الثلاثاء، 11 سبتمبر 2007

قدر الله وما شاء فعل

آسف يا جماعة على أني مش كملت القصة ححاول ان شاء الله قبل رمضان يعني بكرة ولا بعده أنجز فيها جامد قوي بس مش حقدر طبعا أكلفتها، امبارح بقا كان يوم عجيب جدا
نمت متأخر يعني حوالي 5 ونص صباحا عشان كنت بخلص امتحان وابعته للدكتور قبل ما ينتهي الموعد بتاعه يوم الاتنين، المشكلة اني حاولت اصحى ستة ونص وفعلا ظبطت المنبه لكن المشكلة اني صحيت 8 ونص لما صاحبي اللي كان مطبق معايا صحاني، ليه بقا؟ لاني ظبطته على ستة ونص مساء :( بغبائي الجميل
المهم انا لما لاقيت نفسي متأخر وبسبب اني لازم أكون عند العميل تسعة صباحا يعني 45 دقيقة ولسه حكوي واعبي بنزين وكمان الطريق في الوقت ده مستحيل أوصل فيه لو نزلت حالا قبل 10 صباحا على الأقل فقولت الحل الوحيد إني أروح لدكتور السنان
وفعلا اتصلت بالمديرة بتاعتي بعتت مهندس غيري للعميل وانا اخدت عارضة وروحت لدكتور أثنان بالثاء عشان نختبركم بث
المهم روحت للدكتور شودري الظريف ده هو مسلم ومشغل طقم بنات كلهم عنده مشفتش راجل في تلك العيادة غيره، في منهم مسلمات وفي مسيحيات، في هنود وفي باكستانيات وفي تقريبا مكسيكان كمان، المهم أنا روحت للدكتور الظريف ده بعد ما تأكدت انه بيقبل شركة التأمين اللي انا الشغل مأمن عليا فيها، ولما وصلت لاقيت ما شاء الله بنت باكستانية في الريسيبشن محجبة وظريفة قوي استقبلتني بهدوء واخدت بياناتي والرخصة ومش عارف ايه وبطاقة التأمين واهتمت قوي وفعلا مفيش 5 دقايق وكنت راقد على السرير فاتح بقي وبقول اااااااه
أنا بقا وانا راقد على السرير كنت عمال اتفرج حوالايا عيادة كبيرة ما شاء الله ربنا يزيده ويباركله وكل حاجة تمام، كله نضيف قوي وفعلا فكرتني بعيادة الدكتور ايمن بس بدل ما هي في عمارة وشباك واحد هي مبنى مستقل لوحده وحواليها خضرة وزرع وشباك بانوراما كبير، يعني صباح الخير بجد، وطبعا روحت انا مبتسم ومبين سناني اللي معادتشي صفرا خلاص :)) الحمدلله
المهم جابولي دكتورة جات وفتحت بقي وقالتلي قول ااااه وانا طبعا قولتها من كل قلبي :( ، وبعدين راحت عمالة تملي الممرضة كل حاجة ده طلع عنده وعنده وعنده كعادة دكاترة السنان، يعني حسستني بجد والله اني محتاج بق جديد، وارمي القديم ده او اشيله في صندوق الكراكيب بتاعي كالعادة، المهم انا قولتلها انا مالي؟ قالتلي ولا حاجة اتنين حشو فوق وتحت يمين وقعوا وتلاتة تسوس واحد نص نص واتنين سطحي خالص وخفيف جدا حنخلصهم في خمس دقايق
قولتلها ماشي وحيتكلف كام الليلة دي؟ دي بقا كانت الطامة الكبرى، انا لما قولتلها كده بعتتلي مندوبة مخصوص قعدت تشرحلي
قالتلي التأمين بتاعك حيغطي 100% من الاشعة الاكس راي والتصوير الملون لاسنانك من جوا والتنضيف
وحيغطي 90% من تكاليف اي حشو او خلع او علاج تسوس قولتلها ماشي حلو الكلام كام بقا الليلة كلها؟
قالتلي بعد كل شيئ الليلة كلها 800 دولار حتدفع منها انت حوالي 140 بس
قولتلها يا بلاش انا احسنلي اقطع تذكرة لمصر هاهاهاا المهم وافقت اني اعمل تنضيف واشعة بس النهاردة، ويوم السبت الجاي ان شاء الله اعمل الباقي لما السنان تهدى شوية دي كانت نصيحتهم، اتاري التنضيف ده حاجة قوية قوي
