الجمعة، 30 مارس، 2007

حكاية حب - 1 من 2

السلام عليكم و رحمة الله ازيكم يا جماعة الخير النهاردة الجمعة و كل عام و انتم بخير ماهو عيد بقا خلينا نفرح شوية - الجمعة يوم حلو أوي صحيح هو في ماناساس الشغل هنا الجمعة يوم شغل عادي و بيعتبروه اخر الاسبوع و بيسكرو فيه و العياذ بالله اخر الليل لكن برضو هو يوم جميل و في نظري اجمل ايام الاسبوع و مش مهم حثالة الناس بيعملو فيه ايه لان برضو احسن الناس بيعملو فيه ايه و ايه واييييييييييييييييييييييييييييييييييه - انت مين يا؟ وفي الاخر اليوم يوم على الجميع هو هو الجمعة في كل انحاء العالم بس مين يفهم و يقدر طيب أنا حتكلم عن ايه في البوست ده؟ انا ححكي حكاية واحد صاحبي بأسلوبي أنا - واحت تاني غير حماتة حبيبي بسم الله نبدأ --------- تحبو الاول عربي شبه فصيح و لا عامي؟ خلينا في العامي احسن المرة دي :) --------- جرس المنبه فضل يرن و يرن ويرن - مالك يا عم ايه الازعاج ده؟ المهم قام طفاه و كمل نوووووم شوية و بيرن تاني - الله بقا - دانت مسقتصدني؟ ايه الحكاية؟ دانا جايبك مخصوص من النوع اللي بيرن مرة واحدة بس و مش بيرن تاني لما بنطفيه زي المنبهات الغلسة - اوووبببباااا اتاريه قام طفاه في الحلم و كمل نومه - في الحلم برضو يبقى لسه بيرن من ساعتها؟ يالهوييييي قوم بينا نشوف الساعة كام؟ اخص الساعة طلعت 9 و نص صباحا طيب هي المحاضرة من كام؟ اخص تاني النهاردة السبت ايه الرعب اللي انا فيه ده خليني يا عم انام شوية النهاردة اجازة وراح متكلفت في الغطا أو جزيرة القطن على رأي صديقتنا العزيزة و خلع في النوم شوية و اخ ياني النوم طار الله ينتقم منك يا منبه الندامة يعني جاي تصحيني يوم السبت الله يحرقك المهم قام راح عامله كوباية نستافيه (عشان مايطالبوش بنسبة من الاعلانات) و قعد يتفرج من الشباك على التلج و هو بينزل - عظيمة والله اجهزة التكييف المركزي دي بتخلي الجو حلو طول اليوم شتا أو صيف - طبعا الناس بردانة معانا دلوقتي من سيرة التلج بس أطمنكم هنا في زيوريخ - سويسرا - الجو كله لطيف و تلج حلو كده تحت الصفر طول الشتا عادي يعني - وأراهن برضو ان عند حبيبي جروم في ماناساس البلد الجو برضو طول الشتا حلو و متلج عالطول كده - يا ساتر يا رب معرفوش يا جماعة انا ماليش دعوة المهم قعد يسرح في التفكير ماهي مصر كان مالها يعني؟ وكان ايه اللي جابرنا على كده؟ لا برضو الماجستير مهم و زيوريخ مدينة جميلة و سويسراالدراسة فيها رخيصة و حلوة و مفيش بهدلة أمريكا و جروم المسكين - يا عم سيبني في حالي و ركز في قصتك المهم يعني مصر برضو حلوة - هانت اهي كلها كام شهر و انزل - صحيح انا مكملتش سنة لسه بس برضو تستاهل ننزلها بسرعة على الاقل مش عايز استنى سنة كاملة زي جروم عشان انزل - والله لو ما سيبتني في حالي لألبك على دماغك - خلاص خلاص متزوقش طيب صحيح يا ترى هي عاملة ايه دلوقتي؟ (أكيد مش مصر يعني) أي أي ليه السيرة دي بس ماكنا حلوين و طيبين و زي الفل لا بس فعلا أنا حاسس اني مشتاق ليها - اه لو اسمع صوتها دلوقتي و لا اكلمها - من كام يوم حلمت بيها و كنت حموت والله - وحشتني فعلا يعني لا مليش حق والله يعني - ماهي الغلطة غلطتي من البداية وقعد يا عيني الولد يسرح و يسرح و يسرح (أحمد و منى عشان الأنونيموسيتي) السلام عليكم و رحمة الله - ازيك يا منى؟ عاملة ايه؟ جايبالنا ايه جديد النهاردة؟ كان بيقولها و قلبه عمال يتنفض جوا سدره و يتشال و يتحط و يتجاب يمين و شمال و فوق و تحت و في كل الزوايا بس ما شاء الله عليه حافظ على رباطة الجأش (يعني ايه جأش؟) وصدره المتماسك اللي لا طالع و لا نازل و لا حاجة خالص ثابت في مكانه تمام و هو بيقول الكلام راحت هي لفت راسها وبصاله؟ وقالتله اه؟ احمد؟ وعليكم السلام و الرحمة - ازيك عامل ايه؟ انا كويسة الحمدلله - يعني النهاردة مفيش جديد أوي - حنشوف حنعمل ايه في اجتماعات الجمعية الخيرية و خلاص - النهاردة مفيش شغل كتير - وراحت مبتسمة ابستامة القمر و الشمس و كل النجوم و الكواكب - ده تعبيري أنا - ولفت وشها الناحية التانية كملت اللي بتعمله أبقى كداب بجد لو قلت اني فهمت حاجة من اللي قالته - أنا مكنتش مركز في كلامها خالص - أنا ركزت في حاجة تانية - ركزت في جمالها - أنا مش بصبص لا سمح الله و الله أنا كنت ببص في الأرض طول الوقت أنا متربي برضو يعني حتى أسألو جروووم ولا اطلع برا انت مش وش نعمة - مش قولتلك متجيبشي سيرتي تاني - طيب خلاص خلاص انا اسف ابوس ايدك كمل الحكاية طيب خلاص عفوت عنك بس من غير بوس و قرف حكمل يا سيدي المهم يا اخواني انا فعلا كنت سرحان في جمالها - مش جمال الشكل مع انها في نظر ناس كتير جميلة شوية بس عادي يعني زي كل البنات :) -لكن لا أنا بتكلم عن جمال الروح - روحها كان فيها حاجة لله في لله - أنا مش عارف ياض يا احمد انت بتعمل في نفسك كده ليه سبحان الله كلها على بعضها عادية بس لما تتكلم معاها و تشوف روحها و هي بتعامل الناس و بتتكلم معاهم و كده يبني ايه العظمة دي - سبحان الخلاق - لسه في ناس في الدنيا بالروح دي و الجمال ده؟ لا والله لن ممكن أبدا - لا ممكن بدل مالبك - خلاص ممكن يا سيدي و تاج راسي صحيح ماهي قدامي أهي يعني أنا مش عارف ليه والله بقيت أستنظر اجتماعات الجمعية دي كل سبت كده - أكيد عشان أملا قلبي من فيض روحها - شوفتو الحتة الجامدة دي - فعلا لازم بنت زي دي من النوع اللي روحها الجميلة دي بتبهت عليك و بتنسى الصدأ اللي كان اعتلى روحك من زمان - انت حتة صنفرة لقلبي يا جميلتي - معلش أصل الواد بشمهندس مالها الصنفرة يا جروم؟ ياض اسكت أنا اشتريت شبشب جديد خد بالك حشبشبلك بيه - طيب طيب متزوقش المهم قولت في عقل بالي والله يا أحمد مانت مفوت الدرة المكنونة دي - بجد دي لقطة انت عايز ايه تاني؟ يعني جمال و الحمدلله منه كتير - روووح آآآآآآآآاه من الرووووووح - طيب تعليم؟ اه ممتازة و زي الفل - طيب مستوى اجتماعي (أصل أهلي إنفين أوي أوي أوي) وماله برضو صحيح هي مش شكلها غنية أوي بس وماله يبقى احسن واحسن فرصتي تبقى كويسة و أنا كده ملو هدومي :) يبقى على بركة الله - طيب بسرعة كده؟ أه خير البر عاجله يبقى أكلم البنت و نشوف منى ممكن أقولك حاجة - اه بسرعة يا أحمد عشان أنا مستعجلة عايزة ألحق أروح وانت عارف انا ساكنة في العاشر من رمضان و المواصلات و الطريق بقا (اه العاشر دي تمام أوي) لو جبت أهلي و جينا البيت زرناكم و اتقدمتلك - توافقي؟ البنت العكروتة على رأي برايد كانت متوقعة حاجة زي كده - يا حلاوة الميزان يا رشيدي يا ولاد - دي طلعت هي كمان قلبها فيه بتاع من نفس البتاع اللي في قلبي - يا حلاوة النخيل كمان (يللا بقا ماهو موسم الحلاوة - اللي اداك يدينا يا سيدي)

وابتسامة خجولة و كلها كواكب على رأي حبيبي جرووووم (حفوتله المرة دي بس عشان الموقف العاتفي)

