدها مشي لحد بيتنا وطبعا العيال سبقوني هناك بالعربية واستنوني بالشنط والحمدلله طلعت البيت وسلمت على اهلي كلهم وابويا واخواتي كلهم - كانوا مبسوطين مني قوي الحمدلله لاني واحشهم جدا وكمان كان فرح اختي كمان يومين والعملية تمام بقا وكله فرحان ومبسوط الحمدلله - فضلت في بيتنا شوية كده وبعدين روحت مطلع اللابتوب بتاعي ومشيك على الميل في السريع ولاقيت اوفلاين مسج من كام مدون كده بسطوني قوي بيرحبوا بيا في مصر سمعت بقا ادان العصر وروحت متوضي ونازل جري الحق اشوف المسجد حبيبي وشيخ المسجد احب الشيوخ الى قلبي ورمز الاعتدال والاخلاص في نظري - وبعدين روحت نازل على المسجد عدل اشوف صلاة العصر دي قبل ما تفوتني وفعلا بحب اصلي في المسجد ده قوي - وطول الطريق يااااه انا كنت محروم قوي من الادان والمساجد كده نمشيلها مش نركبلها عربية مسافة 15 كيلو ولا حاجة فعلا الناس في مصر في نعمة وكتير مش حاسين بيها للأسف - وبعدين روحت داخل المسجد كان الشيخ صلى ركعة اولى والحمدلله لحقت بقية الصلاة وكملتا ما فاتني وقعدت في مكاني المفضل بعد الصلاة في اخر صف على كرسي بعيد عن المصلين عشان الدوشة - والحمدلله قدرت اني اسلم على الجميع ولكن :( حقولكم المرة الجاية - تحياتي لكم من ماناساس البلد

هناك 23 تعليقًا:

Rosa يقول...

حمد الله على السلامه يا عبد الله
:)
waiting for the rest

esraa يقول...

الحمدلله انك وصلت بالسلامه

بس انت كده مالحقتش يعني

مستنين الباقي(:

yasmina يقول...

عقبال ال 120 يا عبد الله
وحمد الله على السلامة

مستنية باقي تفاصيل الرحلة

دعواتي

Noony يقول...

تروح وترجع من هنا لهناك بألف سلامة دايماً إن شاء الله
هو فينا من
"ولكن"
هو مفيش فايدة في أساليب الإثارة والتشويق..ههههههههه
معلش
هفوتهالك عشان انت بس كسرت ربع قرن
يا مرحباً بيك في النص التاني...الحياة من هنا ورايح ليها حاجة تانية خالص..أجمل بكتيييييييير طبعاً
:)

مش تبكي..مفيش حاجة مستاهلة في الدنيا دي كلها البكاء عليها
اسال مجرب :)

مستنية البقية
(تنفع مطلع أغنية..ومعاها الجملة دية)
أنا بهيس تقريباً
سلام دلوقتي
نوني

koukawy يقول...

المهم حمدلله علي سلامتك
و انا مش ناسيك يا فاكرني و لا حاجه
و هدعيلك دايما انشالله
و رمضان كريم يا كميل

Doba يقول...

الحمد لله على سلامتك
انا سعيدة قوى نك بتحب دايما تصلى فى المسجد - بحترم قوى اللى فعلا بيواظب انه يصلى فيه

تحياتى وأمنياتى بكل التوفيق
هبة

gohayna يقول...

الله انت عيد ميلادك في الشهلر دا زي

مليون كل سنه وانت بالف خير

وحمدلله علي السلامه يا عبدلله

وانا عارفه اني مقصره والغلط راكبني من ساسي لراسي

بس انت اخويا ومش هتززعل اكيدد

ها عايز ايه هديه عيد ميلادك

؟؟؟؟

تحياتي ويارب تفضل في سعاده وهناء للابد

تحياتي

حياة الروح يقول...

امريكا نورت بيك يا عبدالله
ويا رب تعمر مساجدها بالصلاة فيها دائما
وكل سنه وانت طيب وعقبال لما ابنك يبقى عنده 50 سنه فى حياتك
وتحقق انت وهو كل احلامكم

AHMED يقول...

HI ABDOTHEGREAT
IT IS ME YOUR FRIEND IN ABO RAMI (KABAB WE KOFTA)
WHERE IS THE PHOTO WHICH YOU TOOK IT FROM EGYPT
WE WANT TO SEE YOUR REAL FRIENDS

Bride Zone يقول...

نورت المدونة يا عوباد :)
يالله عاوزين نسمع اخبارك بقى واتمنى تكون حاجات حلوة ومن غير لكن اللي بتوجع القلب دي لحد دلوقتي كل حاجة ماشية تمام
:)

عاشقة الوطن يقول...