المهم انا عملت اشعة اكس على السنان وكان اختراع ظريف قوي وبعديها عملت تصوير ملون لبقي من جوا واول مرة أشوف الكهف ده من جوا اللي عمري ما عرفت أشوفه بوضوح في المراية، وكان الموضوع ظريف قوي، لما جينا بقا للتنضيف جات واحدة تانية غير التمرجية المكسيكانية دي بقا شكلها أفغاني وش لاني خبرة جدا في الناس دي، المهم مكلمتشي بس فتحت بقي وبدأت الحفر والمية وبتاع وحاجات عجيبة والنهاية اني اتحفر في سناني حفر عجيبة باسم التنضيف وخرجت من الموضوع سناني كلها بتوجعني وحاسس فعلا انها نضيفة واتاكل منها راقات راقات لدرجة اني حسيت اني ماشي من غير سنان، بس الحمدلله دلوقتي ابتسامة بيضا كده تسحر
:)))))))))))
بس وبعدين خرجت من عندهم وانا مبسوط ومنكشح وهدية منهم معجون سنان وفرشا عليها اسم الدكتور اللي مشوفتش غير قفاه وهو شغال في بق عيان تاني، ربنا يستر علينا بقا
المهم يومها روحت الشغل وفضلت فيه لحد 6 ونص وطبعا المنبه رن ساعتها وطفيته وانا في قمة الغيظ، شوية وقومت روحت بقا بيتنا
في الطريق، كنت بنعس كل شوية وافقر، في مرة منهم على التقاطع بين الطريق 28 والطريق التاني الي اسمه ماناساس درايف لاقيت نفسي بفقر وصحيت من النوم ديييييييب طاااخ رازع في اللي قدامي
رزعت في عربية نص نقل حمرا بتاعت اللي قدامي
طبعا انا زي المذهول صحيت من التفقيرة وانا ببص لنفسي وببص لغطا الماتور اللي بقا طالع قدامي زي العبيط
المهم شوية وركنت على جنب ونزلت انا والراجل نتفحص الاضرار، الحمدلله العربية عندي فيها الغطا انبعج وبطل يقفل والرادياتير دخل جوا شوية والحمدلله فضل سليم من غير ليك او تسريب والعلامة بتاعت سوبارو :(( انكسرت :( لان الشبكة البللاستك انكسرت وانا طبعا كنت على وشك البكاء، المهم كلمت شركة التأمين ظبطوا الراجل الظريف اللي وافق مش نكلم البوليس عشان انا مخدش تيكيت
وهما بقا حيصلحوله ان شاء الله ومن على موقعهم على النت حعرف كل التفاصيل بعدين، طبعا شكرت الراجل بعد ما وقفنا ساعة في الطريق نظبط كل شيئ، ومشيت بعد كده بسرعة قبل ما بوليس يلمحنا، طبعا عربيتي بقا شكلها وحش وانا فضلت زعلان لحد النهاردة وربطت الغطا بتاع الموتور كده عشان مش يطير وانا ماشي
بس عارفين
الحمدلله على كل شيء وقدر الله وما شاء فعل وكان لازم حاجة تصحيني من غفلتي لاني مش بقول الاذكار بقالي فترة :(( ربنا يستر علينا
طبعا اول ما روحت اتعظت جدا روحت غاسل سناني كويس قوي وفضلت بتاع ربع ساعة انضفها قوي اكتر ماهي نضيفة يعني خوفا من ان الغدا اللي اتغديته انا واصحابي يومها باليل في برجر كينج يخرب سناني تاني، دانا مصدقت، وبعدين روحت رايح نايم بدري شوية يعني حوالي 11 مساء عشان اصحى اليوم فايق واكتب البوست ده
ادعولي يا جماعة :)
تحياتي لكم من ماناساس البلد واسف على التأخير في القصة
طبعا على قد ما اليوم كان مليء بالاحداث لكن فعلا انبسطت فيه لاني برضو عملت فيه كام حاجة مهمين قوي في حياتي ومستقبلي - ادعولي بالخير بقا

