الثلاثاء، ٤ سبتمبر ٢٠٠٧

لن أبكي على سريري - الاخيرة

بسم الله الرحمن الرحيم والله مش عارف اكمل ازاي يا جماعة بس حكمل وخلاص وامري الى الله ولكن لما خلصت صلاة العصر وقعدت في المسجد في مكاني المفضل في اخر صف على الكرسي بتاعي دايما اللي اصبح علامة مميزة ليا من زمن طويل، لأول الأمر حسيت براحة نفسية عجيبة لاني رجعت تاني للمكان اللي بحبه والناس اللي بحبها وخصوصا المسجد ده عزيز قوي على قلبي يعني من احب الأماكن في الأرض عندي بعد المساجد الثلاثة وبيتنا، لكن المرة دي احساس مختلف، كل مرة كنت بدخل المسجد كنت بحس براحة نفسية عجيبة وارتياح واني في بيت الله حقا، المرة دي حسيت ان المكان فقد روحه، كانت الروح دي بتهب عليا دايما اول ما ادخل دلوقتي محسيتشي بأي حاجة وكان نذير سيء للغاية، فضلت قاعد لحد ما الجماعة التانية خلصت وانا متكدر قوي لاني فعلا حسيت ان المسجد فقد روحه المميزة - حاجة كمان قطعت فيا قوي، كل اصحابي اتخرجوا وكل اللي بيصلوا في المسجد رغم انه مليان ما شاء الله بس كلها وجوه جديدة معدتش اعرف منهم حد غير الراجل العجوز اللي أم الصلاة بينا وخلاص، حسيت بشعور غربة وحش قوي. قابلت اصحابي اليوم ده وخصوصا حمادة صاحبي لو فاكرينه هو طبعا حبيبي وجاري وقعدنا نتكلم في حاجات كتير وبعدها نزلت انا روحت البيت وطبعا صليت العشا في نفس المسجد لكن المغرب صليته في بيت عمتي اللي روحتلها بعدين مع ابويا - نسيت اقولكم ان ابويا وامي خلاص حسيت فيهم بانهم عجزوا وفقدوا بريقهم واحدة واحدة وخلاص كأنهم بيقولوا يللا حسن الختام، والله حاسس بغصة في قلبي وانا بقول الكلام ده لكن فعلا دي الحقيقة اهلي عجزوا بدري بدري وصحتهم مش ملكهم فعلا، ربنا يشفيكي يا ماما ويشفيك يا بابا يومها بالليل روحت لعمتي وتعبت نفسيا قوي لانها كانت لسه راجعة من المصيف مع ابنها ومراته والحمدلله عملوا حادثة وانقلبت بيهم العربية وخلاص الحمدلله قاموا سلام وهي خفت بس لسه اثار وكدمات الحادثة تعباها قوي ربنا يشفيها يا رب دي كانت احب عمة ليا ودايما بتدعيلي وكمان بتعملي عصير الليموناتة اللي مفيش في الكون حد بيعمل زيه ربنا يشفيها يا رب انا عارف اني غلس في التفاصيل دي بس يا جماعة استحملوني انا بفضفض والله يومها بالليل روحت متأخر شوية وخرجت مع صاحبي محمد روحي من جوا وروحنا كووك دور وصعب عليا حال مصر لاني لما كنت باكل هناك زمان واعزمه كان الموضوع كله على بعضه مش بيزيد عن 15 او 18 جنيه لكن دلوقتي الموضوع دخل في 45 جنيه ونفس الأكل تقريبا حسيت بالحسرة والشفقة بحال الناس في مصر لان كل حاجة غليت والمرتبات كما هي ربنا يستر علينا انا مش ححكي بقا بقية الايام حصل ايه بالتفصيل لانهم عشرين يوم لكن ححكي مواقف معينة حصلت واثرت بشكل او باخر فيا بقوة وده اوقع وانا كمان نسيت حاجات كتير فحلحق ما يمكن لحاقه اول موقف - مش حنسى قعدتي على القهوة في مكاني المفضل وكل اصحابي حوالايا رغم انهم بيتكلموا في حاجات بكرهها موت زي البرمجة والشغل بس بحبهم قوي وكمان جيراني في المنطقة وانتيمي علي ربنا يخليه يا رب ويكرمه ويحميه ليا تاني موقف - نزلت اغير فلوس من البنك ووقفت في طابور ومدانيش وصل ولا اي حاجة وزهقت وسحبت الفلوس ورحت الصرافة وفي 5 دقايق كنت مخلص - والاسم بنك عربي مصري قوي - دي والله اشتغالات وربنا يكون في عون الشعب - طبعا نظرتي للبنوك اختلفت تماما بعد ما اشتغلت في بنوك امريكا وعرفت الليلة فيها ايه - الليلة طلعت كبيرة قوي التالت - بنك كاتب في الاعلان بتاعه على اتوبيس: "اللي بيننا كبير قوي" - بالذمة ده اعلان؟ ربنا يستر علينا الرابع - جهزت بدلتي وحاجتي لفرح اختي وكنت حاسس انه فيه امور مش طبيعية ونذر حرب حتقوم بس طنشت وعملت نفسي مش واخد بالي - ربنا يستر الخامس - ابن خالتي علي ده ولد جدع قوي قوي قوي ويا رب يكبر ويبقى حاجة كبيرة قوي السادس - نمت اول مرة في سريري ومبقيتشي قادر افارقه لمدة يومين وبما اني الرخصة والبطاقة اتاخروا في الوصول من امريكا لمدة يومين ففضلت قاعد في بيتنا انام براحتي خالص في سريري اللي افتقدته - كدت ابكي فيه من كتر الذكريات لكن الحمدلله تماسكت من فرط السعادة بس السابع - يوم الفرح نزلت روحت للحلاق وفضل يسألني انت منين اصلنا مش بنشوفك وبتاع وانا ابتسامة كبيرة على وشي لانه نسيني خالص وانا كنت زبون دايم عنده وهو كان حافظني اول ما اخش يجيب المكنة في خمس دقايق يكون مظلبطني ظلبطة لكن المرة دي ساب شعري من فوق كما هو واشتغل في الجناب - خلاص الشعر اللي بيتحلق مش بيطلع تاني ربنا يستر علينا التامن - شبكة المحلول بتاعتي في امريكا طلعت نضيفة ولوحدها عاملة تجوال مع فوطافون وبتصل بامريكا واستقبل زي الفل - ربنا يديم النعم التاسع - الناس في مصر عندها هوس موبايلات وكمان سيتي ستارز مكان جميل جدا لكن دوشة جدا وبيخوفني من زحمته الظاهر اني مبقيتشي متعود على الزحمة دي خلاص وعدم الهدوء ربنا يستر تاني علينا العاشر - يوم الفرح خالتي جاتلنا البيت وخالتي التانية وصاحبات اخواتي والدنيا كلها وبقت قعدة حريمي - مع الاعتذار للبنات بس طول عمري بقول الستات دولا دوشة كبيرة ال 11 - يوم الفرح مساء جبنا عربية حلوة وزفيت اختي لحد القاعة وبعدين في القاعة الحمدلله عزمنا ناس كتير وناس كتير مش جت واللي جم قليلين قوي في الرجالة لكن عند الستات كان زحمة ما شاء الله والدنيا كلها فرحت - لكن المشكلة ان العريس ماجاش حتستغربوا ازاي ماجاش؟ انا معرفشي انا كنت عامل زي العبيط والناس بتاكل وشي وبتسألني فين العرييس؟ بقالنا ساعتين قاعدين؟ فين العريس؟ وانا اعمل عبيط انا كمان واقول معرفشي زيي زيكم انا جاي من امريكا من يومين وزي المعازيم تمام ومفرقشي عنكم حاجة فضلت كده لحد ما الفرح خلص وزفيت اختي المذهولة عشان البيه مشرفشي لحد بيتنا وهناك قعدنا اتعشينا مع ولاد خالتي واهي فرصة اهيص معاهم شوية وكمان شوية ناس قرايبنا مشوفتهومشي من زمن طويل ثم بقا بسلامته شرف بيتنا بالليل متأخر وطبعا ماما وبابا استلموه كتير قوي وظبطوه :) وانا خليت نفسي برا الموضوع زي مانا من الاول برا الموضوع خلاصة الحدوتة الطويلة دي يا جدعان انه حصلت مشاكل كتير والعريس حب يطلق وبعدين رجع في كلامه والبنت كرهته وبتاع وخلاص مش عايزاه وبيفاوضنا عشان يطلق عشان المصاريف وبتاع هو الولد طيب بس اهله مودينيه في داهية وبدون تفاصيل كتير اقولكم ان الموضوع دلوقتي متوقف على طلاق البنت وغالبا حيحصل قريب ربنا يستر عليكي يا اختي يا حبيبتي ويعوضك خيرا ويرزقك الجنة بصبرك واحتسابك وعله خير لك طبعا يوم ميلادي كان السبت 18 اغسطس 2007 ويومها فضلت مكتئب في بيتنا كتير وكتبت بوست كئيب لكن العيال الحمدلله خرجوني من المود ومش نشرته لكن نشرته بعدين - المشكلة اني كنت زعلان قوي على حالي وحال اختي ال 12 - حاولت اخطب بنت جميلة أمورة ظريفة من اسرة محترمة قوي لكن اختلافات كتيرة ومشاكل كانت ستظهر بشدة خلت الحل الوحيد في نظري اني افركش الموضوع رغم اقتناعي المبدئي الشديد بالبنت لكن الظروف والدنيا تجبر الواحد احيانا على اتخاذ قرارات صعبة - تميت 25 سنة الحمدلله وانا في سادس محاولة ليا تبوء بالفشل - مين عارف يمكن اضرب الرقم القياسي ويمكن رقم 7 يكون وش السعد عليا ال 13 - على فكرة مرة تانية ظروفي كانت اقوى مني لكن البنت كانت تستحق المحاولة بشدة - ربنا يكرمها ويوفقها يا رب ال 14 - خرجت مع اصحابي وحوافيكم بالصور قريب ليلة ما تميت 25 سنة كان مساء الجمعة وروحنا كلنا برا وشربنا وسهرنا في سيلانترو المكان الجميل ده في الكوربة لحد الفجر وروحنا