ممممم أيوة يا أحمد حوافق - سلااااااااااااااااااااااااااااااااام :)) وجريت ركبت ال سي تي ايه (بتفكرني بال CIA اللي هي Cairo International Airport) هاها حتة على الماشي وهو واقف مكانه نص ساعة زي العبيط - أنا مقولتش عبيط أنا قولت زي العبيط يعني ايه؟ - نعم ؟ مش فاهم؟ فضلت أقول لنفسي كده و أنا مش واخد بالي انها وافقت لسه - بيني و بينكم أنا متوقعتش ويوميها روحت البيت و نمت في غرفتي سعيد جدا جدا لدرجة ان بابا بيقولي يبني ايه كل السعادة دي - أصلي يا بابا اليوم سعيد أيوة يبني سعيد ليه؟ اه يا بابا سعيد اه

أيوة يعني ليه؟ آه يا بابا سعيد آه

الواد اتجنن يا خواتي - اه يا عمو اتجنن اتجنن آه هاهاههاا أسيبكم لحد هنا و نكمل المرة الجاية تحياتي من ماناساس البلد فضفضة: ناس صاحية يوم الجمعة و ناس يوم الخميس نيمانة ناس بتلعب كورة بعد الفجر و ناس في بيوتها كسلانة ناس ليها في النشاط وناس ف العسل غرقانــة

الأربعاء، 28 مارس، 2007

زغزغة عالماشي 2

حبايبي الحلوين السلام عليكم و رحمة الله و بركاته و تحياتي من ماناساس البلد أنا استجابة لعمتنا المعلمة الكبيرة ايموس و لطلب الصديقة العزيزة رافينديل انا حتفضل عليكم بشوية زغزغة على الماشي لحد ما ربنا يفرجها قريب أوي ببوست جديد أول حاجة حابب أشكر الجميع على تعليقاتهم الجميلة وبجد بجد بجد والله أثرت فيا جدا سواء الأسلوب عجبهم و لا لأ بس أنا كنت مستني ياسمين و تعليقها على البوست ده و اهو تعليقها جيه اهو الحمدلله و كمان انا كنت مستني افكر في البوست الجديد و قولت في سري أشغلكم شوية في البوست ده بالتصويت ونتيجته تاني حاجة لو حد يعرف حاجة عن برايد يبقى يقولي :) أما بقا حوار التصويت: 26 انسان ظريف و لطيف و خفيف و جميل (هذه الالفاظ كلها تشمل البنات برضو يعني حاجة كده جينيرال عشان المعلمين ميزعلوش) راحو مصوتين عندي و تقريبا لموهم في البوكس لان مازادوش عن 26 من يومين الحلوين دولا منهم مفيش ولا واحد خالص بيقول ان الفرق المناسب بين الراجل و زوجته يكون اكبر من 5 سنين أسف والله يابابا كان من نفسنا نخدم بس الظاهر ان محدش عاجبه راي الكبار اليومين دولا كله متمرد يابا دي عالم انا عارفها اسألني أنا بس ولا يهمك انا وراك وراك يا أبي :) دي فعلا حاجة تلفت النظر أما بقا الخمسة اللي بحييهم والله و بحبهم أوي في الله (بحب الجميع برضو بس دولا أكتر P:) اللي قالو تكون العروسة قده أو أكبر مفيش مشكلة - الناس دي بتفهم صح وتعتقد ان السن مش حيفرق معاهم خالص يعني اصغر منها أو قدها مش حتفرق معاها في حاجة لان طالما في حب و اقتناع يبقى خلاص الناس بقا اللي بتمثل التريند الجديد أو الاتجاه الجديد للحاجة الساقعة - ساقعة مين؟ انت مين يا ساقع؟ الناس الحلوة دي بتاعت اليومين دولا الشباب الويريش دولا يبقو 15 واحد بتوع المرة اللي فاتت تقريبا ومعاهم سوسة و لا حاجة بيقولو ان الفرق لازم يكون من 3 الى 5 سنين - الناس دي بتفهم بس محبكاها شوية و كده وبتعقد الأمور و هما احد اسباب العنوسة هه بس ومحدش يقاطعني و الي مش عاجبه كلامي يقولي طز في وشك وانا مش حزعل بالعكس حقوله الله يسامحك :) الفرق ده مناسب شوية بس فيه عيب خطير لو انا 24 مش حابقى مستريح أوي مع بنت 21 او 19 لازم تكون قريبة مني شوية اكتر عشان يكون في تفاهم بيننا يعني انا مش عايز اخد بنت اربيها من تاني يعني من 1 الى 3 سنين احسن و انا برضه بقول مش عيب ان يكونو قد بعض أو بينهم فرق لحد 3 سنين فوق أو تحت يعني بلاس أور مايناس - مين بلاص ده؟ عيب يا واد اختشي - حاضر يا حمو المهم انا رأيي مع ال 6 الجمال الحلوين اللي مسكو العصاية من النص و قالو الفرق يكون من 1-3 سنين ومفيش مانع عندي في نفس الوقت من ان تكون البنت اكبر او قد الولد لأن العبرة بالشخصية و الدين و الحب :) واللي حيقولي حبك برص و بتاع حقوله روح حديقة الحيوانات و حب زي مانت عايز لكن أنا لن أتنازل عن حقي في قول رأيي بمنتهى الحرية في مدونتي و على المتضرر ضرب دماغه في الحيط وفي مصر الحائط أتخن من هنا من ماناساس طيب و اللي حيهاجمنا بأن البنت تكون قده أو أكبر منه حقوله و ماله؟ الرسول قدوة (عليه الصلاة و السلام - صلو عليه يا بخلاء) و الناس الظريفة بتاعت الرسول غير (عليه الصلاة و السلام) وظروفه غير و دي خصائص بس ليه لا انا شايف لا وألف لا لو لم يكن هو قدوتنا فمن؟ وبعدين الرسول عليه الصلاة و السلام تزوجها قبل الدعوة و البعثة يعني قبل أن يكون نبيا و لم يعارض أحد في مجتمعه العربي القبلي المتعصب هذه الزيجة و لم يلمه أحد وأقتبس هنا كلمات تقول: "وإذا كان تزوج بعد ذلك من السيدة خديجة وهى أكبر منه سنا بخمس عشرة سنة.. وظل مكتفيا بها زوجة وحيدة حتى بعد أن تجاوزت الستين.. " وبعدين لو بيحبها حقيقي و بينهم تفاهم حيعمل زي الرسول صلى الله عليه و سلم و حيفضل متمسك بيها لأخر لحظة - وماعتقدشي الشباب الكاوركية بتوع اليومين دولا وانا اولهم الكاوركي الكبير حعرف اتجوز تاني أساس على مراتي هاهاها يعني دي حاجة المفروض انها تشجع اكتر وبنقول تاني عشان العالم الفهيمة ان مش ده الاساس لكن مش عيب و لا حرام لو حصل الجواز ده وبالعكس لو بيحبو بعض يبقى فل الفل وتمام و نشجعهم ان شاء الله أنا عارف انه تقريبا الموضوع ده شبه مكرر و اتخانقنا فيه في الزغزوغة اللي فاتت و التعليقات عليها بس أنا كنت حابب أعلق شوية شماعات على التصويت و نتيجته صحيح أنا عايز أقولكم حاجة اللي مش عاجبه الزغزوغة دي يبقى ينفض ليها و لنفسه و للمدونة و يسمعنا حسه في التصويت الجديد و يخلع بدري بدري و يسيبني أركز في البوست الجاية أما بقا اللي حيشرفني بتعليق أو اتنين أو يتحفني على رأي واحد صاحبي بتعليق أو اتنين ;) فأنا جاهز تماما للرد عليه و تهنئته على الخطوة الموفقة :) وكمان قولولي رأيكم في الأغنية الجديدة بمناسبة التصويتات و سمعنا صوتك تصبحو على خير من ماناساس البلد :) فضفضة: ناس ليها في الصويت و ناس م الخنقة مبحوحة ناس بتكتب م الخنقة و ناس كتاباتها ملووحة ناس في السيما بتحب و ناس بتتفرج على بوحة ناس بتحب نفسيها و ناس م الحب مدبوحة