السلام عليكم

ازيك ياعبدالله
مصر ضلمت
الف حمدلله على سلامتك وربنا معاك وترجع مصر بالف سلامة ان شاء الله

وبعدين متبقاش تنسي الرخصة تانى
يالا المهم انك سافرت بالسلامة وان شاء الله ترجع بالسلامة
وكل سنة وانت طيب ويارب عقبال ما تتم 100 سنة
كفاية 100 ؟؟
كل سنة وانتطيب ويارب بخير دايما
والف مبروك لاختك وعقبالك ان شاء الله لما نفرح بيك كده

منور ماناساس

تحياتى

The Groom يقول...


روزا

الله يسلمك يا رب - ربنا يكرمك

تحياتي لك من ماناساس البلد

--------

اسراء

الله يسلمك يا رب

يعني هما عشرين يوم كفاية عليا انا معدتش قادر على المشاكل اكتر من كده

ايوا جاااااي

تحياتي لك من ماناساس البلد

-----------

ياسمينا

وعقبالك انت كمان مليون سنة والله يسلمك

ايوا جااااااااي

ربنا يكرمك

تحياتي لك من ماناساس البلد

-----------

الله يسلمك يا رب

اهاهاهاها نعمل ايه بقا ولكن دي في دمي

فوتيهالي وبلاش تفكريني اني دلوقتي بيتعملي يوبيل فضي

طبعا الحياة وانت عجوز كركوب زيي كده احسن مليون مرة

انا مش ببكي وعنوان البوست يدل على ذلك

يا سيدي على مطالع الأغاني

ربنا يكرمك يا رب

تحياتي لك من ماناساس البلد

------------

كوكاوي

الله يسلمك يا رب

كويس انك لسه فاكراني

ربنا يتقبل والله اكرم يا كوكو

تحياتي لك من ماناساس البلد

--------------

دوبا

الله يسلمك - ربنا يديم علينا نعيمه وفضله والاخلاص يا هبة

ربنا يكرمك

تحياتي لك من ماناساس البلد

--------------

جوهاينا

وانت بالف صحة وسلامة والله يسلمك

لا مش حزعل طالما جيتي لحد عندي وصالحتيني

عايز هديتي انك تزوريني كل شوية بس

الله يكرمك يا رب

تحياتي لك من ماناساس البلد

--------------

حياة الروح

امين يا رب

امين يا رب

امين يا رب

ربنا يكرمك ويوفقك يا رب

تحياتي لك من ماناساس البلد

------------

احمد حبيبي

ازيك يا حبي وازاي ابو رامي؟ سلملي على نص كيلو الطرب اللي عامل زي العشرة كيلو

ربنا يستر على معدتي

الصور جاية في الطريق يا جميل

تحياتي لك من ماناساس البلد

----------------

برايد زون

منورة بزوارها الكرام يا برايد

حاضر الاخبار جاية ان شاء الله

ان شاء الله حلوة

ربنا يكرمك يا رب

تحياتي لك من ماناساس البلد

----------------

عاشقة الوطن

وعليكم السلام ورحمة الله

انا بخير الحمدلله لا مصر عمرها ما تضلم وفيها اهلها الطيبين المخلصين زيك كده ومنورة دايما بيكم كلكم

الله يسلمك يا رب وامين يا رب

لا مش حنسى الرخصة :)) خلاص سبتها مع بابا في مصر

الله يسلمك تاني يا رب

لا 100 مش كفاية انا عايز مليون

الله يبارك فيكي وربنا يستر علينا

تحياتي لك من ماناساس البلد والمدونة نورت

أحمد سلامــه يقول...

عاوز اقوللك حمدالله عالسلامة يا عبدالله
بس مشعارف عشان جيت ولا عشان رجعت
التفاصيل البسيطة دي بتبقى غالية قوي قوي قوي
حافظ عليها لانها تساوي حياة كاملة
سلام يا صديقي
وحمدالله على السلامة مرة كمان

أميرة البلطجية يقول...

انا اسفة اسفة اسفة والله يا عبد الله وبجد مش بنفضلك
مش عارفة ااقول سورى ازاي...انا كمان متأخرة اوي في متابعت اخبارك ..انا بس قلت اعتذرلك وع الملئ اهو..انا اسفة..مرة تانية
حاجي بعدين تاني عشان عايزة اقارلك كتيير اوي..بس حاليا عندي شمكلة صغنونة كده ..ادعيلي
اسفة كمان مرة

أميرة البلطجية يقول...

w happy birthday :)

Anima يقول...