صلينا الفجر ونمنا - كانت قعدة جميلة جدا وعرفت فيها اصحابي على التدوين وكيف انه ثقافة واهتمامات جيل كامل وانه الموضوع اضخم مما يتصورون - كانت خروجة بالعمر كله ال 15 - واحد صاحبنا جاب اخته الصغيرة معانا وهي بنت أمورة ظريفة قوي وفعلا عجبني جدا اهتمامه بيها وحرصه عليها قوي مش بس عشان اخته لا كمان لانه راجل بيتحمل المسئولية - حسيت بشعور جميل لا يمكن وصفه وانا بشوفه بيحن عليها - رثوت نفسي وقتها لاني افتكرت اختي دي اللي مش عارف اعملها حاجة دلوقتي غير الدعاء في محنتها وهي كانت بتحنو عليا وتشطفني وتحميني وتأكلني وتظبطني وانا صغير وكل ده ايه وهي اكبر مني بسنة بس - اختي الحبيبة ياما قصرت في حقك لكن فعلا فعلا بحبك :) ال 16- في نفس اليوم ده وقفت قدام بيت صاحبي لما روحت مع اخته الصغيرة ربنا يبارك فيها اوصلها بيتهم واستنيتها تحت باب العمارة لحد ما نزلت تاني وانا مستغرب قوي من حاجة واحدة - سبب انها سابتنا وطلعت انها راحت تشوف مامتها - بتقولي انا مشفتش ماما من 7 الصبح لما خرجت والكلام ده كان 9 مساء - يا عيني البنت مش عايزة تصبر تشوف مامتها لحد ما ترجع - والله ربنا يبارك في الاسرة دي والتربية دي ما شاء الله :) ال 17 - في نفس اليوم برضو وانا واقف تحت عمارة صاحبي ده واخته شفت بنتين ولاد البواب من الصعيد الجواني بان عليهم من لكنة الكلام بس اطفال صغيرين قوي بيلعبوا بالكورة وكيف ان البنت الكبيرة شوية عن التانية بتستغل طيبة اختها وصغر حجمها وبتغلبها لكن البنت الصغيرة مبسوطة وسعيدة باختها وحتى لما تجيب جون في اختها بتكون مبسوطة وسعيدة وبتسلم على اختها وتحضنها - لما الكورة بتبعد في طريق العربيات اختها بتحذرها وتحنو عليها وتخاطر هيا وتجيب الكورة ولا ان اختها الصغيرة تتعرض للخطر - مش عارف برضو نفس الشعور الجميل قوي اللي حسيت بيه - مش عارف ايه بالظبط ولا عارف اوصفه - لكن الي متأكد منه ان الله سبحانه وتعالى ابى الا ان يواسيني في يوم ميلادي وكثرة الاحزان دي بطيف عارم من هذا الشعور الجميل - ربنا يحمي كل اطفال المسلمين يا رب ويبارك فيهم ال18 - بحب الرقم ده بالمناسبة - اما على موضوع اختي تاني انا فضلت معكوك فيه لحد اخر جمعة ليا قبل سفري يوم الجمعة 31 اغسطس لامريكا تاني - الموضوع ده طبعا شغلني جدا ولا قمت باي رحلة من رحلاتي ولا باي حاجة ولا قابلت الناس اللي عايزها ولا عملت اي حاجة بالعافية ظبطت اصحابي شوية ويومين خطف لاسكندرية ودمتمت -ربنا يتمملك كل امورك بخير يا اختي الحبيبة ال19 - حاسس بغصة قوي وانا بكتب الموضوع ده يا جماعة بس حسحتحمل لاني مصمم اكمل ال20 - طبعا الحر الوهمي واخواتي المساكين التانيين 20 يوم وعدتهم بفسح ومفسحتهومشي بس الحمدلله حاولت اظبطهم بهدايا وحاجات ربنا يعوضني خير المرة الجاية افسحهم وافضالهم شوية - ربنا يحميهم ويباركلي فيهم يا رب ال21 - طلعت يوم العاشر من رمضان بدعوة كريمة من المدونة عاشقة الوطن في زيارة لدار ايتام وكان يوم جميل جدا جدا جدا لا يوصف واول مرة في حياتي ازور دار ايتام واقعد مع الايتام واشوف فعلا معاناتهم وحرمانهم بنفسي وقد ايه بيستمتعوا بينا كاخوة كبار ليهم وكانت مجموعة من الشباب ما شاء الله عليهم - فعلا ربنا يباركلهم وباذن الله دايما نفضل حريصين على الزيارات دي وحتبقى خانة جديدة في اجندتي دايما باذن الله - نظرة الاطفال ونظرتي في عيونهم تكفيني بجد - ربنا يحمي اطفال المسلمين يا رب ال22 - الزيارة دي حسستني اني بعمل حاجة مفيدة في حياتي ولبلدي بشدة والحمدلله ربنا وفقني لهذا وما كنا لنهتدي لولا ان هدانا الله ال23 - الزيارة دي كمان علمتني حاجات كتير قوي وكمان حضرها انس ابن خالتي وحسيت فعلا اني عرفته على حاجات جديدة وناس جديدة والولد حس انه راجل كبر وبقا