السبت، ٢٩ سبتمبر ٢٠٠٧

الملك القوللة طلعله تاج

السلام عليكم ورحمة الله قاعد في امان الله والاقي زيزي صاحبة مدونة البئر والظمأ مديالي واحد تاج في المتين طيب أمري لله ------------------ لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟ عصر عمر بن الخطاب رضي الله عنه يوم فتحت مصر وأمر عليها عمرو بن العاص فأحظى بشرف رؤيتهما

اول اولويه فى حياتك عيلتك ولا شغلك ولا اصحابك؟ عيلتي واصحابي متساويين ثم شغلي ايه أكتر حاجة بتحبها في رمضان؟ السحور وقراءة القران والدعاء المستجاب

اوصف ليا اجمل فطار ممكن تفطره ؟

افطار مع زوجتي باذن الله واحنا سعداء بنعم الله وفضله علينا

لو انت حاكم على مجموعه من الافراد هتكون عادل؟؟

لا حكون الملك عبدالله القوللة اللي طلع قيللة

طب هتعمل ايه عشان تتأكد انك حاكم عادل؟

حسألهم انتم شافيني عادل؟ حيقولوا لا

ايه اللى بيبوظ الحكام؟ .. نفسهم؟ ولا الشعب؟ ولا الحاشيه المقربه؟

نفسهم - بايظين لوحديهم الشعب - احنا منستاهلش - عادل امام ليه دعاء رهيب في الموضوع ده الحاشية المقربة - ربنا يحش وسطهم ويحشيهم

مين أكتر اعلامي مصري بتحترمه؟

مش عندي فكرة جامدة قوي بس حقول كنت بحترم قوي الراجل بتاع صباح الخير يا مصر اللي كان ألثغ في الراء بس كنت بحبه قوي

قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟

مش قريته ومش ناوي

لو اه ايه رايك فيه؟

وبعدين بقا؟

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟

رائد فضاء - وسعات بقول مأذون شرعي - وسعات شيخ في الجامع بس اكتر حاجة رائد فضاء

ايه تانى بلد تتمنى تعيش فيها بعد مصر؟

سؤال خبيث - مين قالك ان مصر اول بلد؟ عموما اتمنى اعيش في مكة ثم الامارات ثم مصر بالترتيب

اوصف ليا ترتيبات اجمل فرح ؟؟

لما يكون العريس والعروسة مبسوطين واهاليهم راضيين وربنا قبلهم كلهم راضي بما يحدث وراضي عن الطريقة حتقولي زي ايه؟ حقولك خليها وقتها لما اتفق مع زوجتي ان شاء الله

بتراعي كلام الناس والقيل والقال؟ لو اه اولا قوللي ليه؟

لا - كل اللي يعجبك والبس اللي يعجبك وطز في اللي مش يعجبه من الناس يعني مش قوي كده انا بحب اراعي شعور الناس حتى لو على نفسي لو حسيت اني حضايق حد باي حاجة حتى لو لون اللبس لكن فعلا لو حاجة ملهومشي دعوة توتالي خالص بيها - خد بالك من توتالي دي يبقى طزززززز فيهم لو اعترضوا او اشتكوا - انا مش ناقص

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟

حكون عبدالله برضو زي ما انا ويمكن احس ان في حاجة ناقصة

السعاده هى؟ رضا ربنا ثم زوجتي ثم تعريف بتاع حمادة حبيبي لو فاكرينه - بيقول بتصرف يسير: مزيج من نجاحات شخصية في الحياة العملية مصحوب بعلاقات انسانية ناجحة

عندك أمل ؟؟ أسبابك ؟

طبعا - لأني انسان حي

لما تحب تهرب من كل شئ بتروح فين؟

السرير ادفن نفسي فيه وابكي او انام

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟

لما جيت العب مع ولاد خالتي اللي كنت بشيلهم على كتفي وأأكلهم بايدي في الصيف اللي فات

لما بتعمل عمل خيرى بيكون ايه هو دافعك الاول؟

هو مش بوضوح عشان ربنا بس دافعه ربنا طبعا ووجه الله عز وجل الكريم- غالبا بيكون لاحساسي بان عليا واجب والناس دي محتاجالي بجد ولازم اوفي حقهم عليا - كمان الشفقة وقلبي مش بيستحمل كتير وكمان ابتسامة الشخص بتفرق معايا قوي وبحس ان يومي فعلا كان احسن يوم

بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟

لا - ومتسألشي ليه - أما على ست بتشرب سجاير فعادي بدور وشي الناحية التانية مش ناقصة اصلها هبل و هي حرة بس لما يطلع ابنها ريحته وحشة وسنانه صفرا هي حرة

بتعرف ايدك اليمين من الشمال ازاي؟

لما بفكر في الأكل

ايه اكتر اله موسيقيه بتحبها ؟

الكمان ثم الناي

فى رأيك ليه الذوق والنخوه اتعدموا؟

اللي يقول انعدموا حضربه - بس هما اختفوا شوية من السطح بسبب كثرة المتبلدين في المكان

ايه الحاجه اللى لو حصلتلك تبقى سعيد قوى؟؟؟

كتب كتابي ان شاء الله - من غير لو

تختار يبقى عندك...ارض زراعيه ولا احدث عربيات و لا كام عماره و لا فلوس فى البنك؟؟؟؟

مفيش اختيارات؟ طيب رأي الجمهور؟ طيب يعني لازم اجاوب؟ طيب ينفع كلهم؟ طيب كيلو بامية؟ طيب خلاص حقولك ولا كل ده - زوجتي الحبيبة جنبي وخلاص

البحر و لا النيل؟؟؟

البحر طبعا ثم النيل - لكن اللي زوجتي حتختاره حمشيه لاني مش بيفرق الاتنين معايا قوي من زمان - الكورنيش عموما ايا كان نوع الماء قدامه ظريف وبيهديني ويرجعلي روحي

مركب و لا طياره؟؟

طيارة لاني بحب السفر السريع وبكره بطء المركب وكمان مش بعرف اعوم ومش بحب منظر المية من غير شط

مجنون و لا عاقل؟؟

سعات وسعات - هي شعرة - ساعة تروح وساعة تيجي

تقرأ كتاب و لا تتفرج عليه فيلم؟

عموما مش حقدر اقولك بس بميل لاني اتفرج على فيلم اكتر - لو الكتاب ممتع حقراه ولو اني من زمان مش قريت كتب

بتمرر التاج لمين؟؟؟

ولا حد مانت عارفني مقبرة التاجات والحق انفد من هنا بدل ما ادفنك مع التاج ده

تحياتي لكم من ماناساس البلد

هناك ٥ تعليقات:

Meekness !!! يقول...

سلام الله عليك يا عبد الله
هيييييييييييييييي الحمد لله انا اول واحده اجي اعلق عندك
على فكره اجباتك حلوه قوي يا عبد الله
كزا نقطه كدا عجبوني
في سؤال احلى حاجه في رمضان ؟
و البحر ولا النيل ؟
و لو اخترت تكون حاكم ؟

و موضوع ترتيبات الفرح ؟
و الحاجه اللي لو لو لو لو حصلتلك تبقى سعيد؟؟ و هكرر لو ( هههههههههههه )



بس بغض النظر عن كل ده
هوه ايه الحكااااااااااااااااااايه
انا حاسه ان في حاجه كدا ؟
انت ناوي ولا ايه ؟
بجد كان حلو قوي انك تدخل موضوع زوجتك المستقبليه في كل جمله
بجد حلوه قوي الرومانسيه دي
المهم ما تنسانييش في اخطوبه بقى ان شاء الله
بجد بجد بجد هدايق لو ما اتعزمتش
ههههههههه
يالله بالتوفيق يا جرووم ان شاء الله
و لو اتاخرت شويه كمان على الاجابه كنت هخنقك

ربنا معاك
و تحياتي ليك من صعيد مصر
.
زيزي

الخيط الرفيع يقول...

السلام عليكم ورحمة الله
عندي س:يعني ايه ماناساس البلد؟؟؟؟؟؟؟؟؟؟؟


ربنا يرزقك بكل ما تتمناه نفسك ويزيد
شرفتنا ونورتنا

Noony يقول...

أخويا برضه كان نفسه رائد فضاء..أو تاجر مواشي
هههههههههههه

بص بقى...الأوله شرط أخره نور
زيزي هتقعد جنبي في نفس الترابيزة في فرحك
أنا بقولك أهو

:)
نوني

Rosa يقول...

عبدالله ربنا يوفقك يا رب للفيه الخير و السعاده و يحققلك كل امانيك
ويرزقك بالزجه الصالحه و يجعلها كما تحب و ترضى و يجعلك كما تحب زوجتك و ترضى و يجعلكما كما يحب الله و يرضى

حسام مراد يقول...

ازيك يا عبدلله

اجاباتك واقعيه اوى

تحياتى ليك