هناك 30 تعليقًا:

Bride Zone يقول...

احنا بالبحريني نقول خطاك الشر والحمدلله على السلامة..
ابقى نام كويس المرة الجاية وما تبقاش تنام في السكة عشان لو عملتها تاني العواقب مش حتكون سليمة لا سمح الله.. ومين حيبقى يكمل لنا القصة بعد كدة؟:))
ربنا يوفقك

Meekness !!! يقول...

السلام عليكم
يا لهوي يا جرووووم ايه الخفه دي
انا طول ما انا قاعده عماله اضحك بجد رغم الموود الوحش اللي انا فيه
حلو قوي المنبه اللي رن على 6 و نس pm و كان المفروض يرن am ههههههههه بتحصل معايا كتيييييييييير
المهم خد بالك من ده المره الجايه
***********
و اغسل سنانك كويس
*************
و ما تنامش و انت بتسوق تاني
**************
ربنا يستر عليك في غربتك
و انا هدعيلك ان شاء الله و بالتوفيق يا جرووم و كل سنه و انت طيب
سلام
.
زيزي

أمــانــى يقول...

كــل رمضان وحضرتك بخير وربنا يبغلك رمضـان
ويجعلك نافع للامة ياااااااااارب آمــــــــــين
ويبغلك رمضــان ياااااااااارب آمــــــــــين

yasmina يقول...

الحمد لله ان الله ستر
والحمد لله على السلامة

وقدر وما شاء فعل

لازم تنتبه اكثر المرة الجاية
كمان رمضان قريب وبتكون صايم فدير بالك

الله يوفقك ويحرسك
ويهون عليك غربتك

كل سنة وانت بخير
ورمضان كريم

Noony يقول...

كويس انك اتصرفت بسرعة وخليت زميلك يروح للعميل مكانك..وكويس برده انك فكرت في انك تروح لدكتور السنان...دي فكرة انتحارية من الدرجة الأولى :)
بالنسبة للحادثة...قدر الله وما شاء فعل والحمد لله انك بخير وتستفاد من انك من الدرس دة ألا وهو تنام بدري وتصحى بدري وتشرب اللبن وتغسل سنانك قبل ما تنام :)
فداك ألف عربية يا سيدي...المهم إنك تبقى بخير
وأبقى قلنا رمضان في أمريكا بيبقى عامل ازاي؟ وهتقضيه ازاي؟

كل سنة وانت طيب يا عبد الله والسنة الجاية نقولهالك كلنا انت ومراتك إن شاء الله

:)
رمضان كريييييييييييييييم
نوني

عـلا - من غـزة يقول...



مممم

يعني ذكرى الحادي عشر من سبتمبر كان وشها مش حلو عليك

الحمد لله على سلامتك وسلامتك سنانك وسيارتك

يمكن اعطوك بنج على خفيف او حاجة كدة , وهي الي خلتك تغفى على الدركسيون

!!!

معلش ربنا ستر ,,

صحيح الصيام في امريكا بيكون حسب هلال مين ؟ :)

كل سنة وانت سالم يارب ,, وبالتوفيق في كل حاجة

سلامات :)

Jana يقول...