يعمل حاجات مفيدة في حياته :) ربنا يبارك فيه يا رب والحمدلله انه انبسط ال24 - شيخ المسجد محمود جاري لئيم جدا ما شاء الله واسمحلي يا شيخ اقول عليك صايع كمان وححكيلكم بعدين كان بيعمل ايه معايا المرة دي عشان يلبسني اي جوازة قبل ما ارجع امريكا والسلام :) ال25- روحت بلبيس نفس اليوم اللي روحت فيه العاشر من رمضان وكانت فعلا زيارة جميلة جدا لصديق شخصي مشفتوش من زمان قوي ورغم حداثة معرفتي بيه بس فعلا استمتعت قوي - ربنا يحميه - حيتحط في اجندتي دوما هو كمان :) ال26- حضرت فرح المعيد بتاعي على المعيدة بتاعتي في الكلية - الاتنين دولا كانوا لبعض ورغم ان المعيد ده خطب وفشكل كتير بس كنت بدعي ربنا دايما يكونوا لبعض والحمدلله حصل :) ولحقت الفرح في اخر لحظة والحمدلله انبسطت قوي :) انبسطت قوي :) انبسطت قوي:) والحمدلله ربنا استجاب دعائي ال27 - مش عارف اعمل ايه عشان اخفف عن اختي وكان نفسي اطول في مصر اكتر بس انا وصلت اخر كام يوم مش طايق اكمل ودلوقتي حاسس بغربة موحشة قوي ونفسي ارجع تاني :( نفسي ال28 - انا رجعت لهدوئي وصفائي النفسي هنا وبنام كويس الحمدلله - في مصر كنت بنام كل يوم 3 ساعات او اربعة بس - ربنا يستر عليا في صحتي ال29 - قابلت ناس كتير قوي حسسوني بنعم ربنا الكبيرة عليا - بس انبسطت قوي لما شفت اشرف واماني ولاد عمي محمد - فعلا وحشوني قوي وحسسوني ان الدنيا لسه بخير لما جم الفرح - والله انبسطت قوي لاني بحبهم قوي اكتر ناس في عيلة ابويا ال30 - قابلت شخصية محصلتشي في زيارتي دي لمصر - شخصية لو حكيت عنها سنين مش حخلص - مرتين بس شفت الشخصية دي - بس حسستني فعلا ان مصر فيها ناس لو ادولهم الفرصة بلدنا دي حتبقى ملهاش حل :) - ربنا يكرم الشخصية دي ويباركلها يا رب ال31- كل الناس معاها موبايلات اقل واحد فيها ب 200 دولار على الاقل وانا معايا موبايل بعشرة دولار :) ومكفيني والله حسيت باننا شعب استهلاكي عجيب ال32- عمار يا مصر - الجيش لما روحت اعمل تصريح السفر لاقيتهم سمعوا كلامي اخر مرة طلبت منهم يشغلوا قران بدل الهلس ويحطوا ساعة في القاعة الكبيرة دي والراجل العقيد ولا مش عارف رتبته المهم هو المسئول اخبرني انه حيلبي طلبي فورا وفعلا المرة دي كله بالحرف ولما شغلوا اغاتي شغلوا مشاري :) ربنا يبارك في جيش مصر وخير اجناد الارض :) ال33- روحت كلية علوم عين شمس مع محمد صاحبي وروحي وحسيت اني روحي حتتخطف لو مش مشيت من المكان ده بسرعة - ربنا يعينك يا محمد ويوفقك ويخرجك منه متفوق وعلى خير يا رب ال34- حسيت بغربة شديدة قوي وانا بفارق مصر تاني وبسلم على اصحابي وعلى ناس تانية قبل السفر بكام ساعة - حسيت قد ايه انا حفتقد الناس دي وحزعل على فراقهم - حاسس فعلا بالغربة والوحدة قبل ما اركب الطيارة - يا رب ارجع للناس دي تاني وافضل جنبهم سعيد للابد يا رب ال35 - اسف يا جماعة طولت عليكم بس المواقف كتير لا تعد ولا تحصى رغم اني اغلب الوقت كنت مزنوق في مشاكل اختي مع الجدع ده والحوارات دي وقعدة عرب وكبارات البلد ومش عارف ايه وايه لكن الحمدلله في الاخر ظبطت الحمدلله - ربنا يخلصنا من الامور دي على خير ال36- ادعولي يا جماعة وحرزعكم قصة قريب لان مزاجي ابتدى يبقى عال دلوقتي - ربنا يبارك فيك يا رب ياللي في بالي واللي كان السبب :) تحياتي لكم من ماناساس البلد
على فكرة انا اكتر من خمسين مرة حبيت اعيط وانا في سريري من مشاعر كتير قوي قوي قوي لكن في النهاية قررت عمري ما حعملها وانا مسافر لاني جاي سريري استجم من تراكمات سنة ونص تعب وبهدلة وشيل عفش وحط وقلة قيمة - قررت انام على سريري كل يوم والغصة في حلقي لكن لن ابكي - قد ابكي هنا بشدة ولكن لن يكون ابدا في احب مكان ليا في مصر بعد الجامع :) - ده سبب اسم البوست وشكلي بخرف بس ماشي الحال