الاثنين، 26 مارس، 2007

ترى .... أين و كيف هي الآن؟

السلام عليكم و رحمة الله وحشتوني أوي والله و اعذروني على التأخير يا جماعة بس أنا كنت بعزل من بيت خالي أخيرا على مدينة تانية اسمها ستيرلينج البلد لكن خير ان شاء الله انا بنزل ماناساس كل اسبوع مرتين على الاقل و ماناساس يا حبي يا حتة من قلبي المهم انتم اخباركم ايه؟ انا وعدتكم بأول حكاية حب ليا وأديني بوفي بوعدي أسيبكم مع الحكاية ....... ب ب ... بقالة السعادة آه انها تكتب هكذا بقالة السعادة ... لا أدري كيف أصبحت أقرأ اليافطات الكبيرة بسرعة هل من كثرة المرور بها؟ ربما لكن المؤكد هو أنها كلها لم تعد تلفت نظري كسابق عهدي بها ... قد يكون بسبب أنني أصبحت الآن أنضج و أوعى؟ لم تعد تلفت نظري الألوان الجميلة أو الرسومات الباهرة - قد تتوقف عيناي قليلا عند تلك الرسومات الجميلة أو تلك الحروف الغريبة للغة الأنجليزية لكنها سرعان ما تفقد بريقها إلا إذا كان المحل صاحب اليافطة مكانا أحب زيارته :) بسرعة بسرعة بسرعة كلمح البصر تتلاحق الكلمات و الحروف و أبي يجري مسرعا بالسيارة كي نلحق خطبة الجمعة - يا الله كم أحب هذا المسجد البعيد لأننا نقطع شارع السوق بأكمله كي نصل اليه في وقت قياسي - وبالتالي تتاح لي الفرصة أن أتابع الجديد في وسط المدينة و كل تغيير أو تجميل يتم كما تتيح لي أن أدرب عيني على القراءة السريعة فقد أحتاجها يوما ما - هوايتي الجميلة :) اليوم أول مرة يسمح لي أبي بالجلوس في المقدمة بجواره - أعتقد أنني لم أعد صغيرا الآن - هل يعني هذا أنني صرت رجلا؟ لا مممممم أعتقد أنني صرت شابا لأن الرجولة في نظري تكون على الأقل في الثلاثين - قد أكون مخطئا لكن "عمو" و "عمو" كلهم ليس من بينهم من هو أقل من الثلاثين و لا أستسيغ أن أطلق هذا اللقب على هذا أو ذاك بدون أن يكون أكبر من ثلاثين عاما - لا أدري لماذا :) السلام عليكم و رحمة الله - السلام عليكم و رحمة الله و بركاته فلأصل السنة بسرعة قبل أن ينصرف الناس - أحمد انتظرني أحماااااااااااااد - أوووف لقد ذهب - فلأصل أربع ركعات اذن فليس ما يستوجب التقليل اللآن - اللهم تقبل :) عبداااااللللااااااه - حاضر يا أبي اني قادم - آه حان موعد الانصراف من المسجد - ليتني أبقى قليلا - يا الله كم أعشق جدران هذا المسجد و إمامه و كل ما فيه - إنه بحق تحفة المدينة هنا - ليتني أبقى قليلا لكن عزائي الوحيد هو أنني عائد اليه اليوم مساء في الدرس الأسبوعي :) بسرعة بسرعة بسرعة - آآآآآآآآآآآآآآآآآآآآآآآآآه ه ه ليت أبي يتمهل قليلا لأن تلك اليافطة الجديدة أفلتت مني - كنت أريد أن أتحقق من تلك الحروف الإنجليزية أهي تلك الكلمة التي أعرفها أم هي كلمة جديدة؟ من واجبي أن ألم بكل كلمات تلك اللغة العجيبة - يجب أن يفخر بي أبي بأنني متمرس مثله في تلك اللغة - ليته على الأقل يكف عن ازعاجي بتلك التمارين اليومية المزعجة :) توققققققاااااااافففففف يييييااااا أأأأأأبببببيييي لم العجلة؟ أليس هذا بنك دبي الاسلامي على تلك الناصية في اخر شارع السوق؟ أرجوك يا أبي بالله عليك توقف و لنمر عليه ولو لخمس دقائق انه مكاني المفضل في هذه المدينة بعد المسجد و مدرستي أرجوك يا أبي – لم تتجاوز تلك الكلمات خواطري و لم يقدر لساني على نطقها – كم هو طيب أبي لكنه يثور اذا عطلته عن مواعيده المهمة دائما بعد الصلاة – قد يتوقف و قد لا لنر :) عبدالله – سوف نمر بسرعة على بنك دبي الاسلامي هنا على الناصية كي أتحقق من شيء بسرعة – أتريد انتظاري في السيارة؟ عبدالله؟ أين أنت؟ كنت قد قفزت من السيارة لتوي عندما سمعته ينطق هذه العبارة فأنا لم أنفك أعشق ذلك المكان و فور أن أبطأ سرعته كي يركن سيارته في مكانها المخصص قفزت منها قبل أن يجبره الزحام على العدول عن رأيه :) آآآآه يا قلبي – كم أحب هذا المكان – بلونه الأخضر الجميل – ورخامه الأسود اللامع – والخضرة التي تبعث على راحة البال – ياله من جنة في أرضنا هذه – لأدخل قبل أن يعود أبي أدراجه – أحيانا أجد سياسة الأمر الواقع سياسة مفيدة :) السلام عليكم يا عم – أين أجد عم علي؟ (عم علي هو ذلك الرجل السوداني صاحب الشيب الأبيض و الملامح العربية الجميلة ونظراته الحنونة الباسمة و طبعا قطعة الحلوى التي كنت أخذها منه كل يوم جمعة – يالسعادتي) :) "عموووو عليييي" "هييييييييييييييييييييييه" و جريت اليه بكل طاقتي و تلقفني بيديه الصغيرتين و ساعديه القويين و رفعني لأعلى و قبل جبيني و أنزلني – مع أنني كنت أعتبر نفسي كبرت و زاد طولي كثيرا لكنه لازال و سيظل الى يومنا هذا طويلا عني – ربما لانه كان في برج عال في نظري – كم هو متدين وخلوق و الله إني أحبه في الله :) عبدالله كيف حالك؟ ماذا لديك اليوم؟ آخ نسيت أنني قد أنفقت كل نقودي على الحلوى و التبرعات أيضا في المسجد – مممم لأتفقد جيوبي و محفظتي الصغيرة – لا يمكن أن أكون قد نسيت – للأسف نعم نسيت – كل مافي يدي الآن ربع درهم – "يال احراجي" – ماذا سأقول له الان – أتمنى لو تنشق الأرض و تبلعني في التو واللحظة حتى أبي لن ينقذني من هذه الورطة فقد اقترضت منه للتو مصروف يوم غد لأنفقه على يومنا هذا – كم أنا سيء الحظ – سأخبر عم علي بالحقيقة و أمري إلى الله :( "لا تحزن يا عبدالله " "كم معك من النقود الان؟ " "لا تحزن ان كنت لاتملك مالا الان – الجايات اكتر من الرايحات يا ولدي – بارك الله فيك" وجدت نفسي أصرخ لا لا معي ربع درهم – ثم نظرت إلى الأرض من كسوفي و خجلي – ماذا يفعل الربع درهم لهؤلاء الأيتام – ماذا يفعل لتلك الأم الثكلى – ماذا يفعل لهؤلاء المرضى؟ - ماذا ينفع هؤلاء المشردين من بيوتهم في قلب أوروبا المتحضرة لأنهم فقط مسلمون؟ بل ان حتى قطعة الحلوى لن تقل عن نصف درهم – ليتني لم أفتح فمي اللعين :( "وماله يبني – بارك الله فيك – ضعه في الصندوق – إن الله يضاعف لمن يشاء" – لكن يا "عمو" علي انه فقط ربع درهم؟ لا يساوي شيئا و ليس له قيمة؟ :( "لا والله – إن الله يضاعف لمن يشاء يا ولدي و الله يعلم نيتك و سيجزيك عليها و ليس على قيمة ما تنفق و قد يكون هذا الربع الصغير التافه في نظرك أثقل و أهم عند الله تعالى من ألف ألف درهم بلا نية صادقة أو من مال حرام - ضعه يا ولدي و توكل على الله" :) جريت نحو الصندوق كي أضع الربع درهم فيه و قد زال خوفي و همي – على وعد بيني و بين نفسي أن أتبرع بعشرة دراهم كاملة في المرة القادمة تعويضا عن ما حدث – لا أحب أن أقطع عادة بدأتها أبدا – اللهم أعط منفقا خلفا يا رب – كم تعجبني تلك العبارة – بل و تعجبني أكثر تلك التي تقول "يا باغي الخير أقبل فهذا سبيلنا" – لا زلت أذكر تلك الملصقات التي دوما أحملها وعليها كافة أنواع العبارات "الوهمية دي" – انها تحبب في عمل الخير و كان السبب الرئيسي في حملي لها وتوزيعها دائما تلك الكلمة السحرية "جمعية دار البر الخيرية" :) كانت تلك المعاني كلها و الخواطر تجري في عقلي بنفس سرعة قدمي نحو الصندوق حين حدث ما لم أكن أتوقعه :) وقع نظري عليها – و …… و و و وتجمممممدت في مكاني ووقفت مشدوها فاغر الفاه محدقا فيها يا اللللللللللااااااااااااااااااااااااااااه وبدلا من أن أضع النقود في الصندوق توقفت فجأة عن الركض و تجمدت قدماي أنا الان كالصخرة – عيناي محدقتان في ذلك الكائن الخرافي الذي لا يمت لعالمنا بصلة :) شعر كالحرير أطوله – عينان بالسواد مكتحلة – أهداب من الشعر أجمله – وجه في الصفاء و البياض أحسنه – ملامح من أوروبا و لكن حنان عربي مسلم في العينين أظهره – ترى ماذا حل بي مذ رأيتك يا قرنفله؟ ترى من أنت؟ وكيف أنت؟ و ما جاء بك الى هنا؟ ولماذا أنت في سني؟ ماهذا الشعور الغريب الذي يتملكني – أهو بسببك أنت؟ ردي على سؤال لم أنطقه - أرجوك :( طالت نظراتي قرب الدقيقتين و أنا متسمر في مكاني أتفرس ملامحها و أتعرف على وجهها جيدا – لا أدري لم أحسست أن هذا آخر لقاء بيني وبينها مع أنه الأول – يا الله – كم هي جميلة – طيبة – بشوشة – حنونة فيها من كل الصفات أجملها و من كل العيوب أقلها و من كل الجمال معظمه – سبحان الخلاق العظيم :) ان شاء الله عندما أتعلم كتابة الشعر في المدرسة سأكتب لها شعرا – هي تستحق أكثر من هذا بكثير لكنه المتاح – مجرد صفاء النية هي كل ما أقدر عليه الآن – ترى ماذا ينادون هذا الجمال؟ :) ماسمك؟ سؤال لم يتجاوز عقلي – ليست لدي الجرأة – أنا أخجل من أن أكلم بنت خالتي أو خالي أو حتى أن ألمس يدها – فكيف أسأل هذه ؟ ويا ترى ماذا ستكون اجابتها؟ :) مرت الدقاءق بسرعة الضوء و – هااااااااااااااااااااااه انه عم علي ينادي – آه لقد و قفت فترة طويلة – الله أعلم كم وقفت من الزمان – لماذا ينظر الي عم علي باستغراب – عله لم يلاحظ ؟ أتمنى هذا – أنا لم أنظر لبنت قط – لكن هذه هي النظرة الأولى و الأخيرة – لا يمكن أن أنسى ذلك الوجه الملائكي و تلك الملامح الطفولية – الحمدلله لا أنسى وجه من رأيته أبدا و لو لمرة واحدة – وجمال تلك البنت كاف كي يحفر في مخي حفرته و يستقر فيها للأبد – والله لن أنسى وجهها ما حييت :) "عبدالله" نعم يا عم علي – "ماذا تفعل هناك يا ولدي؟ لماذا توقفت هناك؟ هل تبرعت أم لا؟ مالذي لفت نظرك في الصندوق؟" تلك الجملة الأخيرة الخاصة بالصندوق كان بها قليل من الضحك الخبيث العابث – لقد كشف أمري – لكني والله بريء – انما هو اعجاب بما رأيت من الجمال و هي مجرد نظرة لم تطل كثيرا و ما مكثت الا أن وضعت عيني أرضا – كيف أرفعها لأرى تلك الساحرة بدون أن ينكشف أمري :( لا شيء يا عم علي – من تلك التي في الصورة؟ لقد أحسست أني أعرفها من قبل – "آه تقصد تلك البنت الجميلة التي على الصندوق؟ نعم هذه صورة بنت فقيرة من البوسنة و الهرسك فقدت أهلها كلهم ولم يبق لها سوى أخيها الرضيع صاحب الثلاثة عشر شهرا – وقد وضعنا صورتها على الملصق الخاص بحملة التبرع للبوسنة لجلب اهتمام الناس من اصحاب القلوب الرحيمة لآخواننا المسلمين هناك و ما يعانونه" أكمل كلامه وأنا نصف شارد مشتت الذهن فيها و نصف آخر يقول آآآآآآآآآآه تذكرت – هؤلاء الطلبة من البوسنة و الهرسك – يا الله ما أوسمهم – ما أجمل بلادهم التي خربها المعتدون – ما أحلى صوتهم وهم يقرأون القرآن و يجودونه أفضل مني و من كل من في مدرستي – لكم الله يا أبطال و حق علينا عونكم و اغاثتكم :( ما اسمها يا عم علي؟ "اسمها لا اعرفه يا ولدي – لكن مالك مهتم بها؟ هل أحببتها؟" ;) خبيث هذا العم – في منتهى الخبث – انه يعرف كيف يقرأ عقلي الصغير بسرعة البرق – لم أستطع أن أخفي عليه سرا أبدا – عيناي تفضحاني دائما – المهم لست أدري بم سأجيبه الآن؟ ليس هناك أفضل من الصراحة – نعم أحببتها يا عم – إنها أجمل من رأيت و أطيب من رأيت و أحن من رأيت تلك النظرة التي في الصورة تكفي يا سيدي – أتمنى أن أكبر بسرعة و أتزوجها و أرعاها وأعوضها عن أهلها خيرا وأصبح كل ما لها في دنياها – و و و وأجهشت بالبكاء – ما ذنب ذلك الجمال أن يشرد؟ ما ذنبها أن تحرم من أهلها و اخوتها؟ ما ذنبها أن تفقد حنان الأب و الأم في تلك السن الصغيرة؟ والأدهى أنني عاجز حتى عن مساعدتها – رحمتك يا الهي وركضا ركبت السيارة و عدت على البيت مع أبي نصف باك و نصف شاك مالك يا ولدي قالت أمي؟ قلت لها لا شيء فقط تذكرت ما أحزنني قالت عليك أن تصلي العصر و سيزول حزنك ان شاء الله و فعلا مالبثت أن صليت أطول صلاة عصر صليتها في حياتي – وبكيت فيها بكاء لم أبكه أبدا لك الله يا محبوبتي – لك الله و فرج الله همك و كربك و عوضك خيرا وذهبت الى غرفتي لأقضي فيها بقية اليوم حزينا ونمت في المساء غارقا في دموعي مكرها على نوم لا أرغبه
وتمر الأيام والسنون و كل يوم كنت أمر فيه بجوار ذلك المكان أدعو الله لها و أشهده على ما في قلبي