انا اعرف ناس فعلا بتنزل مصر مخصوص عشان يصلحوا اسنانهم...ويجيبوا هدايا كمان...وبرضه بيكونوا وفروا
اعانك الله على دكاترة الاسنان والحلاقين

بخصوص العربية
قدر الله وما شاء فعل
رب ضارة نافعة
اديك افتكرت الذكر وحتبتدى رمضان بداية حلوة ان شاء الله

ان شاء الله تصوم معانا السنة دى بنفس توقيتنا ..
لأن لحد دلوقتى السعودية ماشية معانا

كل سنة وانت طيب
والى الله اقرب

تحياتى.

أميرة البلطجية يقول...

ايه صورة البروفايل الكميلة دي يا عبد الله؟
لا كده لازم نجوزك فعلا
هههههه
كل سنة وانت طيب وربنا يتقبل منك رمضان ويستجيب دعائك فيه ان شاء الله
:)

Just a Reader يقول...

قدر الله وما شاء الله فعل ...معلش فداك والحمد لله إنها جت على قد كده...فيه أيام كده بتيقى باينه من بدايتها:)
ومبروك عليك السنان البيضه :)
وكل سنه وأنت طيب ....رمضان كريم ...ربنا يعينك على ذكره وشكره وحسن عبادته ولا تنساني من صالح دعائك

حسام مراد يقول...

قدر الله وما شاء فعل والحمد لله
المهم انك طلعت من عند الدكتور بابتسامه تجبلك عروسه هههههههههههههه

والحمد لله برده على الحادث اللى حصل وان الموضوع اجهه بسيط

وكل سنه وانت طيب فى مانساس البلد
والامه الاسلاميه بخير وافضل حال

ورمضااااااااااااااان كرييييييييييييم

عصفور بلا أجنحة يقول...

جيت بس اقول كل سنة وانت طيب

Anima يقول...

رمضان كريم

أيامنا الحلوة يقول...

كل سنة وانت طيب ياجروم
وابقى اصحي بدري وسيبك من المنبه اللي هيوديك في داهيه ده عشان تعرف تقوم تصلي الفجر في رمضان
كل عام وانت الى الله اقرب والى المعاصي ابعد

تحياتي

Ert3ashat يقول...

معلش يا جروم
قدر الله و ماشاء فعل
ان شاء الله خير و قضا اخف من قضا

عاشقة الوطن يقول...

السلام عليكم

ازيك ياعبدالله

الف سلامة على اسنانك
وحافظ على ابتسامتك البيضا

وبعد الشر على العربية
ابقي خلى بالك بعد كده
المرة ديه جت على العربية ربنا يستر على المرة الجاية
خلى بالك يااستاذ بقي
وربنا معاك ويحفظك ان شاء الله

كل سنة وانت طيب
ورمضان كريم
ويارب رمضان السنة ديه يبقي احلى من السنة اللى فاتت
كل سنة وانت بخير وطيب يااارب

ومتبقاش تنام تانى وانت سايق صحصح كده

رمضاااان كريم

محمد العدوي يقول...

كل سنة وانت طيب ...


هو رمضان جا عندكو ولا لسة ..

محمد العدوي يقول...

نسيت : تحية لك من المنصورة البلد ..

اشتغالة يقول...


سلامو عليكم

حمد الله ع السلامة
مش ليك طبعا .. لدكتور السنان
هههههههههههههه
الناس دي بتتعب أوي في أبقاق الناس الي مش بيغسلو سنانهم
و انا اول واحدة منهم
هههههههههههههه
و حمد الله ع السلامة تاني
مش ليك برضه .. للعربية
هههههههههههههه
و كل سنة و انتا طيب
دي بقا ليك
ههههههههههههههه


ياااه بقالي كتير مشرفتكش بوجودي
الكريم هنا .. معلش بقى
ههههههههههههههه

إلا هي ايه ماسورة الضحك اللي ضاربة عندي دي ؟؟

هههههههههههههههههه
مش مشكلة
ينكن عشان الدراسة بدأت

لا بجد
كل عام و انت إلى الله أقرب و على طاعته أدوم و عن معصيته أبعد و لكتابه أحفظ و لسنة نبيه أتبع

يلا دعوة حلوة من الفلب

سلام

غير معرف يقول...