هناك ٢٠ تعليقًا:

قلوب حائرة يقول...

جرووووم ازيك وحمد لله على السلامة يمكن دياول مرة اعلق عندك بس انا متبعاك بقالي كتير وحمد لله عهلى سلامتك وان كنت رجعت يعني بس ربنا ياسيدي يكرمك بزوجة والظروف تتيسر ويكرم اختك يارب ويصلح لها حالها ومبروك للمعيدين بتوعك ومتزعلش من الحال والله مصر زي الفل بناسها ويارب الزيارة الجاية يارب تقدر تحقق الي مقدرتش تحققه المرة دي من زواج وخروج وعيشة كويسة تحياتي ليك ومتعك اللع بالصحة وبلغك رمضان

AHMED يقول...

we need to see the photo
we need to see the photo
we need to see the photo
we need to see the photo
we need to see the photo
we need to see the photo
we need to see the photo
we need to see the photo
we need to see the photo
we need to see the photowe need to see the photo
we need to see the photo
we need to see the photo
we need to see the photo
we need to see the photo
we need to see the photo

AHMED يقول...

we need to see the photo
we need to see the photo
we need to see the photo
we need to see the photo
we need to see the photo
we need to see the photo
we need to see the photo
we need to see the photo
we need to see the photo
we need to see the photowe need to see the photo
we need to see the photo
we need to see the photo
we need to see the photo
we need to see the photo
we need to see the photo

AHMED يقول...

أنا شاب في 25 من العمر
من أسره ميسوره الحال
أعمل في شركه عالميه ودخلي ميسور والحمد لله

اعاني من فرغغغغغغغغغغغغغغغغغ عاطفيييييييي
مطلوب عروسه غيرمهم الشكل
المهم الروح
عندها إستعداد للجنان
ساعدني ياأمريكي

NeRmeeN يقول...

اولا

حمد الله على سلامتك يا جروم

ثانيا

ان شاء الله اختك ربنا هيكرمها وكربها هيتفك ...وانا والله كل ما تيجى على بالى هدعلها ان ربنا يصبرها يعوضها خير ان شاء الله

ثالثا
ربنا يدى مامتك وباباك الصحة ...هما كويسين بلاش تتخض عليهم...طبيعى بعد غياب سنة و نص عنهم ...حاسس فيهم بتغيير....سواء الشكل الخارجى او التصرفات نفسها ....سنة الحياة بقى ...لكن انا لامست فيك مرارة اوى وخوف رهيب عليهم...ربنا يخليهوملك ويديهم الصحة ...انت بس اللى حساس زيادة عن اللزوم و الغربة والوحدة خلتك تفكر كتير و تتامل فى كل حاجة ...وتقلق على الناس اللى بتحبهم على طول

رابعا بقى

انا جتلك هنا كذا مرة قبل كده..اينعم مش بعلق كتير بس متبعاك...ودايما بحس بمسحات حزن و شجن فى كلامك...والله مش عارفة ليه يا عبد الله بحس ان ربنا هيكرمك اوى ان شاء الله و هتبقى حاجة ...وشوية التعب اللى فى اول المشوار دول طبيعى ...وان شاء الله هتفرج ..وابقى افتكر كلامى..
ربنا يكرمك يا عبد الله ..ويهون عليك الغربة

تحياتى ليك

عبدالله يقول...

ازيك يا جميل
حمدلله علي السلامه
كان نفسي اشوفك يا مضروب بس يالا مره قريبه ان شاء الله
ربنا يعينك علي الغربه ان شاء الله
وربنا يكرم اختك بالخير دايما ان شاء الله محدش عارف الخير فين

كل سنه وانت طيب رمضان قرب واعمل بقي حسابك نشوفك في السعوديه قريب

سلام

عـلا - من غـزة يقول...




:|


عشرين يوم وصار فيهم كل هالأشياء


اتاريك .... ربنا يهون عليك وعلى الجميع

بس يبدو انك بقيت احسن ان شاء الله


مش عارفة اعلق على ايه ولا ايه

ما علينا ,, المهم انك ازحت شوية هموم عن صدرك وفضفضت ,, وعلى فكرة انا مش من انصار كتم الدموع ابددا :)


ربنا يباركلك ويكون لك خير معين على الغربة وما فيها


سلامات :)


yasmina يقول...