اللهم عوضها و عوضني خيرا فيها و منها يا رب العالمين

حتى عندما ذهبت للامارات في نوفمبر 2004 حرصت على زيارة نفس المكان و التأكد من أن تلك الجمعية لازالت تملك من ذلك الملصق الذي لازلت احتفظ بنسخة منه - وللأسف فقد توقفو عن انتاجه

عم علي ظل يدعو لها و لي كلما رآني بعدها و يطمأنني أنها بخير حسبما علم من المسئولين في الجمعية – لكن بسفري الى مصر انقطعت اخباره عني و بالتالي فقدت فرصة الاطمئنان عليها الى الأبد

لقد ضاعت في عالم النسيان ككل من ضاعو

لكنني لم ولا ولن أنساها ما حييت وتبقى في القلب فرحة و غصة

وتنزل من العين دمعة

ويحزن الوجه وعليها يدمى القلب أيا كانت و أينما كانت – اللهم احفظها واحفظ اخاها و احفظ جميع اطفال المسلمين يا رب العالمين انتهت القصة يمكن أكون بالغت شوية يا جماعة – ويمكن أسلوبي ممل ووحش ومفيهوش تشويق و اثارة لاني أول مرة أكتب حاجة بالطول ده – لكن كل كلمة فيها هي مجرد الحقيقة بدون رتوش اللهم ارحمنا يا رب العالمين – أسألكم الدعاء لها و لي تحياتي من ماناساس البلد – أرجوكم من غير تريقة بس :)