Pity that all of this happened to your nice little car! Qaadar Allahu w masha2 fa3al..Allahoma laka al7amd !

Thank God you're doing fine alhamdulelah

well...Just stopped by to wish you a happy Ramdan insha Allah!

kol sana wenta tayyb, w ela ta3et Allahi aqrab insha Allah!

rabena yatqbal mena w menkom insha Allah!

will you start fasting by tomorrow, or today ?! along with Egypt or KSA I mean?!

Best wishes

p.S.WHY visit a dentist if you already have got one lol

واحدة من الناس يقول...

ياعينيييييي
لاء سلامه العربيه وسنانك على فكره موضوع المنبه الى بعمله بى ام ده عندى ادمان بس مش بلاقى حد بروح بدالى الكليه هههههه
ربنا يوفقك يارب ويعينك ويقدرك على الصيام والقيام ويتقبل منا أجمعين يارب
شوف بقى بما انى لسه متعرفه على مدونتك من فتره قصيره فلسه ما قرتش حاجات كتيره فيها بس هاقرأوأعلق ان شاء الله انتظرنى:))
شيماء

تخاريف خاصه! يقول...

اولا سلامه سنان حضرتك...
:))))))
ثانيا..ماشاء الله ا نت بتغيظنا يعنى عشان عندكوو تأمين وبتاع ع السنان وع العربيات وعلى كل حاجه...
ايهي عنى ..مش مهم...ماحنا عندنا هنا برضه مصر للتأمين..حبيبه الملايين

:)

كل سنه وانت طيب يا جرووم والسنه الجايه تكون فى احسن حال...
معلش هروح اقرى القصه على رواقه ...
:)

Rivendell** يقول...

هع هع هع

يا عييييييييييني

معلش بكرة تتصلح وترجع زي الفل

ينعاااااااد عليك رمضان بالخير

esraa يقول...

كل سنة وانت طيب

ورمضان كريم (:

YOTTA يقول...

ألف سلامة عليك

المهم تكون كويس دلوقتى

حلو أوى الدكتور اللى بيدى فرشة ومعجون هدية ده
احنا اللى عندنا بياخدوا بس مابيدوش

يللا،، كل سنة وانت طيب

آه ملحوظة كده ع الماشى
أنا مستغربة أوى انك عايش ومتربى برة
وبتتكلم عربى بالعامية كمان حلو أوى كده
بس على فكرة اسمها "مبسوط ومنشكح" مش "منكشح"ا
:)
أرجو أن تكون غلطة كيبوردية
هههههههه

tota يقول...

كل سنه وانت طيب ورمضان كريم عليك وعلي كل اهلك واحبابك ده اولا
ثانيا حبيت اردلك الزياره واشرب عندك شاي لقيت نفسي قربت ابيت في مدونتك مع اني لست من هواه البوستات الطويله بس حبيت كتير بساطه وطبيعيه كتاباتك
حمد الله علي سلامتك وبتمنالك كل الخير
سلامي ليك

Meekness !!! يقول...

مش عوايدك يا جرووم الغيبه دي
فين الجديد
.
زيزي

إنـســانـة يقول...

بقا نمت وانت سايق؟؟؟

يا صلاة النبى يا صلاة النبى

اجدع نااااااس

الحمد لله على كل حال وقدر الله وما شاء فعل ومبروك عليك السنان البيضا وعقبالى هههههه

كل سنة وانت طيب يا عمونا

The Groom يقول...