انا مش عارفة ابدا منين كلامك مؤثر ولمحات الحزن مؤثرة جدا
الله يشفيلك امك وابوك يا رب
وعمتك كمان
ويخلي لك ابن خالتك وكل احبابك

انا بدي ابدا بقعدة القهوة لانه عجبني الوصف واكيد ردت فيك الروح

حرام عليك طيب احنا دوشة بس انتو اكيد اعظم
:))

ربنا يصبر اختك ويعينها ويرزقها بالاحسن ويستر عليها ان شاء الله

مرة ثانية عقبال ال 120
الزواج نصيب ويا رب يوفق البنت بطريقها ويوفقك بطريقك
ويا اخي لا تعد المرات المهم النتيجة
:)

زيارة الايتام عمل احييك عليه بشدة وذلك انك قمت به رغم قلة وقتك ورحلتك القصيرة ربنا يبارك فيك

اخر فقرة اوقفتني لاشعر اكثر مع المغتربين لانه عادة ما يحب الانسان ان يبكي في سريره ولكن يبدو ان الغربة تجعل السرير والبيت مكان مقدس لا يسمح لنا بالبكاء وانما استغلال اللحظات لنحاول اسعاد انفسنا

ان شاء الله ترجع مصر لاحبابك واصحابك ويتغير شعور الوحدة والغربة الذي بداخلك

انت عاوز دعوات اكثر
مش كفاية؟؟
:)))

دعواتي دائما

Meekness !!! يقول...

السلام عليكم
ازيك يا جروووووم الاول
سوري على اسمك اللي قلته غلط
يا رب تكون بخير
حلو قوي الكلام اللي حكيت عنه يا جرووم
بس نصيحة
تقدر تعمل كتير لاختك .. ب انك تقف جنبها .. بعدين ايه اللي حصل لكل ده ..
بعدين الف سلامه على عمتك .. ربنا معاها
و انت اهتمين بتفاصيل كتير احنا مش بنلاحظها
اهتمام صاحبك ب اخته و عيال البواب
لانك عايش في امريكا
و في كتير احاسيس و مشاعر نفقوده هناك بين الناس و بعضها
ربنا يوفقك يا رب
زيزي

عاشقة الوطن يقول...

السلام عليكم

ازيك ياعبدالله
المواقف كتير واحكى زى ماانت عاوز
وربنا يحل مشاكل اختك على خير ويرزقها بالخير ويعوضها ان شاء الله
المهم انك تخفف عنها وانت حتى فى الغربة
حاول تكون على اتصالبيها على طول
واكيد كلنا هندعيلك وندعيلها

بالنسبة للدعوة وانك لبيت الدعوةوحضرت بجد بجد احنا اللى مبسوطين جدا بتلبيتك للدعوة ولحضورك الكريم

وسعدنا بوجود أنس
وان حب يكون معانا فى اى نشاط اكيد هيسعدنا وجوده
وان شاء الله هنستناك فى اجازتك الجاية

وربنا يخليلك والدك ووالدتك ويباركلك فيهم ان شاء الله

المساجد من احب الاماكن
وخاصة اللى بتحس فيها براحة

يارب ترجع بالف سلامة ونشوفك على خير
وترجع لأهلك واصحابك بالف سلامة

أختك فى الله
رضوى

غير معرف يقول...

you had to write it.,..to help your thoughts break their silence and have a calm moment with yourself

Just try to enjoy your life, eat yoru Herchey's, visit friends, write stories, drink coffee, and enjoy! But always remember that Allah is watching over you..He's there for every one to give them stregth and bestow his mercy upon our souls

don't worry about your sister, Allah preseves the best for her insha Allah

for your parents... just be their loyal son...however far you are..let them feel your presence in their lives and dailies..do not alienate yourself from them..reset your communication channel with them!

once again, welcome back!

see the beauty of life and prepare yourself for Ramdan,God is Merciful!

Just a Reader يقول...

سبحان الله ...فيه ناس بتحس إن ساعات بيحصلها أحداث كتيرة أوي في مسافة زمنية صغيرة وفيه ناس بتحس إن حياتها فاضية وتتمني أن يمر بها ولو جزء من الأحداث التي بتحصل لباقي الناس ..
هكذا الحياة ...مشاعر سعيده ومشاعر حزينة...ولكنها تمضي بحلوها ومرها ..
ساعات بحس زيك إن الواحد في وسط الأحزان ربنا بيبعتله مسحة من المشاعر أو اللمسات التي تحنو عليه في تلك الأوقات العصيبة ....ربنا يكرم أختك ويبدلها خير عاجلا غير آجلا إن شاء الله ...إسأل عليها كتير وادعيلها
وربنا يبارك في عمر أهلك ويشفيلك عمتك وإن شاء الله اللي جاي يبقى أحسن
ليك وللجميع :)

NOHA RADI يقول...

ازيك و حمد الله على سلامتك لك وحشة
اولا ربنا يشفيلك والدك ووالدتك و ما يزعلكش و لا يقلقك عليهم ابدا
و صدقني ربنا هيعوض اختك خير انا شفت ناس حصل معاهم زي اختك و ربنا رزقهم ازواج احسن مما كانوا بيتمنوا ربنا مخلف معوض لا تقلق عليها و هندعلها كلنا
فضفض فضفض كلنا اخواتك و اخوانك و يارب لما تيجي مصر السنه الجاية نعمل مشروع و نتقابل مع كل المدونين لعمل رابطة و بالمرة نتعرف كلنا على بعض و تيجي و تلاقي عروستك جاهزة مستنياك و يارب يبارك للشخصية اللي عدلت مزاجك
ولك تحياتي و ابقى زور مدونتي

حسام مراد يقول...