الأربعاء، 21 مارس، 2007

زغزغة عالماشي

سلامو عليكو
ازيكم يا حلوين
أنا عارف اني وحشتكم :)
صباح الخير عليكم كلكم بتوقيت ماناساس البلد - فيرجينيا المحطة - أمريكا المحافظة
صاحبي و حبيب قلبي حمادة بيسلم عليكم كتير و هو بيبلغكم شكره العميق وبيستخير حاليا عشان يتقدملها - هو مقتنع أوي بكلامكم و بيقولي يا بختك باصحابك المدونين دولا
وأنا بدوري بقوله دولا مش بس اصحابي - دولا اخواتي كمان
:)
أنا كمان بشكركم كلكم والله على وقوفكم جنبي و تخفيفكم عني - ربنا يخليكم ليا يا رب
طيب نيجي بقا دلوقتي لموضوع البوست ده
طيب - التصويت اللي فات - يالهوييييييييييييي - كان ظريف أوي أوي وبيأكدلي ان الدنيا لسه فيها خير
حبايبي الحلوين اللي صوتو و سمعوني حسهم فيه كانو 16 منهم أنا - وأعوذ بالله من كلمة أنا
من ال 16 دولا كان في 14 ممتازين ربنا يبارك فيهم بيقولو لا مش لازم فرق سن كبير بين الراجل ومراته
وكان في 2 ظراف لطاف بعتز جدا برأيهم - لأن أبويا رأيه من رأيهم - بيقولو لا - لازم يكون في فرق سن كبير وبرضو ربنا يبارك فيهم هما كمان عشان الراي الحر بتاعهم و ماخافوش مني و لا من قاعدة ماناساس العسكرية
حلو قوي و عسل و ميت فل و 16 (أصلي معرفشي 14 أصلها أيه؟) لو حد يعرف يقوللي
نتخانق حبتين في التصويت ده - عشان أنا جايلكم كمان في الكلام
;)
دلوقتي الأغلبية بتقول لازم يكون فرق السن مش كبير عشان التفاهم والنضج والاهتمامات المشتركة و حاجات كده كتير - أنا بقا مقتنع بده جدا جدا و بقول هو ده الأصل حتى لو صح علميا أن الست بتعجز بدري عن الراجل طيب يعني يعمل ايه؟ يرمي نفسه في البحر؟ الجسم هو اللي بيعجز لكن الروح تظل فيها الشباب طالما في الصدر قلب ينبض - ياسيدي عليا
يعني كلام بابا غلط؟ مع احترامي ليك يا بابا و كلامك الصح - كلامك مش عاجبني
أنا لما أتجوز واحدة أصغر مني ب7 سنين على الاقل زي مابتقول يبقى أنا كده بتجوز عيلة في نظري - يعني على الاقل معندهاش خبرتي في الحياة و لا تجاربي و مش حيعجبها رأيي و لا احنا متفقين - واسألو عمرو (هاهاها حبيبي انت يا عمرو) يعني عمرو ده مثلا راح يخطب واحدة و هو عنده 23 وهي عندها 18
كتير من البنات في السن ده عيال - الا من رحم ربي - ده لو اعتبرنا ان في أصلا شباب ناضجين وهما 23 - يللا بقا وروني ضرب النار
المهم عمرو حبيبي راح شارب حتتة مقلب في البت و فسخ الخطوبة بدري بدري
عارفين ايه اللي حصل؟ مفيش حاجة واحدة اتفقو عليها و لا حتى لون العربية اللي حيشتروها - لييييييه؟ عشان هي لسه في أولى كلية و هو من زمان بياكل اللية يعني خلاص اتخرج وبقا موظف و ناقص يقف في طابور الجمعية
يبقى الدنيا ايه؟
طبعا لو حصل توافق تام و حب و رضا و قبول من الطرفين يبقى حتى لو هي 50 وهو 25 حيكون كويس
لكن مش دي الحقيقة و لا الواقع و دي الاستثناء مش القاعدة -معرفوش والله يا بيه هو بتاع القاعدة مش أنا؟ أنت مين يا؟
الواقع بيقول -وخصوصا في زواج الصالونات - أن الطرفين بيكون في بينهم اختلافات كتير و مشاكل اكتر لكن اللي بيساعدهم على التغلب عليها و انهم يمشو حالهم انهم يكونو قريبين في السن و التفكير و حاجات تانية كتير (كانت موضوع حرب و لازالت)
يبقى العمل ايه؟
العمل ان الانسان ينقي شريكة حياته سواء اصغر منه و لا اكبر منه في سن مناسب يعني مش يكون 27 ينقيلي بنت 20 و لا يكون سنه 30 و يدورلي على 22
ده رأيي - واللي مش عاجبه يولع في المدونة بس يسيبني أنا في حالي
هو كله ضرب ضرب مفيش شتيمة؟
أنا حاسس ان البوست ده مشتت شوية بس اعذروني لسه خارج من اجتماع سخيف فورلي دمي عالصبح - المهم انا انا اصلا ضيف شرف فيه و ماليش لازمة لكن نعمل ايه - شغل بقا
أصل انا مبعرفشي أدون غير في الشغل ونادرا لما القريحة بتشتغل في البيت
البوست الجاي قريبا جدا - عشان ده كان زغزغة على الماشي - حيكون مع أول حكاية حب ليا - ودولا ياما - وأوعدكم أنها حكاية حتعجبكم أوي أوي يعني مش بعيد تطير فيها رقبتي - بس ولو - فداكم
يللا بقا سمعوني رأيكم واضربو زي مانتم عايزين وأنا جاهز للتحدي
بيان رقم 2 في سعت 1100
اضرب في المليان و على المتضرر - لو ظل حيا - اللجوء للقضاء العسكري لمدينة ماناساس البلد و على جميع الساكنين خارجها مراعاة فروق التوقيت
والله الموفق
فضفضة:
ناس في الشغل بتكتب وناس في العسل غرقانة
ناس في البيت بتغسل و ناس في المطر جريانة
ناس ليها في البصل و ناس م الكافيار زهقانة

الجمعة، 16 مارس، 2007

مكتئب بس ميسور الحال

السلام عليكم ورحمة الله أنا مش في المووود و متعكنن عشان كده حكتب بالأسود لكن واحد صاحبي بعتلي الأغنية بتاعت كاظم الساهر ميســــور الحـــال هاهاها ده مش أنا لحسن حد يفتكرني بسوق لنفسي على البلوج دي - أنت مين يا؟ كل الفكرة يا جماعة اني سمعتها و حسيت أنها بتبعبر (من كتر العنب نعمل ايه؟) عن اللي في قلبي و قلب كتير من الشباب و يمكن بت روشة بتسمع أغاني و طالعة فيها يصلح حالها أغنية أحسن من ألف واعظ اسم الأغنية: ميسور الحال نوعها: مش بفهم فيها بس أعتقد أقرب إلى الموال كلمات: كاظم السعدي غناء: كاظم الساهر الرابط هنــــــــــــــــــــــــــــــــا أترككم مع الكلمات بقا ما عندي ألماز وقصر لكني ميسور الحال عندي قلب ليرة ذهب وصحتي عال العال ما أوعدج إلا أوفي بموعدي خطوة .. خطوة منا حبنا يبتدي بيت على قد أحلامنا وعيشة على قد الحال تغنينا كلمة من القلب والغنى مو بالمال لأجيب لج خاتم ذهب من الشمس وأجيب لج من القمر ثوب العرس ثيابج تخيطها محلتنا صاف الذهب صافي محبتنا بيت على قد أحلامنا وعيشة على قد الحال تغنينا كلمة من القلب والغنى مو بالمال ذراعي تصير وسادتج أنعم وأحن من الريش بساطنا الحب والوفا شلون ما نريد نعيش الدنيا ببساطتنا نحليها حتى خسارتنا نربح بيها بيت على قد أحلامنا وعيشة على قد الحال تغنينا كلمة من القلب والغنى مو بالمال الراحه مو مال وذهب الراحه راحه البال نتقاسم الخبزه سوى تكفينا سنين طوال

كلام حلو و جميل أوي رد فيا جزء من روحي في انتظار الباقي ان شاء الله

على فكرة صاحبي حمادة حبيبي بيشكركم أوي على نصايحكم و أنا كمان بشكركم ولو اني اخدت منه علقة عشان سيحتله بس ولو كان لازم نسيحله و بيقول يمكن قريب ان شاء الله تسمعو منه أخبار حلوة

مستني ردودكم و اعذروني أني اضايقت قدامكم ملحوظة: موضوع البوست الجاي عن شوية احصاءات ظريفة طرأت في دماغي أعملها أو يمكن أرد على شوية بوستس من بتاعت برايد سلاااااااام فضفضة: ماناساس اليوم كله ضلمة و المطر أسود بلا ألوان ماناساس ضلمة و الحبيب حيران بعيد في الشغل بايت بكتب وأنا زعلان مش عايز أروح أنا - م البيت أنا قرفان