برايد زون

الله يسلمك يا رب ويكرمك

حاضر حسمع الكلام يا أبلتي

القصة حتكمل لوحدها

تحياتي لك من ماناساس البلد

-------------

زيزي

وعليكم السلام ورحمة الله وبركاته

خفة مين بس انا حاسس اني دمي تقيل :))

ربنا يزيح عنك المود الوحش يا رب

حاضر حسمع الكلام تاني

ربنا يكرمك وفعلا مش تنسي الدعاء

تحياتي لك من ماناساس البلد وكل عام وانت بخير

-------------

أماني

امين يا رب

امين يا رب

وانت بالصحة والسلامة يا اماني

تحياتي لك من ماناساس البلد

-----------------

ياسمينا

الله يسلمك يا رب

حاضر حنتبه ان شاء الله

امين يا رب

امين يا رب

وانت بالصحة والسلامة والله أكرم

تحياتي لك من ماناساس البلد

The Groom يقول...


نوني

طبعا أنا كلي أفكار انتحارية من كل الدرجات

حاضر حشرب اللبن كل يوم يا أبلة

رمضان في امريكا ممل جدا لان الجميع بياكل حواليك في معاد الغدا وكمان الدنيا حر بس خير ادينا متعودين وكمان مش بفكر في المواضيع دي عادي يعني

اما بقضيه ازاي؟ عادي شغل ونوم وقراية قران وصلاة وبس

وصيام كمان تقريبا
هاهها

ربنا يكرمك

تحياتي لك من ماناساس البلد

-----------------

عزة من غزة

ايوة وشها حلو قوي وهو يوم من اوله هاهاها

الله يسلمك يا رب ويكرمك

لا مفيش بنج انا كنت مش نايم كويس يومها بس

بس خير ان شاء الله

يللا وانت بالصحة والسلامة وامريكا هنا بنشوف الهلال بتاعنا عادي ملناش دعوة ببلدان تانية بس السنة دي كلنا في وقت واحد مع كل الدول العربية :)

تحياتي لك من ماناساس البلد

--------------

جنا

صحيح والله انا لو كان المطلوب ادفع كل المبلغ كامل هو ده نفس تمن التذكرة فكنت طبعا حستنى لكن الحمدلله على التأمين

امين يا رب

صحيح الذكرى جميلة ان شاء الله

ايوة بصوم معاكم ومع السعودية

وانت بالصحة والسلامة تاني

وربنا يكرمك

تحياتي لك من ماناساس البلد

----------------

أميرة البلطجية

:) ايوة انا قررت أحط الصورة دي لان الصورة التانية كانت منفرة العرايس مني هاهاهاها

ربنا يكرمك

وكل عام وانت بخير وصحة وسلامة

تحياتي لك من ماناساس البلد

----------------

جاست أ ريدر

صحيح ربنا يقدر ويكرمني بما قدر يا رب

اما على رمضان فالله أكرم وربنا يباركلك فيه ويعينك فيه ويعينا جميعا

ربنا يوفقك ويحميكي

تحياتي لك من ماناساس البلد

-------------------

حسام مراد

شكرا بجد لمتابعتك :)

طبعا الحمدلله على كل حال

وانت بالصحة والسلامة يا رب ويكرمك ويوفقك

تحياتي لك من ماناساس البلد

---------------

عصفور

وانت بالصحة والسلامة يا رب ويطلعلك أجنحة وتحلق في العلالي

ربنا يكرمك وشكرا على الزيارة

تحياتي لك من ماناساس البلد

--------------

أنيما

الله أكرم واعظم وكل عام وانت بخير وطمنيني عليكي دايما

تحياتي لك من ماناساس البلد

--------------

أيامنا الحلوة

وانت بالصحة والسلامة يا شيرين

حاضر حسمع الكلام واقوم بدري واشرب اللبن كمان :)

امين يا رب وكل عام وانت بخير

تحياتي لك من ماناساس البلد

----------------

ارتعاشات حبيبي

ازيك يا بني؟ عامل ايه واحشني قوي والله

طبعا خير

وشكرا بجد على زيارتك ربنا يكرمك

تحياتي لك من ماناساس البلد

--------------

عاشقة الوطن

أنا بخير الحمدلله وبصحة وسعادة الحمدلله

الله يسلمك يا رب

وانت بالصحة والسلامة والى الله أقرب دايما

الله أكرم :)