ازيك يا عبدلله حمد لله على السلامه دى اول زياره ليا فى مدونتك ومش هاتكون الاخيره ان شاء الله
ربنا يصبر اختك ويهدى الحال كده يا رب وشيل من دماغك الهواجس بتاع والدك ووالدتك وان شاء الله ربنا يديلهم طولت العمر

وربنا يا رب يكرمك فى الغربه ويرجعك مصر على خير
بجد احساسك باين اوى فى البوست احساس فيه حب للى حواليك وبرده فيه حزن وسعاده
بس ربنا يا رب يخليك سعيد ويكون راضى عنك بره
وربنا معاك

وكل سنه وانت طيب

تقبل ارق تحياتى وسلاماتى
حسام مراد

أخت عاشقة الوطن يقول...

السلام عليكم

إزيك يا عبدالله حمد الله على سلامتك لرجوعك أمريكا
ربنا يخفف عن أختك وطمنا عليها وربنا يباركلك فى أهلك
إحنا اللى كنا سعدائك بتشريفك أنت وإبن خالتك لنا فى رحلة الأطفال الأيتام ويارب تتكرر دايما ربنا يجازيكم خير

شيماء الجيزى يقول...

بص يا جروم
مش عارفه ليه عجبنى البوست ده قوى
متسألنيش السبب
اينعم انا مبعلقش عندك بس ده مش يمنع انى بشوف مدونتك كتير

.............

لو سمحت غير الشات اللى فى الجمب مش بعرف اكتب فيه
.............

ثانيا ربنا هيرزق اختك بالاحسن منه
وربنا يتقبل كل دعاءك ليها

.............

انت ايه اللى بعدك كده انت فى اميريكا ؟
.............

كل سنة وانت طيب انت اكبر منى بسنة ويومين
انا مواليد 20\8
انت برج الاسد زى
:d

.............

متحزنش يا جروم ..وابدا فى الجديد

تحياتى لك يا صديقى

The Groom يقول...


قلوب حائرة

الله يسلمك يا رب ويكرمك شرفتيني ونورتي المدونة

شكرا لمتابعتك واعتز بيها جدا

امين يا رب

امين يا رب

امين يا رب

الله يبارك فيكي

يا رب يستجيب لك يا رب

ادعيلي كمان وكمان

ربنا يوفقك ويكرمك

تحياتي لك من ماناساس البلد

----------------
أحمد حبيبي

بقولك ايه يا عم التعبان والجعان روح كل جبنة بريزيدون وانت تبقى تمام

يبني انا كمان تعبان وجعان الاقيش عندك جبنة رومي؟

بكره الجبنة الرومي

تحياتي لك يا اخويا من ماناساس البلد والصور جاية في الطريق

وانا مش امريكي يا ولا

-------------

نرمين

الله يسلمك يا رب ويا رب يستجيب

هو بس ابويا وامي وحشوني قوي والغربة عنهم للاسف كان لابد منها رغم انها تعبتني قوي بس صنعت مني الانسان اللي انا فخور بيه دلوقتي

امين يا رب ربنا يستجيب ليكي يا بنتي يا رب

عارفة والله انا مش عايز ابقى حاجة غير ان ربنا يسامحني ويغفر لي ويدخلني الجنة

ربنا يكرمك

تحياتي لك من ماناساس البلد

------------------

عبدالله

الله يسلمك يا حبي

انا اللي مضروب؟ طيب يا متبهدل

ربنا يكرمك ويوفقك ونشوفك على خير في السعودية او اي مكان تاني

تحياتي لك من ماناساس البلد

-----------------
عزة من غزة

شفتي ربنا قادر على اكتر من كده كمان

ربنا يستر

نصيب وكله خير باذن الله

انا كتمت الدموع في سريري في مصر بقا لانه ليه وحشة لكن انا فعلا بكيت هنا في امريكا لما شبعت

الحمدلله على كل حال

تحياتي لك من ماناساس البلد

الله يسلمك يا رب

-----------------
ياسمينا

لا الدعاء مش كفاية خالص

ربنا يكرمك على وقفتك جنبي ودعمك المستمر

ربنا يحمي جميع بنات المسلمين ويهدي الجميع شباب وبنات للخير والصلاح

برضو الستات دوشة :P

تحياتي لك من ماناساس البلد :)

--------------
زيزي

وعليكم السلام ورحمة الله وبركاته

ولا يهمك :)

اما عن اللي حصل فلا ينحكي ولا ينقرا

اما على المشاعر بتاعت الناس فان كمان في مصر المشاعر دي بقت نادرة حتى بين الاخوات وبعضيهم ونظرة واحدة متأنية فاحصة حيادية حولك تكفيكي لكي تدركي الحقيقة المرة لمجتمعنا الا من رحم ربي