انا جيت اسلم ما قريتش الموضوع لان الطبيب مانع عني الجلس كثير و خصوصا قدام الكومبيوتر

يومك سعيد

Just a Reader يقول...

حمدالله على السلامة...- 25 سنه ...كل عام وانت إلى الله أقرب وعلى طاعته أدوم
ربنا يكرمك ويبعد عنك المشاكل وينعم عليك براحة البال :)

Meekness !!! يقول...

السلام عليكم
اولا حمد الله على السلامه
ياااااااه 15 كيلو
عشان تروح مسجد هناك
فرحتني قوي و انت بتقول تروح تصلي حاضر
بجد ربنا يوفقك يا برايد
و مستنيين مغامراتك
سلام
زيزي

Té la mà Maria - Reus يقول...

Thank you for linkar our blog, we proceed to do the same thing with yours and us matenemos in contact we are to your disposition for what it is convenient for you
Regards from Reus Cataluya Spain

NOHA RADI يقول...

الف مبروك لاختك يا عبد الله و يارب يكرمها بالذرية الصالحة و يجعل زوجها لها جنة الدنيا و سببا في جنة الاخرة و ربنا يوعدك بفتاة احلامك زوجة تسعدك و تفهمك و تهنيكو شكلك كده ناويها قريب و ابقى فرحني و قولي صحيح مسجل مدونتي عندك ليه تحت عنوان يارب تتجوز و لك تحياتي

The Groom يقول...


أحمد سلامة

الله يسلمك يا فنان هاهاها عشان الاتنين يا صديقي

صحيح انا بحب التفاصيل في كل حاجة في حياتي

سلام يا جميل وطمني عليك دايما

تحياتي لك من ماناساس البلد

-----------

أميرة

لا متتأسفيش يا بنتي انا بس حابب اطمن عليكي ومش بحب تغيبي عليا

يا رب يا بنتي يحل كل شماكلك الصغيرة دي كلها :)) ويرزقك الخير ويرضيكي بيه يا رب حيثما كان

ادعيلي كتير

تحياتي لك من ماناساس البلد

-----------

اميرة تاني

الله يهنيكي يا رب وعقبال مليون سنة ليكي انت كمان

تحياتي لك من ماناساس البلد مرة اخرى

--------------

أنيما

الله يسلمك يا رب والف الف سلامة عليكي ويا رب ترجعيلنا بالسلامة تاني اكثر قوة باذن الله

ربنا يعينك

تحياتي لك من ماناساس البلد

--------------
جاست

الله يسلمك يا رب

امين امين امين

جزيت الجنة على الدعاء الجميل ده

تحياتي لك من ماناساس البلد

------------

ميكنس

وعليكم السلام ورحمة الله وبركاته

اه شفتي؟ والله ده اقرب مسجد

ربنا يستر علينا

الله يسلمك مليون مرة

على فكرة انا جروم مش برايد :)))

تحياتي لك من ماناساس البلد ويا رب مش تكون اخر زيارة

---------------
Te La ma Maria

Welcome any time. It was my pleasure to have you a dear visitor to my blog. Please don't let it be the last time. Have a great time. I will be following your blog soon.

Thanks.

----------------

نهى راضي

الله يبارك فيكي يا رب ولو ان الموضوع متمش

ربنا يستر

امين امين امين

ادعيلي انت بس كتير

مدونتك استفزني فيها بوست بتزعلي فيه وتقولي لما يبقى مش عارف ايه لازم تكوني بلياتشو عشان تتجوزي وطبعا مش يرضيني الكلام ده فدعيلتك بس وكمان حبيت الاسم يكون كده عشان كل مين يقراه يبقى دعالك حتى لو مش قصده :)

تحياتي لك من ماناساس البلد

--------------

ربنا يكرمكم جميعا

:)

شقاوة شعب يقول...

حمد الله على السلامة

وقصة الاذان اللى اشتقيتله فكرتنى بقريبة ليا طوول عمرها عايشة فى امريكا ومن فترة جت مصر
واول ماخدناها من المطار وروحنا وقعدنا ناكل اذن اذان المغرب وكان صوته قوى وندى فلاقيناها مرة واحدة قعديت تعيط

قلنا مالها دى حد زعلها ولا ايه
فسالناها هى بتعيط ليه قالت ان صوت الاذان وحشها جدا وهى عمرها ماسمعته كدة بينطلق جمب بيتها
الاذان عندهم مايسمعهوش الا اللى داخل المسجد فقط

ربنا يديمها علينا نعمة ويرزقنا شكرها واداء حقها دائما

غير معرف يقول...

Welcome back
good to see the mosque as your purgation trip, cleansing your soul!