تحياتي لك من ماناساس البلد

---------------

محمد العدوي

وانت بالصحة والسلامة يا رب

اه بعديكم ب 6 ساعات مراعاة لفروق التوقيت

:)

تحياتي لك من ماناساس البلد

---------------

تحياتي لأهل المنصورة يا محمد وعلى فكرة احنا بلديات

:)

------------------

اشتغالة

وعليكم السلام ورحمة الله وبركاته يا كوكو

الله يكرمك على دعواتك الجميلة دي يا رب

ربنا يخليكي ليا

تحياتي لك من ماناساس البلد

---------------

ابيتاف

لا مفيش داعي للشفقة الحمدلله كله كان خير وحصل فيه خير ومن وراه خير

ربنا يكرمك يا رب ويحميكي

احنا صايمين هنا مع مصر والسعودية كلنا في وقت واحد لاول مرة :)

هاهاها على دكتور الثنان اختي دي لثة مبتدئة و2 على 5 من دكتور الثنان

لما تخلص خالص حبقى اروحلها

وتعملي تخفيض

تحياتي لك من ماناساس البلد :)
---------------

واحدة من الناس

الله يسلمك يا رب

امين يا رب

يللا مستنيكي تخلصي المدونة كلها وتقوليلي رأيك فيها

واوعي تزهقي منها بسرعة ولا من خفة دمي

تحياتي لك من ماناساس البلد

-----------------

تخاريف خاصة

ازيك يا دكتورة كل سنة وانت طيبة وفي الف صحة وسلامة

فينك من زمان؟ والله زمان

الله يسلمك يا رب

ايوة هاهاها بغيظكم قوي كمان

وانت بالصحة والسلامة وربنا يكرمك

روحي وقوليلي رأيك واديني نزلت جزأ جديد

تحياتي لك من ماناساس البلد

--------------

رافينديل

هع هع هع

الله يكرمك يا رب
ان شاء الله طبعا كله بيتصلح

امين يا رب

:) تحياتي لك من ماناساس البلد وكل عام وانت بخير

---------------

اسراء

وانت بالصحة والسلامة والله أكرم

ادعيلي كتير الله يكرمك

تحياتي لك من ماناساس البلد

----------------

يوتتا

الله يسلمك

انا بخير الحمدلله وسليم وزي الحصان الحمدلله

ايوة دكتور كان ظريف قوي رغم اني مشوفتش غير قفاه

موضوع بره ده انا رديت عليكي فيه في مدونتك

يللا خدي بالك من نفسك وادعيلي

تحياتي لك من ماناساس البلد

----------------

توتة

الله يكرمك يا رب وكل عام وانت بخير وصحة وسلامة

:) يللا المدونة كلها شرفت بيكي ونورت وتحت أمرك وانت اللي جبتيه لنفسك :)

تحياتي لك من ماناساس البلد ويا رب مش اخر زيارة ليكي

--------------

زيزي

أيوة جااااااااااااااي

تحياتي لك من ماناساس البلد

--------------

انسانة

طبعا انا ولد وهمي متعدد المهام بنام وانا سايق :)

الحمدلله على كل حال والله يبارك فيكي

روحي بيضي سنانك بملح ومية وكربوناتا

:)

تحياتي كل من ماناساس البلد

غير معرف يقول...

يانهار ابيض
كل ده يحصل؟؟؟؟؟
والله الاسنان دى مشكلتها بقت مشكله متنيله بستين نيله
طب انا واحده بتنضف سنانها ومع كده عندها نقص كالسيوم مخلى سنانها تتفلق بالطول
يبقى الحل ايه؟؟؟
فداك العربيه والحمد لله انها جت على قد كده
عجبتنى مدونتك قوى
انا ليه ما زرتكش قبل كده؟؟؟؟