الأربعاء، 14 مارس، 2007

أبوها سواق ميكروباص

سلامو عليكو يا حلوين
ده سلام مربع لاصحابنا الحلوين اللي بينوروني في البلوج بتاعي أو المدونة باللغة العربية الحلوة
ان شاء الله تكونو لسه فاكريني كويس
انا كنت وعدتكم ان المرة دي حتكلم عن نتيجة التصويت (طبعا جابو المطافي و كانت ليلة) لكن لا بما أن التصويت لسه مخلصشي وكان فيه صعوبات تقنية نعتذر عنها عزيز المشاهد
بما أنه يعني مخلصشي ححكيلكم حكاية ظريفة بتاعت واحد صاحبي
أنا مستأذنتوش في الكلام عنها بس مش مهم وانا من امتى مؤدب و بستأذن؟ ها مش عاجبك؟ اطلع برا
الرواية كالآتي
صاحبي حمادة ده ولد ظريف و لطيف (على فكرة مالوش دعوة بحمادة بتاع برايد) عنده كام و عشرين سنة و بيشتغل في شركة ....ات و نفسه يتجوز
المهم صاحبي الحبوب ده كان قاعد مرة على النت (واخ من النت اخ) وبيتفرج على المدونات بتاعت الناس و المنتديات و مش بيفتح مواقع وحشة خااااالص ولا ليه في قلة الأدب (لا صحيح بعرف أجامل) المهم صاحبنا ده - ايوة ما خلاص بقا صاحبنا- لاقيته في يوم بيكلمني على المزنجر و انا في مناساس البلد لسه صاحي من النوم بالليل كده
المهم صباح الخير يا جاري وبتاع وبعدين يا جروم انا عايزك في موضوع؟
خير اللهم اجعله خير؟ قال بيقول انه اتعرف على بنت حلوة و محترمة على النت وبيحبها
قلتله يا حبيبي؟ وماله يبني دوس في الحوار (أنا روش أوي صح؟) و عرفني ايه اللي حيحصل معاك ولو عايز استنى لما انزل مصر واجي معاك نخطبهالك
الواد ياعيني يا ولداه باباه منفضله
المهم قاللي لا معتقدشي انه حينفع؟
ليييييييييييه؟
أصل انا عرفتها من على النت
طيب وماله؟ هي معرفة النت حرام؟ ولا فيها حاجة لا سمح الله؟ يعني هي الصالونات جالنا منها ايه؟
الواد بصلي بصة (عن طريق الويب كام) كأني ارتكبت جريمة
طبعا رحت جاري و طافي الكاميرا و كملت زي العبيط - أهو ده عيبكم يا مصريين (أكني مش مصري) دايما عاملين من الحبة قبة و كل حاجة عندكم عيب و حرام - يبني مش البنت طيبة و محترمة و كويسة؟
آه أوي يبني دي بتنقط عسل
طيب و مالهاش في قلة الأدب و بتتكلم معاك باحترام؟
آه اكيد طبعا انت عبيط؟
طيب وانت بتحبها؟
آه بموت فيها الصراحة
طيب وهي بتحبك؟
آه ده هي حتى اللي قالتلي الأول بعد ما تقابلنا يجي 50 مرة
طيب وأهلها يعرفو الحوار؟
لا عادي يعني ماجتشي مناسبة و هي مش حتقولهم غير لما اتقدم رسمي
طيب ممكن لو عرفو يعملو مشكلة ليها؟
لا دولا نفسهم يجوزوها
طيب انت شفتها وقابلتها في الحقيقة و قعدتو مع بعض؟
آه طبعا بقولك قالتلي بحبك
طيب وكل حاجة فيها عاجباك؟
آه كلها على بعضها كده داخلة دماغي طحن - بحبها يا مان بحبها
حبك برص - طيب وانت معاك فلوس تفتح بيت دلوقتي؟
آه معايا يعني على قدي
طيب وهي ترضى؟
آه رجلها على رجلي و عارفة ظروفي
طيب انت عاجبك مستواها العلمي و شخصيتها؟
آه ذكية جدا و ما شاء الله خريجة فنون
طيب يعني ايه المشكلة دلوقتي كاتك آواه؟
مش عارف انا عرفتها من على النت و بابا وماما مش حيوافقوا عليها وبعدين الناس تقول ايه عليا؟ معرفشي ينقي؟
قلتله طظ فيك و في بابا و ماما (مع احترامي) بس يعني البنت بالمواصفات دي كلها و زي الفل و جميلة وانت بتحبها وكله تمام وهي كمان بتحبك و راضية بظروفك و كله تمام؟ ايه اللي ناقص يا لكعي؟ اخطبها انا بدالك يامان؟
راح الواد ساكت شوية وبعدين قال:انت تعرف انا اعرفها من يجي 3 شهور ولا حاجة
قلتله يااه و كل ده و ساكت
قال ماهو اعمل ايه انا متردد أصل مستواهم يعني مش أوي أصل أبوها بيشتغل ....... يعني و دي شغلانة مش ولا بد
ياااااااااااااااااااااااي
الكلمة دي صدمتني الصراحة
يعني ايه يا بقف انت؟ (معلشي أصل لساني بيطول حبتين لما بتنرفز) يعني ايه؟
قال: أصل أبوها بيشتغل حاجة كده على قده و معاهوش مؤهل
قلتله يا عيب الشوم عليك؟ واسمالله على بابا بتاع انت و لا حتى البابا بتاع انا؟ يعني كانو وارسين و لا قرايب ارسين لوبين؟ ولا حتى معاهم يأكلونا؟ يبني وماله لما يكون أبوها انشالله سواق ميكروباص ايه المشكلة؟ طالما راجل محترم و مربي عياله و اخلاقهم و دينهم كويسين و مش عيب خالص انهم ساكنين في الحتة دي يعني لازم يكونو في متشينة نسر ولا السمالك يعني؟
(أصله ساكن هناك في متشينة نسر)
ورحت بقا داخل فيه شمال و يمين لما قطعته
وخليته في الاخر يفكر في الموضوع تاني و يفكر يتقدملها بجد
لاقيت ليه بقا حديث شيق بيقول ايه
(ومن بطأ به عمله لم يسرع به نسبه)
صدق رسول الله
يعني يا جماعة
(لا فضل لعربي على أعجمي الا بالتقوى)
صدق رسول الله
بس مين يفهم؟
انتم ايه رأيكم دام فضلكم؟ هل انتم معاه في رأيه؟ ولا يتقدم ليها و على بركة الله؟ همتكم معايا عشان المرة الجاية في البوست الجاي العملية حتسخن أوي و حتكلم في الحوارات دي بقلب مفتوح - مش مفضوح يا هواة العكننة
مستني ردودكم و تصبحو على خير بتوقيت ماناساس البلد
سلااااااااااااااااااااااااام عليكم

الاثنين، 12 مارس، 2007

س ن ا ع

ازيكم يا جماعة
جوود أفتر نووون بتوقيت ماناساس البلد
أنا فعلا فخور بالناس اللي كلمتني و ردت عليا والله حسيت ان الدنيا مش سايعاني
طيب ليه النكد بأه و الكلام في الموضوع المنكد بتاع الع... ده؟ لا انا وعدتكم و لازم اوفي بوعدي
الأول اقترح عليكم تقرأو المقالة دي
لأنها حتوفر عليا كلام كتير أوي أوي في أسلوب قصصي ممتع - أيوة أنا ممل و اللي مش عاجبه يطلع برا
المهم لازم ناخد بالنا من حاجات كتير منها:
1 - صعوبة الحصول على عمل بمرتب يكفي الشاب للزواج و بالتالي يكون جاهز في سن متأخر (مشكلة مجتمع)
2- قلة الوعي و الثقافة لدى كثير من البنات في المعايير الصحيحة لاختيار عريس الغفلة (مشكلة تربية و ثقافة)
3- ولما يجي عريس الغفلة قلة الوعي لدى أهلها والطلبات المادية المغالى فيها و البت زي العبيطة قاعدة تتفرج على أبوها يقطع في الواد و يمرمط بيه الأرض و أمها بتقولها يا عبيطة (ماهي وراثة) ده لمصلحتك (صباح الجهل)
4- صعوبة الحصول على مسكن مناسب بأسعار معقولة و طبعا غباء الكثيرين (يعني ماله القانون الجديد؟ لازم تمليك و منظرة؟)
5- الأحلام الوردية الغير واقعية يعني مش لازم تتجوزي سوبر مان ممكن برضو تتجوزي واحد زيي هو صحيح مش سوبر او سوبر نص لبه بس احسن من مفيش
6- مش القاعدة طبعا ان البنت تتجوز ولد اصغر منها و لا نحبذ هذا لكن وماله برضو لو حصل مش عيب و لا حرام وبالعكس نبينا عليه الصلاة و السلام فعلها يعني في قدوة تمام في أن لو هي البنت لاقت عريس لقطة ممكن تضحي حبتين بفرق السن و أهم حاجة السعادة يعني هما لو حبو بعض و عاشو في سعادة حتفرق مين الكبير؟ أما عبط صحيح
7- طيب وحاجة تانية مهمة جدا لما البنت تلاقي عريس كويس و هو مش واخد باله منها يبقى مش عيب خالص انها هي اللي تتقدمله طبعا مش تجيب السيد الوالد وتروح تخطبه؟ لا الصح انها تعمل اي حاجة تراها هي مناسبة و اخطب لبنتك و لا تخطب لابنك و لو أبوها بيفهم و متفتح ميفرطشي فيه و يخطبه لبنته انا ياما جالي عروض جواز من اباء لبناتهم و خيلان لبنات اخواتهم بس انا اللي بقف بعيد عنكم وعيني فارغة و معرفتش كده غير لما طارو العرايس
8- طيب ولما عريس يلاقي بنت كويسة و يتردد و يتردد و يتردد لحد ماتطير عشان هو جبان و معندوش جرأة يبقى العيب فيه لازم
يتقدم و يكون جريء و لو ليه نصيب حيحصل لكن يسبل للبنت سنة و يخطبها واحد في الاخر في سانية
9- خوف البنات و عدم ا لتوكل على الله و بعد الشباب عن الالتزام و المسخرة و الحياة اللاهية العابثة و فجأة يقرر يتجوز طبعا محدش حيجوزه و البنات يعتقدو ان العملية باديهم لا ده نصيب و قدر يعني لا ابوكي و لا اطخن طخين حيقدر يوقف الجوازة دي يا فؤادة لو ربنا أراد تتجوزي عباس فاعتمدي على ربنا مش على فلان و علان
يا اخواني يا اصحابي يا جيراني....
المرة الجاية حتكلم عن نتيجة التصويت - سمعونا بقا الحس العالي
سلاااااااااااااااااااااااااااام