ربنا يكرمك ويوفقك

تحياتي لك من ماناساس البلد

----------------
عاشقة الوطن

وعليكم السلام ورحمة الله وبركاته

الحمدلله يا سيدتي

امين يا رب يستجيب ليكي يا رب

وانا كمان انبسطت قوي معاكم والله وباذن الله كل مرة ححاول دايما اكون على اتصال بيكم وازوركم ان شاء الله

رضوى ... جزاك الله عني خيرا

تحياتي لك من ماناساس البلد

-----------------

ابيتاف

صحيح الفضفضة بتخفف الاحمال جامد قوي

ربنا يستر علينا

ونعم بالله والرسول عليه الصلاة والسلام قال استعن بالله ولا تعجز

صحيح فعلا الله رحيم ورؤوف بعباده

ربنا يكرمك يا رب

تحياتي لك من ماناساس البلد

----------------
جاست أ ريدر

امين يا رب

امين يا رب

امين يا رب

تحياتي لك من ماناساس البلد وجزاك الله عني خيرا

-----------------
نهى راضي

جزاك الله خيرا على المتابعة

والله يسلمك ويكرمك يا رب

امين يا رب

امين يا رب

امين يا رب

وان شاء الله حظبط موضوع لقاء المدونين المرة الجاية حتى قبل ما انزل عشان وقتي حيكون محدود

ربنا يكرمك تاني ويرضى عنك

تحياتي لك من ماناساس البلد

-------------------

حسام مراد

الله يسلمك يا صديقي

شرفتني فعلا وان شاء الله مش اخر مرة

وانت بالصحة والسلامة وخد بالك من نفسك وواصل الدعاء ليا بظهر الغيب لانه مستجاب

تحياتي لك من ماناساس البلد

-----------------

أخت عاشقة الوطن

وعليكم السلام ورحمة الله وبركاته

ازيك يا بنتي؟ عاملة ايه؟ كل عام وانت بخير

الله يسلمك مليون مرة

امين يا رب وباذن الله عادة لن تنقطع

تحياتي لك من ماناساس البلد

---------------

شيماء الجيزي

مش حسألك يا فندم :)

:)) وشكرا تاني لمتابعتك الجميلة ليا رغم عدم التعليق بس ميهمنيش التعليق قدر ما يهمني اشوف الناس مهتمة بما اكتب

الشات اللي في الجنب لايف يعني بيوصلني لما بكون اونلاين للاسف بس هو مش فيه عربي :(

انا يا ستي بدرس في امريكا وبشتغل واهي كانت غربة لا بد منها

الله يكرمك وفعلا محدش عارف الخير فين وشكرا ولا تنسي الدعاء لي ولاختي بظهر الغيب

اما على يوم ميلادك فكل عام وانت بخير وصحة وسلامة وعقبال مليون سنة في طاعة الله سبحانه وتعالى

ربنا يكرمك

تحياتي لك من ماناساس البلد

:)

-----------------

تخاريف خاصه! يقول...

اولا كل سنه وحضرتك طيب...معلش متأخره حبيتين ..تلاته...بس معلش...

ثانيا انت لحقت ترجع يا راجل..؟؟؟؟
:)

ثالثا جدع جدا انك مابكيتش على سريرك..لانك لو كنت بكيت المره دى...كنت هتتعود على كده كل ماترجع مصر...
خلى مصر بالنسبه لك للذكريات الحلوة وبس...

:)
حمد الله ع السلامه يا فندم..

Noony يقول...

الأول :)

بغض النظر عن الظروف الملخبطة والمشاكل اللي اتكومت كلها في وقت واحد
الحمد لله انك كنت مع أهلك في الفترة دي...لأنهم أكيد كاننوا محتاجينك وانت كنت هتزعل أوي لو حصل الكلام دة كله وانت بعيد عنهم
ربنا ييسر الحال
ابكي زي مانت عايز طالما البكاء ممكن يريحك

إن شاء الرحمن الأجازة الجاية لمصر تكون أحلى أجازة وتبقى مليئة بالأفراح
وانتهز فرصة رمضان وادعي كتير بكل اللي في نفسك--بس ماتنسانيش من الدعاء ;)

نوني

Dr.Diamond86 يقول...

ياااااااااااااااااااااااااااااه
كل ده حصل
بس المهم ان ربنا هيعينك باذن الله وتخرج من حاله الحزن دي
ربك كريم
وان شاء الله ربنا هيرزق اختك زكل شباب المسلمين بازواج وزوجات صالحين وويعوضنا جميعا خير ان شاء الله
ومتقلقش على والدك ووالدتك بس هى اكيد غربتك عنهم ماثرة فيك وفيهم
ومتبكيش غير على اللى يستحق البكا
بس لما تبقى تعبان بجد صدقنى البكا بيريح اوى
دى نعمه بجد من ربنا
ربنا يكرمك يا رب ويرضى عنك
وو االله ما ناسياك ولا حاجة
فاكراك بالخير الحمد لله دايما
الله يكرمك ويرضي عنك يا رب