السبت، 10 مارس، 2007

التلاتيــــــن

صباح الخييييييييييييييييييييييييييير

برضو بتوقيت مناساس البلد - فيرجينيا - يو اس ايييييييييييه ها؟ بتقول ايه؟ اطلع برا تاااااااني آل أغير التوقيت آل بقولكم ايه انا مش فاضي للعب العيال ده - توقيت ماناساس البلد يبقى ماناساس البلد و بس واوعى حد يتكلم المهم انا اسف لاخوانا الي مالهومشي ذنب في الدخلة الشمال دي بس اعمل ايه كل شوية ينفرزوني و انا متنرفز خلقة من نفسي دانا حتى و انا صغير كنت مولود بسنان و كل الممرضات و الدكاترة و اخواتي و ماما و بابا وعيلتي كلها يا ما خدو مني عض و دراعاتهم ورمت اه نعمل ايه بس يعني ماجربشي سناني الجديدة؟ يرضيكم؟ برضو ما علينا - النهاردة انا فايق على غير العادة يمكن عشان السبت و أول مرة من زمن طويل اصحى بدري يوم السبت- طبعا بتوقيت ايه؟ ايوة كده شطار الموضوع بتاعي في البوست دي هو التلاتـــــين لا مش التلاتين بتاع فيصل و لا كفر التلاتين اللي مش عارف فين لا مش دولا روحو اقروا مدونة برايد و انت تعرفو تلاتين ايه بس طيب ايه اللي بيخلي المجتمع يطلق هذا اللقب القميء على العانـــ.... كان ولد ولا بنت؟ طبعا انا مش حكمل الكلمة متعمدا لان اولا انا بكره الكلمة دي ثانيا دي بتطلق على الرجالة كمان هي يكثر استعمالها في الاوساط الحريمي بس برضو الرجالة كمان بيقولوها كتير فيما بينهم و لا ايه يا صاحبي؟ اللقب ده حاجة كده متخلفة حعملها بوست لوحديها عشان اتخانق فيها براحتي وانزل ضرب في اللي يرد عليا و أبعت اجيب طقم قباقيب جديدة ماركة شجرة الدر - لكن انا دلوقتي حتكلم على السن بتاع العنـــ اشمعنى بيكون 30؟ التلاتين ده سن جميل جدا - انا واحد من الناس مقتنع جدا ان التلاتين ده سن النضج و الانسان فيه في أوج عطاءه وهو لسه كمان مقارب لمنتصف العمر اللي هو الاربعين و كفر الاربعين و روحو تاني ادرسو جغرافيا الانسان لما بيكون عنده تلاتين سنه و لسه متجوزشي؟ عادي ايه المشكلة؟ المتوسط في سن الجواز في اوروبا و الدول المتخلفة - ماعادا ماناساس البلد محدش يغلط فيها - بيكون حوالي من 30 الى 40 وده طبعا كبير علينا صحيح نسبة اللي بيتجوزوا في هذا السن في بلادنا عالية بعض الشيء (نوع من المواساة) لكن برضو مش أعلى من الدول التعبانة دي - في المقابل بقا لما تيجي تبص على العرب هنا كاتهم نيله في امريكا تلاقيهم بيجوزوا عيالهم بدري من اول مايوصلو سن 22 او 23 سنة خلاص تلاقيهم اتجوزوا - مش مصدقيني؟ طيب انا اعز اصاحبي هنا اللي اتعرفت عليهم كلهم اصغر مني بكام سنة و كلهم ما شاء الله يا متجوزين يا خاطبين وباقي على الحلو تكة طيب ليه في بلادنا - تحيا جمهورية الفراخ و الملوخية - المتوسط في سن الجواز يميل للارتفاع؟ احسن ما يكون واطي وعشان ميتقالشي عليه يا واطي أكيييييييد مش ده السبب - السبب طبعا البنات - وأنا بقولها بكل جرأة البنات يعني مسلا (اه بدأت اخبط في اللغة و مالكشي دعوة يا صبري -> مدرس العربي) البنات لما يكونو من 18 الى 24 يبدأو يتشرطو وهما طول عمرهم اساسا مطلعين عينينا احنا الرجالة (متستنوش كلام احسن من كده مني انا عندي 5 اخوات بنات) وطول النهار خناق و طلبات و دولا لسه مامتك و اخواتك طيب ولما يكبرو بقا ويجيلهم عرسان؟ هاهاها اتفرج على اللي بيحصل و اوعى وشك و احمد ربنا ألف مرة ان انت متقدمتش واتنيلت و حتخطب واحدة زي اختك لما البنت تطلب من الواد الهلفوت (قبل 28 او 29 سنة بيبقى هلفوت خصوصا عند الاباء) كل الطلبات دي وايشي مش عارف ايه و ايشي ايه و كله لسه في الاول وهو على البر قبل ما يغرق طيب الولد المسكين يعمل ايه؟ لو كان من بتوع العواطف و الرومانسية و الهوب و الغراميات اه الهوب و اللي مش عاجبه يطلع برا - لو كان من بتاع الكلام الفاضي ده يبقى غصب عنه حينخ - طيب و لو مش بتاع الكلام ده؟ حينفض للبنت طبعا والنتيجة؟ البنت عمالة تطفش العرسان كل يوم وأبوها عمال يطلع عينيهم و يكشرلهم و يطردهم وأمها عمالة تتريق عليهم و طبعا طنط حشرية كمان بتاخد عمولتها لحد ما احيانا حتى البنت بيتعملها سمعة انها بتطفش العرسان وانا طبعا عبيط و حتقدملها لاني بحب العند أوي هههههه يعني الخلاصة ان سن العنــ بيتحدد بكيف الولد او البنت - في الاخر الموضوع يا جماعة قسمة و نصيب و اللي نصيبه يكون وحيد حبتين من عمره خلاص يرضى و يشكر ربنا و يتفرج على الناس اللي اتجوزو بدري عملو ايه يعني؟ كل يوم خناقات و بتاع دانا حتى اليومين دولا مسلف الكنبة بتاعتي (بتتعمل سرير) لواحد صاحبي متجوز وطبعا كل بنت عارفة كويس ليه كده؟ وكل ولد عارف كويس انه لازم يعمل حساب المستقبل في كنبة ممتازة يعني جاست اين كييييس كيس مين؟ ما علينا - المهم انت او انت اللي بتحدد او بتحددي سن العنوسة - اوبس مين اللي قال الكلمة دي؟ انطق؟ قر واعترف؟ كيش كيش كيش وطاخ طاخ طاخ بريء يا بيه بريء طيب خلاص سماح المرادي بس المرة الجاية كلمتي لن ممكن تنزل الارض ابدا - حنفي - طيب خلاص معلشي لسه صاحي و مفطرتش - الانسان لو اعزف عن الزواج يبقى هو اللي بيحدد السن دي بنفسه يعني هي كل العملية لا تفقد الأمل أبدا و خلي أملك في ربنا كبير و متبطلشي تحاول لو انت بنت مش عيب ابدا انت اللي تدوري على العريس في زمانا الاغبر ده و سيبك من كلام الناس اللي بيتكلمو في كل الاحوال زي مانا بتكلم كده عادي يعني ولو انت ولد يبقى كل بنت ترفضك او اهلها يرفضوك - طبعا هما يطولو؟ يخرب بيت الثقة - خلي الرفض سبب أقوى للتقدم للبنت اللي بعديها يعني اوعى تيأس واعملي اللي عليكي و انت يا ولد اعمل اللي عليك و سيبكم من المجتمع الذي في كل الاحوال لا و لن يرحمكم و لن يترك لكم فرصة تستمتعو بحياتكم أومال انا ايه اللي طفشني برا بلادي؟ كفاية بقا عليكم كده عشان أروح انا افطر طبعا مش من عند عم صبحي بتاع الفول (الله يرحم ايامه) لا انا دلوقتي في بيت خالي و حاكل فول من بتاع مرات خالي (حاسس بيك يا خالي والله) و ........ و يجعله عامر البوست الجاي ان شاء الله عن الكلمة القبيحة - اللي اولها ع و اخرها سين و في النص ان أصلها كلمة مبتنزليش من زور سلاااااااااااااااااااااااااااااااااااام

الجمعة، 9 مارس، 2007

السؤال الأول

"يا أهلا يا أهلا بالشباب الجامد و ماله يا عم ..احنا في بلد ديمقراطي هنا طبعا عندك مافيش ديمقراطية خاااااالص احنا اللي اخترعناها حتى اخطف رجلك لأي معبد تلاقيها مرسومة ع الجدران ايه يعني؟..هو أنا بخاف لأ دانا جدعة قوي ..انت ماتعرفنيش و الميدان بره واسع و فارس لفارس

من غير هزار بأه ألف مبروك يا عم ع البلوج الجديد يجعله عامر و وش الخير عليك و نمشي في فرحك قريب انشاء الله انا هتابع اللي هنا أول بأول..انت ترد عليا و انا كمان ارد عليك ..عادي يعني هو انا ماليش كي بورد أرد بيهاأنا عن نفسي هافضل اكتب بوستات من اللي بتغيظك دي" bride

الي فات كان أول رد من برايد على الايميل بتاعي الذي أعلمها فيه - وانا طبعا متقمص شخصية نابليون - باعلان الحرب على ألمانيا و بسمارك - مالكشي دعوة يا عتريس مدرس التاريخ - بصفتي نابليون العظيم حرب ايه و بتاع ايه انت فهمتيني غلط خالص يا برايد انا انسان بريء و مسالم و بعدين ربنا يجعل كلامي خفيف على الناس ال حرب و بتاع يبنتي انا لو جريت ورايا قطة حستخبى عشان كده انا عريس مناسب للي حتدبحلي القطة

انا كل هدفي أرد على الكام بوست اللي فارسيني أوي دولا لحد ما وشي بقا شوارع من التكشير - الظاهر برضو اني ورثت الموضوع من ابويا بس انا عندي الموضوع مكشر زيادة عن اللزوم كله ##### تقريبا هذا الرقم غير موجود في الخدمة

طيب الكلام على مين دلوقتي؟ عليا طبعا أبتدي المدونة واستفتح بقصة ظريفة أوي لواحد صاحبي طيب وانا رحت فين؟ لا انا في وقت تاني لسه بقا على مالم العالم و أدور على قصصي المبعطرة في السوق تقريبا كده انا نسيتها و كمان عشان أشوفلي طنط كشرية أصدي حشرية بس للاسف تقريبا انا عندي اللي بيقوم بدورها راجل ظريف و دمه خفيف اسمه عم مصطفى و تلك مصيبة أخرى أنا دلوقتي بس مؤقتا حرد شوية ردود سريعة على بوست حلوة للست برايد البوست بتاعتها بعنوان أسئلة مجنناها :)

بس الأول انا معنديش جزمة الحمدلله عشان معنديش ناموسة بتزن ولا تليفون بيرن في وداني السؤال الأول بيقول ليه موضوع السن ده؟ طبعا انت معاكي حق و انا ابصم بالعشرين ان سي السيد في البيت هي الست و ان الراجل ده مقدمة منطقية و كمالة عدد واستهلال لابد منه في تسيير امور البيت و كي يتحول لقب المرأة من آنسة إلى مدام يعني من الاخر البنات اعتقد انهم بيتجوزو مصلحة

فطبعا بقا على الاقل وكنوع من المواساة او التعويض سميه زي ما تسميه بيتفضلو على الراجل و ينعموا بانهم يعملوله فرق سن كويس بينه و بين مراته طب ليه تاني؟ عشان لما يكون بالليل جاي ينام كده و يقعد يفكر زي الديك كده و يتنفخ اه انا الكبير انا القوي ينام مبسوط و في الاخر يصحى من النوم الصبح فايق عشان متضطرش مراته تطششششش اخ بلاش طشششش دي ليها ذكريات مؤلمة

المهم كنا بنقول ايه؟ اه و كمان عشان مينامشي مضايق يطق يموت تصبح مراته بلقب أرملة شفتي الموضوع مهم جدا ازاي للست؟ وطبعا الراجل الغلبان مش فارقة معاه راح و لا جيه و لا حاجة في مملكة المرأة وياما (ودي ليها بوست مخصوص) اتقدمت انا لبنات اكبر مني و الصراحة حسيت ان عادي ماهي متحكمة متحكمة يبقى اكبر مني احسن عشان يبقى اسمها اكبر مني وميجيش واحد من الجيران مالوش لازمة (اكيد قريب حشرية) يدس انفه في شئوني و يقولي مش عيب يا جاري ان مراتك العيلة دي تمشي كلمتها عليك؟ طبعا حيلاقي قبقاب نازل على دماغه و ووو و الباقي انت عارفينه بقا أسامي حيوانات و حشرات بتتطاير في المكان وكله تمام حد قاله يقرب مني؟ انا متجوز حفيدة قاتل النمرود ذاته يبقى لما هي تكون اكبر مني يبقى وفرت البهدلة على جاري العزيز

نخلي بقا الرد على السؤال التاني بتاع التلاتين للبوست الجاي - التلاتين

وتصبحو على خير بتوقيت ماناساس البلد - فيرجينيا - أمريكا

الدخول باليمين فقط

دخلت بالشمال ليه؟ اطلع برا و ادخل تاني باليمين يللا بسرعة

مساء الخيييييييييييييييييييير

أنا مش عارف دلوقتي الساعة كام في مصر و لا في أنحاء العالم العربي؟ عموما اللي حيقرأ البوست دي و هو مش من أهل مساء الخير نقوله صباح الخيييييييييييييييير

بقولك ايه لو مش عاجبك اخرج من المدونة بتاعتي!!!! انا حر

على فكرة كل كلام انا حقوله على لساني بعد كده حيكون بالأخضر (متعرفشي الأخضر؟ زي الجرجير كده - طيب متعرفشي الجرجير؟ طيب الخيار؟ لا انت مشكلتك كبيرة اوي) وأي كلام بتاع أي حد تاني مهما كان - إلا لو كانت العروسة - حيكون بالأسود (زي ايه زي ايه؟ شفت المرسيدس العيون السودا؟ لو متعرفهاش اطلع برا فورا) وبس شوفو انا مش بعرف أرغي كتير و يمكن ناس كتير تستتقل دمي بس انا قلت أرد على البرايد صاحبة البلوج بتاعت عايزة أتجوز أنا في نفسي كلام كتير أوي عايز أقوله في موضوع الجواز ده و زي ماهو من حق البنات يشتكو و يسرخو (زي أختنا برايد) اللي مالية الدنيا شخط و نطر ..... اطمني يا ماما زي ما في بنات بيشتكو انهم لا مؤاخذة على وش انهم يـــ يــ يـــ ـعـ بلاش احسن تضربيني و لا تسلطي عليا شلة بلطجية

المهم زي ما في بنات كده في ولاد كمان خلاص فاتهم القطر و اللي بعده و اللي بعده و اللي بعده كمان لحد اخر محطة (اللي هي يا اما القبر - ربنا يديكم طولة العمر - او بيت العرايس و العرسان - ربنا يديكم طولة العمر مرتين)

والمصيبة ان الولاد دولا مش حيعرفو بعد كده يتأمرو و لا يقعدو زي البنات و يتشرطو و يطلعو عين البنت زي مالبنت بتطلع عين الواد مننا - طيب حد حيسألني انت مالك انت و انت لسه 24 سنة؟ اه انا 24 سنة بس حاولت اخطب و اتجوز من وانا 18 سنة و حاولت كتييييييييير و لسه بحاول (طبعا امال ازاي بعمل البلوج دي دلوقتي؟) طيب انا حرد على برايد أقول ايه؟ انا طبعا مستأذنتهاش في أني أقلدها (عمركم شفتم حد بيستأذن حد قبل مايروح يقلده؟) لكن أنا مش حقلدها بالظبط يعني انا حقول كلام كتير منه اللي رد عليها و على البوستس اللي تغيظ بتاعتها بس ممتعة في نفس الوقت ( آه أنا بتغاظ من البوستس بتاعتك يا برايد ) ومنه اللي ردود من الناس و كل اللي حابب يقول كلمة هنا أو تعليق حخليه أنا بقا ديموقراطي أوي و يحيا جورج بوش (بعدين أقولكم ليه) انا عندي حكايات تكفي 3 بلوج في نفس الوقت و كمان عندي حكايات أصحابي لأني كنت مستودع الأسرار ليهم كلهم وكمان عرض مغري عشان تسيبكم من برايد وتجولي (طبعا محدش يقدر ايه بهرج مالكم كشرتم ليه؟) العرض انه انا افضى شوية من برايد اللي مستنية العريس دي يعني حكتب في البلوج كتير

على الأقل انا مش بدور على عروسة دلوقتي حالا يمكن قريب طيب ونفترض لو جاتلي عروسة من على البلوج دي؟ لا مفتكرشي برايد يجيلها عرسان و ده الطبيعي وهي ترفض أو أبوها ربنا يديه الصحة يعمل الـ 11111 بتوعه هما أحرار لكن أنا كل ماتقدم لبنت أطلع من بيتها عندي على وشي تكشيرة انما ايه و لا وش حمار اندهس باتوبيس بعد ما وقع من المطلع

تكشيرة كلها ^^^^ يعني التمانيات بتاعت ونيس لو فاكرينها وبعدين انا صحيح واثق من نفسي و كل حاجة و زي الفل و تمام و حليوة وأمور و و وو و و و و خلاص عارف انكم زهقتم لكن في نفس الوقت المجتمع بتاعنا اللي الست برايد عايزة تغيره أكتر مني بيحرم على البنت ان هي اللي تبعبر (سورري العنب مأثر عليا دلوقتي) للولد عن مشاعرها أو رغبتها أو على الاقل حد من أهلها يتقدم يخطب الولد من أهله (الموضوع ده بيحصل على فكرة و ياما حصلي) وطبعا انا قعدت اتبغدد و اتدلع و في الاخر طششش صحوني من النوم بأقدم طريقة عرفها الانسان قبل المنبه و اترك لكم طبعا تفسير الباقي و كلمة طشششششش في القاموس اوعو تفتكرو اني حعمل هليلة وبوليكا لا خالص (اسف يا كاريكا) لا لا لا انا كل اللي حعمله اني حشوف برايد بتقول ايه هي و زوار المدونة عندها و ارد عليها و كمان طبعا حتحفكم باللي بيحصل معايا و الطرائف و الظرائف بتاعت التقدم للبنات وكل واحدة هي و اهلها بيعملو فيا ايه و طبعا بشوف كل انواع الارقام الظريفة اللي مخاصمة بعضها زي التمانيات و غيرها و كمان بسمع اصوات غريبة كتير و في مرة من المرات لاقيت اثار جزمة على البدلة من ورا ولحد دلوقتي مش عارف انا قعدت على جزمة حد و انا راجع من بيتها و لا الميكروباص كان زحمة و لا مش عارف (لا لا اكيد مش اللي في بالك)

أنا أكيد كنت حابب انضم لبيت العرايس والعرسان لكن هنا انا حاخد راحتي اكتروكمان البيت ده المفروض يبقى للقصص الي خلصت على خير (يعني بالجواز) سواء كانت رومانسية اوي بالغصب (كفاالله الشر) أو مصلحة (وماله؟) يعني أو اي حاجة تانية المهم مش للي ليا اللي ماشيين يخبطو في الدنيا و يقعو على وشهم ويطلحو من حفرة لدحديرة و من فخ لفخ (أخ)

الظاهر اني طولت - طيب يا جماعة نيكست بوست و عليكم خير سلاااااااااااااااااااااااااااااااااااااااااااااااااااااااااااااام